Сар о Иегова поможый амэнди тэ проповедуем

1. Со амэ ӷанас и андэр со амэ можэм тэ авас уверени?

О ИЕГОВА дя амэнди важно дила — тэ проповедуем. Но амэ ӷанас, кай дэсавэ мануша лэна тэ тасавэн пар мэндэ. Ай май англэ вонэ лэна тэ преследуют амэн инке май фартэ (Дан. 11:44; 2 Тим. 3:12; Отк. 16:21). Но всаек амэ уверени, кай о Иегова дэла амэнди зор када тэ виритярас. Васо? О Иегова всегда поможыяс пэстирэ служытелёнэнди тэ стерэн лэстири дила. Кай май бут тэ уӷанас пала када, давайте роздиқаса дэсавэ событии андэ жызня кай о пророко Иезекиилё, саво росԥэнэнас пала Дэл лэ евреёнэнди андо вавилонско плено.

2. Со о Иегова ԥэндя пала мануша, савэнди проповедовал о Иезекиилё, и со амэ роздиқаса андэ кадэя статья? (Иезекииль 2:3—6).

² Савэ мануша жувэнас котэ, кай проповедовал о Иезекиилё? О Иегова ԥэндя пала лэндэ, кай вонэ «ӷруби и упрями мануша» и «найкандино народо». Важ када о Иегова най еқвар ԥэндя лэ Иезекиилёсти: «На дар». (Проадинон Иезекииль 2:3—6.) О Иезекиилё моӷ тэ стерэл лэ Дэвлэстири дила, важ кода кай: 1) лэс бишалдя о Иегова, 2) лэсти дэлас зор о свынто духо и 3) лэс подритярэнас и алава анда лэ Дэвлэско Алав. Сар кадэла маменторя поможысардэ лэ пророкости? И сар када можэт тэ поможый амэнди адес?

ЛЭ ИЕЗЕКИИЛЁС БИШАЛДЯ О ИЕГОВА

3. Савэ алава трэбуй сас тэ придэн зор лэ Иезекиилёсти и сар о Иегова сыкадя, кай подритярэл лэс?

³ О Иегова ԥэндя лэ Иезекиилёсти: «Мэ бишалав тут» (Иез. 2:3, 4). Кадэла алава трэбуй сас тэ придэн зор лэ пророкости. Васо? Наверно, во сэрэлас, кай о Иегова ԥэндя кацавэ жэ алава лэ Моисеёсти и лэ Исайёсти, кала стодя лэн пэстирэ пророконэнца (Исх. 3:10; Ис. 6:8). Кадяжэ о Иезекиилё ӷанэнас, сар о Иегова поможыяс кадэлэ служытелёнэнди тэ виритярэн дэсавэ трудности. Важ када, кала о Иегова ԥэндя лэсти: «Мэ бишалав тут», о пророко моӷ тэ патял, кай о Иегова лэс подритярэла. Инке андэ книӷа Иезекииль амэ най еқвар адиносарас: «О Иегова ԥэндя манди» (Иез. 3:16). Андэр латэ бут разоря ԥэнэнпэ «О Иегова упалэ обратисайля каринг мандэ» (Иез. 6:1). Канешно, о Иезекиилё сас уверено, кай лэс бишалдя о Иегова. Кадяжэ лэско дад сас рашай, и во наверно росԥэнэнас пэстирэ шавэсти, кай о Иегова всегда подритярэлас пэстирэ пророконэн. Например, лэ Исаакости, лэ Иаковости и лэ Иеремиясти о Иегова ԥэнэнас: «Мэ туса» (Быт. 26:24; 28:15; Иер. 1:8).

4. Савэ гиндоря подритярэнас лэ Иезекиилёс и придэнас лэсти зор?

⁴ Сар май бут израильтяноря андярэнас пэс, кала о Иезекиилё проповедовал? О Иегова ԥэндя: «Но о израильско народо на закамэла тут тэ ашунэн, важ кода кай вонэ на камэн тэ ашунэн ман» (Иез. 3:7). Кала вонэ отԥэндёнас тэ ашунэн лэ пророкос, вонэ отԥэндёнас лэ Иеговастар. Кода, со ԥэндя о Иегова, подритярдя лэ Иезекиилёс. Хоть и мануша на ашунэнас лэс, када на сыкавэлас, кай во найлашо пророко. Кадяжэ о Иегова ԥэндя лэсти, кай кала лэстирэ алава исполнинапэ, и мануша «лэна тэ ӷанэн, кай машкар лэндэ сас пророко» (Иез. 2:5; 33:33). Канешно, кадэла гиндоря подритярэнас лэ Иезекиилёс и придэнас лэсти зор тэ терэл лэ Иеговастири дила.

АМЭН БИШАЛДЯ О ИЕГОВА

5. Со придэл амэнди зор, сар ԥэнэнпэ андэ Исайя 44:8?

⁵ Амэ ӷанас, кай амэн бишалдя о Иегова, и када придэл амэнди зор (Ис. 43:10). О Иегова ԥэнэн, кай амэ лэстирэ свидетеля. Сави дэ бари честь! Кадя жэ сар о Иегова ԥэндя лэ Иезекиилёсти: «На дара», во ԥэнэн и амэнди: «На даран». Васо амэ можэм тэ на дарас, кала амэн преследуют? Важ кода кай амэн, сар лэ Иезекиилёс, бишалдя о Иегова, и во амэн подритярэл. (Проадинон Исайя 44:8.)

6. а) Сар о Иегова ԥэнэн амэнди, кай лэла тэ поможый? б) Со амэнди придэл зор?

⁶ О Иегова дэл алав, кай лэла амэн тэ подритярэл. Например, англа кода, сар тэ ԥэнэн: «Тумэ мэрнэ свидетеля», во ԥэндя: «Кала ту прожаса через и пая, мэ авава туса, кала лэса тэ пэрэжас и лэна, вонэ на затасавэна тут. Кала жаса через и яг, вой на ԥабарэла тут, и пламя на опсмалия тут» (Ис. 43:2). И чаче, дэкала андэ служэния амэндэ моӷут тэ авэн барэ трудности, савэ шонпэ пэ лэн или пэ яг, сави фартэ можэт тэ росԥабол. Но лэ Иеговастирэ зорэса амэндэ вижала тэ на парашас тэ проповедуем (Ис. 41:13). Адес, сар и андэ лэ Иезекиилёстирэ деса, бут мануша на камэн тэ прилэн лэ Дэвлэско чачимос. Но важно тэ сэрас — када на сыкавэл, кай амэ найлашэ проповедникоря. О Иегова радуийпэ, кала амэ на парашас тэ проповедуем. И када фартэ придэл зор амэнди. Акэ со ԥэндя о апостоло Павло: «Кажнонэ манушэсти дэна лашимос важ лэстири дила» (1 Кор. 3:8; 4:1, 2). Ек ԥэй, сави служый пианероса ужэ бут бэрша, ԥэндя: «Када бари бах тэ ӷанэс, кай о Иегова блаӷословий кода, со амэ терас».

О СВЫНТО ДУХО ДЭЛАС ЗОР ЛЭ ИЕЗЕКИИЛЁСТИ

7. Со сас по ди кай о Иезекиилё, кала во розмышлял пала видения? (Диқэн и картинка пэ обложка.)

⁷ Андэ видения о Иезекиилё диқля, кай лэ Дэвлэско духо — када баро зор. О Иегова сыкадя лэсти, кай о свынто духо андярэл лэ зоралэ небеснонэ созданиен, ай кадяжэ и небесно колесница, савятэ барэ роты (Иез. 1:20, 21). Сар када повлияло по Иезекиилё? Акэ со во пистросардя: «Кала мэ додиқлэм када, мэ пэлэм пэ чанга и тэлелэм жы каринг и ԥув» (Иез. 1:28). Амэ полас, васо кай о Иезекиилё сас кацави дар англа Дэл. Потом во, наверно, бут разоря розмышлял пала кадэя удивительно видения. И када дя лэсти тэ патял, кай лэ Дэвлэстирэ зорэса лэстэ вижала тэ стерэл лэ Дэвлэстири дила.

8, 9. а) Со сас посли кода, сар о Иегова ԥэндя лэ Иезекиилёсти тэ ваздэлпэ? б) Сар о Иегова придя зор лэ Иезекиилёсти, кай во моӷ тэ служый андэ найвушэро тиритория?

⁸ О Иегова ԥэндя лэ Иезекиилёсти: «Шаво манушыкано, ущи! Мэ лава тэ дав дума туса». Кадэла алава придинэ лэсти зор тэ ваздэлпэ. О Иезекиилё пистросардя: «Андэр мандэ зажыля о духо и стодя ман пэ пэрнэ» (Иез. 2:1, 2). Ай потом вся пэстири служэния во диқэлас лэ Иеговаско вас (Иез. 3:22; 8:1; 33:22; 37:1; 40:1). Лэ Дэвлэско зор подритярэлас лэ пророкос, кай во тэ стерэл лэ Дэвлэстири дила: тэ проповедует лэ манушэнди, кастэ «састо чикат и упрямо ди» (Иез. 3:7). О Иегова ԥэндя лэсти: «Мэ стердэм тиро муй, кай тэ авэл кацаво жэ састо, сар лэнго муй, и тиро чикат, кацаво жэ састо, сар лэнго чикат. Мэ стердэм тиро чикат, сар алмазо, май састо, чем о кремнё. На дар лэндар и лэндирэ муестар» (Иез. 3:8, 9). Аврэ алавэнца, о Иегова ԥэндя: «На умэк и вас через кода, кай и мануша упрями. Мэ тут подритярава».

⁹ Посли када о Иегова андярдя лэ Иезекиилёс пэ вся лэстири «тиритория, кай во трэбуй сас тэ проповедует». О Иезекиилё пистросардя: «Мэ чувствовал пэр пэстэ зорало лэ Иеговаско зор». Цыло курко о Иезекиилё гиндояс пала кадэя видения, кай тэ полэл ла и тэ подготовица, кай потом тэ росԥэнэн пала када лэ манушэнди. И мануша сас трэбуй тэ диқэн, кай во екжэно андэ када патял (Иез. 3:14, 15). Тоди о Иегова андярдя лэ пророкос пэ равнина и котэ через пэско свынто духо дя лэсти зор (Иез. 3:23, 24). Акана о Иезекиилё сас ӷотово тэ начнёт пэстири служэния.

О СВЫНТО ДУХО ДЭЛ ЗОР АМЭНДИ

10. Сави помощь амэнди трэбуй, кай амэ тэ проповедуем, и васо?

¹⁰ Сави помощь амэнди трэбуй, кай тэ проповедуем? Кай тэ полас када, давайте подаса дума, со сас андэ жызня кай о Иезекиилё. Англа кода, сар во тэ начнёт пэстири служэния, лэ Дэвлэско свынто духо дя лэсти зор, саво лэсти трэбуй сас. Кадяжэ и амэ адес проповедуем блаӷодаря кодэлэсти, кай амэнди поможый лэ Дэвлэско свынто духо. Васо можно кадя тэ ԥэнас? Важ кода кай о Сатана андярэл и война против амэндэ, кай амэ тэ парашас тэ проповедуем (Отк. 12:17). И мануша моӷут тэ гиндон, кай амэндэ на вижала тэ фэрисавас лэ Сатанастар. Но кала амэ служысарас, амэ победисарас лэс! (Отк. 12:9—11). Васо можно кадя тэ ԥэнас? Кала амэ жас андэ служэния, амэ сыкавас, кай на дарас лэ Сатанастар. Кажно разо, кала амэ вижас пэ проповедь, о Сатана процэлэл. Со сыкавэл кода, кай амэ можэм тэ проповедуем, хоть о Сатана и тасавэл пар мэндэ? Амэнди поможый лэ Дэвлэско свынто духо, и о Иегова амэнца довольно (Матф. 5:10—12; 1 Пет. 4:14).

11. Сар поможыя амэнди лэ Дэвлэско свынто духо и со тэ терас, кай о Иегова тэ дэл лэс амэнди?

¹¹ Сости амэ сытювас анда кода, кай о Иегова стердя лэ Иезекиилёско муй и о чикат састо? Через лэ Дэвлэско свынто духо амэ можэм тэ виритярас всаворэ трудности андэ служэния (2 Кор. 4:7—9). Со амэ трэбуй тэ терас, кай о Иегова тэ дэл амэнди о свынто духо? Трэбуй вся и время тэ мангаспэ пала лэстэ и тэ авас уверени, кай Иегова амэн ашунэн. О Иисусо ԥэнэнас пэстирэ учениконэнди: «Мангэн... родэн... марэн андэ вудара». Если амэ ласа кадя тэ терас, «о небесно Дад... дэла [амэнди] о свынто духо» (Луки 11:9, 13; Деян. 1:14; 2:4).

ЛЭ ДЭВЛЭСТИРЭ АЛАВА ПОДРИТЯРЭНАС ЛЭ ИЕЗЕКИИЛЁС

12. Катар появисайля о свитко и со андэр лэстэ сас пистромэ? (Иезекииль 2:9—3:3).

¹² Лэ Иезекиилёсти придэлас зор най кати о свынто духо, кадяжэ лэс подритярэнас лэ Дэвлэстирэ алава. Андэ видения о Иезекиилё диқля о вас, саво ритярэлас о свитко. (Проадинон Иезекииль 2:9—3:3.) Катар появисайля кадэва свитко? Со андэр лэстэ сас пистромэ? Сар во подритярдя лэ Иезекиилёс? Давайте уӷанаса. О свитко появисайля лэ Дэвлэстирэ престолостар. Наверно, о Иегова пэрэдя лэс через ек анда штар анӷелоря, савэн о Иезекиилё раньшэ диқля (Иез. 1:8; 10:7, 20). Андо свитко сас пистромэ лэ Дэвлэстирэ алава — лэско приӷоворо важ о найкандино народо, саво о Иезекиилё трэбуй сас тэ пэрэдэл лэ народости (Иез. 2:7). Кадэва приӷоворо сас запистромэ дуе ригэндар андэ кадэва свитко.

13. Со ԥэндя о Иегова лэ Иезекиилёсти и васо о свитко сас гугло?

¹³ О Иегова ԥэндя лэ пророкости: «Поха кадэва свитко... ԥэр лэса пэско ӥло». О Иезекиилё кангля лэ Иеговас и похаля вся о свитко. Со сыкавэл кадэя часть андэ видения? О Иезекиилё трэбуй сас драго тэ полэл, со сыкавэн лэ Дэвлэстирэ алава. Во трэбуй сас тэ патял андэ када екжэно, кай тэ закамэл тэ пэрэдэл лэ Иеговастирэ алава лэ народости. Тоди тердяпэ варисо удивительно. О Иезекиилё почуствовал, кай о свитко «сас гугло, сар ядин» (Иез. 3:3). Васо? Важ лэстэ сас бари бах тэ пэрэдэл лэ Иеговастирэ алава, и када сас кадя жэ приятно, сар тэ хал и ядин (Пс. 19:8—11). Во сас блаӷодарно лэ Иеговасти, кай во стодя лэс пэстирэ пророкоса.

14. Со поможысардя лэ Иезекиилёсти тэ подӷотовица каринг лэ Дэвлэстири дила?

¹⁴ Тоди о Иегова ԥэндя лэ Иезекиилёсти: «Внимательно ашун всаворэ алава, савэ мэ тути ԥэнав, и драго пала лэндэ погиндосар» (Иез. 3:10). О пророко трэбуй сас тэ запомнит кода, со сас запистромэ андо свитко, и тэ розмышляет пала када. Кадя лэ Дэвлэстирэ алава подритярдэ лэ Иезекиилёс. Акана во моӷ тэ пэрэдэл лэ Дэвлэстири весть лэ народости (Иез. 3:11). Кадэя весть сас лэстэ андо ди и пэ шыб, и во сас ӷотово тэ стерэл лэ Иеговастири дила. (Диқэн Псалом 19:14.)

ЛЭ ДЭВЛЭСТИРЭ АЛАВА ПОДРИТЯРЭН АМЭН

15. Пала со амэ трэбуй тэ погиндосарас, кай тэ на парашас тэ служысарас?

¹⁵ Кай тэ на парашас тэ служысарас, амэ трэбуй тэ домэкас, кай лэ Дэвлэстирэ алава тэ подритярэн амэн. Важно драго тэ розмышляем пала вся, со ԥэнэн амэнди о Иегова. Адес во дэл дума амэнца через пэско Алав, и Библия. Со амэ трэбуй тэ терас, если камас, кай лэ Дэвлэско Алав вся и время тэ влияет пэ амарэ гиндоря, по ди и пэ кода, васо амэ служысарас?

16. Со поможыя амэнди май драго тэ полас лэ Дэвлэско Алав?

¹⁶ Кадя жэ сар амэ лас зор, кала хас о хамос, амэ подритярас пэс духовно, кала адиносарас лэ Дэвлэско Алав и розмышляем пала кода, со адиносардям. Кадэлэсти амэ сытювас анда видения пала свитко. О Иегова камэл, кай амэ «тэ ԥэрас пэско ӥло» лэстирэ алавэнца. Када сыкавэл, кай амэ трэбуй драго тэ полас и Библия. Важ када амэ трэбуй тэ мангаспэ, тэ адиносарас и тэ розмышляем. Спэрва амэ мангаспэ, кай тэ подӷотовим пэско ди, кай тэ полас лэ Дэвлэстирэ гиндоря. Тоди амэ адиносарас библейско отрывко, ай потом притердювас, кай драго тэ погиндосарас пала кода, со проадиносардям. Саво лашымос када анэна? Со май бут амэ розмышляем, со май драго полас лэ Дэвлэско Алав.

17. Васо фартэ важно тэ розмышляем пала кода, со адиносарас андэ Библия?

¹⁷ Васо фартэ важно тэ адиносарас и Библия и тэ розмышляем пала латэ? Када дэл амэнди зор адес тэ росԥэнас и весть пала Царство. Кадяжэ када поможыя амэнди тэ пэрэдас лэ манушэнди лэ Иеговаско приӷоворо. И када, возможно, авэла фартэ ӥто. Ай инке, кала амэ розмышляем пала райканэ лэ Иеговастирэ качестворя, амари дружба лэса ашэл май састи. И када дэл амэнди варисо фартэ приятно и, ԥэнэса, гугло, — амэндэ ашэл мирно и спокойно по ди (Пс. 119:103).

АМЭ НА КАМАС ТЭ СДАСПЭ

18. Со прижалапэ тэ прижанэн лэ манушэнди котэ, кай амэ проповедуем, и васо?

¹⁸ Амэ най пророкоря, сар о Иезекиилё. Но амэ всаек камас тэ доандярас лэ манушэнди и новость лэ Дэвлэстар, сави запистромэ андэ Библия. Амэ ласа тэ терас кадэя дила, пока о Иегова на ԥэнэна, кай хутила. Кала авэла о сындо, и мануша котэ, кай амэ проповедовали, нэ смоӷут тэ ԥэнэн, кай лэнди заранее пала када на ԥэндэ или кай о Дэл бистэрдя пала лэндэ (Иез. 3:19; 18:23). Лэнди прижалапэ тэ прижанэн, кай и новость, пала сави амэ лэнди росԥэнасас, сас лэ Дэвлэстар.

19. Со придэла амэнди зор тэ проповедуем?

¹⁹ Со придэла амэнди зор тэ проповедуем? Кодэла трин маменторя, савэ подритярэнас лэ Иезекиилёс. Амэ проповедуем, важ кода кай ӷанас: амэн бишалдя о Иегова, во дэл амэнди зор через пэско свынто духо и амэн подритярэн лэстирэ алава. Лэ Иеговастирэ зорэса амэ камас тэ стерас андэ служэния вся, со во ԥэнэн, и вся тэ виритярас (Матф. 24:13).