Диқэс ту по пимос кадя жэ, сар о Дэл?

О ИЕГОВА стердя важ амэндэ фартэ бут подаркоря. И амэ блаӷодарни, кай во домэкэл, кай амэ екжэнэ тэ ришаем, со лэнца тэ терас. Ек анда кадэла подаркоря — када о вино. Андэ Библия ԥэнэнпэ: «О хамос — радуий оди, и о вино терэл, кай тэ авэл вэсэло» (Эккл. 10:19; Пс. 104:15). Но ту наверно ӷанэс кацавэ манушэн, савэндэ исин проблема лэ пимаса. Кадяжэ андэ разни страны и культуры най еқэндар диқэн по пимос. Со поможыя лэ христианиности тэ прилэн годявэрнэ ришэнии андэ кадэва вопросо.

Кала амэ прилас ришэнии, амэнди трэбуй тэ шас сама най сар и мануша диқэн пэ када, ай сар диқэл о Дэл. Амэ ӷанас, кай о Дэл амэнди вэрыто нэ пожылает.

Амэ всаворэ ӷанас, кай бут мануша андэ кадэя люма бут и часто пэн. Дэко гиндой, кай во кадя можэт тэ отцыёл. Ай авэр терэн кадя, кай тэ бистрэн пала пэстирэ проблемы. Андэ дэсавэ страны и мануша гиндон, кай кала о мануш бут пэл, када сыкавэл, кай во драго жувэл и кай во па чачимастэ муршари.

Но и христианоря приашундён каринг и советоря, савэ дэл о любящё Создателё. Например, во амэнди ԥэндя, со можэт тэ авэл, кала о мануш черезчур бут пэл. Пала када драго пистромэ андэ Притчи 23:29—35a. О Дэ́ниело, саво барэдэр ԥрал андэ собрания андэ Европа, вспоминает, сави лэстэ жызня сас, кала во инке на ӷанэнас лэ Иеговас: «Раньшэ мэ фартэ бут павас. Важ када мэ бут со стердэм нэправильно и через када мандэ дуқалас оди! Пала дэсавэ ситуацыи мандэ идоси на вижал тэ бистрав».

Сар лэ христианонэнди тэ на попэрэн андэ кадэя ловушка — черезчур бут тэ пэн? Кала о мануш прилэл ришэния, во трэбуй тэ диқэл, со пала када пистромэ андэ лэ Дэвлэско Алав.

Давайте уӷанаса, со ԥэнэнпэ андэ Библия пала пимос и пала кода, васо дэсавэ пэн.

СО АНДЭ БИБЛИЯ ԤЭНЭНПЭ ПАЛА ПИМОС?

И Библия на сындой лэ манушэс, саво пэл о вино, ягали или варисо кацаво. Андэр латэ ԥэнэнпэ, кай о вино можэт тэ радуий оди. Амэ адиносарас: «Ха о марно радостяса и пи о вино лошалэ одеса» (Эккл. 9:7). О Иисусо и авэр предани лэ Иеговастирэ служытеля дэкала пэнас о вино (Матф. 26:27—29; Луки 7:34; 1 Тим. 5:23).

Но и Библия драго сыкавэл, сави разница исин машкар кода, кала о мануш пэл набут и кала во допэлпэ. Андэр латэ ворта ԥэнэнпэ: «На пэн фартэ бут вино» (Эф. 5:18). И дажэ ԥэнэнпэ, кай о «матимари... на попэрэла андэ лэ Дэвлэско Царство» (1 Кор. 6:10). Да, о Иегова вэрыцый, кала о мануш допэлпэ. Важ када на трэбуй тэ терэс кадя, сар терэн авэр. Ӷлавно, кай кода, со ту витидэс, тэ радуий лэ Иеговас.

Дэсавэ мануша моӷут бут тэ пэн и тэ на матён. Но када опасно. Андэ Библия ԥэнэнпэ, кай кодэла, ко «пэн бут», моӷут фартэ нэправильно пэс тэ андярэн и тэ хасарэн и дружба лэ Иеговаса (Титу 2:3; Прит. 20:1). О Иисусо ԥэндя, кай и мануша, савэ камэн тэ авэн андо раё пэ ԥув, трэбуй тэ диқэн, кай лэндирэ одести тэ на авэл «ԥарэс через кода, кай... пэрэпэн» (Луки 21:34—36). Сар амэ диқлям, о пимос можэт тэ анэн каринг и барэ проблемы. Со поможыя лэ христианиности тэ фэрийпэ?

СОСТИ, СКАТИ И КАЛА?

Андэ кажно культура пэстирэ традицыи пала кода, сар тэ диқэн по пимос. Но и христианоря, кай тэ прилэн ришэнии, шон сама най пэр лэндэ. Кай тэ витидэн, со тэ хан и тэ пэн, вонэ шон сама, сар о Иегова пэ када диқэл. Андэ Библия ԥэнэнпэ: «Хан тумэ чи пэн, чи авэр варисо терэн, терэн вся, кай о Дэл тэ авэл ашунгло» (1 Кор. 10:31). Акэ дэсавэ вопросоря и библейски принцыпоря, пала савэ амэнди трэбуй тэ погиндосарас.

Мэ пав, кай мандар тэ на асанпэ авэр? Андо Исходо 23:2 ԥэнэнпэ: «На жан пала бут мануша, кай тэ терэн о найлашымос». О Иегова на камэлас, кай и израильтяноря тэ лэн примеро па кодэла мануша, савэ лэсти на чалён. О Иегова андэ када на паруделя. Во камэл, кай амэ адес тожэ тэ приашундювас каринг кадэла алава. Если амэ домэкас, кай авэр тэ влияют пэ кода, сар амэ тэ диқас по пимос, амэ можэм полокорэс тэ дурювас лэ Иеговастар и тэ парашас тэ жувас па лэско законо (Рим. 12:2).

Мэ пав, кай тэ сыкавав, пэ скати мэ дэ зорало? Андэ дэсавэ культуры тэ пэн часто и бут — када нармально и важ када дажэ хвалин (1 Пёт. 4:3). Но шон сама, со ԥэнэнпэ андэ 1 Коринфянам 16:13: «Вся и время терэн кода, со камэл о Дэл, састэс тердён по Дэвлэско дром, на даран, терэн вся, кай тэ авэн састэ». Хэба можэт о пимос па чачимастэ тэ стерэл, кай о мануш тэ авэл састо и зорало? Наоборот, кала о мануш бут пэл, во найдраго полэл, со терэлпэ круӷом лэстэ, и нэ можэт твэрэзо тэ гиндой. Вижал, кодэла, ко бут пэн, дицон ригатар най зоралэ, ай чудни и найгодявэрнэ. Андэ Исайя 28:7 пала кацавэ мануша ԥэнэнпэ, кай вонэ змарделэ па дром и нэ моӷут драго тэ гиндон.

О чачуно зор можэт тэ дэл кати о Иегова, и во дицол андэ кода, кай о мануш андярэл пэс осторожно и ашэлпэ састо андэ вера (Пс. 18:32). Амэ можэм тэ авас кацавэ, если на парашаса тэ авас внимательни и тэ фэрисарас пэс всаворэстар, со можэт тэ римой амари дружба лэ Иеговаса. О Иисусо сас па чачимастэ зорало мануш и пэр лэстэ стонас патив, важ кода кай во сас смило и на даралас тэ терэл кода, со правильно.

Мэ пав, кай тэ улав о ԥаримос па ди? О псалмопевцо пистросардя: «Кала мандэ сас гиндоря, савэндар ԥарэс по ди, ту терэсас кадя, кай манди ашэлас май вушэро по ди» (Пс. 94:19). Если тутэ исин ԥаримос андэ жызня, родэ и помощь кай о Иегова, ай най андо пимос. Лашо маменто тэ улэс о ԥаримос па ди — када май часто тэ мангэспэ. Ай инке, пала пэрэжывании можэш тэ росԥэнэс кодэлэсти, кастэ састи вера. Во можэт тэ дэл тути лашо совето. Но кала о мануш улэл пэстирэ проблемы лэ пимаса, лэстэ можэт тэ на авэл жэлания тэ терэл правильно и во можэт тэ подэлпэ лэ бэзэхэсти (Ос. 4:11). О Дэниело, пала саво амэ дям дума май данглал, прижанэн: «Мандэ вся и время сас стрэсо и мэ пэс дошаляравас. Кай манди тэ ашэл май вушэро по ди мэ павас. Но и проблемы ашэнас кати май бут и май бут. Мэ хасардэм лэ друӷонэн и парашэлэм тэ став патив пэр пэстэ». Со стердя о Дэниело? «Мэ полэм: кай тэ улав и проблемы манди трэбуй о Иегова, ай най о пимос. Мэк и най сразу, но лэ Дэвлэстирэ зорэса мэ вся стердэм». Амэ точно ӷанас, кай о Иегова вся и время ӷотово тэ поможый, дажэ тоди, кала здэлпэ, кай нинай выходо (Флп. 4:6, 7; 1 Пёт. 5:7).

Если ту дэкала пэс вино, ягали, пиво или варисо кацаво, ту можэш тэ погиндос, на лян ту када тэ терэс часто и бут? Андэ када тути поможына кацавэ вопросоря. Ԥэнэн манди андо ери или и друӷоря, кай лэнди на чалёл, скати или сар дэ часто мэ пав? Када можэт тэ сыкавэл, кай о пимос лэл тут тэ зацырдэл и тути када трэбуй тэ ашавэс. Пав мэ май бут чем раньшэ? Када можэт тэ сыкавэл, кай ту присытёс тэ пэс. Ԥарэс манди тэ проритярдював, кай тэ на пав дэсавэ деса (или май бут время)? Если да, тоди када можэт тэ сыкавэл, кай ту ужэ присытелян тэ пэс и тути, возможно, трэбуй авэла и помощь лэ врачонэндар.

Дэсавэ христианоря погиндосардэ, савэ проблемы моӷут лэндэ тэ авэн, если вонэ лэна тэ пэн. Важ када вонэ отԥэнделэ вобще тэ пэн. Ай авэр на пэн важ кода кай лэнди просто на чалёл лэ пимаско вкусо. Ай со если варико анда тирэ друӷоря приля кацави ришэния? Стов пэр лэндэ патив, драго лэнца обжапэ и на сындосар лэн важ када.

Возможно, ту ришиса важ пэстэ, сар часто и скати тэ пэс. Варико домэкэл пэсти, кай тэ пэл еқвар андо курко или набут кала бэшэл тэ хал. Дэсавэ витидэ, саво вонэ лэна тэ пэн о пимос, ай саво най. Например, вонэ ришыли, кай лэна тэ пэн набут вино или пиво, но на пэна нисаво састо пимос, дажэ кактэлёря. Если о мануш састэс ришыл важ пэстэ кадэла маменторя, тоди лэсти авэла май вушэро тэ приритярдёл кадэлэсти. О мануш, савэстэ састи вера, на трэбуй тэ пэрэжывает, со лэна тэ гиндон авэр пала кода, сар во ришыл важ пэстэ.

Пэр со инке трэбуй тэ шас сама? Со аврэ манушэстэ андо ди. Андэ Римлянам 14:21 амэ адиносарас: «Фэдэр тэ на хан о мас, тэ на пэн о вино и тэ на терэн нисо, состар лэ ԥралэстири вера ашэла май слабо». Сар ту можэш тэ прилэс кадэва совето? Любисар пэстирэ ԥралэн и ԥэян. Если ту ӷанэс, кай важ варикастэ о пимос — када бари проблема, тоди ту на лэса тэ пэс англа лэндэ. Кадя ту сыкавэса, кай заботиспэ пала авэр май бут, чем пала пэстэ (1 Кор. 10:24).

Кадяжэ и христианоря ритярэн о законо, саво исин андэ страна, кай вонэ жувэн. Часто о ӷосударство ԥэнэн, андэ саво возрасто можно тэ пэн. Ай инке запретин кодэлэнди, ко пиля, тэ бэшэн пала рулё и тэ управляют ла техникаса (Рим. 13:1—5).

О Иегова дя амэнди право екжэнэнди тэ витидас сар тэ используем лэстирэ подаркоря. Ек анда кацаво подарко, када кай екжэнэ тэ витидас, со тэ хас и со тэ пас. Давайте ласа када тэ терас кадя, кай через амэндэ тэ на дуқал оди кай амаро Небесно Дад.