Бахталэ кодэлэстар, кай служысарас лэ Иеговасти

Пэ авэр бэрш всаворэ вефильцонэнди ԥэндэ, кай трэбуй добровольцоря, кай тэ ладэн тэ служын андэ южноафриканско Вефилё. Котэ вонэ камэнас тэ стон бари печатно машынка. Мэ ԥэндэм, кай камав тэ ладав, и тоди ман и инке тринэ ԥралэн анда Вефилё витидэ тэ ладас кордэ. Када сас о Деннисо Лич, о Билло Маклеллано и о Кено Нордино. Мэ фартэ обрадосайлэм. И и ԥрала тиндэ амэнди всаворэнди билеторя кати андэ ек риг.

Тоди мэ ԥэндэ мэрня дати, кай мэ пэрэладав андэ Южно Африка. Мэрни дэй фартэ любияс лэ Иеговас и патялас лэсти. Важ када кала мэ када лати ԥэндэм, вой подритярдя ман. Ни мэрно дад, ни мэрни дэй никала нисо на ԥэнэнас пала мэрнэ ришэнии, савэ мэ прилавас, кай тэ служысарав лэ Иеговасти. Но тэ ԥэнав чаче, лэнди сас ԥарэс, кай мэ уладавас фартэ дур.

ЛАДАС АНДЭ ЮЖНО АФРИКА

Спэрва амэн лэ штарэн бишалдэ, кай тэ сытювас трин шон андо бруклинско Вефилё, кай печатают и литература. Посли кода сар амэ отсытелям котэ, амэн стодэ пэ ӷрузово лодка, сави жалас андо Кейптауно. Тоди манди сас кати 20 бэрш. Мэ драго сэрав кодэва вэчэро, кала амэ лаглям андо баро дром по поездо анда Кейптауно андэ Йоханнесбурго. Пэрво разо амэ терделям тэсараса андэ най баро форицэ. Котэ сас фартэ жарко и сас бут прахо. Амэ диқасас анда фэлястра и камасас тэ полас, каринг амэ попэлям. Но кати сар прожылэ дэсавэ бэрша и амэ упалэ авелямас интя, амэ полям пэ скати дэ лашэ кацавэ форицоря, и кай андэр лэндэ фартэ спокойно жызня.

Най ек бэрш мандэ сас фартэ интересно, но ԥари дила. Мэ теравас и строчки важ и машынка, пэ сави ԥэнэн линотипо. Пэр латэ печатали амарэ журналоря «Сторожэво башня» и «Прошонпэ!». Андэ амаро Вефилё вимэкэнас и журналоря пэ бут африкански шыба. Ай кадяжэ пэ шыба, савэ сас най кати андэ Южно Африка, но пэ савэ дэнас дума андэ страны май пашэ каринг о северо. Да, пэ кадэя мощно машынка линэ тэ терэн фартэ бут дила андэ лэ Дэвлэстири арӷанизацыя! И най евья амэ епаш люма облаглям, кай тэ авас кардэ.

Потом мэ лэм тэ терав дила андо офисо. Мэ теравас кацави бути, кай ришысарасас разни вопросоря. Када сар тэ вимэкэн и литература, сар тэ пэрэандярэн ла и сар тэ одбишалэн андэ разни собрании. Мэрни жызня сас фартэ интересно и андэр латэ сас бут со лашо!

ЯБЬЯВ И НЭВИ ДИЛА АНДЭ СЛУЖЭНИЯ ЛЭ ИЕГОВАСТИ

Андэ 1968 бэрш мэ жэнисайлэм пэ Лора Боуэн. Вой жувэлас най дур лэ Вефилёстар и сас пианерка. Кадяжэ вой поможыяс андэ переводческо отдело сар секретарё. Андэ кодэя время кодэлэн, ко кати пожэнисайля на ашавэнас андо Вефилё. Важ када амэн бишалдэ тэ служысарас сар спецыальни пианероря. Важ када мэ пэрэжывал. Мэ 10 лет служысаравас андо Вефилё и присытелэм, кай катэ позаботинапэ, со тэ хас, со тэ пас и кай тэ жувас. И мэ загиндосайлэм, ай сар акана амэ жуваса? Андэ кодэя время лэ спецыальнонэ пианеронэнди кажно шон дэнас най барэ ловэ, 35 долларов. И кати тоди, если о пианеро терэлас и норма андэ служэния. Кадяжэ лэсти трэбуй сас тэ роздэл и литература скати трэбуй сас важ о шон, ай кадяжэ тэ терэл и повторни посещения скати трэбуй. Анда кадэла ловэ трэбуй сас тэ потинас важ о цэр, важ о хамос. важ о дром, важ и ӥда и инке кай тэ личисавас, если трэбуй сас.

Амэн бишалдэ тэ служысарас андэ най бари ӷруппа най дур лэ форостар Дурбан. Во сас паша Индийско океано и котэ жувэнас бут индийцоря. Андо 19 вико кардэ авэнас бут мануша анда Индия, кай тэ терэн бути пэ мал. Ай лэндирэ потомкоря ужэ на терэнас бути пэ маля, но жувэнас котэ. Вонэ на бистэрдэ пэстири культура, о хамос, саво вонэ драго гитонас, особенно лэнго лашо хамос карри. Инке вонэ драго дэнас дума пэ английско шыб. Важ када амэнди сас май вушэро тэ дас дума лэнца пала Дэл.

Андэ кодэя время о пианеро трэбуй сас тэ служый 150 часоря андо шон. Важ када амэ ла хулаяса камасас тэ служысарас по 6 часоря андо дес. Кала амэ жылям андэ служэния, сас фартэ жарко и ԥарэс тэ ԥурдас. Повторни посещения амэндэ на сас и изучения тожэ, и важ када амэ служысарасас кати па цэра. Манди здяпэ, кай амэ ужэ роздолӷо служысарас и ужэ трэбуй тэ жас цэрэ. Но кала диқлэм пэ время, мэ полэм, кай амэ служысарас кати 40 минут. Тоди мэ запэрэжывал, сар амэ катэ сможэм тэ служысарас?

Но амэ ӥто присытелям каринг о нэво ӷрафико. Кажно дес амэ ласас пэса варисо тэ хас и тэ пас. Ай кала камасас тэ отцыювас, стасас и машына варикай тала виточка, кай исин тенёчко. Паша амари машына стидэнаспэ бут индийски бэяцэ и обдиқэнас амэн. Через дэсавэ деса амэ полям, кай амэнди трэбуй тэ проритярдювас дуй, трин часоря андэ служэния, ай потом и время вурял фартэ ӥто.

Сар жэ драго сас тэ росԥэнас важ о Дэл лэ манушэнди, савэ любинас тэ прилэн пэстэ цэрэ лэ мирос! И идийски мануша стонас бари патив пэ авэр мануша, вонэ сас блаӷодарно народо и даранас дэвлэстар. Бут андар лэндэ прилэнас о чачимос анда Библия. Лэнди чалёлас тэ уӷанэн пала Иегова, пала лэско Шаво, пала Библия, пала кода, кай пэ ԥув авэла раё и пала кода, кай о Иегова рия лэ манушэн каринг и жызня. Через ек бэрш амэндэ ужэ сас 20 изучении. Кажно дес варисаво ери, каса амэ проандярасас изучения Библии, ақарэлас амэн каринг пэстэ, кай вмести тэ побэшас и тэ хас. Котэ амэнди фартэ чалёлас тэ жувас и тэ служысарас. Амари жызня сас фартэ бахтали!

Но ӥто амари служэния паруделя. Манди ԥэндэ тэ служысарав сар раёно надзирателё. Амэ служысарасас паша шукарнэ ҭана паша Индийско океано. Кажно курко амэ авасас андэ разни собрании и служысарас котэ лэ ԥралэнца и лэ ԥэянца. И кажно курко амэн прилэлас варико анда собрания. Амэ ашэлям лэнца сар чаче. Амэ полюбисардям лэн и лэндирэ бэятонэн. Прожылэ дуй бэрш, и амэнди позвонисардэ анда южноафриканско филиало, и ԥэндэ, кай камэн, кай амэ тэ рисавас палпалэ андо Вефилё. Мэ ԥэндэм, кай амэнди и катэ чалёл. Но амэ самас ӷотови тэ служысарас везде, каринг амэн тэ на бишалэн.

УПАЛЭ АНДО ВЕФИЛЁ

Манди ԥэндэ тэ служысарав андо служэбно отдело. Котэ мэ теравас дила лэ ԥралэнца, савэ бут бэрша служынас и ӷанэнас драго тэ терэн пэстири дила. Андэ кодэя время анда Вефилё бишалэнас письморя андэ собрания посли кода, сар лэндэ сас о раёно надзирателё. Кадя вонэ подритярэнас всаворэн андэ собрания и пистронас, со трэбуй тэ терэн и ԥрала и ԥэя. И секретарёря андэ служэбно отдело пристонас фартэ бут зор. Вонэ пэрэандярэнас и отчёторя, савэ терэнас и раёни надзирателя, па разни африкански шыба пэ английско шыб. Ай потом пэ кадэла жэ африкански шыба вонэ пэрэандярэнас и письморя, савэ авэнас анда филиало. Манди фартэ чалёлас, сар кадэла лашэ переводчикоря пристонас бут зор пэ када. Инке вонэ поможысардэ манди тэ полав, саво ԥаримос исин кай амарэ африкански ԥрала и ԥэя.

Андэ кодэя время андэ Южно Африка и мануша, савэндэ разно нацыя, трэбуй сас тэ жувэн отдельно ек еқэстар, и вонэ почти на диқэнаспэ ек еқэса. Амарэ ԥрала и ԥэя андэ Африка моӷли тэ диқэнпэ кати кодэлэнца, ко сас анда лэнго народо, тэ росԥэнэн пала Дэл кати лэнди и тэ ԥирэн пэ собрания, кай дэнас дума кати пэ лэнди шыб.

Жы каринг када мэ служысаравас андэ собрания, кай дэнас дума пэ английско шыб. Важ када мэ почти ни кас на ӷанавас анда африкански ԥрала. Ай акана мэ моӷ май драго тэ уӷанав лэн, лэндири культура и традицыи. Мэ уӷанглэм скати ԥаримос исин андэ лэндири жызня. Скати вонэ пристонас зор, кай тэ ашавэн кодэла законоря, савэ на чалён лэ Дэвлэсти. Пэр лэндэ фартэ тасавэлас о родо, о ери, и сосидоря, кай вонэ на ритярэнас и традицыи, савэ сԥанглэ лэ бэнгэнца. Ай кадяжэ вонэ жувэнас чорорэс и бут андар лэндэ сас най ӷрамотни, но вонэ стонас бари патив пэ Библия.

Мэ поможысаравас лэ ԥралэнди андэ юридическо отдело. Котэ амэ поможысарасас, кай лэ ԥралэнди и лэ ԥэянди и власти тэ дэн спокойно тэ служын лэ Иеговасти. Ай кадяжэ поможысарасас, кала и власти тасавэнас пэр лэндэ, кай вонэ на камэн тэ ӷулен андэ политика. Лэ бэятонэн, савэ на дилабэнас андэ школа о ӷимно и савэ на мангэнаспэ лэндирэ дэвлэнди, вишонас анда школа. Но вонэ на парашэнас тэ кандэн лэ Иеговас и сас фартэ смили. И кала мэ диқавас, сар вонэ када вся виритярэн, мэрни вера андо Дэл ашэлас май бари!

Инке сас фартэ ԥарэс лэ ԥралэнди и лэ ԥэянди, савэ жувэнас андэ най бари африканско страна, пэ сави ԥэнэнас Свазилендо. Кала муля лэнго правителё, всаворэнди ԥэндэ, кай и мурша тэ побриинпэ налысо, ай и жувля тэ подшынэн пэсти бал. Када сас обычаё, саво сыкавэлас, кай вонэ тэлён пэстирэ мулэнди. И пэ ԥрала и ԥэя, савэ отԥэндёнас тэ терэн када, линэ тэ тасавэн. Но вонэ на парашэнас тэ служын и тэ кандэн лэ Иеговас андо ԥаримос. Када лэлас амэн лэ одестар, и амэ бут сости сытелям лэндар.

УПАЛЭ КОРДЭ, КАЙ ПЕЧАТАЮТ И ЛИТЕРАТУРА

Андэ 1981 бэрш ман упалэ стодэ, кай тэ печатаю и литература. Амэнди трэбуй сас тэ терас бути па нэвэ технологии. Када сас фартэ интересно. И дицолас пэ яқа, сар фэдэр ля тэ печатаеца амари литература. Ек компания ԥэндя, кай амаро филиало можэт бесплатно тэ потерэл бути пэ лэндири нэви машынка, пэ сави печатают и литература, кай тэ уӷанас, сар вой терэл. Амэнди чалеля тэ терас пэр латэ дила, и амэ парудям и девять линотипов пэ панч кацавэ нэвэ машынки. Ай инке амэ стодям авэр нэви печатно бари машынка. Када андя фартэ бут лашимос!

Пэ компьютероря амэ сытелям тэ терас дила через и проӷрамма MEPS (када «Многоязычно электронно издательско система»). Вой поможысардя май фэдэр тэ терас и журналоря, савэ вимэкасас. И сар дэ драго, кай амэнди будэр на трэбуй сас кодэла барэ машынки, пэ савэ ԥэнэн линотипоря, важ савэ амэ лэштар авелям анда канадско Вефилё андэ Южно Африка! (Ис. 60:17). Каринг кодэя время амэ всаворэ ужэ самас жэнати. Амэндэ сас райканэ хулая, савэ сас пианерки и савэндэ сас лащи дружба лэ Иеговаса. Амэ лэ Биллоса кадяжэ служысарасас андо Вефилё, ай о Кено и о Деннисо пэстирэ еренца жувэнас най дур лэ Вефилёстар.

Андо Вефилё сас май бут и май бут бути. И библейско литература трэбуй сас тэ пэрэандярэн пэ бут шыба, потом ла печатали и одбишалэнас андэ авэр филиалоря. Прожыля время, и ужэ трэбуй сас тэ строисарас нэво Вефилё. Витидэ шукарно ҭан паша Йоханнесбурго, и андэ 1987 бэрш динэ алав, кай андэ кадэва нэво Вефилё лэна тэ служын лэ Иеговасти. Мэ бут бэрша служысаравас андо камитето андо южноафриканско филиало. И хоть тоди сас фартэ бут дила, всаек кала мэ сгиндосарав пала кодэя время, манди драго по ди.

УПАЛЭ ДЭН НЭВИ ДИЛА!

Андэ 2001 бэрш ман ақардэ тэ служысарас андо нэво Вефилё андэ США. Мэ удивисайлэм кадэлэсти. Канешно, манди и мэрня хулаяти сас ԥарэс тэ ашавас амари бути, сави амэнди чалёлас, и амарэ друӷонэн андэ Южно Африка. Но амэ всаек фартэ аштярасас, кала амэ ладаса тэ служысарас андо Вефилё андэ США.

Но амэ пэрэжывали пала ла Лорати дэй, сави сас андэ бэршэндэ. Амэ поласас, кай если амэ уладаса дур, тоди амэ нэ сможэм тэ заботисавас пала латэ. Но драго, кай латирэ трин ԥэя линэ тэ диқэн пала пэстири дэй. Вонэ ԥэндэ, кай раз вонэ нэ моӷут тэ служын сар пианероря, тоди вонэ поможына амэнди тэ служысарас май бут лэ Иеговасти. Амэ лэнди фартэ блаӷодарни!

Ай пала мэрни дэй, сави ашэляпэ би хуласко, ля тэ заботийпэ мэрно ԥрал ла хулаяса. Вонэ жувэнас андэ Торонто. Мэрни дэй лэнца прожудя май бут чем 20 бэрш. Амэ лэнди фартэ блаӷодарни, кай вонэ драго пала латэ диқэнас! Но кала амэ авелям андо Нью-Йорко май пашэ каринг мэрнэ, прожыля набут время, и мэрни дэй муля. Манди сас ԥарэс, но мэ фартэ блаӷодарно лэ Иеговасти, кай амэндэ ла хулаяса исин кацаво родо, саво заботийпэ пала амарэ ԥурэ родителя. Амэ полас, кай дэкала тэ заботиспэ пала ԥурэ мануша най вушэро.

Посли кода сар амэ пэрэлаглям андэ Америка, мэ дэсави время теравас андо вефильско отдело, кай вимэкэнас и литература. Мэ диқавас, сар линэ май драго тэ печатают и тэ вимэкэн и литература. Потом мэ лэм тэ терав андо отдело, кай затинэн вся, со трэбуй важ и вефильцоря. Манди випэля бари бах тэ служысарав 20 лет андэ кацаво баро Вефилё, кай служынас варикай 5 000 вефильцоря и 2 000 добровольцоря!

Да, 60 бэрш палпалэ мэ нэ моӷ дажэ тэ погиндосарав, кай мэ акана лава тэ служысарав. Всаворэ кадэла бэрша ман подритярэлас мэрни хулаи и Лора. Андэ амари жызня сас бут лашимос. И амэ блаӷодарни лэ Иеговасти, кай во дэлас амэнди бут разно дила андэ вефилёря, савэ исин па вся и люма. Ай кадяжэ мэ блаӷодарно лэ Иеговасти важ всаворэ мануша, савэнца мэ котэ служысаравас и савэн уӷанглэм. Акана манди май бут чем 80 бэрш и мэ ужэ терав най кадя дэ бут дила, сар теравас варикала. Но драго, кай амэндэ исин бут тэрнорэ ԥрала, савэ акана моӷут тэ терэн вся кадэя дила.

И мэ моӷу тэ ԥэнав, сар и о псалмопевцо, саво ԥэндя: «Бахтало миро, каско Дэл о Иегова» (Пс. 33:12). Наис лэ Иеговасти, кай мэ моӷу тэ служысарав лэсти еқэ ҭанэ лэстирэ бахталэ народоса!