На параш тэ цэнис о выкупо!

1, 2. Со када выкупо, и васо во амэнди трэбуй?

КАЛА о Адамо сас совершэно, во стердя бэзэх и хасардя и возможность, тэ жувэл вечно во и лэстирэ потомкоря. О Адамо нарошно жыля против о Дэл и важ када муля. Ай со можно тэ ԥэнас пала лэстирэ бэяцэ? Вонэ ни андэр со найдошалэ, и вонэ на стердэ бэзэх (Рим. 5:12, 14). Но ко лэн моӷ тэ спасый? Посли кода сар о Адамо стердя бэзэх, о Иегова ля по набут тэ росԥэнэн, сар спасыя бутэ лэ Адамостирэ потомконэн лэ бэзэхэстар и ла смэртятар (Быт. 3:15). О Иегова стодя время, кала бишалэла пэстирэ Шавэс па нэбо пэ ԥув, кай во тэ отдэл пэстири жызня, сар выкупо важ бут мануша (Мар. 10:45; Иоан. 6:51).

² Со када выкупо? Андэ Христиански Ӷречески Писании кадэва алав сыкавэл цэмин, сави потиндя о Иисусо, кай тэ витинэл кода, со хасардя о Адамо (1 Кор. 15:22). Васо амэнди трэбуй о выкупо? Важ кода кай андэ лэ Дэвлэско справедливо законо ԥэнэнаспэ, кай трэбуй тэ отдэн жызня важ и жызня (Исх. 21:23, 24). О Адамо хасардя пэстири совершэно жызня, и важ када па лэ Дэвлэско законо о Иисусо трэбуй сас тэ отдэл пэстири совершэно жызня (Рим. 5:17). Кадя во ашэля «Вечно Дад» важ кодэла, ко патял андо выкупо (Ис. 9:6; Рим. 3:23, 24).

3. Васо, сар ԥэнэнпэ андэ Иоанна 14:31 и 15:13, о Иисусо закамля тэ отдэл пэстири жызня?

³ О Иисусо отдя пэстири жызня, важ кода кай любияс лэ Иеговас и лэ манушэн. (Адиносар Иоанна 14:31; 15:13.) Кадэя любовь поможысардя лэсти тэ на парашэл тэ кандэл лэ Иеговас жы каринг и смэрть. Блаӷодаря кодэлэсти кай о Иисусо муля, лэ манушэндэ авэла кацави жызня, сави о Иегова загиндосардясас важ лэндэ. Андэ кадэя статья амэ подаса дума, васо о Иегова домэкля, кай о Иисусо тэ пэрэандярэл бут ԥаримос англа пэстири смэрть. Кадяжэ амэ набут подаса дума пала ек мануш, саво пистросардя и Библия и саво фартэ цэнияс о выкупо. Кадяжэ амэ уӷанаса, сар тэ авас инке май блаӷодарни лэ Иеговасти и лэ Иисусости.

ВАСО О ДЭЛ ДОМЭКЛЯ, КАЙ О ИИСУСО ТЭ МУЧИЙПЭ?

4. Росԥэн, сар муля о Иисусо?

⁴ Представь о послиднё лэ Иисусоско дес англа смэрть. Во моӷ бы тэ ақарэл фартэ бутэ анӷелонэн, кай вонэ тэ фэрин лэс, но во на стердя када. О Иисусо домэкэл, кай лэс тэ залэн и римски воиноря, потом лэс фартэ жэстоко марэн ла чукняса и лэстэ пэ тила ашэнпэ ратвалэ раны (Матф. 26:52—54; Иоан. 18:3; 19:1). И воиноря стон лэсти пэ вся помардэ думэ ԥаро столбо. Во лэл полокорэ тэ жал пэ кодэва ҭан, кай камэн лэс тэ умарэн, но потом во совсем вимардёл анда зор и нащи жал. Тоди и воиноря приԥэнэн тэ андярэл лэско столбо авэр мануш, саво жал мимо (Матф. 27:32). Кала о Иисусо авэл кордэ, и воиноря примарэн карфянца лэстирэ вас и пэрнэ каринг о столбо. О столбо ваздэн и кодэлэстар, кай лэстири тила цырдэл тэлэ, лэстирэ раны лэн тэ рошындён. Лэстири дэй ровэл, и друӷоря нащи арақэн пэсти ҭан, кай диқэн со пэрэжувэл о Иисусо, ай иудейски начальникоря асанпэ лэстар (Луки 23:32—38; Иоан. 19:25). Када вся жал най ек часо. Лэ Иисусости ашэл фартэ ԥарэс тэ ԥурдэл, ай лэско ди ели марэлпэ. Но англа смэрть о Иисусо ӷанэн, кай во стердя вся, со камэл лэско Дад, и во послиднё разо мангэлпэ лэсти. Тоди о Иисусо змэкэл о шэро и мэрэл (Мар. 15:37; Луки 23:46; Иоан. 10:17, 18; 19:30). Сави жэ медленно и дэ ԥари смэрть!

5. Со важ о Иисусо сас май ԥарэс, чем лэстири смэрть?

⁵ Но со май ԥарэс лэ Иисусости сас най кодэлэстар, кай лэс трэбуй сас тэ умарэн, ай кодэлэстар кай пэр лэстэ хохадэ. О Иисусо фартэ любияс пэстирэ Дадэс, ай пэр лэстэ ԥэндэ, кай во ԥэнэнас найлашэ алава по Дэл и на столас патив пэр лэстэ (Матф. 26:64—66). Лэ Иисусости сас фартэ ԥарэс кадэлэстар. Во дажэ надеияспэ, кай о Дэл злэла пар лэстэ кадэва хохаимос (Матф. 26:38, 39, 42). Но васо о Иегова домэкля, кай лэско любимо Шаво тэ пэрэандярэл кадэва ԥаримос и тэ мэрэл? Уӷанам трин причины.

6. Васо о Иисусо трэбуй сас тэ мэрэл по столбо?

⁶ Пэрво причина, васо о Иисусо трэбуй сас тэ мэрэл по столбо, када кай тэ злэл па евреёря и амрая (Гал. 3:10, 13). Пэр лэндэ сас амрая, важ кода кай вонэ динэсас алав, кай лэна тэ ритярэн лэ Моисеёско Законо, ай екжэнэ на жувэнас пар лэстэ. Котэ сас пистромэ, кай важ дэсавэ ӷрехоря лэ манушэс трэбуй сас тэ умарэн. Ай потом и тила моӷли тэ амблавэн по столбо, кай тэ сыкавэн, кай во преступнико (Втор. 21:22, 23; 27:26)b. Но лэ Иисусос сас най васо тэ умарэн, во стердя вся па лэ Моисеёско Законо. И кала во муля по столбо, кадэлэса во заля пэр пэстэ и амрая па евреёря, савэ сас тала кадэва Законо. Кадяжэ во зля пар лэндэ и лэ Адамоско бэзэх, саво сас пэ всаворэ мануша. Вижал, хоть вонэ на патяе андо Иисусо, лэстири жэртва моӷла лэнди тэ поможый.

7. Сави дуйто причина, васо о Иегова домэкля, кай лэско Шаво тэ мучийпэ?

⁷ Акана шам сама пэ дуйто причина, васо о Дэл домэкля, кай лэско Шаво тэ мучийпэ англа пэстири смэрть. О Иегова камля кай о Иисусо тэ авэл важ амэндэ Пэрвосвященико. О Иисусо екжэно поля пэ скати дэ найвушэро тэ кандэс лэ Дэвлэс, кала бут ԥаримос. Лэ Иисусости сас кадя ԥарэс, кай во «фартэ ровэлас и ясвэнца» мангэлас лэ Иеговас, тэ поможый лэсти. Да о Иисусо ӷанэс, со када, кала фартэ ԥарэс по ди. Важ када во полэл, сар амэнди дэ ԥарэс и со амэнди трэбуй, и во можэт тэ поможый амэнди андо ԥаримос. Амэ фартэ лошалэ, кай о Иегова дя амэнди кацавэ Пэрвосвященикос, саво полэл и жалуий амэн и саво ӷанэн, со амэндэ по ди! (Евр. 2:17, 18; 4:14—16; 5:7—10).

8. Сави трито причина, васо о Иегова домэкля кай лэ Иисусостэ тэ авэл кадя бут ԥаримос?

⁸ И трито причина, васо о Иегова домэкля кай лэ Иисусостэ тэ авэл бут ԥаримос англа смэрть, када кай кадя во камля тэ дэл атвето пэ важно вопросо. Моӷут и мануша тэ на парашэн тэ кандэн лэ Дэвлэс, дажэ андэ само баро ԥаримос? О Сатана ԥэнэн, кай нэ моӷут и мануша тэ служын лэ Дэвлэсти просто кадя. Во ԥэнэн, кай вонэ када терэн кати важ кода, кай лэнди варисо трэбуй лэстар и вонэ, сар о Адамо, на любин лэ Иеговас (Иов 1:9—11; 2:4, 5). О Иегова ӷанэнас, кай лэско Шаво ашэлапэ лэсти преданно, важ када во домэкля, кай лэстэ тэ авэл кацаво ԥаримос, саво никастэ анда мануша на сас. О Иисусо на парашэля тэ кандэл лэ Иеговас жы каринг пэстири смэрть и доԥэндя, кай о Сатана хохавно.

О ИОАННО ФАРТЭ ЦЭНИЯС О ВЫКУПО

9. Сости амэ можэм тэ сытювас кай о апостоло Иоанно?

⁹ Кай лэ Иеговастирэ служытеля исин бут ԥаримос, но вонэ всаек на парашэн тэ росԥэнэн пала лэстэ и кандэн лэс вся и жызня. Блаӷодаря кадэлэсти вонэ инке май фартэ патян андэ кода, кай о Иисусо отдя пэстири жызня важ лэндэ. Погиндосарам пала апостоло Иоанно. Варикай май бут чем 60 бэрш во на парашэлас тэ росԥэнэн пала Иисусо и пала выкупо. Кала лэ Иоанности сас пала 90 бэрш и правителя андо Римо гиндонас, кай во опасно мануш. Важ када вонэ стодэ лэс андо бар и одбишалдэ по острово Патмос. Васо? Важ кода кай во «росԥэнэнас пала Дэл и со стердя о Иисусо» (Отк. 1:9). Да, лэ Иоанностар можно бут сости тэ сытювас, сар тэ на парашас тэ патяс андо Иисусо и тэ служысарас лэ Иеговасти!

10. Сар анда лэ Иоанностирэ книӷи можэм тэ полас, кай во цэнияс о выкупо?

¹⁰ Андэ Библия андэ книӷи, савэ пистросардя о Иоанно, дицол лэстири бари любовь и блаӷодарность каринг о Иисусо и каринг кода, со во стердя. Андэ кадэла книӷи май бут чем 100 раз ԥэнэнпэ пала выкупо, и саво лашимос во андя. Например, о Иоанно пистросардя, кай если варико стерэла бэзэх, тоди о Иегова простия кодэлэ манушэс через о Иисус Христос (1 Иоан. 2:1, 2). Анда лэ Иоанностирэ книӷи можно тэ полас, пэ скати дэ важно сас важ лэстэ «тэ росԥэнэн пала Иисусо» (Отк. 19:10). Чаче, о Иоанно фартэ цэнияс о выкупо. Ай сар амэ тэ сыкавас, кай цэнисарас о выкупо?

САР ТЭ СЫКАВЭС ПЭСТИРИ БЛАӶОДАРНОСТЬ ПАЛА ВЫКУПО?

11. Со поможыя тути тэ на стерэс бэзэх?

¹¹ Тер вся, кай тэ на стерэс бэзэх. Если тути па чачимастэ куч о выкупо, тоди ту на лэса кадя тэ гиндос: «Состэ мэ трэбуй тэ старысавав, кай тэ на стерав варисаво бэзэх, если мэ моӷу потом тэ мангав прощения кай о Дэл, и во ман простия?» Наоборот, если ту закамэса тэ стерэс варисаво ӷрехо, ту лэса тэ гиндос, со стердя важ тутэ о Иисусо и о Иегова, и тоди ту на стерэса кода, со лэнди на чалёла. Важ када ту можэш тэ мангэс лэ Иеговас, кай во тэ дэл тути зор, кай тэ на стерэс бэзэх (Матф. 6:13).

12. Сар ту можэш тэ прилэс каринг пэстэ и алава анда 1 Иоанна 3:16—18?

¹² Любисар лэ ԥралэн и лэ ԥэян. Если ту любис лэ ԥралэн и лэ ԥэян, кадя ту сыкавэс, кай ту блаӷодарно пала выкупо. Васо можно кадя тэ ԥэнэс? Важ кода, кай о Иисусо отдя пэстири жызня най кати важ тутэ, но и важ амарэ ԥрала и ԥэя андэ собрания. (Адиносар 1 Иоанна 3:16—18.) Если о Иисусо муля важ лэндэ, вижал вонэ куч важ лэстэ. Тири любовь каринг лэндэ дицола инке андэ кода, сар ту лэнца пэс андярэс (Эф. 4:29, 31—5:2). Например, ту можэш тэ дэс лэнди помощь, кала вонэ занасвавэн или кала лэндэ баро ԥаримос, када можэт тэ авэл бида андэ природа. Ай сар ту пэс андярэса, кала тут варико холярэла андэ собрания?

13. Васо важно тэ простис аврэн?

¹³ Ай со если тути ԥарэс тэ простис ла ԥья или лэ ԥралэс анда собрания? (Лев. 19:18). Тоди тути поможыя кадэва совето: «На холявэн ек пэ ек и анда вся оди простин ек еқэс, если варикастэ исин васо тэ холявэл пэ авэр. Сар о Иегова анда вся оди простисардя тумэн, кадяжэ простин и тумэ» (Кол. 3:13). Кажно разо кала ту простис лэ ԥралэс или ла ԥья, тоди о Иегова диқэл, кай ту па чачимастэ цэнис о выкупо. Ай сар инке ту можэш тэ сыкавэс пэстири блаӷодарность лэ Иеговасти пала кадэва подарко.

САР ТЭ СЫКАВЭС ИНКЕ МАЙ БАРИ БЛАӶОДАРНОСТЬ ПАЛА ВЫКУПО?

14. Росԥэн, сар ту можэш тэ сыкавэс инке май бари блаӷодарность важ о выкупо?

¹⁴ Блаӷодарисар лэ Иеговас важ о выкупо. И ԥэй Джоанна анда Индии, савяти 83 года ԥэнэн, кай вой кажно дес мангэлпэ и ԥэнэн андэ молитва наис лэ Иеговасти важ о выкупо. Ту можэш андэ молитва тэ росԥэнэс лэ Иеговасти пала ошыбки, савэ ту тердян важ о дес и тэ мангэс лэстар прощения. Канешно, если о мануш стердя баро бэзэх, тоди лэсти авэла трэбуй помощь лэ старейшынонэндар. Кадэла ԥрала виашунэна лэс, дэна совето па Библия и поможына. Вонэ вмести лэса мангэнапэ лэ Иеговасти, кай во тэ простий, и кай лэстэ упалэ тэ авэл лащи дружба лэ Иеговаса (Иак. 5:14—16).

15. Васо трэбуй тэ адинос и тэ гиндос пала выкупо?

¹⁵ Гиндосар пэ скати дэ куч о выкупо. И ԥэй, савя ақарэн Раджамани и савяти 73 года, ԥэнэн, кай вой нэ можэт би ясвэнго тэ адиной пала кода, со пэрэжудя о Иисусо. Можэт и тиро ди нащи тэрпий, кала ту гиндос пала кода, саво ԥаримос сас кай лэ Дэвлэско Шаво. Но со май бут ту лэса тэ гиндос пала выкупо, со май фартэ ту лэса тэ любис лэ Иеговас и лэстирэ Шавэс. Ту можэш пэ лично или пэ семейно изучения тэ розлэс кадэя тема пала выкупо.

16. Саво лашимос анэна, кала ту росԥэнэс аврэнди пала выкупо? (Диқэн и картинка пэ обложка.)

¹⁶ Росԥэн аврэнди пала выкупо. Кажно разо кала ту росԥэнэс аврэнди пала выкупо, ту екжэно лэс инке май фартэ цэнис. Андэ амари арӷанизацыя исин бут литература, андэ сави драго росԥэнэнпэ, кай о Иисусо трэбуй сас тэ мэрэл важ амандэ. Например, андэ брашура «Лащи новость лэ Дэвлэстар» амэ можэм тэ диқас о штарто уроко, саво называеца «Ко када о Иисус Христос». Ай андэ книӷа «Сости амэн сытярэл и Библия» амэ можэм тэ прадиносарас панчто ӷлава, сави называеца «Выкупо када кучутно подарко, саво дя о Дэл». Инке кажно бэрш амэ авас пэ Вечеря, ай кадяжэ ақарас тэ авэн пэр латэ всаворэн ко камэл. Кадя амэ лас инке май фартэ тэ цэнисарас о выкупо. Важ амэндэ бари бах тэ росԥэнас аврэнди важ лэ Иеговаско Шаво!

17. Васо о выкупо, када само кучутно подарко лэ Дэвлэстар лэ манушэнди?

¹⁷ Амэндэ исин васо тэ авас фартэ блаӷодарни пала выкупо. Через лэстэ амэндэ исин бут лашимос. Пэрво, када дружба лэ Дэвлэса, хоть пока амэ найсовершэни. Дуйто, када кай лэ Сатанастири дила авэла розмарди (1 Иоан. 3:8). И трито, о Иегова стерэла кода, со загиндосардя, и вся и ԥув ашэла раё. Андо раё кажно мануш авэла тэ любий лэ Иеговас и тэ служый лэсти. Ласа кажно дес тэ сыкавас амари блаӷодарность лэ Иеговасти пала кадэва кучутно подарко выкупо, саво во подарисардя кажнонэ манушэсти!