Скати жував — скати сытював

Мэ арақаделэм андо 1927 бэрш андо найбаро форицо паша Чикаго (штато Илино́йсо, США). Амэн андо ери сас панч бэяцэ: и Джэта, о До́но, мэ, о Ка́рло и Джой. Всаворэ амэ камасас анда вся зор тэ терас лэ Иеговастири дила. И Джэта сытеля андэ Школа Галаадо андо дуйто класо андо 1943 бэрш. О Доно, о Карло и Джой линэ тэ терэн лэ Дэвлэстири дила андо Вефилё андо Бруклино. О Доно попэля интя андо 1944 бэрш, о Карло андо 1947 бэрш, ай и Джой андо 1951 бэрш. Лашо примеро, саво сыкадэ мэрнэ ԥрала, ԥэя и родителя, дя манди зор тэ терав важ о Дэл инке май бут.

САР АМАРО ЕРИ УӶАНГЛЯ О ЧАЧИМОС ПАЛА ДЭЛ

Лэ дадэсти и ла дати фартэ чалёлас тэ адинон и Библия. Вонэ любинас лэ Дэвлэс и сытярэнас амэн тэ любисарас лэс. О дад сас халавдо и, кала жалас и пэрво мирово война, во парашэля тэ патял лэ қандирянди. И дэй сас фартэ лошали, кай во рисайля цэрэ жундо, и ԥэндя лэсти: «Авэн андэ қандири, амэ дэлмут котэ на самас». Во ԥэндя лати: «Мэ туса жава, но тэ зажав андрэ на лава». Вой пушля: «Васо?» О дад ԥэндя: «Кала жалас и война, мэ диқлэм, сар и рашая блаӷословинас лэ халавдэн и свынцонас и мардя, кай тэ умарэн лэнца лэ манушэн анда лэндири жэ вера. Ай пэ авэр краёря и рашая терэнас точно кадя! И пэ кастири риг сас о Дэл?»

Еқвар, кала мэрни дэй сас андэ қандири, амэндэ авелэ дуй лэ Иеговастирэ свидетеля. Вонэ камлэ тэ ашавэн лэ дадэсти дуй книжки, пэ савэ ԥэнэнас «Свето». Андэр лэндэ росԥэнэнаспэ, со пистромэ андэ Свынто тайна. Мэрнэ дадэсти здяпэ, кай кадэла книжки интересни, и во лэн ля. Кала и дэй рисайля цэрэ, вой сразу жэ ля лэн тэ адиной. Ӷэт май интя вой проадиносардя андэ ӷазета, кай всаворэ, ко камэл, моӷут тэ авэн тэ розуӷанэн и Библия па книжки «Свето». Вой закамля тэ жал. Кала вой авеля интя, каринг латэ вижыля ԥури манушни. И дэй сыкадя лати и книжка и пушля: «Катэ сытярэн па кадэя книжка?» Кодэя манушни ԥэндя лати: «Да, дочо, прожа». Пэ авэр разо и дэй ля пэса всаворэ́ бэятонэн. И кадя амэ лям тэ ԥирас интя кажно курко.

Еқвар, о ԥрал, саво проандярэлас и изучения, мангля ман тэ заадиносарав Псалом 144:15. Котэ ԥэнэнаспэ, кай бахталэ всаворэ, ко полэл лэ Иеговас. Ман фартэ ля лэ одестар кадэва стихо. Кадяжэ манди чалелэ дуй авэр стихоря: 1 Тимафеё 1:11, андэ саво пистромэ, кай о Иегова — «бахтало Дэл», и Ефесо 5:1, андэ саво ԥэнэнпэ: «Ни акэ, лэн примеро лэ Дэвлэстар, важ кода кай тумэ лэстирэ любими бэяцэ». Мэ полэм, кай, со бы мэ тэ на терав важ мэрно Дэл, мэ трэбуй тэ терав када лошаса и тэ авав блаӷодарно лэсти важ када. Кодэла времятар мэ кадя и терав.

Само пашутно ҭан, кай тэ стидаспэ пэ собрания, сас амэндар 30 километроря. Но амэ всаек на промэкасас и собрании, и мэ инке май драго уӷанавас и Библия. Сэрав, сар еқвар и Джэта дэлас каментариё, и мэ погиндосардэм: «Мэ жэ када ӷанав. Мэ тожэ моӷу тэ ваздав о вас и тэ дав ответо». Посли када мэ лэм тэ ӷотовлюсь каринг и собрании и тэ дав каментарии. Но со инке май важно, мэ, сар и мэрнэ ԥрала и ԥэя, ашавас инке май пашэ каринг о Дэл. И андо 1941 бэрш мэ болделэм.

СЫТЮВАВ КАЙ О ИЕГОВА ПЭ КАНӶРЭСОРЯ

Мэ драго сэрав о канӷрэсо, саво прожалас андо Кли́влендо (штато Ага́ё) андо 1942 бэрш. Каринг лэстэ па телефоно подключисайлэ и ԥрала и ԥэя май бут чем анда 50 фороря андэ США. Найдур кодэлэ ҭанэстар, кай прожалас о канӷрэсо, и ԥрала позвазглэ и катуны, кай амэ и жувасас. И дуйто мирово война как раз со май фартэ розжаласпэ. И халавдэ со май часто дэнас пэ лэ Иеговастирэ свидетеля. Вечером мэ додиқлэм, сар и ԥрала стонас пэстирэ вураля кадя, кай и фары тэ авэн андэ авэр риг лэ катунэндар. Вонэ доԥэнделэ, кай андэ кажно вурали вся и рят лэла варико тэ бэшэл. Если варисо терэлапэ, вонэ дэна яг и фары и лэна тэ сиӷналин. Тоди, пока о вудуд лэ фарэндар халоп лэ халавдэнди и яқа, кай и авэр ԥрала вижылоп май ӥто тэ авэн и тэ дэн помощь. Мэ погиндосардэм: «Лэ Иеговастирэ мануша пала вся диқэн». И важ када мэ сутэмас спокойно. И драго, кай кадя нисо и на тердясаспэ.

Жанас бэрша, и мэ часто гиндосаравас важ кодэва канӷрэсо. Манди авэлас по гиндо, сави дэ спокойно сас и дэй. Пар латэ вобще на дицолас, кай вой тэ пережывает или тэ дарал. Вой анда вся оди патялас лэ Иеговасти и лэ ԥралэнди. Никала на забистрава лако райкано примеро.

Каринг о канӷрэсо и дэй ашэля общё пианеро, важ када вой фартэ драго ашунэнас и речи пала лэ Дэвлэстири особо дила. Па дром, кала амэ рисавасас цэрэ, вой ԥэндя: «Мэ камлоп и май дур тэ терав лэ Дэвлэстири дила сар пианеро, но манди ԥарэс тэ авав пианеро и тэ диқав цэрэ пала вужымос». Потом вой пушля, сможэм амэ тэ дас лати андэ када зор. И амэ доԥэнделям ла даса, кай кажно андар мэндэ тэсараса лэла тэ прилэл ек или дуй цэра. Кала амэ ужасас андэ школа, и дэй прожалас па цэр, кай тэ диқэл, вужэс котэ чи най, и потом жалас тэ росԥэнэн пала Дэл. Латэ сас фартэ бут дила, но всаек вой всегда шолас амэн сама. Кала амэ авасас цэрэ по обедо и рисавасас посли урокоря, вой ужэ сас цэрэ и аштярэлас амэн. Дэкала посли школа амэ ԥирасас ласа тэ росԥэнас важ о Дэл, када поможысардя амэнди тэ полас, со када тэ авэс пианеро.

ЗАЛАВ ТЭ ТЕРАВ ЛЭ ДЭВЛЭСТИРИ ДИЛА САР ПИАНЕРО

Мэ ашэлэм пианеро, кала манди сас 16 бэрш. О дад кода время инке на сас лэ Иеговаско свидетелё, но лэсти сас интересно, сар мандэ и дила. Еқвар вечером мэ ԥэндэм лэсти, кай пристав бут зор, кала росԥэнав важ о Дэл, но идоси нико кадя и на закамля май драго тэ уӷанэн и Библия. Мэ погиндосардэм и пушлэм: «Ай можэт ту камэс тэ уӷанэс и Библия май драго?» Во набут погиндосардя и ԥэндя: «Ай чаче, васо най?» Да, пэрво, касти мэ залэм тэ поможысарав тэ розуӷанэн и Библия май драго, сас мэрно дад. Када сас фартэ интересно!

Амэ адиносарасас и Библия па книжка «О чачимос освободия тумэн». Прожыля дэсави время, и мэ полэм, кай о дад поможысардя манди май драго тэ розуӷанав и Библия и тэ авав май лашо учителё. Например, еқвар вечером, кала амэ проадиносардям о абзацо, во ԥэндя: «Мэ диқав, со пистромэ андэ книжка. Но катар ту ӷанэс, кай катэ вся пистромэ правильно?» Кацаво мэ на аштярдэм и важ када ԥэндэм лэсти: «Щас манди найсо тэ ԥэнав. Но пэ авэр разо мэ виарақава ответо». И мэ зритярдэм о алав. Мэ виарақлэм стихоря, савэ доԥэнэнас и гиндоря анда абзацо. Посли када мэ сытелэм драго тэ розуӷанав и Библия и май драго тэ ӷотовлюсь каринг кажно изучения. Када поможысардя тэ ашас май састэ па лэ Дэвлэстири время и манди, и лэ дадэсти. Во лэлас тэ жувэл кадя, сар уӷанэнас, и андо 1952 бэрш болделя.

НА ПАРАШАВ ТЭ СЫТЮВАВ — АКАНА УЖЭ АНДО ВЕФИЛЁ

Кала манди сас 17 бэрш, мэ лэм тэ жував екжэно. Ла Джэтаa бишалдэ тэ росԥэнэн важ о Дэл андэ авэр страна, ай о Доно терэлас лэ Дэвлэстири дила андо Вефилё. И вонэ радуинаспэ кодэлэстар, со терэнас. Лэнго примеро ля ман лэ одестар. Мэ бишалдэм и анкета андо Вефилё и андэ Школа Галаадо и лэм тэ аштярав лэ Иеговастар ответо. Сави решэния во приля? Андо 1946 бэрш ман ақардэ андо Вефилё.

Важ и вся время андо Вефилё мэ теравас разно дила, и када бутэсти ман сытярдя. Мэ андо Вефилё ужэ 75 бэрш. Мэ сытелэм тэ печатаю и книжки, тэ диқав пала ловэ, тэ тинав кода, со трэбуй важ о Вефилё, и тэ одбишалав каринг трэбуй. Но со май фартэ мэ цэнисарав и утренё библейско проӷрама и разни речи.

Мэ кадяжэ бутэсти сытелэм кай мэрно цыкнэдэр ԥрал, кай о Карло, саво авеля андо Вефилё андо 1947 бэрш. Во сас лашо учителё и драго розлэласпэ андэ Библия. Еқвар манди трэбуй сас тэ подӷотовлю и речь и важ када мэ манглэм лэстар помощь. Мэ ԥэндэм мэрнэ ԥралэсти, кай стидэм бут информацыя, но на ӷанав, со анда када тэ витидав важ и речь. Тоди во задя манди кати ек вопросо: «Ай сави тутэ тема?» Мэ сразу жэ вся полэм! Трэбуй тэ ашавав кати кода, со поджал каринг и тема, ай вся авэр тэ вилав. Кадэва важно гиндо мэ никала на бистравас.

Кай тэ авэс бахтало вефильцо, трэбуй тэ на парашэс тэ росԥэнэс пала Дэл и тоди тутэ точно авэна интересни случаёря. И акэ со тердяпэ манца еқэ вечероса андо Нью-Йорко. Амэ лэ ԥралэса зажылям кай ек манушни, сави лясас «Сторожэво башня» и «Прошонпэ!». Амэ ԥэндям: «Амэ камас тэ сыкавас тути ек гиндо анда Библия, саво тути чалёла». Вой ԥэндя: «Если тумэ камэн тэ подэн дума пала Библия, тоди прожан». Амэ сыкадям лати дэсавэ стихоря пала лэ Дэвлэско Царство и пала нэви люма и подям дума важ када. Лати чалеля кода, со амэ росԥэндям. Кала амэ рисайлям пэ авэр курко, вой аштярэлас амэн ужэ най екжэни, ай ақардясас инке манушэн. Май интя кадэя манушни и лако хулай ашэлэ лэ Иеговастирэ свидетеля.

СЫТЮВАВ КАЙ ПЭСТИРИ ХУЛАИ

Мэ камлэм тэ жэнисавав, но прожыля варикай 10 бэрш, сар мэ виарақлэм пэстирэ манушэс. Со поможысардя манди тэ виарақав ла? Мэ мангаваспэ лэ Иеговасти и гиндосаравас: «Сави мэ аштярав жызня посли ябьяв?»

Андо 1953 бэрш посли канӷрэсо, саво сас андо Нью-Йорко по стадионо «Янки», мэ уӷанглэм ԥья, савя ақарэнас Мэри Аньёл. Вой мэрня ԥьяса, ла Джэтаса, сытелясас андо 2-то класо андэ Школа Галаадо и вонэ вместе терэнас лэ Дэвлэстири дила андэ авэр страна. Кай и Мэри ԥабонас и яқа, кала вой росԥэнэнас манди пала пэстири дила пэ Карибски остраворя и пала мануша, савэнди вой важ кадэла бэрша поможысардя тэ розуӷанэн и Библия. Со май драго амэ уӷанасас ек еқэс, со май фэдэр поласас, кай амэндэ еқэндар и цэли па лэ Дэвлэстири время. Амэ ашасас май пашэ и май пашэ ек каринг ек. И андо апрелё андо 1955 бэрш амэ цэлдям ябьяв. Мэ най еқвар диқавас, кай и Мэри — када па чачимастэ райкано подарко лэ Иеговастар. Вой сас лашо примеро важ мандэ бут андэр со. Сави дила лати тэ на дэн, вой вся и время сас лошали. И Мэри пристолас бут зор и анда ди заботияспэ пала авэр. Лэ Дэвлэско Царство вся и время сас важ латэ по пэрво ҭан андэ жызня (Матф. 6:33). Амэ трин бэрш терасас раёно дила, ай андо 1958 бэрш амэн ақардэ андо Вефилё.

Мэ бут сости сытелэм кай и Мэри. Например, посли амаро ябьяв амэ решыли вмести тэ адиносарас и Библия, кажно разо варикай 15 стихоря. Ек андар мэндэ адинояс, ай потом амэ вместе дасас дума пала када и гиндосарасас, сар амэ можэм тэ прилас када андэ пэстири жызня. И Мэри часто росԥэнэнас пала кода, со уӷангля андо Галаадо, и пала время, кала вой терэлас лэ Дэвлэстири дила андэ авэр страна. Када поможысардя манди май драго тэ росԥэнав мэрнэ речи, ай кадяжэ тэ полав, со трэбуй лэ ԥэянди и сар лэнди тэ придав зор (Прит. 25:11).

Мэрни кучутни Мэри муля андо 2013 бэрш. Мэ фартэ скучисайлэм пала латэ и аштярав, кала амэ упалэ диқасапэ ласа андэ нэви люма. Ай пока мэ на парашав тэ сытював кай о Иегова и андэ вся тэ надеисавав пэр лэстэ (Прит. 3:5, 6). Кала мэ гиндосарав важ кода, со о Иегова камэл тэ стерэл важ пэстирэ мануша андэ нэви люма, манди ашэл спокойно и драго по ди. Амэ инке май бут уӷанаса важ амаро ашунгло Учителё и важ кода, со во стердя. Да, мандэ на хутилэна алава, кай тэ сыкавав, сар мэ лэсти блаӷодарно важ вся, сости во ман сытярдя, и важ лэско баро ковло ди.