Ту най екжэно, о Иегова вся и время паша тутэ!

1. Через со лэ Иеговастирэ служытеля моӷут тэ гиндон, кай вонэ екжэнэ?

БУТЭ манушэнди здэлпэ, кай вонэ екжэнэ. Ай дэсавэ жувэн кадэлэса най ек бэрш. Лэ манушэстэ кацаво можэт тэ авэл по ди дажэ тоди, кала паша лэстэ бут миро. Варикасти, например, ԥарэс тэ авэл андэ нэви собрания. Варико бареля андо баро ери, и кала во пэрэлагля андэ авэр ҭан, во скучий пала пэско родо. Ай дэсавэнди ԥарэс по ди кодэлэстар, кай гиндон, кай вонэ екжэнэ, важ кода кай хасардэ варикас анда чаче. Ай варикасти можэт ԥарэс, важ кода кай о родо и друӷоря на камэн тэ прилэн, кай во служый лэ Иеговасти, или дажэ моӷут тэ тасавэн пэр лэстэ. И май часто када можэт тэ авэл, кала о мануш кати ля тэ уӷанэн о чачимос анда Библия.

2. Пала савэ вопросоря амэ подаса дума андэ кадэя статья?

² Нико кадя дэ драго нэ можэт тэ полэл и тэ ӷанэн, со амэндэ по ди, сар о Иегова. Кала амэ гиндосарас, кай амэ екжэнэ, о Иегова шол сама пэ када и камэл амэн тэ подритярэл. Ай сар во када терэл? Со амэ можэм тэ терас, кай амэндэ кацаво тэ на авэл по ди? И сар тэ поможысарас лэ ԥралэнди и лэ ԥэянди андэ собрания? Амэ уӷанаса пала када анда кадэя статья.

О ИЕГОВА ПОЛЭЛ, СО АМЭНДЭ ПО ДИ

3. Сар о Иегова позаботисайля пала Илья?

³ О Иегова всаворэ одеса пэрэжывает пала кажно пэско служытелё. Во паша кажно андар мэндэ. Если варикасти найдраго по ди, во сразу шол сама пэ када (Пс. 145:18, 19). Сгиндосарам, со сас андэ жызня кай о пророко Илья. Во служыяс андо Израилё, кала котэ сас фартэ ԥари время. И мануша андэ власти на дэнас лэсти спокойно тэ служый лэ Иеговасти, и камэнас тэ умарэн лэс (1 Цар. 19:1, 2). Инке кай о Илья сас кацаво гиндо, кай ек во ашэляпэ анда лэ Дэвлэстирэ пророкоря. И через када лэстэ умэклэпэ и вас (1 Цар. 19:10). О Иегова сразу пэ када шутя сама и бишалдя каринг лэстэ лэ анӷелос. И о анӷело ԥэндя лэсти, кай андо Израилё исин инке бут лэ Иеговастирэ служытеля, савэ на парашэн лэс тэ кандэн (1 Цар. 19:5, 18). И о Илья поля, кай во най екжэно!

4. Сар анда Марка 10:29, 30 дицол, кай о Иегова заботийпэ пала пэстирэ служытеля, савэндар отԥэнделя о родо и друӷоря?

⁴ Бутэ манушэндэ адес исин бут ԥаримос. Дэсавэ манушэндар отԥэнделя о родо и друӷоря через кода, кай вонэ линэ тэ служын лэ Иеговасти. О Иегова полэл, сар лэнди дэ ԥарэс. Еқвар о апостоло Пётро пушля: «Акэ амэ ашадям вся и жылям пала тутэ. Со амэнди кадэлэстар авэла?» (Матф. 19:27). Можэт, кадэлэса о Пётро камля тэ сыкавэл, кай лэстэ по ди най спокойно. Тоди о Иисусо ковлэс ԥэндя пэстирэ учениконэнди, кай лэндэ авэла май баро ери анда ԥрала и ԥэя андэ собрания. (Адиносар Марка 10:29, 30.) Кадяжэ о Иегова амаро небесно Дад дэл алав, кай на ашавэла и подритярэла кодэлэн, ко лэсти служый (Пс. 9:10). Инке амэ уӷанаса, со амэ можэм тэ терас, кай о Иегова амэнди тэ поможый, кала амэндэ исин кацавэ гиндоря, кай амэ екжэнэ и никасти на трэбуй.

СО ТУ МОЖЭШ ТЭ ТЕРЭС, КАЛА ГИНДОС, КАЙ ТУ ЕКЖЭНО?

5. Васо драго тэ ӷанэс, сар о Иегова тут подритярэл?

⁵ Шув сама, сар о Иегова подритярэл тут (Пс. 55:22). Када поможыя тути тэ диқэс пэ вся па аврятэ. Ек ԥэй, сави наймиростэ, савя ақарэн Миланаb, ԥэнэн, кай нико анда лако родо на служый лэ Иеговасти. Кала вой сгиндой, сар о Иегова подритярэлас ла андэ ԥари время, тоди вой ужэ на лэл тэ гиндой, кай екжэни. Инке када поможый лати тэ патял, кай о Иегова никала ла на ашавэла.

6. Сар и алава анда 1 Петра 5:9, 10 придэна зор, кала исин гиндо, кай ту екжэно?

⁶ Гиндосар пала кода, сар о Иегова поможый аврэ ԥралэнди и ԥэянди. (Адиносар 1 Петра 5:9, 10.) О ԥрал Хвэдя ужэ бут бэрша на парашэл тэ служый лэ Иеговасти. Но нико анда лэско родо на ашэля лэ Иеговаско служытелё. Во ԥэнэн, кай всаворэ́ ԥралэндэ и ԥэяндэ андэ собрания исин пэско ԥаримос. Но всаек кажно анда вся оди старыийпэ тэ служый лэ Иеговасти. Кадэва гиндо придэл зор лэсти и кодэлэнди, кастэ андо ери нико на служый лэ Иеговасти.

7. Сар тути поможый и молитва?

⁷ Вся и время мангпэ, адиносар и Библия и ԥир пэ собрания. Кала ту мангэспэ лэ Иеговасти, трэбуй тэ росԥэнэс лэсти вся, со тутэ по ди (1 Пет. 5:7). Кала и ԥэй Зина ля тэ служый лэ Иеговасти, латар одбанделя вся лако ери. Лати сас фартэ ԥарэс. Латэ сас кацавэ гиндоря, кай вой ашэляпэ совсем екжэнёры. Но лати фартэ поможысардя, кай вой анда вся оди мангляпэ каринг о Иегова. Во ашэля важ латэ сар Дад. И Зина кажно дес мангэласпэ лэсти и росԥэнэнас вся, со латэ сас по ди.

8. Сар тути поможый, кала адинос и Библия и гиндос, пала со проадиносардян?

⁸ Кажно дес адиносар и Библия и шув сама, пэ кодэла стихоря, савэ поможына тути инке май фартэ тэ патяс, кай о Иегова любий лично тут. И ԥэй Патрина ԥэнэн, кай латирэ ерести фартэ на чалёл, кай вой служый лэ Иеговасти. Лати кадэлэстар фартэ ԥарэс. Лати придэл зор, кала вой адиной пала мануша анда Библия и кала уӷанэн пала мануша андэ амари время, кастэ сас кацаво жэ ԥаримос сар и латэ. Авэр христианоря висытён варисаво библейско стихо, саво лэнди придэл зор. Например, када Псалом 27:10 или Исаия 41:10. Ай дэсавэнди поможый тэ улэн и гиндоря, кай вонэ екжэнэ, кала ашунэн и аудио важ и статья, сави лэна тэ прожан пэ собрания или кала ашунэн, сар адинон и Библия па амаро сайто.

9. Саво лашимос тути анэн и собрания?

⁹ Пристов вся о зор, кай тэ на промэкэс ни ек собрания. Пэ собрания ту можэш тэ лэс зор, ай кадяжэ ту можэш тэ уӷанэс май драго лэ ԥралэн и лэ ԥэян (Евр. 10:24, 25). И Зина, пала сави амэ ужэ дям дума, ԥэнэн, кай хоть вой и сас фартэ лажавни, вой всаек ԥирэлас пэ кажно собрания и дэлас каминтарии. Када поможысардя лати тэ полэл, кай вой куч андэ собрания.

10. Васо драго, кала ту дружыс лэ ԥралэнца и лэ ԥэянца анда собрания?

¹⁰ Подружысав лэ ԥралэнца и лэ ԥэянца анда собрания. Виарак андэ собрания кацавэ друӷонэн, савэндар ту можэш тэ сытёс. Мэк вонэ дажэ барэдэр или цыкнэдэр тутар или лэндэ авэр культура. Андэ Библия ԥэнэнпэ, кай и ԥрала и ԥэя, савэ андэ бэршэндэ, бут со пэрэжудэ андэ жызня, и важ када вонэ бут со полэн (Иов 12:12). Но и вонэ тожэ моӷут бут сости тэ сытён кай и тэрнорэ. Например, кай о Давид и кай о Ионафано сас бари разница андэ бэрша. Но вонэ всаек сас лашэ друӷоря (1 Сам. 18:1). Вонэ подритярэнас ек еқэс, кала сас ԥари время. И када поможысардя лэнди тэ на парашэн тэ служын лэ Иеговасти (1 Сам. 23:16—18). И ԥэй Алёна екжэни андо ери служый лэ Иеговасти. Вой ԥэнэн, кай и друӷоря андэ собрания моӷут тэ авэн важ амэндэ сар чаче ԥрала и ԥэя или сар дад или дэй. Кадя о Иегова дэл лати кода, со лати на хутилэл.

11. Со трэбуй тэ терэс, кай тутэ тэ авэн лашэ друӷоря?

¹¹ Тэ виарақэс пэсти нэвэ друӷонэн дэкала найвушэро. Ай инке май ԥарэс када тэ стерэс, если ту фартэ лажавно. И Рада тожэ фартэ лажавни ԥэй. Вой ашэля лэ Иеговаско свидетелё, хоть пэр латэ фартэ тасавэлас о родо. Вой ԥэнэн, кай если и ԥрала и ԥэя тэ на поможысардоп лати, тоди вой на служысардоп лэ Иеговасти. Драго, кала амэндэ исин, касти амэ можэм тэ росԥэнас, со амэндэ по ди. Када поможый, кай и дружба лэ ԥралэнца и лэ ԥэянца андэ собрания тэ авэл май лащи. Тирэ друӷоря фартэ камэн тут тэ подритярэн и тэ поможын. Но если ту на лэса лэнди пала када тэ росԥэнэс, тоди сар вонэ тути поможына?

12. Сар амэ можэм тэ виарақас друӷонэн андэ собрания?

¹² Кала амэ жас андэ служэния варикаса, кадя амэ сможэм лэн май драго тэ уӷанас. И Милана, пала сави амэ ужэ дям дума, ԥэнэн, кай кала вой жал лэ ԥэянца андэ служэния или кала терэл варисави дила андэ лэ Дэвлэстири арӷанизацыя, кадя вой лэн май драго уӷанэн. Ужэ бут бэрша о Иегова подритярэл ла через кадэла друӷоря. Чаче, фартэ важно, кай амэндэ тэ авэл лащи дружба лэ ԥралэнца и лэ ԥэянца андэ собрания. Кадя о Иегова можэт амэнди тэ поможый, кай амэндэ тэ на авэн кацавэ гиндоря, кай амэ екжэнэ и никасти на трэбуй (Прит. 17:17).

ПОМОЖЫСАР АВРЭНДИ, КАЙ ВОНЭ ТЭ ПОЛЭН, КАЙ АМЭ ЕК ЕРИ АНДЭ СОБРАНИЯ

13. Со трэбуй тэ терэл кажно андар мэндэ?

¹³ Кажно андар мэндэ трэбуй тэ шол сама, кай ни еқэ ԥралэстэ или ԥьятэ андэ собрания тэ на авэл кацаво гиндо, кай вонэ екжэнэ и никасти на трэбуй. Трэбуй тэ терас вся, кай андэ собрания всаворэ тэ цэнин ек еқэс и тэ ладин (Иоан. 13:35). Ту можэш тэ ԥэнэс лэнди лашо алав или тэ стерэс варисави дила важ лэндэ. Кадя ту придэса лэнди зор! Акэ со росԥэнэн ек ԥэй. Кала вой изучала и Библия, и ԥрала и ԥэя андэ собрания ашэлэ важ латэ сар ери. Вой ԥэнэн, кай если вонэ тэ на диноп лати помощь, тоди вой на служысардоп лэ Иеговасти. Ай сар ту можэш тэ поможыс лэ ԥралэсти или ла ԥьяти, если лэндэ нико анда ери на служый лэ Иеговасти, кай вонэ тэ полэн, кай вонэ куч андэ собрания?

14. Сар ту можэш тэ ашэс друӷо лэ манушэсти, саво кати авеля андэ собрания?

¹⁴ Пэрво подружысав лэ ԥралэнца и лэ ԥэянца. Если андэ собрания исин мануша, савэ кати болделэ или савэ кати изучают и Библия или савэ анда авэр собрания пэрэжылэ андэ тумари, тоди сыкав, кай ту лэнди лошало (Рим. 15:7). Но на хутила, кати просто тэ ԥэнэн лэнди: «Доров! Сар и дила?» Важ кода кай амэ камас тэ подружысавас лэнца. Трэбуй анда вся оди тэ шос сама лэ манушэс. Но на трэбуй тэ роспушэс лэстар кода, со на трэбуй. Старысав тэ полэс, со лэстэ по ди, саво ԥаримос лэстэ исин. Но на бистэр, кай варикасти ԥарэс тэ росԥэнэн, со лэстэ по ди. Важ када трэбуй тэ авэс ковло, кала дэс дума лэ манушэса. На грабисав варисо тэ ԥэнэс, ай фэдэр драго виашун лэс. Можно тэ пушэс лэстар, сар во уӷангля лэ Иеговас.

15. Сави помощь лэ ԥралэнди и лэ ԥэянди моӷут тэ дэн и христианоря, савэ драго полэн лэ Дэвлэско законо?

¹⁵ Кала и ԥрала и ԥэя анда вся оди шон сама ек еқэс, тоди вонэ инке май фартэ лэн тэ патян лэ Иеговасти. Со май бут сама трэбуй тэ шон кодэла христианоря, савэ драго полэн лэ Дэвлэско законо и савэн найвушэро тэ змарэн па лэ Иеговаско дром. Особенно када трэбуй тэ терэн и старейшыноря. И ԥэй Мелисса, сави жы бэятатар ӷанэн лэ Иеговас, ԥэнэн, кай сас андэ собрания кацавэ ԥрала, савэ сас важ латэ сар дад. Вонэ на жалуинас важ латэ время. Вой алавэнца нэ можэт тэ пэрэдэл, сар вой лэнди блаӷодарно важ када. Вся и время, кала вой камэлас тэ росԥэнэн варикасти, со латэ по ди, вонэ сас паша латэ. Ай о ԥрал Миша ԥэнэн, кай кала о ԥрал, саво лэса изучал ашэля неактивно вазвещятелё, лэстэ сас по ди, кабута во никасти на трэбуй. Но лэс фартэ подритярэнас и шонас сама и старейшыноря. Вонэ лэнас лэс андэ служэния, росԥэнэнас лэсти, со интересно уӷанэнас пэ лично изучения, и дажэ лэнас лэс тэ цэлэн андэ спортивни иӷры. И блаӷодаря кадэлэсти акана и о Миша и Мелисса служын лэ Иеговасти полновременно.

16, 17. Сар инке ту можэш тэ поможыс аврэнди?

¹⁶ Поможысар пэ дила (Гал. 6:10). О Лёша, саво служый мисианероса дур лэ цэрэстар, ԥэнэн, кай фартэ придэл зор, кала андо ԥаро маменто терэс хоть набут варисо лашо. Например, кала во попэля андэ авария, лэсти по ди сас фартэ ԥарэс. Кала во рисайля цэрэ, лэстэ ужэ совсем на сас ни пэр со зор. Но ек ери, ақардя лэс каринг пэстэ тэ побэшэн вмести тэ хан. Во дажэ на сэрэл, со вонэ халэ андэ кодэва маменто, но во идоси сэрэл, кай вонэ шутэ сама лэс и драго виашундэ. Лэсти кадэлэстар сас фартэ драго по ди.

¹⁷ Амэнди фартэ чалёл тэ авас пэ канӷрэсоря. Котэ амэ диқаспэ бутэ ԥралэнца и ԥэянца дас дума пала проӷрамма, сави ашунас. Но важ и ԥэй Милана тэ авэл по канӷрэсо, када фартэ ԥарэс. Вой ԥэнэн: «Авэс интя, ай паша тутэ ԥэрдо миро и када май бут мануша, савэ авелэ пэстирэ еренца, ай мэ екжэнёры. Андэ кацавэ маменторя манди фартэ ԥарэс по ди и мандэ сразу авэн гиндоря, кай мэ никасти на трэбуй». Инке можэт тэ авэл ԥарэс по ди кодэлэнди, ко хасардя лэ хулас чи ла хулая. Особенно, кала вонэ пэрво разо авэн по канӷрэсо би лэнго. Если ту ӷанэс кацавэ манушэн, савэнди ԥарэс тэ жан по канӷрэсо екжэнэ, тоди ту можэш тэ ақарэс лэн пэса.

18. Со трэбуй тэ терэс, кала ақарэс лэ ԥралэн и лэ ԥэян тэ побэшас, сар ԥэнэнпэ андэ 2 Коринфянам 6:11—13?

¹⁸ Проандярэн время ек еқэса. Ақар лэ ԥралэн и лэ ԥэян пэстэ цэрэ, кай тэ побэшэн, тэ подэн дума. Особенно кодэлэн, кастэ исин гиндоря, кай вонэ екжэнэ и никасти на трэбуй. Ԥэрнав важ лэндэ пэско ди. (Адиносар 2 Коринфянам 6:11—13.) И ԥэй Мелисса, пала сави дям дума, ԥэнэн, кай лати фартэ чалёл, кала и ԥрала и ԥэя ақарэн ла латиря даса в ӷости, или ладэн варикай вмести тэ отцыён. Ай андэ тири собрания, исин кацавэ ԥрала и ԥэя, савэн трэбуй тэ шос сама и тэ сыкавэс, кай вонэ куч андэ собрания?

19. Кас и кала андэ собрания трэбуй тэ шас сама?

¹⁹ Дэкала лэ ԥралэнди и лэ ԥэянди трэбуй, кай амэ тэ авас паша лэндэ. Дэкасти фартэ ԥарэс андэ кодэва дес, кала о родо, саво на служый лэ Иеговасти стол празникоря, савэ нэ уӷодни лэ Иеговасти. Ай аврэнди фартэ ԥарэс, кала пашол о дес, андэ саво ужыля лэнго пашутно мануш. Если амэ андэ кодэва маменто аваса паша лэндэ, тоди вонэ полэна, кай вонэ куч амэнди и амэ заботисавас пала лэндэ (Флп. 2:20).

20. Сар лэ Иисусостирэ алава анда Матфея 12:48—50 дэн зор кодэлэнди, касти здэлпэ, кай вонэ екжэнэ?

²⁰ Лэ Иеговастирэ служытеля дэкала моӷут тэ гиндон, кай кабута вонэ екжэнэ и никасти на трэбуй. И лэндэ пэ када исин бут причины. Но на ласа тэ бистрас, кай о Иегова ӷанэн вся, со амэндэ по ди и полэл амэн. Во вся и время подритярэл амэн и терэл када через и ԥрала и ԥэя андэ собрания. (Адиносар Матфея 12:48—50.) Ай амэ можэм тэ сыкавас пэстири блаӷодарность лэ Иеговасти, если поможысарас андэ собрания кодэлэнди, касти трэбуй помощь. И со амэндэ тэ на авэл по ди, амэ трэбуй тэ на бистрас, кай о Иегова никала амэн на ашавэла.