Сытён лэ Иеговастар тэ пэрэандярэн о ԥаримос

1, 2. Сар тути придэн зор и алава анда книӷа Исаия 65:16, 17?

ПО РЕӶИОНАЛЬНО канӷрэсо андо 2017 бэрш бут жалас дума пала кода, кай нащи тэ умэкас и вас. Када придя амэнди зор тэ патяс, кай амэ сможэм тэ пэрэандярас любо ԥаримос. Но прожыля ужэ штар бэрш посли кодэва канӷрэсо, ай амэнди идоси прижалпэ тэ жувас андэ кадэя найлащи люма.

² Ай со тути прижыляпэ тэ пэрэжувэс важ кадэла бэрша? Можэт сас ԥаро насвалимос, или можэт ужылятар варико анда чаче, или сас бида андэ природа? Можэт через кода кай ту служыс лэ Иеговасти, тут мардэ или на дэн спокойно тэ росԥэнэс пала лэстэ? Ай можэт тути фартэ ԥарэс кодэлэстар, кай тутэ найлашо зор и ту ужэ андэ бэршэндэ? Или можэт ту пэрэнасвайлян лэ насвалимаса, саво щяс жал па вся и люма? Сар жэ фартэ амэ аштярас кодэя время, кала вся када прожала и будэр на авэла ԥаримос андэ амари жызня! И аштярас кодэя время, кала дажэ по гиндо на авэла кода, саво ԥаримос амэ пэрэжудям. (Адиносар Исаия 65:16, 17.)

3. Со амэ трэбуй тэ терас, и васо када фартэ важно?

³ И жызня андэ кадэя люма фартэ ԥари. Амэнди трэбуй тэ сытювас тэ пэрэандярас любо ԥаримос ужэ акана, важ кода кай англэ авэла инке май ԥарэс (Матф. 24:21). О Иисусо ԥэндя: «Тумэ фэрина пэстири жызня кодэлэса, кай виритярэн о ԥаримос» (Луки 21:19). Кай тэ виритярас вся о ԥаримос, саво исин амэндэ андэ жызня, амэнди трэбуй тэ сытювас кай кодэла мануша, савэндэ вижыля када тэ стерэн.

4. Васо можно тэ ԥэнас, кай со май драго ӷанэн тэ пэрэандярэл о ԥаримос, када о Иегова?

⁴ Со май драго ӷанэн тэ пэрэандярэл о ԥаримос, када о Иегова. Пока о Сатана правий кадэла люмаса, андэр латэ фартэ бут ԥаримос. И если о Иегова закамэла, во сможэт сразу вся када тэ улэл. Но во аштярэл кодэя время, сави во стодя, кай тэ улэл вся пэско ԥаримос (Рим. 9:22). Ай саво лэстэ ԥаримос? Уӷанаса пала када май англэ.

САВО ԤАРИМОС ПЭРЭАНДЯРЭЛ О ИЕГОВА?

5. Савя времятар на линэ тэ стон патив пэ Иеговаско алав, и со амэндэ кадэлэстар по ди?

⁵ На стон патив пэ лэско алав. О Иегова камэл, кай по лэско алав всаворэ тэ стон патив (Ис. 42:8). Но ужэ май бут чем 6 тысяч лет и мануша лажаварэн лэс (Пс. 74:10, 18, 23). Када линэ тэ терэн инке андо Эдэмско садо. Тоди о Сатана, пэ саво инке ԥэнэн «хохавно», дошалярдя лэ Иеговас, кай во кабута на камэл, кай о Адамо и Ева па чачимастэ тэ авэн бахталэ (Быт. 3:1—5). О Сатана хохавэл жы каринг амарэ деса. Лэ Иисусости сас фартэ ԥарэс кодэлэстар, кай бут мануша на стонас патив пэ лэстирэ Дадэско алав. Важ када во ԥэнэнас пэстирэ учениконэнди, кай вонэ тэ мангэнпэ кадя: «Амаро Дад по нэбо, мэк тиро алав авэл свынто» (Матф. 6:9).

6. Васо о Иегова дя время, кай всаворэ тэ полэн, кай кати лэстэ исин право тэ правий?

⁶ Ԥэнэн, кай лэстэ нинай право тэ правий амэнца. Кати кай о Иегова исин право тэ правий и кодэлэнца, ко по нэбо, и кодэлэнца, ко пэ ԥув. Лэстири правления со май лащи (Отк. 4:11). Но о Сатана терэл вся, кай и анӷелоря и мануша тэ патян, кай лэ Дэвлэстэ нинай кацаво право. Важ када о Иегова дя лэ манушэнди время, кай вонэ тэ полэн, кай би лэско вонэ нэ смоӷут тэ жувэн и нисо лашо анда када на вижала (Иер. 10:23). Важ кода кай о Иегова аштярэл кадэя время, потом ужэ нико на лэла тэ гиндой или тэ на допатял, кай лэстэ нинай право тэ правий. И кадя во доԥэнэна, кай кати через лэско Царство пэ ԥув авэла па чачимастэ мирно и мануша нисостар на лэна тэ даран.

7. Ко жал против о Иегова и со лэнца авэла?

⁷ Лэстирэ бэяцэ жылэ против лэстэ. О Иегова создал лэ анӷелонэн и лэ манушэн, кай вонэ тэ авэн совершэни. Но потом ек анӷело жыля против лэстэ и ашэля лэ Дэвлэско само баро вороӷо. Пэр лэстэ линэ тэ ԥэнэн Сатана, када сыкавэл, кай во жал против. Во стердя кадя, кай и совершэни мануша о Адамо и Ева тэ жан против о Иегова. Ай потом кадя линэ тэ терэн и авэр мануша и дажэ и анӷелоря (Иуды 6). Дажэ и израильтяноря, савэн о Иегова витидя, кай вонэ тэ авэн лэско народо, одбанделэ лэстар и линэ тэ служын лэ хохавнэ дэвлэнди (Ис. 63:8, 10). Можно тэ полас, со сас по ди кай о Иегова кодэлэстар, кай лэс придинэ. И всаек о Иегова вся када виритярдя. Во на парашэля тэ аштярэл кодэя время, пока на стерэла кадя, кай пэ ԥув на авэла ни ек мануш, саво жала против лэстэ. Када авэла со май бахтало дес важ и мануша, савэ на парашэлэ тэ служын лэ Иеговасти, хоть андэ лэндири жызня сас фартэ бут ԥаримос!

8, 9. Андэр со дошалярэн лэ Иеговас и сар амэ можэм тэ доԥэнас, кай када хохаимос?

⁸ О Сатана на парашэл тэ хохавэл. О Сатана хохадя по Иово, ай кадяжэ пэ всаворэ лэ Дэвлэстирэ служытеля, кай вонэ лэсти служын кати важ пэсти выӷода (Иов 1:8—11; 2:3—5). Во идоси на парашэл тэ хохавэл (Отк. 12:10). Но если амэ любисарас лэ Иеговас и на парашас тэ кандас лэс, тоди амэ доԥэнаса, кай о Сатана хохавно. И тоди о Иегова блаӷословия и амэн, сар лэ Иовос (Иак. 5:11).

⁹ О Сатана камэл, кай о миро тэ гиндой, кай о Иегова фартэ жэстоко и дошало андэ лэ манушэнго ԥаримос. Во када терэл через и барэдэра андэ хохавнэ веры. Например, кала мэрэл бэято, дэсавэ рашая ԥэнэн, кай када о Дэл заля лэс по нэбо, важ кода кай лэсти трэбуй инке ек анӷелочко. Када фартэ баро хохаимос по Дэл! Сар жэ драго, кай амэ ӷанас о чачимос. Амэ никала на ласа тэ дошалярас лэ Иеговас, дажэ если фартэ занасваваса или дажэ если варико ужала анда амарэ чаче. Амэ ӷанас, кай авэла время, кала о Иегова исцэлия лэ насвалэн и рия каринг и жызня кодэлэн, ко муля. И амэ камас, кай всаворэ тэ ӷанэн, кай о Иегова любий всаворэ манушэн. Кала амэ росԥэнас лэ манушэнди пала када, кадя лэ Иеговастэ авэла, со тэ ԥэнэн кодэлэсти, ко най драго дэл дума пала лэстэ (Прит. 27:11).

10. Со амэ уӷанас пала Иегова анда Псалом 22:23, 24?

¹⁰ Лэстирэ любими служытеля пэрэандярэн о ԥаримос. Амаро Дэл Иегова фартэ полэл амэн и жалуий. Во полэл, сар амэнди дэ ԥарэс, кала пар мэндэ тасавэн, кала насвавас, кала терас варисо най кадя. И кала амэ ровас, лэстэ фартэ дуқал оди. (Адиносар Псалом 22:23, 24.) Кала амэнди ԥарэс и лэсти ԥарэс. Но во най кати полэл, со по ди амэндэ и жалуий, но инке во улэла вся о ԥаримос, саво исин амэндэ андэ жызня. (Диқэн Исход 3:7, 8; Исаия 63:9.) О Иегова дэл алав амэнди, кай авэла кодэва дес, кала во виқосэла всаворэ ясва па амарэ яқа, и смэрть будэр на авэла, нисави бида, ни дук будэр на авэла (Отк. 21:4).

11. Со кай о Иегова по ди кодэлэстар, кай лэстирэ друӷоря мэрэн?

¹¹ Лэстирэ лашэ друӷоря мэрэн. О Иегова фартэ скучий пала пэстирэ служытеля, савэ нинайлэ. И во фартэ камэл упалэ лэн тэ диқэл (Иов 14:15). Кати погиндон, сар дэ фартэ во скучий пала пэско друӷо Авраамо (Иак. 2:23). Или пала Моисеё, савэса во «дэлас дума муй муестэ» (Исх. 33:11). Ай сар лэ Иеговасти на хутилэл лэ Давидос или аврэ манушэн, савэ пистронас и псалморя, андэ савэ сас райканэ диля важ лэстэ! (Пс. 104:33). И хоть лэн ужэ нинай, о Иегова никала на бистрэл пала пэстирэ друӷоря (Ис. 49:15). Во сэрэл пала лэндэ вся. Андэ Библия ԥэнэнпэ, кай «важ лэстэ вонэ всаворэ жундэ» (Луки 20:38). Ӥто о Иегова рия лэн каринг и жызня. Тоди вонэ упалэ лэна тэ служын лэсти, ай во лэла тэ ашунэн, сар вонэ анда вся оди мангэнпэ лэсти. Сар жэ амэ лошалэ тэ ӷанаса када, особенно, если амэ хасардям варикас анда амарэ чаче.

12. Состар лэ Иеговасти май ԥарэс по ди?

¹² И мануша фартэ жэстоко обжанпэ ек еқэса. О Иегова полэл, кай посли кода, сар и мануша жылэ против лэстэ, када вся андя бари бида, и трэбуй тэ прожал и время, кай упалэ вся тэ ашэл драго. О Иегова нэнавидит о найлашимос, нэсправедливость и кала лэ манушэнца жэстоко обжанпэ. Лэско ди фартэ дуқал, кала во диқэл, кай и мануша тасавэн пэ кодэла, пала кастэ най ко тэ зашолпэ. Када и ԥивля или бэяцэ, савэ ашэлэпэ би родителёнэнго (Зах. 7:9, 10). Но лэсти инке май ԥарэс, кала лэстирэ служытелёнэнца, савэ на парашэн лэс тэ кандэн, обжанпэ жэстоко и бэшарэн андо баруно. Патян, кай о Иегова любий кажнонэс андар тумэндэ! Тумэ сар и во виритярэн о ԥаримос андэ жызня.

13. Саво найлашимос терэн и мануша и со стерэла о Иегова?

¹³ И мануша совсем на лажан тэ терэн билажавардимос. О Иегова создал лэ манушэн тэ авэн кацавэнца, сар во, кай вонэ тэ андярэн пэс правильно. Но о Сатана терэл вся, кай и мануша тэ терэн бэзэх и лэсти када фартэ чалёл. Андэ лэ Ноёстири время и мануша терэнас пэ ԥув ек о найлашимос. «Тоди о Иегова пожалел, кай создал лэ манушэн пэ ԥув, и лэсти ашэля ԥарэс по ди» (Быт. 6:5, 6, 11). Ай акана и мануша андярэн пэс фэдэр? Канешно, най! Андэ кадэя люма и мануша терэн ек еқэса разно билажавардимос. Кадяжэ вонэ изменяют ек еқэсти, о мурш жувэл лэ муршэса, и жувли жувэл ла жувляса (Эф. 4:18, 19). Но май фартэ о Сатана лошавэл, кала лэстэ вижал тэ змарэл па правильно дром лэ Иеговастирэ служытелёнэн, кай вонэ тэ стерэн баро бэзэх. Но о Иегова най вся и время лэла тэ тэрпий кадэва найлашимос. Ӥто во сыкавэла, сар нэнавидит о билажавардимос и умарэла лэ манушэн, савэ када терэн и савэ на камэн тэ парудёнпэ.

14. Сар и мануша на фэрин и ԥув и лэ жывотнонэн?

¹⁴ И мануша римон и Ԥув. «Кала о мануш хулаий пэ авэр мануш, када на анэн лашимос» (Эккл. 8:9). И Ԥув создал о Иегова, и дя, кай и мануша тэ заботинпэ пала латэ (Быт. 1:28). Дэсави учони ԥэнэн, кай ӥто и мануша стерэна кадя, кай пэ ԥув помэрэна милионоря жывотни и растении. Важ када вонэ фартэ пала када пэрэжывают. Но драго, кай о Иегова дя алав, кай умарэла «кодэлэн, ко римой и ԥув» и стерэла, кай и ԥув тэ ашэл раё (Отк. 11:18; Ис. 35:1).

СОСТИ АМЭ СЫТЮВАС АНДА КОДА, САР О ИЕГОВА ВИРИТЯРЭЛ О ԤАРИМОС

15, 16. Со поможыя амэнди тэ пэрэандярас о ԥаримос кадя жэ сар о Иегова? Росԥэнэн о примеро.

¹⁵ Кати погиндон, скати ԥаримос пэрэандярэл амаро небесно Дад о Иегова ужэ тысячи бэрша! (Диқэн и рамка «Саво ԥаримос пэрэандярэл о Иегова?».) Но о Иегова можэт андэ любо время тэ улэл кадэя найлащи люма. Но во када на терэл. Во аштярэл. И амэ трэбуй тэ авас блаӷодарни лэ Иеговасти пала лэстири терпения. Прецтавьте пэсти, сар о хулай и хулаи аштярэн, кала лэндэ авэла бэято. И если вонэ уӷанэна, кай о бэято арақадёла насвало и прожувэла набут, вонэ всаек лэна тэ лошавэн лэсти, саво ԥаримос лэндэ тэ на авэл. И вонэ стерэна вся, со па лэнго зор, кай лэнго бэято, хоть набут тэ авэл май бахтало. Кадя вонэ сыкавэна, кай фартэ лэс любин.

¹⁶ Кадя жэ и лэ Адамостирэ потомкоря, кала арақадён, вонэ ужэ нэсовершэни. Но о Иегова всаек лэн любий и заботийпэ пала лэндэ (1 Иоан. 4:19). Но о Иегова май зорало, чем кодэла родителя, лэстэ исин зор тэ улэл кадэва ԥаримос. И во дажэ ужэ стодя о дес о и часо, кала улэла вся о ԥаримос лэ манушэндар (Матф. 24:36). Кала амэ гиндосарас, сар о Иегова любий амэн, када придэл зор тэ на умэкас и вас, пока на авэла лэско дес.

17. Со амэнди можэт тэ придэл зор тэ на умэкас и вас, сар запистромэ андэ Евреям 12:2, 3?

¹⁷ О Иегова само лашо примеро важ амэндэ андэ кода, сар во виритярэл о ԥаримос. О Иисусо фартэ шолпэ пэ пэско Дад. Кала во сас пэ ԥув, во важ амэндэ пэрэандярдя бут ԥаримос. Пэр лэстэ ԥэнэнас найлашэ алава и хохавэнас. Ай кадяжэ лэс фартэ жэстоко умардэ по столбо. (Адиносар Евреям 12:2, 3.) Но лэсти фартэ придэлас зор кода, кай лэско Дад виритярэл о ԥаримос и во сытёлас лэстар. Када придэла зор и амэнди.

18. Саво лашимос исин, кай о Иегова аштярэл и время, кала улэла вся о ԥаримос, сар запистромэ андэ 2 Петра 3:9?

¹⁸ Адиносар 2 Петра 3:9. О Иегова точно ӷанэн, кала фэдэр авэла тэ улэл кадэя найлащи люма. Ай пока во аштярэл, кай май бут мануша тэ уӷанэн лэс и тэ ашэн лэстирэ служытеля. Кажно андар мэндэ фартэ блаӷодарно лэ Иеговасти важ кода, кай во ӷанэн тэ пэрэандярэл о ԥаримос и бут время аштярэл. Блаӷодаря кодэлэсти кай во аштярэл, пэ люма авелэ бут бэяцэ, савэ вибарелэ и закамлэ тэ ашэн лэстирэ служытеля. Кала фартэ бут мануша пэрэжувэна о Армагеддоно, тоди дицола, кай о Иегова аштярэлас най евья.

19. Со амэ камас тэ терас и саво лашимос авэла англэ?

¹⁹ Амэ можэм тэ сытювас кай о Иегова и лошаса тэ пэрэандярас о ԥаримос, саво исин амэндэ. Хоть о Сатана андя андэ люма бут бида и ԥаримос, о Иегова на парашэл тэ авэл бахтало Дэл (1 Тим. 1:11). Амэ тожэ можэм тэ авас бахталэ и тэ на парашас тэ аштярас, кала о Иегова стерэла пэско алав тэ авэл свынто, доԥэнэна, кай лэстири правления со май лащи и улэла вся о ԥаримос и о найлашимос андэ кадэя люма. Амэндэ исин бут, пала со тэ авас блаӷодарни лэ Иеговасти, важ кода кай во на парашэл тэ пэрэандярэл о ԥаримос! И амэ трэбуй тожэ тэ на парашас тэ пэрэандярас о ԥаримос! Тоди пала всаворэ лэ Дэвлэстирэ служытеля можно авэла тэ ԥэнэс кадя: «Бахтало о мануш, саво виритярэл о ԥаримос, важ кода кай кала во виритярэла лэс, лэсти авэла дино и жызня, пала сави о Иегова дэл алав кодэлэнди, ко лэс любий» (Иак. 1:12).