Ай тиро алав исин андэ «книӷа важ и жызня»?

1. Сави книӷа, сар ԥэнэнпэ андэ Малахия 3:16, пистрой о Иегова и со андэр латэ запистромэ?

УЖЭ най ек тысяча бэрш о Иегова пистрой особено книӷа. Андэр латэ запистромэ лэ манушэндирэ алава, савэ лэсти предани. Пэрво андар лэндэ сас верно лэ Иеговаско служытелё о Авелё (Луки 11:50, 51)b. Важ бут викоря о Иегова запистрояс андэ кадэя книӷа нэвэ лэ манушэндирэ алава, и адес лэн ужэ милионоря. Андэ Библия пэ кадэя книӷа ԥэнэнпэ «книӷа, кай тэ сэрэл», «книӷа важ и жызня» и «ла жызняко свитко». Андэ кадэя статья амэ пэр латэ ласа тэ ԥэнас «книӷа важ и жызня» (проадинон Малахия 3:16; Отк. 3:5; 17:8).

2. Кастирэ алава запистромэ андэ книӷа важ и жызня и со трэбуй тэ терас, кай амаро алав тожэ тэ авэл котэ?

² Андэ кадэя особено книӷа исин алава кодэлэндирэ, касти куч лэ Иеговаско алав и кастэ исин дар тэ на уӷодий лэсти. Кадэла мануша лэна тэ жувэн вечно. Со тэ терас, если амэ камас, кай амаро алав тожэ тэ авэл запистромэ андэ кадэя книӷа? Трэбуй тэ терас вся, кай амари дружба лэ Иеговаса тэ авэл састи. Када возможно блаӷодаря кодэлэсти, кай о Иисус Христос отдя пэстири жызня, кай тэ витинэл амэн (Иоан. 3:16, 36). Сави бы амэндэ надежда тэ на авэл — тэ жувас по нэбо или пэ ԥув, — всаворэ амэ камас, кай амаро алав тэ авэл запистромэ андэ кадэя книӷа.

3, 4. а) Если амаро алав запистромэ андэ книӷа важ и жызня, сыкавэл када, кай амэ ласа тэ жувас вечно? Росԥэнэн. б) Со амэ уӷанаса андэ кадэя и андэ авэр статья?

³ Но можно тэ ԥэнас, кай и мануша, савэндирэ алава запистромэ андэ кадэя книӷа, точно получина и вечно жызня? Атвето амэ арақас андэ алава, савэ о Иегова ԥэндя лэ Моисеёсти: «Мэ стрисарава анда мэрни книӷа кодэлэс, ко стердя бэзэх против мандэ» (Исх. 32:33). Вижал, лэ манушэндирэ алава, савэ акана исин андэ кадэя книӷа, о Иегова можэт тэ стрий, кабута во лэн пистросардя карандашоса (Отк. 3:5). Амэнди трэбуй тэ пристас зор, кай амаро алав тэ ашэлпэ андэ кадэя книӷа жы каринг кодэя время, пока о Иегова на запистроя лэс кордэ пэ вся и жызня — ԥэнэса, ручкаса.

⁴ Но амэндэ моӷут тэ авэн дэсавэ вопросоря. Например, со андэ Библия ԥэнэнпэ пала кодэла мануша, кастирэ алава запистромэ андэ книӷа важ и жызня и пала кодэла, савэндирэ алава нинай андэр латэ? Кала получина и вечно жызня кодэла, кастирэ алава запистромэ андэ кадэя книӷа? Ай со авэла кодэлэнца, ко ужэ муля, но лэндэ на сас возможность тэ уӷанэн лэ Иеговас? Моӷут лэндирэ алава тэ авэн запистромэ андэ кадэя книӷа? Атветоря пэ кадэла вопросоря амэ уӷанаса андэ кадэя и андэ авэр статья.

КАСТИРЭ АЛАВА ЗАПИСТРОМЭ АНДЭ КНИӶА ВАЖ И ЖЫЗНЯ?

5, 6. а) Кастирэ алава, сар ԥэнэнпэ андэ Филиппийцам 4:3, запистромэ андэ книӷа важ и жызня? б) Кала о Иегова запистроя андэ кадэя книӷа лэндирэ алава пэ вся и время?

⁵ Кастирэ алава запистромэ андэ книӷа важ и жызня? Кай тэ уӷанас када, подам дума пала панч ӷрупы манушэн. Варикастирэ алава запистромэ андэ кадэя книӷа, ай варикастирэ най.

⁶ Андэ пэрво ӷрупа ужан и мануша, савэн витидэ, кай тэ правин лэ Иисусоса по нэбо. Запистромэ лэндирэ алава андэ книӷа важ и жызня? Да. Кала о апостоло Павло пистросардя лэ христианонэнди андэ Филиппы, во ԥэндя пала помазани христианоря, савэндирэ алава запистромэ андэ кадэя книӷа важ и жызня. (Проадинон Филиппийцам 4:3.) Но кай лэндирэ алава тэ ашэнпэ андэр латэ, вонэ трэбуй и май дур тэ на парашэн тэ кандэн лэ Дэвлэс. Кала о Дэл стола пэр лэндэ и послиднё печать, во запистроя лэндирэ алава андэ кадэя книӷа пэ вся и время. Важ варикастэ када авэла англа кода, сар тэ мэрэн, ай важ варикастэ англа кода, сар тэ залэлпэ и само бари бида (Отк. 7:3).

7. Сар и Откровение 7:16, 17 поможый тэ полас, кала о Иегова запистроя лэ манушэндирэ алава андэ книӷа важ и жызня пэ вся и время?

⁷ И дуйто ӷрупа — када и «фартэ бут мануша». Запистромэ лэндирэ алава андэ книӷа важ и жызня? Да. Ашэнапэ вонэ котэ посли о Армагеддоно? Да (Отк. 7:14). О Иисусо ԥэндя, кай кадэла мануша, савэн сыстосардэ лэ бакрорэнца, «лэна вечно тэ жувэн» (Матф. 25:46). Но кодэла, ко пэрэжувэна о Армагеддоно, най сразу получина и вечно жызня. Лэндирэ алава кадяжэ авэна запистромэ андэ кадэя книӷа, ԥэнэса, карандашоса. Кала о Иисусо лэла тэ правий и 1 000 бэрш, во «лэла тэ пасый лэн и тэ андярэл кордэ, катар жал ла жызняко паи». И алава кодэлэндирэ, ко кандэла лэ Христос и авэла предано лэ Дэвлэсти, о Иегова запистроя андэ книӷа важ и жызня пэ вся и время. (Проадинон Откровение 7:16, 17.)

8. Кастирэ алава нинай андэ книӷа важ и жызня и со лэн аштярэл?

⁸ Андэ трито ӷрупа ужан и мануша, савэ авэна уничтожэни андо Армагеддоно. Лэндирэ алава нинай андэ книӷа важ и жызня. О Иисусо сыстосардя лэн лэ бузнэнца и ԥэндя, кай «лэндар навсегда одлэна и жызня» (Матф. 25:46). О апостоло Павло кадяжэ ԥэндя пала лэндэ: «Лэнди авэла виандярдо о приӷоворо, и вонэ авэна пэ вся и время уничтожэни» (2 Фес. 1:9; 2 Пет. 2:9). Кадяжэ када аштярэл кодэлэн, ко спецыально терэлас бэзэх против свынто духо. Лэн аштярэл най и вечно жызня, ай вечно уничтожэния. Амэ драго полас, кай о Иегова кацавэ манушэн на воскресия (Матф. 12:32; Мар. 3:28, 29; Евр. 6:4—6). Акана давайте шаса сама пэ дуй ӷрупы манушэн, савэн о Иегова рия каринг и жызня пэ ԥув.

КОДЭЛА, КАС О ДЭЛ РИЯ КАРИНГ И ЖЫЗНЯ

9. Савэ дуй ӷрупы манушэн авэна рисардэ каринг и жызня пэ ԥув и соса вонэ на шонпэ машкар пэстэ? (Деяния 24:15).

⁹ Андэ Библия ԥэнэнпэ, «кай ринапэ каринг и жызня кодэла, ко муля, праведни и нэправедни». Кай кадэла дуй ӷрупы манушэн авэла возможность тэ жувэн вечно пэ ԥув. (Проадинон Деяния 24:15.) И «праведни» мануша — када кодэла, ко вся и жызня предано служынас лэ Иеговасти. Ай и «нэправедни» на сас лэ Иеговастирэ служытеля. Кода, сар вонэ пэс андярэнас, драго сыкавэл, кай вонэ нэправедни мануша. Но если и мануша анда кадэла дуй ӷрупы воскреснут, запистромэ лэндирэ алава андэ книӷа важ и жызня? Кай тэ полас када, давайте подаса дума пала кажно анда кадэя ӷрупа.

10. Васо о Иегова воскресия лэ праведнонэ манушэн и сави честь авэла кай дэсавэ андар лэндэ? (Пала воскресения пэ ԥув кадяжэ можно тэ проадинон андэ статья «И читателя пушэн» андэ кадэва выпуско.)

¹⁰ Штарто ӷрупа — када и «праведни». Кала вонэ инке жувэнас, о Иегова запистросардя лэндирэ алава андэ книӷа важ и жызня. Но стрисардя во лэн анда кадэя книӷа посли лэндири смэрть? Най, важ кода кай во вся и время пала лэндэ сэрэл. Сар ԥэндя о Иисусо, о Иегова — «Дэл най лэ мулэнго, ай лэ жундэнго, важ кода кай важ лэстэ вонэ всаворэ жундэ» (Луки 20:38). Вижал, кала вонэ воскреснут пэ ԥув, лэндирэ алава идоси авэна андэ кадэя книӷа, но запистромэ, ԥэнэса, карандашоса (Луки 14:14). Амэ патяс, кай дэсавэ анда кадэла мануша авэна «князёнэнца па вся и ԥув» (Пс. 45:16). Када важ лэндэ бари честь.

11. Со трэбуй тэ уӷанэн и «нэправедни» мануша англа кода, сар о Иегова тэ запистрой лэндирэ алава андэ книӷа важ жызня?

¹¹ Акана подам дума пала панчто ӷрупа, пала «нэправедни» мануша. Вонэ на андярэнас правильно пэстири жызня (возможно, важ кода кай на ӷанэнас лэ Иеговаско законо). Важ када лэндирэ алава нинай андэ книӷа важ и жызня. Но о Дэл воскресия лэн и дэла лэнди возможность тэ попэрэн андэ кадэя книӷа. Канешно, кадэлэ манушэнди трэбуй авэла бари помощь. Англа кода, сар лэн тэ на ашэл, вонэ терэнас андэ пэстири жызня фартэ бут найлашымос. Важ када лэн трэбуй авэла тэ сытярэн, сар тэ жувэн па лэ Иеговаско праведно законо. Кай кадя тэ авэл, лэ Дэвлэско Царство стерэла само бари обучения, сави инке ни еқвар на сас андэ люма.

12. а) Ко лэла тэ сытярэл лэ нэправеднонэ манушэн? б) Со авэла кодэлэнца, ко отԥэндёла тэ парудёл?

¹² Ко лэла тэ сытярэл лэ нэправеднонэ манушэн? И «фартэ бут мануша», ай кадяжэ и «праведни», савэ ринапэ каринг и жызня. Со трэбуй тэ терэн и нэправедни, кай лэндирэ алава тэ попэрэн андэ книӷа важ и жызня? Вонэ трэбуй тэ ашэн лэ Иеговастирэ друӷоря и тэ лэн тэ жувэн важ лэстэ. О Иисус Христос и памазаникоря лэна внимательно тэ диқэн, прилэн вонэ кода, сости лэн сытярэн, чи най (Отк. 20:4). Кодэлэнди, ко отԥэндёла тэ парудёл, о Дэл на дэла тэ жувэн вечно, дажэ если кацавэ манушэнди авэла ужэ 100 лет (Ис. 65:20). О Иегова и о Иисусо диқэн лэ манушэнго ди и на домэкэна, кай андо раё пэ ԥув варико тэ терэл вредо аврэнди (Ис. 11:9; 60:18; 65:25; Иоан. 2:25).

ВАРИКО ВОСКРЕСНЕТ ВАЖ И ВЕЧНО ЖЫЗНЯ, АЙ ДЭКО — ВАЖ О СЫНДО

13, 14. а) Сар амэ варикала поласас лэ Иисусостирэ алава анда Иоанна 5:29? б) Пэр со трэбуй тэ шас сама, кай тэ полас правильно лэстирэ алава?

¹³ О Иисусо тожэ ԥэндя пала мануша, савэн о Дэл рия каринг и жызня пэ ԥув: «Поджал о часо, андэ саво всаворэ, ко мулинэ ашунэна лэско ӷолосо и ущена. Ко терэнас лашымос, ринапэ каринг и жызня, кай тэ жувэн. Ай ко терэнас о найлашымос, ринапэ, кай о Дэл тэ сындой лэн» (Иоан. 5:28, 29). Пала со о Иисусо ԥэндя?

¹⁴ Раньшэ амэ гиндосарасас, кай о Иисусо ԥэндя пала лэ манушэндири дила, сави вонэ лэна тэ терэн посли кода, сар воскреснут: варико лэла тэ терэл о лашымос, ай авэр — о найлашымос. Но шон сама: о Иисусо на ԥэндя, кай кадэла мануша лэна тэ терэн лашымос или лэна тэ терэн о найлашымос. Во дэлас дума пала время, сави прожыля. О Иисусо ԥэндя пала кодэла, «ко терэнас лашымос», и пала кодэла, «ко терэнас о найлашымос». Вижал, и дума жалас пала дила, сави и мануша терэнас жы каринг пэстири смэрть. И када годявэрнэс, чаче ш? Важ кода кай андо раё пэ ԥув нико нэ сможэт тэ терэл о найлашымос. Вижал, и нэправедни мануша терэнас найлащи дила жы каринг кода, сар мулинэ. Сар жэ акана тэ полас лэ Иисусостирэ алава? Со во камля тэ ԥэнэн, кала дэлас дума пала кадэла дуй ӷрупы манушэн, савэ воскреснут?

15. Ко воскреснет, кай тэ получий и вечно жызня, и васо?

¹⁵ И праведни мануша, савэ терэнас лашымос, воскреснут, кай тэ получин и вечно жызня, важ кода кай лэндирэ алава ужэ запистромэ андэ книӷа важ и жызня. Вижал, андэ Иоанна 5:29, кай ԥэнэнпэ пала кодэла, ко «терэнас лашымос» и андэ Деяния 24:15, кай пистромэ: «ринапэ каринг и жызня кодэла, ко муля, праведни», ԥэнэнпэ пала ек. Васо амэ ԥэнас пала праведни мануша, кай лэндирэ алава запистромэ андэ книӷа важ и жызня, хоть вонэ и мулинэ? Андэ Римлянам 6:7 пистромэ: «Кодэва, ко муля, роспотинделя важ пэско бэзэх». Кала и праведни мануша мэрэн, о Иегова простий лэндирэ ӷрехоря. Но лэндири лащи дила во никала на бистрэл (Евр. 6:10). Важ када лэндирэ алава ашэнпэ андэ кадэя книӷа важ и жызня. Канешно, посли кода, сар и праведни мануша воскреснут, вонэ трэбуй и май дур тэ кандэн лэ Дэвлэс, кай во тэ на стрий лэндирэ алава анда книӷа важ и жызня.

16. Пала кастэ дэлпэ дума, кай вонэ «ринапэ, кай о Дэл тэ сындой лэн»?

¹⁶ Ай со можно тэ ԥэнас пала кодэла, ко терэнас о найлашымос? Хоть вонэ и на служынас лэ Иеговасти, посли кода, сар лэн на ашэля, во простисардя лэндирэ ӷрехоря. Лэндирэ алава андэ книӷа важ жызня нинай. Вижал, кодэла, ко «терэнас о найлашымос», — када кодэла жэ нэправедни мануша, пала савэ ԥэнэнпэ андэ Деяния 24:15. Вонэ «ринапэ, кай о Дэл тэ сындой лэн»c. Со када сыкавэл? О Иисусо лэла внимательно тэ диқэл пала лэндэ и пала кода, сар вонэ пэс лэна тэ андярэн (Луки 22:30). Трэбуй тэ прожал время, кай тэ дицол, достойни вонэ, кай лэндирэ алава тэ запистрон андэ книӷа важ и жызня чи най. Если и нэправедни мануша улэна пэстар и найлащи дила и лэна тэ жувэн важ о Иегова, во запистроя лэндирэ алава андэ пэстири книӷа.

17, 18. Со трэбуй тэ терэн кодэла, ко воскреснут каринг и жызня пэ ԥув и пала сави дила ԥэнэнпэ андэ Откровение 20:12, 13?

¹⁷ Всаворэ, ко воскреснут, — и праведни, и нэправедни — трэбуй авэна тэ жувэн па лэ Дэвлэско законо, саво авэла запистромэ андэ нэвэ свиткоря. Кадэла свиткоря авэна ԥэрнадэ андэ лэ Иисусостири Тысячелетнё правления. О апостоло Иоанно пистросардя: «Мэ додиқлэм лэ манушэн, савэ мулинэ, ашунглэн манушэн и найашунглэн, савэ тердён англа престоло, и додиқлэм, сар сас ԥэрнадэ и свиткоря. Сас ԥэрнадо инке ек свитко, када ла жызняко свитко. И кодэлэн, ко муля, сындосардэ па кода, со запистромэ андэ свиткоря, пала кода, со вонэ стердэ» (Отк. 20:12, 13).

¹⁸ Па сави дила лэна тэ сындон лэ манушэн, савэ ринапэ каринг и жызня? Жал катэ и дума пала кодэя дила, сави вонэ терэнас англа кода, сар мулинэ? Най! На бистрэн, кала лэн на ашэля, лэндирэ ӷрехоря о Дэл простисардя. Вижал, када нэ можэт тэ авэл кодэя дила, сави вонэ терэнас варикала. Май ӥто всаворэстар, катэ ԥэнэнпэ пала кода, сар вонэ пэс андярэна, кала лэн лэна тэ сытярэн андо раё пэ ԥув. Дажэ и праведни мануша, кацавэ, сар о Ноё, о Самуило, о Давидо и о Даниило, трэбуй авэна тэ уӷанэн пала Иисус Христос и тэ патян андэ лэстири жэртва. Если лэ праведнонэнди кадэлэсти прижалапэ тэ сытён, тем более и нэправедни трэбуй авэна бут со тэ уӷанэн!

19. Со аштярэл кодэлэн, ко на закамэла, кай лэндирэ алава навсегда тэ авэн запистромэ андэ книӷа важ и жызня?

¹⁹ Со аштярэл кодэлэн, ко на закамэла, кай лэндирэ алава навсегда тэ авэн запистромэ андэ книӷа важ и жызня? Андэ Откровение 20:15 ԥэнэнпэ: «И кажнонэс, кас на виарақлэ андэ ла жызнятири книжка, шутэ андо озеро ягаса». Вонэ авэна уничтожэни пэ вся и время. Важ када важно тэ терас вся, кай амаро алав тэ запистрон андэ книӷа важ и жызня и никала тэ на стрин!

20. Сави бари дила авэла андэ лэ Иисусостири Тысячелетнё правления? (Диқэн и картинка пэ обложка.)

²⁰ И время андэ лэ Иисусостири Тысячелетнё правления авэла фартэ удивительно! Авэла бари обучения, сави инке никала на сас. Кадяжэ и небесни сындомаря лэна тэ диқэн пала праведни и нэправедни мануша, сар вонэ пэс андярэна (Ис. 26:9; Деян. 17:31). Сар лэла тэ прожал и обучения, кала о Иисусо правия 1 000 лет? Авэр статья поможыя амэнди май драго тэ полас и тэ цэнисарас кадэя удивительно лэ Иеговастири обучения.