«И жувли трэбуй тэ кандэл лэ муршэс»

1. Со трэбуй тэ пушэл пэстар и христианка, сави камэл тэ жал миростэ?

ХУЛАЙ пэ вся собрания, када о Иисус Христос. И во драго терэл пэстири дила, важ кода кай во совершэно. Но кала и христианка жал миростэ, лати прижалпэ тэ кандэл найсовершэнонэ манушэс. И када тэ терэл найвушэро. Важ када, кала и христианка витидэл пала кастэ тэ жал, лати трэбуй тэ пушэл пэстар, васо вой патял, кай кадэва мануш авэла лашо хулай андо ери? Можно тэ ԥэнэс, кай и служэния лэ Иеговасти лэстэ по пэрво ҭан андэ жызня? Ай если най, тоди васо вой гиндой, кай посли ябьяв во поможыя, кай латири дружба лэ Иеговаса тэ авэл май лащи. Инке вой трэбуй тэ полэл, саво латэ характеро, и авэла вой лащи хулаи андо ери? Можно тэ ԥэнэс, кай вой на грабий тэ холявэл? Най жадно вой мануш? Лащи латэ дружба лэ Иеговаса? (Эккл. 4:9, 12). Авэла вой бахтали андо ери или най, зависит кодэлэстар, савэ ришэнии вой прилэлас жы каринг о ябьяв.

2. Пала со амэ подаса дума андэ кадэя статья?

² Амэндэ андэ собрания бут сомнакунэ, райканэ ԥэя. И кажно андар лэндэ кандэл пэстирэ хулас. Важ када трэбуй анда вся оди тэ хвалисарас лэн. Амэ лошалэ тэ служысарас кацавэ ԥэянца, савэ на парашэн тэ кандэн лэ Иеговас и пэстирэ хулан. Андэ кадэя статья амэ розласа трин вопросоря. Васо ла хулаятэ можэт тэ авэл ԥаримос андо ери? Васо вой трэбуй тэ кандэл лэ хулас? И сости о хулай и и хулаи моӷут тэ сытён кай о Иисусо, кай и Авигея и ла Мариятар лэ Иосифостиря хулаятар?

ВАСО ЛА ХУЛАЯТИ МОЖЭТ ТЭ АВЭЛ ԤАРИМОС АНДО ЕРИ?

3. Васо нинай кацавэ еря, андэ савэ нинай нисавэ проблемы?

³ О Дэл загиндосардя важ и мануша, кай лэ муршэстэ тэ авэл хулаи, ай ла жувлятэ тэ авэл хулай. Но акана всаворэ мануша найсовершэни (1 Иоан. 1:8). Важ кода андэ Библия ԥэнэнпэ, кай андо ери авэла «ԥаримос» (1 Кор. 7:28). Амэ подаса дума пала дэсавэ проблемы, савэ моӷут тэ авэн кай и хулаи.

4. Васо и хулаи можэт тэ гиндой, кай тэ кандэл пэстирэ хулас, када нэправильно?

⁴ Дэсавэ жувля, через кода, кай лэн кадя барярдэ, гиндон, кай если вонэ кандэна пэстирэ хулас, тоди лэнго алав нисо на ашэл. Ек ԥэй анда США росԥэнэн, кай котэ, кай вой жувэл, и мануша гиндон, кай андо ери лэдуй ӷлавни, и о хулай и и хулаи. Вой ӷанэн, кай о Иегова стодя лэ муршэс тэ авэл хулай андо ери, ай и хулаи трэбуй лэс тэ кандэл, тэ стол пэр лэстэ патив и тэ на заваздэл о шэро. Но лати дэкала ԥарэс када тэ терэл, важ кода кай всаворэ мануша, савэ жувэн круӷом латэ, гиндон па аврятэ.

5. Саво нэправильно гиндо исин кай дэсавэ мурша пала жувля?

⁵ Ай дэкала андо ери о мурш гиндой, кай и жувли май хужэ, чем о мурш. Ек ԥэй, сави жувэл андэ Южно Америка, росԥэнэн, кай лэндэ спэрва хан и мурш, ай потом кати бэшэн тэ хан и жувля. Ай и шаворэ андярэн пэс сар царёря, савэнди трэбуй всаворэ тэ уӷодин и дажэ и дэй. Ай авэр ԥэй анда Азия росԥэнэн, кай лэндэ исин кацави поӷоворка, кай ла жувляти бари годи на трэбуй. Вой трэбуй кати тэ прилэл па цэр, тэ подэл и тэ тавэл. И со вой гиндой, никасти най интересно. И если о хулай тожэ кадя гиндой пала пэстири хулаи, тоди вой на авэла бахтали андо ери. Если о мурш пэс кадя андярэл, тоди во на сытёл лэ Иисусостар и када на чалёл лэ Дэвлэсти (Эф. 5:28, 29; 1 Пет. 3:7).

6. Со трэбуй тэ терэл и хулаи, кай латири дружба лэ Иеговаса тэ авэл май лащи?

⁶ Сар амэ ужэ уӷанглям анда кодэя статья, о Иегова камэл кай о хулай тэ заботийпэ пала ери, кай лэндэ всаворэндэ тэ авэл лащи дружба лэ Иеговаса и тэ авэл вся, со трэбуй важ и жызня, ай кадяжэ, кай лэнди тэ авэл драго по ди (1 Тим. 5:8). Но ла хулаяти тожэ важно, кай вой екжэни кажно дес тэ адиной и Библия и тэ гиндой пала кода, со адиной. Кадяжэ лати трэбуй тэ мангэлпэ лэ Иеговасти. Но латэ можэт тэ на хутилэл пэ вся када время и зор. Важ када лати трэбуй тэ витидэл время пэ када, и када фартэ важно. Васо? Важ кода кай о Иегова камэл, кай кажнонэ манушэстэ тэ авэл пэстири дружба лэса (Деян. 17:27).

7. Со поможыя ла хулаяти тэ терэл кадя, сар ла сытярэл о Иегова?

⁷ Но дэкала ла хулаяти найвушэро тэ терэл кода, со лати приԥэндя о Иегова. Када тэ кандэл пэстирэ найсовершэнонэ хулас. Лати авэла май вушэро тэ кандэл лэ хулас, если вой полэла и принцыпоря анда Библия, савэ сыкавэн, васо вой трэбуй када тэ терэл, и тэ прилэл лэн каринг пэстэ.

ВАСО И ХУЛАИ ТРЭБУЙ ТЭ КАНДЭЛ ЛЭ ХУЛАС?

8. Васо и хулаи трэбуй тэ кандэл лэ хулас, сар ԥэнэнпэ андэ Эфесянам 5:22—24?

⁸ И хулаи кандэл пэстирэ хулас, важ кода кай кадя камэл о Иегова. (Адиносар Эфесянам 5:22—24.) Вой патял пэстирэ Дэвлэсти лэ Иеговасти. Вой ӷанэн, кай вся, со во терэл, када важ кода кай во любий ла. И вся, со во ԥэнэн лати тэ терэл, када анэна лати кати о лашимос (Втор. 6:24; 1 Иоан. 5:3).

9. Саво лашимос авэла андо ери, если и хулаи кандэл лэ хулас?

⁹ Андэ амари время о миро ԥэнэн, кай и жувли на трэбуй тэ кандэл лэ хулас, важ кода кай вой най хужэ лэстар. Но кодэва миро на ӷанэн лэ Иеговас, кай во любящё. И жувля, савэ кандэн лэс, важ лэстэ сар щея. Важ кода во никала на диноп кацаво законо, савэстар лэнди авелоп най драго по ди. И хулаи, сави полэл када, анда вся оди старыийпэ тэ уӷодий лэ Иеговасти, и тоди андэ лако ери авэла мирно и порядко (Пс. 119:165). Кадэлэстар авэла драго лати, латирэ хуласти и латирэ бэятонэнди.

10. Сости амэ можэм тэ сытювас кадэла ԥьятар?

¹⁰ Кала и хулаи кандэл пэстирэ хулас, кадэлэса вой сыкавэл, кай любий и стол патив по Иегова, саво дя кадэва законо, ко кас трэбуй тэ кандэл. И ԥэй, сави жувэл андэ Южно Америка росԥэнэн, кай вой полэл, кай лако хулай лэла тэ терэл варисо най кадя. Но кода, сар вой пэс андярэла, сыкавэла пэ скати лати куч и дружба лэ Иеговаса. Важ када, вой старыийпэ вся и время тэ стол патив пэр лэстэ. Вой кадя пэс андярэл, важ кода кай камэл тэ радуий лэ Иеговас.

11. Со поможый ла ԥьяти тэ простий пэстирэ хулас, и сости амэ можэм латар тэ сытювас?

¹¹ И хулаи можэт тэ гиндой, кай о хулай на стол патив пэр латэ и на шол сама, со латэ по ди. Тоди лати можэт тэ авэл ԥарэс тэ кандэл лэс. Кацаво сас ла ԥьяса, савя ақарэн Анис. Вой росԥэнэн, со лати поможый. Вой сэрэл, кай всаворэ мануша терэн ошыбки и старыийпэ тэ на холявэл пэ авэр. И вой полэл, кай о Иегова простий анда вся оди, и вой камэл тэ терэл кадяжэ. Када поможый, кай латэ тэ авэл по ди мирно и спокойно (Пс. 86:5). И ла хулаяти, сави простий пэстирэ хулас, май вушэро лэс тэ кандэл.

СОСТИ АМЭ СЫТЮВАС ЛЭ МАНУШЭНДАР, ПАЛА САВЭ ПИСТРОМЭ АНДЭ БИБЛИЯ?

12. Пала савэ мануша амэ щяс подаса дума?

¹² Дэсавэ мануша гиндон, кай тэ кандэн аврэн моӷут кати и слаби мануша. Но када най кадя. Андэ Библия росԥэнэнпэ пала бут мануша, савэ на сас слаби, но савэ кандэнас аврэн. Када сас о Иисусо, и Авигея и и Мария, лэ Иисусостири дэй. Уӷанаса, сости амэ можэм лэндар тэ сытювас.

13. Васо о Иисусо кандэл лэ Иеговас? Росԥэнэн.

¹³ О Иисусо кандэлас лэ Иеговас най важ кода, кай во варисо на ӷанэн или на полэл. Андэ кода, сар о Иисусо сытярэлас аврэ манушэн, дицолас, кай во сас фартэ годявэрно (Иоан. 7:45, 46). О Иегова цэнияс, кай лэско Шаво драго ӷанэн вся тэ терэл, и важ када о Иисусо поможыяс лэ Иеговасти, кала во создавал и ԥув (Прит. 8:30; Евр. 1:2—4). Посли кода, сар о Иисусо рисайля каринг и жызня, о Иегова стодя лэс хуласа «па вся нэбо и па вся ԥув» (Матф. 28:18). Но всаек о Иисусо вся и время пушэл совето лэ Иеговастар. Васо? Важ кода кай во любий пэстирэ Дадэс (Иоан. 14:31).

14. а) Сости о хулай можэт тэ сытёл кай о Иегова? б) И сости во сытёл анда кода, со запистромэ андэ Притчи 31 ӷлава?

¹⁴ Сости можэт тэ сытёл о хулай? О Иегова ԥэндя, кай и жувля тэ кандэн пэстирэ хулан най важ кода, кай вонэ май хужэ лэндар. Во дажэ стердя кадя, кай машкар кодэла, ко лэна тэ правин лэ Иисусоса по нэбо, авэна и жувля (Гал. 3:26—29). Инке о Иегова фартэ патял пэстирэ Шавэсти, важ када во лэсти дя власть. Кадяжэ можэт тэ терэл и о мудро хулай. Во можэт тожэ тэ дэл дэсави власть андо ери пэстиря хулаяти. Андэ Библия пистромэ, кай и хулаицко манушни можэт тэ диқэл пала хабэ, тэ тинэн и тэ битинэн лэс и ӷанэн, сар тэ затерэл и ловэ. (Адиносар Притчи 31:15, 16, 18.) О хулай нащи тэ гиндой, кай лэстири хулаи, сар служанка, и латэ ни пэр со нинай право. Во трэбуй тэ патял лати и тэ приашундёл каринг латэ. (Адиносар Притчи 31:11, 26, 27.) Тоди вой лэс лэла тэ кандэл анда вся оди.

15. Сости можэт тэ сытёл и хулаи кай о Иисусо?

¹⁵ Сости можэт тэ сытёл и хулаи? Хоть о Иисусо стердя бари дила, во всаек кандэлас лэ Иеговас. Во на гиндояс, кай кадэлэса во тэлярэл пэс (1 Кор. 15:28; Флп. 2:5, 6). И хулаи тожэ можэт тэ сытёл кай о Иисусо. Хоть вой кандэл лэ хулас, вой на гиндой, кай кадэлэса вой хужэ лэстар. Вой кандэл пэстирэ хулас най кати важ кода кай любий лэс, ай важ кода кай любий лэ Иеговас, и када само ӷлавно.

16. Со трэбуй сас тэ стерэл и Авигея, сар запистромэ андэ 1 Самуила 25:3, 23—28? (Диқэн и картинка пэ обложка.)

¹⁶ Ла Авигеятэ сас ӷордо и най блаӷодарно хулай, саво кати гиндояс пала пэстэ. Лэс ақарэнас Навало. Но вой всаек на розжыляпэ лэса. И дажэ тоди, кала о Давид камэлас лэс тэ умарэл, вой стердя вся, кай тэ фэрий пэстирэ хулас. Кати погиндон, скати трэбуй сас тэ авэл смилость кай и Авигея, кай тэ жал тэ подэл дума лэ Давидоса и инке лэса сас 400 воиноря. Вой дажэ ля пэр пэстэ и дош пэстирэ хуласти. (Адиносар 1 Самуила 25:3, 23—28.) Вся обжыляпэ драго. О Давид поля, кай о Иегова бишалдя кадэла жувля, кай во тэ на стерэл бэзэх.

17. Сости о хулай можэт тэ сытёл анда кода, сар о Давид андярдя пэс ла Авигеяса?

¹⁷ Сости можэт тэ сытёл о хулай? И Авигея сас годявэрни манушни, и драго, кай о Давид приашунделя каринг латирэ алава, на стердя бэзэх и на умардя кодэлэ манушэн. Кадяжэ и о хулай, если лэла тэ приашундёл каринг пэстири хулаи, када поможыя лэсти тэ прилэл лащи ришэния.

18. Сости и хулаи можэт тэ сытёл кай и Авигея?

¹⁸ Сости можэт тэ сытёл и хулаи? И хулаи, сави любий лэ Иеговас и стол патив пэ лэстирэ законоря, терэл лашимос важ пэско ери, дажэ если лако хулай на служый лэ Дэвлэсти или лэстири дружба лэ Иеговаса ашэля най кацави дэ лащи сар сас. Вой, сар и Авигея, на родэл варисо, кай лижбы тэ ужал пэстирэ хуластар. Вой стол патив пэ пэско хулай, кандэл лэс и камэл тэ терэл вся, кай во тэ лэл тэ служый лэ Иеговасти (1 Пет. 3:1, 2). Дажэ если о хулай на шол сама, со вой терэл важ о ери, вой ӷанэн, кай о Иегова цэний кода, кай вой на парашэл лэс тэ кандэл.

19. Кала и хулаи можэт тэ на кандэл пэстирэ хулас?

¹⁹ Но со, если о хулай, саво на служый лэ Иеговасти, мангэл пэстиря хулая тэ стерэл кода, со холярэла лэ Дэвлэс? Во можэт тэ ԥэнэн лати тэ жал тэ дилярэл или тэ чорэл. Тоди вой можэт тэ на кандэл лэс. Вой ӷанэн, кай, сар христианка, спэрва вой трэбуй тэ кандэл лэ Иеговас. И дажэ, кала лако хулай мангэла тэ терэл кадя, сар на чалёл лэ Дэвлэсти, вой ворта, но ковлэс ԥэнэна лэсти, кай вой на лэла када тэ терэл (Деян. 5:29).

20. Катар амэ ӷанас, кай ла Мариятэ сас лащи дружба лэ Иеговаса?

²⁰ Ла Мариятэ сас лащи дружба лэ Иеговаса. Кала вой дэлас дума ла Елизаветаса, савяко шаво сас о Иоанно Крестителё, вой андэ пэстири дума 20 раз ԥэндя и алава анда Свынто Писания (Луки 1:46—55). Кадяжэ шон сама, кала и Мария сас просватано пала Иосифо, о анӷело дя дума най лэса, ай ласа, и ԥэндя, кай латэ арақадёла шаво (Луки 1:26—33). О Иегова ӷанэнас, кай вой любия и лэла тэ заботийпэ пала лэско Шаво. И дажэ кала о Иисусо муля, ай потом рисайля каринг и жызня и жыля по нэбо, кай и Мария всаек сас лащи дружба лэ Иеговаса (Деян. 1:14).

21. Со можэт тэ полэл о хулай анда кода, со запистромэ андэ Библия пала Мария?

²¹ Сости можэт тэ сытёл о хулай? О мудро хулай на лэла тэ холявэл, если лэстири хулаи май бут ӷанэн анда Библия. Во наоборот лошавэл кадэлэсти. Во полэл, кай если и хулаи драго ӷанэн и Библия и полэл и принцыпоря андар латэ, када можэт тэ авэл бари помощь важ о ери. Но дажэ если о хулай полэл, кай лэстири хулаи май ӷрамотно лэстар, во всаек полэл, кай и семейно изучения трэбуй тэ проандярэл во, важ кода кай о Иегова дя лэсти кадэя дила. Кадя во поможый, кай о ери тэ служый лэ Иеговасти (Эф. 6:4).

22. Сости и хулаи можэт тэ сытёл кай и Мария?

²² Сости можэт тэ сытёл и хулаи? Вой полэл, кай о Иегова стодя лэ хулас, кай во тэ диқэл, кай лэ ерестэ тэ авэл лащи дружба лэ Иеговаса. Но инке вой трэбуй екжэни тэ диқэл пала пэстири дружба лэ Иеговаса (Гал. 6:5). Вой трэбуй тэ виарақэл время, кай тэ проандярэл лично изучения па Библия, и тэ гиндой пала кода, со адиной. Када вся поможыя лати инке май фартэ тэ любий лэ Иеговас и тэ стол патив пэ лэско законо. Кадяжэ када поможыя лати анда вся оди тэ кандэл пэстирэ хулас.

23. Если и жувли кандэл пэстирэ хулас, саво када лашимос анэн лати, латирэ ерести и андэ собрания?

²³ И хулаи, сави кандэл пэстирэ хулас, важ кода кай любий лэ Иеговас, авэла май лошали и май бахтали андо ери, чем кодэя, сави на кандэл пэстирэ хулас. Кацавэ ԥэяндар моӷут тэ сытён и и тэрнэ ԥэя и ԥрала. Ай кадяжэ кадэлэстар авэла драго най кати андэ лэнго ери, авэла драго и андэ собрания (Титу 2:3—5). И хоть лэ жувлян май бут андэ собрания, амэ всаворэ куч важ о Иегова, и нэ важно када мурш чи жувли (Пс. 68:11). Андэ авэр статья амэ подаса дума, со кажно андар мэндэ можэт тэ терэл важ и собрания.