О Иегова стердя, кай мэрни жызня тэ авэл бахтали

И РОДИТЕЛЯ ПОМОЖЫН МАНДИ ТЭ ЖАВ ПА ЛЭ ИЕГОВАСКО ДРОМ

Мэрнэ родителя уӷанглэ лэ Иеговас андо 1920 бэрш, инке тоди, сар на жэнисайлэ. Потом вонэ пожэнисайлэ, и лэндэ арақаделэмпэ мэ андо 1939 бэрш. Жувасас амэ андэ Англия. Жы бэятостар мэ ԥиравас лэ дадэса и ла даса пэ собрания. Ай потом мэ запистросайлэм пэ Школа теократического служэния. Сар щяс сэрав кодэва дес, кала манди пэрво разо динэ задания. Мэ заӷульдэм по ящико пэ сцэна, кай через о микрофоно тэ додиқав лэ ԥралэн и лэ ԥэян, савэ ман ашунэнас. Манди сас кати 6 бэрш и мэ фартэ пэрэжывал, кала диқавас андо зало, кай бэшэнас ек и взросли.

Мэрно дад пистрояс важ мандэ пэ карточка прости алава, сар тэ залав дума лэ манушэнца андэ служэния. Кала манди сас 8 бэрш, мэ пэрво разо андэ служэния поджылэм каринг и двэри екжэно. О хулай лэ цэрэско проадиносардя кодэя карточка, сави мэ лэсти сыкадэм, и закамля тэ лэл и книӷа «Бог верен». Мэ сымас кадя лошало, кай сразу прастаем кай мэрно дад тэ росԥэнав пала када, ай во сас пэ кадэя жэ вулица и росԥэнэнас пала Дэл. И служэния лэ Иеговасти и собрания анэнас манди радость, и важ када мэ закамлэм тэ служысарав лэ Иеговасти полновременно.

Мэ инке май фартэ лэм тэ любисарав о чачимос анда Библия, посли кода, сар мэрно дад випистросардя, кай манди тэ авэн нэвэ журналоря «Сторожэво башня». И сар кати вонэ авэнас, мэ лэн сразу проадиносаравас. Кадя мэ лавас май фартэ тэ патяв лэ Иеговасти и важ када закамлэм тэ дав алав тэ жував важ лэстэ.

Андо 1950 бэрш амаро ери лагля андо Нью-Йорко по канӷрэсо. Во назывался «Рост теократии». Мэ идоси сэрав, со сас 3 августа. Сас четверӷо и и тема сас «Миссионерский день». О ԥрал Кэри Барберо, саво потом служыяс андо Руководящё совето, росԥэндя речь важ кодэла, ко болдёл. В концэ речи во задя дуй вопросоря кодэлэнди, ко камэл тэ болдёл. Мэ ущелэм и ԥэндэм: «Да!». Манди сас кати 11 бэрш. Мэ полавас пэ скати дэ важно шаго мэ терав. Но мэ фартэ даравас лэ паестар, важ кода кай инке на ӷанавас тэ плавуисарав. Мэрно како подындярдя ман каринг о бассейно и ԥэндя, кай манди най состар тэ дарав. И чаче, прожыля вся кадя ӥто, кай мэрнэ пэрнэ дажэ нэ успели тэ лэнпэ каринг о дно. Ман пэрэдинэ ек аврэсти пэ вас, ек ԥрал ман болдя, ай авэр виля ман анда бассейно. Кодэлэ десэстар о Иегова вся и время андэ мэрни жызня, и мэ сым бахтало мануш.

СЫКАВАВ ДИЛАСА, КАЙ ПАТЯВ ЛЭ ИЕГОВАСТИ

Посли школа мэ закамлэм тэ авав пианеро. Но и учителёря линэ манди тэ ԥэнэн, кай мэ тэ жав тэ сытював андо университето. Мэ приашунделэм каринг лэндэ, но мэ нэ моӷ и драго тэ сытював андо университето, и кай мэрни дружба лэ Иеговаса тэ авэл лащи. Тоди мэ полэм, кай трэбуй тэ ужав анда университето. Мэ пистросардэм письмо лэ учителёнэнди и пативалэс росԥэндэм, кай мэ будэр на лава лэндэ тэ сытював. Посли када мэ лэм тэ служысарав пианероса. Кадя мэ пэ дила сыкадэм, кай патяв лэ Иеговасти.

Мэ лэм тэ служысарав пианероса андо 1957 бэрш андо июлё андо форо Уэллингборо. Мэ манглэм лэ ԥралэн анда Вефилё анда Лондоно, кай тэ подԥэнэн манди, савэ ԥралэса мэ моӷу тэ служысарав, кай тэ сытював лэстар май драго тэ росԥэнав важ о Дэл. Мэ лэм тэ служысарав лэ ԥралэса, савэс ақарэнас Берт Вейзи. Лэстэ ԥаболас оди андэ служэния лэ Иеговасти, и во поможысардя манди тэ стерав лашо ӷрафико важ и служэния. Амэ ԥирасас андэ собрания, андэ сави сас шов ԥэя, савэ андэ бэршэндэ, и мэ лэ ԥралэса. Важ када мэ драго ӷотовился каринг кажно собрания и часто ԥэнавас речи. Када поможысардя манди инке май фартэ тэ патяв лэ Иеговасти и тэ росԥэнав важ лэстэ аврэнди.

Прожыля набут время и ман бэшардэ андо бар най пэ долӷонэстэ, важ кода кай мэ отԥэнделэм тэ служысарав андэ халавдэ. Посли кода, сар ман одмэклэ, мэ уӷанглэм ла ԥья, сави служыяс сар спецыально пианеро. Ла ақарэнас Барбара. Андо 1959 бэрш амэ пожэнисайлям. И амэ ԥэндям, кай ласа тэ служысарас андэ любо ҭан, андэ саво амэн тэ на бишалдоп. Спэрва амэн бишалдэ андо Ланкаширо, саво сас андэ Англия, ай потом андо январё андо 1961 бэрш, ман ақардэ пэ шонэстэ андо лондонско Вефилё, кай тэ сытював андэ Школа священного служэния. Но потом ман стодэ тэ служысарав сар раёно надзирателё, мэ фартэ удивисайлэм. Дуй курте мэ проандярдэм андо форо Бирмингемо, и ман котэ сытярэлас ек раёно надзирателё, саво ужэ най ек бэрш служыяс. И кадэва разо манца сас мэрни хулаи и Барбара. Посли када амэн бишалдэ тэ служысарас андо Ланкаширо и Чеширо.

НИНАЙ НИСО МАЙ ФЭДЭР, ЧЕМ ТЭ ПАТЯС ЛЭ ИЕГОВАСТИ

Андо августо андо 1962 бэрш, кала амэ самас андо отпуско, амэнди авеля письмо анда филиало. Андо письмо амэнди бишалдэ заявления и ақардэ тэ сытювас андэ Школа Галаад! Амэ манглямпэ мэрня хулаяса, пистросардям и заявления и сразу одбишалдям о письмо андо филиало, сар и манглэ и ԥрала. Через панч шон амэ лаглям андо Бруклино, кай тэ сытювас андэ Школа Галаад, сави прожалас дэш шона. И када сас 38 класо.

Андэ Школа Галаад амэ бут сости сытелям. Амэ полям май драго и Библия, уӷанглям пала лэ Иеговастири арӷанизацыя, ай кадяжэ уӷанглям бут со пала ԥрала и ԥэя па вся и люма. Амэнди инке на сас дажэ и 25 бэрш, но амэ бут сости сытелям кай и ԥрала и ԥэя, савэ амэнца вмести сытёнас. Кадяжэ манди випэля бах тэ терав дила лэ ԥралэса, савэс ақарэнас Фредо Раско. Во манди дясас лашо совето, кай если мэ варикасти варисо подԥэнав, тэ терав када кати па Библия. Инке пэ кодэя школа, амэн сытярэнас кацавэ ԥрала, сар о Нейтано Норро, о Фредерико Френцо и о Карло Клейно. Кадяжэ мэ бут сости сытелэм кай о ԥрал Александро Макмиллано, саво сас най ӷордо. Пэ школа во амэнди росԥэндя, сар о Иегова поможыяс пэстирэ народости лэ 1914 бэршэстар жы кай о 1919 бэрш.

СЛУЖЫСАРАС АНДЭ НЭВИ СТРАНА

Ашэляпэ набут, кай тэ досытювас андэ кадэя школа, и тоди о ԥрал Норро ԥэндя, кай мэ и и Барбара ладаса тэ служысарас андэ Бурунди андэ Африка. Амэ май ӥто прастаям андэ вефильско библиатека, кай тэ диқас о ежэӷоднико и тэ уӷанас, саво отчёто исин пала кадэя страна. Но котэ амэ нисо на виарақлям, важ кода кай котэ нико никала на служысардя. И амэ полям, кай амэ дажэ нисо и на ӷанас пала кадэя страна. Амэ фартэ запэрэжывали! Но кала амэ манглямпэ лэ Иеговасти, амэнди ашэля май спокойно по ди.

Андэ Бурунди амэ самас най сыклэ каринг и поӷода, каринг кода, сар котэ жувэл о миро. Кадяжэ амэнди прижыляпэ тэ сытювас и француско шыб. Через дуй дес амэндэ залагля амаро друӷо, саво сытёлас амэнца андэ ек класо андэ Школа Галаад. Лэс ақарэнас Харри Арнотт. Во ладэлас андэ Замбия, котэ во служыяс мисианероса. И во поможысардя амэнди тэ виарақас пэсти цэр. И катутнэ власти на ӷанэнас пала амари арӷанизацыя, и важ када линэ амэн тэ вэрыцын. Амэ кати лям тэ лошавас кодэлэсти, кай и служэния ля драго тэ жал, сар амэнди и власти ԥэндэ, кай амэ трэбуй тэ уладас анда кадэя страна, если амэндэ на авэла лил, па саво амэ можэм тэ терас бути андэ кадэя страна. И сар ԥарэс амэнди тэ на авэл тэ уладас, важ кода кай амэ кати присытелям каринг кадэя страна, амэ всаек пэрэлаглям андэ авэр страна, андэ Уганда.

Амэ пэрэжывали сар ладаса андэ страна Уганда, важ кода кай амэндэ на сас виза. Но ек ԥрал, саво пэрэлагля анда Канада, кай тэ служый андэ Уганда, поджыля и подя дума пала амэндэ лэ манушэса, саво тердёлас пэ ӷраница, и амэнди динэ розришэния, кай амэ тэ ашаспэ пэ дэсавэ шона андэ кадэя страна, пока на стераса пэсти и лила. И амэндэ вся вижыля. Тоди амэ полям, кай о Иегова амэн на ашадя.

Андэ Уганда вся сас па аврятэ. Андэ кадэя страна ужэ служынас лэ Иеговастирэ свидетеля, но па вся страна лэн сас кати 28 мануша. Котэ андэ служэния амэнди попэрдёнас бут мануша, савэ дэнас дума пэ английско шыб. Но кай вонэ тэ уӷанэн май драго лэ Иеговас, амэнди трэбуй сас тэ висытювас и шыб, пэ сави дэн дума кадэла катутнэ мануша. Амэ лям тэ служысарас андо форо Кампала и най дур паша лэстэ. Котэ май часто дэнас дума пэ шыб луганда и амэ закамлям тэ сытювас именно кадэя шыб. Пока амэ лям драго тэ дас дума пэ кадэя шыб, прожылэ бэрша. Но скати лашимос амэнди када андя андэ служэния! Акана амэ май драго поласас, сар тэ поможысарас кодэлэнди, каса амэ изучали и Библия, кай лэндэ тэ авэл май лащи дружба лэ Иеговаса. Вонэ лэнас тэ патян амэнди и росԥэнэнас вся, со лэндэ по ди.

ЕЗДИСАРАС ПА АВЭР СТРАНЫ

Амэ самас фартэ лошалэ тэ поможысарас лэ манушэнди тэ уӷанэн о чачимос анда Библия. Но инке май лошалэ самас, кала амэн манглэ, кай амэ тэ авас андэ разъездно служэния. Амэ лям тэ росԥэнас важ о Дэл па вся страна. И ԥрала анда филиало андэ Кения бишалдэ амэн тэ розуӷанас кацавэ ҭана, кай можно авелоп, кай и спецыальни пианероря тэ служын котэ, и када тэ анэн май бут лашимос андэ служэния. И котэ бут мануша, савэ совсем на ӷанэнас лэ Иеговастирэ свидетелёнэн, прилэнас амэн роздраго и дажэ гитонас важ амэндэ варисо лашо тэ хас!

Потом амэ улаглям андэ авэр ҭан. Анда Кампала мэ дуй дес ладавас по поездо андо Момбасо, ай котар по кораблё мэ лаглэм пэ островоря Сейшелы андо Индийско океано. Лэ 1965 бэршэстар жы кай 1972 бэрш мэ ла хулаяса инке най еқвар сымас пэ Сейшелы. Котэ сас кати дуй вазвещятеля, потом ашэля ӷруппа, ай потом райкани собрания. Кадяжэ, кала мэ ездисаравас, мэ диқаваспэ и аврэ ԥралэнца анда Судано, Эритрея и Эфиопия.

Андэ Уганда и военни мануша захутилдэ и власть, и вся паруделя андэ страна. Андэ кодэя ԥари время мэ полэм, пэ скати дэ мудри сас лэ Иисусостирэ алава, савэ во ԥэндя: «Отдэн лэ цэзарёско лэ цэзарёсти» (Мар. 12:17). И мануша, савэ жувэнас андэ кодэя страна, манглэ, кай, ко чужо и ко жувэл андэ кадэя страна, трэбуй сас тэ запистронпэ андэ ваздии. Амэ сразу кадя и стердям. И сас маменто, кала амэ ладасас па форо лэ ԥралэса, саво сас мисианеро, амэн тердярдэ и рая и ԥэндэ, кай амэ шпионоря, и андярдэ амэн андэ бари ваздии. Амэ ԥэндям, кай амэ спокойни и мирни мануша, и амэ просто росԥэнас пала Дэл. Но амэн нико на камэлас тэ ашунэн. Вонэ всаек амэн андярдэ андэ ваздии. И именно кордэ андярдэ, кай амэ ужэ запистросайлям. Амэ самас фартэ лошалэ, кала андэ кадэя ваздии о дежурно рай ӷатярдя амэн и приԥэндя тэ одмэкэн!

Андэ кодэя время амэ фартэ пэрэжывали, кала подладасас каринг о посто, важ кода кай и рая вся и время сас котэ матэ. Амэ мангасаспэ лэ Дэвлэсти англа кажно посто. И кала амэн промэкэнас, амэнди тоди сразу ашэлас май вушэро, ԥэнэса, бар па ди спэля. Но всаек андо 1973 бэрш и мануша, кастэ исин власть, приԥэндэ кодэлэнди, ко анда авэр страна и ко росԥэнэн пала Дэл тэ уладэн анда страна Уганда.

Амэ упалэ пэрэлаглям андэ авэр страна, андо Кот-д’Ивуаро. Котэ амэнди прижылясаспэ упалэ тэ присытювас каринг и нэви культура. Амэнди трэбуй сас упалэ тэ дас дума пэ француско шыб и тэ сытювас тэ жувас аврэ мисианеронэнца анда авэр страны. Но андэ вся када амэ диқлям лэ Иеговаско вас. Андэ служэния бут миро, саво сас най ӷордо, драго ашунэлас пала Дэл. Амэ патясас лэ Иеговасти, и во стердя амари жызня бахтали.

УПАЛЭ ВСЯ ПАРУДЁЛПЭ

Кай и Барбара виарақлэ найлашо насвалимос. Амэ ездисарасас тэ личисавас андэ авэр страна, но андо 1983 бэрш амэ полям, кай будэр нэ сможэм тэ ашэспэ андэ Африка. Сар жэ амэнди кадэлэстар сас ԥарэс!

Амэ лям тэ служысарас андо Вефилё андо Лондоно. Но мэрня хулаяти сас хужэ и хужэ. Лако насвалимос на прожыля, и вой муля. Ман фартэ подритярэнас всаворэ ԥрала и ԥэя андо Вефилё. Но май фартэ ман подритярдя ек ери. Вонэ поможысардэ манди тэ пэрэжував кадэя ԥари время и поможысардэ манди тэ на парашав тэ патяв лэ Иеговасти. Потом мэ уӷанглэм ла ԥья, савя ақарэн Энн. Вой служыяс сар спецыально пианеро. Ай акана вой авеля тэ поможый андо филиало. Латэ сас лащи дружба лэ Иеговаса, и вой лэс фартэ любияс. Амэ ласа пожэнисайлям андо 1989 бэрш, и акана амэ ласа служысарас андо Вефилё.

Лэ 1995 бэршэстар жы кай о 2018 бэрш мэ сымас, сар тоди ԥэнэнас, зонально надзирателё. Ԥрала анда ӷлавно управления бишалэнас ман тэ пэрэдав, со вонэ ԥэнэн, лэ ԥралэнди андэ авэр страны. Мэ сымас варикай андэ 60 страны и пэстирэ яқэнца диқавас, сар о Иегова блаӷословияс пэстирэ служытелёнэн андэ любо ԥаримос.

Андо 2017 бэрш, кала мэ сымас андо Вефилё, мэ упалэ лаглэм андэ Африка. Мэ сымас лошало, кай и Энн тожэ тэ диқэл, скати мануша уӷанглэ о чачимос анда Библия андэ кадэя страна. Акана пэ кодэя вулица, пэ сави мэ варикала росԥэнавас пала Дэл андо 1964 бэрш, тердёл райкано филиало, анда саво и ԥрала диқэн май бут чем пала 15 тысяч вазвещятеля.

Манди динэ списко, андэ савэ страны мэ трэбуй тэ авав андо 2018 бэрш. Мэ сымас фартэ лошало, кала додиқлэм андо списко и страна Кот-д’Ивуар. Кала амэ авелям андо Абиджано, андо само баро форо андэ кадэя страна, мандэ сас по ди, ԥэнэса, мэ цэрэ рисайлэм. Котэ андо Вефилё сас списко, сар справочнико, кай сас запистромэ и телефони номеря лэ ԥралэндирэ, савэ котэ терэнас бути. Мэ виарақлэм алав еқэ ԥралэско и па кода, сар лэс ақарэнас, погиндосардэм, кай када кодэва ԥрал, саво сас надзирателё андо форо Абиджано. Но када сас най во, ай лэско шаво.

Посли вся када мэ полэм, кай о Иегова стерэла кода, пала со дя алав. Андэ мэрни жызня сас бут ԥаримос, через саво мэ диқлэм, кай если о мануш патял лэ Иеговасти, о Иегова стерэла, кай лэстири жызня тэ авэл бахтали. Мэ всаворэ одеса камав тэ на парашав тэ жав па лэ Дэвлэско дром, саво андярэл каринг и вечно жызня андо раё пэ ԥув (Пр. 4:18).