«Надеисав по Иегова»

1. а) Сави надежда амэнди дя о Иегова? б) Со када тэ надеиспэ по Иегова? (Диқэн «Сар када тэ полас».)

О ИЕГОВА дя райкани надежда всаворэнди, ко лэс любий. Ӥто во улэла вся о насвалимос, всаворэ биды и смэрть (Отк. 21:3, 4). Во поможыя кодэлэнди, кастэ ковло ди, тэ стерэн, кай о раё тэ авэл па вся и ԥув (Пс. 37:9—11). И амэндэ авэла инке май лащи и май пашутни дружба лэ Иеговаса, чем акана. Сави дэ райкани надежда! Но васо амэ можэм тэ патяс кадэлэсти? Важ кода кай о Иегова всегда зритярэл пэско алав. Вижал, амэндэ исин бут причины, васо тэ надеисавасb по Иегова (Пс. 27:14). Амэ анда вся оди аштярас, кала о Иегова зритярэла пэстирэ обещянии (Ис. 55:10, 11).

2. Сар о Иегова доԥэндя, кай зритярэл пэстирэ обещянии?

² О Иегова ужэ доԥэндя, кай зритярэл пэстирэ обещянии. Роздиқаса ек примеро. Андэ книӷа Откровение о Иегова дя алав, кай стидэла вмести лэ манушэн «анда всаворэ нацыи, народоря и шыба» и вонэ лэна тэ тэлён лэсти. Пэ кадэя ӷрупа ԥэнэн «фартэ бут мануша» (Отк. 7:9, 10). Хоть андэр латэ ужан разни мануша па вся и ԥув, вонэ вмести тэлён лэ чачунэ Дэвлэсти сар ек баро ери, андэ саво всаворэ любин ек еқэс (Пс. 133:1; Иоан. 10:16). Кадяжэ вонэ анда вся оди росԥэнэн аврэнди пала Иегова. Кала и мануша камэн тэ ашунэн лэн, вонэ всегда ӷотови тэ росԥэнэн пала пэстири надежда (Матф. 28:19, 20; Отк. 14:6, 7; 22:17). Если и тумэ ужан андэ «фартэ бут мануша», тоди кадэя надежда тожэ куч тумарэ одести.

3. Со камэл тэ стерэл о Сатана?

³ О Сатана камэл, кай амэ тэ хасарас пэстири надежда. Во терэл вся, кай амэ тэ патяс, кай о Иегова на позаботияпэ пала амэндэ и на зритярэла пэстирэ обещянии. Если кай о Сатана вижала када тэ стерэл, амэ хасараса пэстири смилость и можэм дажэ тэ парашас тэ служысарас лэ Иеговасти. Имено кадя лэ Дэвлэско вороӷо андярдя пэс лэ Иовоса. Во камэлас, кай о Иово тэ хасарэл и надежда и тэ парашэл тэ служый лэ Иеговасти.

4. Пала со амэ подаса дума андэ кадэя статья? (Иов 1:9—12).

⁴ Андэ кадэя статья амэ роздиқаса, со терэлас о Сатана, кай о Иово тэ одбандёл лэ Иеговастар. (Проадинон Иов 1:9—12.) Кадяжэ амэ подаса дума, сости амэ можэм тэ сытювас анда лэ Иовоско примеро и васо трэбуй тэ сэрас, кай о Иегова любий амэн и всегда зритярэл пэстирэ обещянии.

О САТАНА СТАРЫИЙПЭ ТЭ ОДЛЭЛ КАЙ О ИОВО И НАДЕЖДА

5, 6. Со тердяпэ кай о Иово важ и найбари время?

⁵ Кай о Иово сас райкани жызня. О Иегова сас лэско пашутно друӷо. Лэстэ сас баро и дружно ери, ай кадяжэ во сас фартэ барвало (Иов 1:1—5). Но потом важ ек дес во хасардя почти вся. Во ашэляпэ пэ кали ԥув. Спэрва во хасардя пэско барвалимос (Иов 1:13—17). Ай тоди во уӷангля, кай всаворэ лэстирэ бэяцэ мулинэ. Сави дэ бари бида сас кай о Иово! Кала и родителя хасарэн дажэ еқэ бэятос, када анэн лэнди фартэ бари дук. Прецтавьте, со сас по ди кай о Иово и кай лэстири хулаи, кала вонэ уӷанглэ, кай лэндирэ дэш бэяцэ мулинэ андэ ек дес! Вонэ сас умардэ бидаса. Амэ полас васо о Иово «росшындя пар пэстэ ӥда и... пэля пэ чанга» (Иов 1:18—20).

⁶ Потом о Сатана заля кай о Иово лэско зор и стердя, кай пэр лэстэ будэр тэ на стон патив (Иов 2:6—8; 7:5). Раньшэ и мануша пативалэс обжанаспэ лэса и пушэнас лэстар совето (Иов 31:18). Ай акана вонэ линэ лэс тэ обнашэн. Во ашэляпэ екжэно. Лэстар одбанделэ лэстирэ ԥрала, друӷоря и дажэ лэстирэ слуӷоря, савэ сас андэ лэско цэр (Иов 19:13, 14, 16).

7. а) Кас о Иово моӷ тэ дошалярэл андэ пэстири бида, но со во на ля тэ терэл? б) Диқэн пэ картинка. Со можэт тэ авэл андэ жызня кай о христианино?

⁷ О Сатана камэлас, кай о Иово тэ патял, кай о Дэл лэса нэдовольно и кай када во дошало андэ лэстири бида. Например, о Сатана использовал бари балвал, кай тэ зындярэл о цэр, андэ саво сас всаворэ дэш лэ Иовостирэ бэяцэ (Иов 1:18, 19). Кадяжэ во бишалдя па нэбо и яг, кай тэ сԥабарэл лэ Иовостирэ стадоря и лэстирэ слуӷонэн, савэ диқэнас пала лэндэ (Иов 1:16). О Иово моӷ тэ гиндой: «Если и балвал и яг сжанас па нэбо, значит, када сас лэ Дэвлэстар. Вижал, мэ варисоса холярдэм лэ Иеговас?» Но всаек, о Иово на ля тэ дэл амрая пэстирэ небеснонэ Дадэс. Во прижанэлас, кай важ кадэла бэрша о Иегова дя лэсти фартэ бут лашимос. О Иово авеля каринг кацаво гиндо, кай лэ Дэвлэстар трэбуй тэ прилэл и о лашимос, и о найлашимос. Во ԥэндя: «Мэк славийпэ лэ Иеговаско алав» (Иов 1:20, 21; 2:10). Хоть о Иово хасардя о хабэ, пэстирэ бэятонэн и о зор, во всаек ашэляпэ предано лэ Иеговасти. Но о Сатана на сдэласпэ.

8. Со дальшэ ля тэ терэл о Сатана?

⁸ Акэ со инке стердя о Сатана. Каринг о Иово авелэ трин мануша, савэ притерэнаспэ, кай вонэ лэстирэ друӷоря. Через лэндирэ алава о Иово моӷ тэ гиндой, кай во нисо на ашэл. Вонэ линэ тэ ԥэнэн, кай лэстэ кацаво ԥаримос важ кода, кай во стердя варисаво бэзэх и кай во екжэно дошало андэ пэстири бида (Иов 22:5—9). Ай кадяжэ вонэ старыинаспэ тэ доԥэнэн лэсти, кай дажэ если во стердя андэ жызня фартэ бут лашимос, лэ Дэвлэсти всаек пэ када (Иов 4:18; 22:2, 3; 25:4). Вонэ камэнас, кай о Иово тэ патял, кай па чачимастэ о Иегова на любий лэс, на заботийпэ пала лэстэ и нинай нисаво смысло тэ служый лэсти. Через лэндирэ алава о Иово моӷ тэ хасарэл пэстири надежда и тэ умэкэл и вас.

9. Со поможысардя лэ Иовости тэ ашэлпэ смило и састо?

⁹ Прецтавьте, сар о Иово бэшэл андо пепло. Лэстэ фартэ дуқал вся и тила (Иов 2:8). Пэр лэстэ динэ бида пала бидатэ. Лэско ди росшындёл кодэлэстар, кай во хасардя пэстирэ бэятонэн. Тоди и «друӷоря» ԥэнэн лэсти, кай во найлашо мануш и кай вся, со во терэл, нисо на ашэл (Иов 2:13—3:1). Кадэлэстар лэстэ бар по ди, и во ашэл мулком. Кадэла мануша моӷли тэ погиндон, кай во на дэл дума, важ кода кай одбанделя лэ Дэвлэстар. Но када най кадя! И акэ о Иово ваздэл о шэро и ԥэнэн: «Пока мэ на мэрава, ашавапэ вужо англа Дэл!» (Иов 27:5). Со поможысардя лэ Иовости тэ ашэлпэ смило и састо андэ кацави бида? Дажэ кала во умэкля и вас, во на хасарэлас и надежда, кай о Дэл лэсти поможыя. Во ӷанэнас, кай дажэ если во мэрэла, о Иегова обязательно рия лэс каринг и жызня (Иов 14:13—15).

СОСТИ АМЭ МОЖЭМ ТЭ СЫТЮВАС КАЙ О ИОВО?

10. Сости амэ сытювас кай о Иово?

¹⁰ Кала амэ адиносарас пала Иово, амэ полас дуй маменторя. Пэрво, о Сатана нэ можэт тэ заставий амэн тэ одбандювас лэ Иеговастар. Дуйто, о Иегова драго ӷанэн, со терэлпэ андэ амари жызня. Давайте роздиқаса инке дэсавэ урокоря, савэ исин андэ кадэя история.

11. Андэр со амэ можэм тэ авас уверени, если на парашас тэ патяс лэ Иеговасти? (Иакова 4:7).

¹¹ О Иово доԥэндя, кай если амэ на парашаса тэ патяс лэ Иеговасти, амэ можэм тэ виритярас любо ԥаримос и тэ на домэкас, кай о Сатана тэ победий. Сар ԥэнэнпэ андэ Библия, тоди о Сатана нашэлатар амэндар. (Проадинон Иакова 4:7.)

12. Сар лэ Иовос подритярэлас и надежда, кай о Иегова рия лэ манушэн каринг и жызня?

¹² Амэ трэбуй састэс тэ патяс, кай о Иегова рия лэ манушэн каринг и жызня. Сар ԥэнэнаспэ андэ кодэя статья, о Сатана часто использует и дар англа смэрть, кай тэ заставий амэн тэ отԥэндювас лэ Дэвлэстар. О Сатана ԥэндя, кай о Иово жала пэ вся, кай тэ спасый пэстири жызня, дажэ если прижалапэ тэ одбандёл лэ Иеговастар. Но во сас нэправо. Дажэ андэ само ԥаро маменто, кала о Иово гиндояс, кай во мэрэла, во ашэляпэ предано лэ Иеговасти. Во сас уверено, кай о Иегова фартэ добро и улэла лэско ԥаримос. Када дэлас лэсти зор вся тэ виритярэл. О Иово патялас, кай дажэ если о Иегова на поможыя лэсти, пока во жувэл, май англэ во обязательно рия лэс каринг и жызня. Во састэс патялас андэ воскресения. Если и амэндэ авэла кацави жэ увереность, сар кай о Иово, тоди, дажэ если прижалапэ тэ хасарас и жызня, амэ никала на одбандюваса лэ Иеговастар.

13. Васо амэ трэбуй тэ шас сама, сар о Сатана обжыляпэ лэ Иовоса?

¹³ Важно тэ шас сама, сар о Сатана обжыляпэ лэ Иовоса, важ кода кай адес во андярэл пэс кадя жэ. Акэ со ԥэндя о Сатана: «Важ пэстири жызня о мануш [най кати о Иово] отдэла вся, со лэстэ исин» (Иов 2:4, 5). Аврэ алавэнца, о Сатана доԥэнэн, кай па чачимастэ амэ на любисарас лэ Иеговас и кай важ пэстири жызня, амэ отԥэндюваса лэстар. Кадяжэ во ԥэнэн, кай о Иегова амэн на любий и кай амэндэ на вижала лэсти тэ уӷодисарас. Но амэ ӷанас, со камэл о Сатана, и важ када лэстэ на вижала амэн тэ дилярэл.

14. Со амэ можэм тэ уӷанас пала пэстэ, кала амэндэ исин ԥаримос? Росԥэнэн примеро.

¹⁴ Амэ трэбуй тэ диқас пэ пэско ԥаримос, сар пэ возможность май драго тэ уӷанас корко пэс. И бида, сави сас кай о Иово, поможысардя лэсти тэ полэл, савэ лэстэ исин нэдостаткоря, и тэ парудёл. Например, во поля, кай лэсти на хутилэл смирения (Иов 42:3). Кадяжэ и амэ можэм тэ уӷанас бут со нэво пала пэстэ, кала амэндэ исин трудности. Лэ ԥралэс, савэс ақарэн Николаёc, бэшардэ андо баруно, хоть лэстэ сас найлашо зор. Во ԥэнэн: «О баруно — када, сар ренгенто, саво поможый тэ полас, савэ амэндэ исин качества, ай савэ нинай». Кала амэ полас, савэ амэндэ нэдостаткоря, амэ можэм тэ стас зор, кай тэ парудювас.

15. Кас амэ трэбуй тэ ашунас и васо?

¹⁵ Важно тэ ашунас лэ Иеговас, ай най амарэ вороӷонэн. Кала о Иегова дэлас дума лэ Иовоса, во лэс внимательно ашунэлас. Прецтавьте, кай о Иегова ԥэнэн лэсти: «Дик пэ кода, со мэ создал. Хэба ту на диқэс, саво дэ баро мандэ зор? Мэ драго ӷанав пала вся, со туса терэлпэ. Ту гиндос, кай мэ бистэрдэм пала тутэ?» О Иово смирено атветил лэ Иеговасти: «Раньшэ мэ кати ашунавас пала тутэ. Ай акана мэ диқав тут пэстирэ яқэнца» (Иов 42:5). Дицол, кай во фартэ цэнияс лэ Иеговастири доброта. Кала о Иово ԥэндя кадэла алава, наверно, во инке бэшэлас андо пепло, пэ лэстири тила сас бут нарыворя, ай лэско ди фартэ дуқалас кодэлэстар, кай мулинэ лэстирэ бэяцэ. И хоть лэстири ситуацыя инке на паруделя, о Иегова сыкадя лэсти, кай фартэ любий лэс и кай во лэсти уӷодно (Иов 42:7, 8).

16. Пала со амэ трэбуй тэ сэрас, кала амэндэ исин трудности, сар ԥэнэнпэ андэ Исайя 49:15, 16?

¹⁶ Адес тожэ бут мануша андярэн пэс амэнца кадя, кабута амэ нисо на ашас. Дэсавэ андар лэндэ старыинпэ тэ римон и репутацыя важ амари арӷанизацыя и хохавэн пар мэндэ (Матф. 5:11). Но анда лэ Иовоско примеро дицол, кай о Иегова уверено, кай амэ ашасапэ предани лэсти, дажэ андо ԥаримос. Амаро небесно Дад любий амэн и никала на ашавэла кодэлэн, ко надеийпэ пэр лэстэ. (Проадинон Исайя 49:15, 16.) На шон сама пэ алава, савэ ԥэнэн лэ Иеговастирэ вороӷоря! Кай о ԥрал Джеймсо анда Турцыя и кай лэско ери сас фартэ барэ трудности. Акэ со во росԥэнэн: «Амэ полям, кай если ласа тэ ашунас о хохаимос, саво ԥэнэн по лэ Иеговаско народо, амэ умэкаса и вас. Важ када амэ лям май фартэ тэ гиндосарас пала амари надежда и анда вся оди служысарасас лэ Иеговасти. Када поможысардя амэнди тэ на хасарас и радость». Кадя жэ сар о Иово, ашунэн лэ Иеговас. На домэкэн, кай через о хохаимос, саво ԥэнэн лэ Дэвлэстирэ вороӷоря, тумэ тэ хасарэн пэстири надежда!

И НАДЕЖДА ПРИДЭЛА ТУМЭНДИ ЗОР

17. Сости амэ сытювас кай и верни лэ Дэвлэстирэ служытеля, пала савэ ԥэнэнпэ андэ 11 ӷлава Евреям?

¹⁷ Канешно, най кати о Иово ашэляпэ смило и састо, кала сас ԥаримос. О апостоло Павло росԥэнэн лэ евреёнэнди андэ пэско письмо пала бут авэр верни лэ Дэвлэстирэ служытеля, пэр кастэ ԥэнэн «фартэ бут свидетеля» (Евр. 12:1). Лэндэ всаворэндэ сас барэ трудности, но вонэ ашэлэпэ предани лэ Иеговасти (Евр. 11:36—40). Сас када евья? Най! Вонэ всаворэ́ одеса надеинаспэ по Иегова, хоть и на диқлэ, сар во зритярдя пэстирэ обещянии. Вонэ ӷанэнас, кай о Иегова лэнца довольно, и важ када сас уверени, кай во зритярэла пэско алав (Евр. 11:4, 5). Лэнго примеро поможыя и тумэнди тэ на парашэн тэ надеинпэ по Иегова.

18. Со тумэ закамлэ тэ терэн? (Евреям 11:6).

¹⁸ Амэ жувас андэ люма, кай и мануша фартэ найдраго пэс андярэн (2 Тим. 3:13). О Сатана на парашэл тэ тасавэл по лэ Дэвлэско народо. Амэндэ андэ жызня фартэ бут ԥаримос. Но амэ «надеисавас по жундо Дэл» (1 Тим. 4:10). Давайте анда вся оди тэ служысарас лэсти! О лашимос, саво о Иегова дя лэ Иовости, драго сыкавэл, кай во «фартэ любий и жалуий анда вся оди» (Иак. 5:11). Кадя жэ сар о Иово, авэн предани лэ Иеговасти. Патян: во обязательно блаӷословия кодэлэн, «ко фартэ родэл лэс»! (Проадинон Евреям 11:6.)