Сар трэбуй тэ мангэспэ? Трэбуй вся и время тэ повторяеш и молитва Отче наш?
Библейско ответо
И молитва Отче наш, сыкавэл, сар трэбуй тэ мангаспэ и пала со. Ла о Исусо ԥэндя, кала и ученикоря пушлэ лэстар: «Учителё, сытяр амэн, сар тэ мангаспэ» (Лука 11:1). Но и молитва Отче наш, када най кати ек молитваa. Май ӥто всаворэстар, када просто примеро, савэ молитвы ашунэн о Дэл.
Андэ кадэя статья
Пала со ԥэнэнпэ андэ молитва Отче наш?
И молитва Отче наш запистромэ андо Матфеё 6:9—13 и андэ разни библейски переводоря вой ашундёл по-разному. Акэ дуй примероря.
Андэ «Нэвя люмако переводо» пистромэ: «Амаро небесно Дад, мэк тиро алав авэл свынто. Мэк правий тиро Царство. Мэк вся ашэл кадя, сар тути уӷодно, и пэ ԥув, и по небо. Дэ амэнди котор марно пэ кадэва дес и простисар амэнди амаро вужылимос, сар и амэ простисардям кодэлэн, ко амэнди вужылэ. Поможысар амэнди тэ на подаспэ лэ бэзэхэсти и фэрисар амэн лэ Бэнгэстар».
Андо Синодально переводо: «Отче наш, сущий на небесах! да святится имя Твоё; да приидет Царствие Твоё; да будет воля Твоя и на земле, как на небе; хлеб наш насущный дай нам на сей день; и прости нам долги наши, как и мы прощаем должникам нашим; и не введи нас в искушение, но избавь нас от лукавого»b.
Со сыкавэн и алава анда молитва Отче наш?
Вся сости сытярэлас о Исусо сжалпэ ла Библияса. Важ када можно тэ ԥэнас, кай авэр части анда Библия поможын тэ полас и алава анда молитва Отче наш.
«Амаро небесно Дад»
Када правильно, кай тэ ԥэнас по Дэл «амаро Дад», важ кода кай во создал амэн и дя амэнди жызня (Исайя 64:8).
«Мэк тиро алав авэл свынто»
Лэ Дэвлэско алав, Иегова, трэбуй тэ авэл свынто и трэбуй пативалэс тэ дас дума пала лэско алав. И мануша терэн, кай тэ авэл свынто лэ Дэвлэско алав, кала росԥэнэн аврэнди пала лэско райкано характеро и пала кода, со во загиндосардя важ лэндэ (Псалом 83:18; Исайя 6:3).
«Мэк правий тиро Царство»
Лэ Дэвлэско Царство — када правительство по небо. Царё андэ кадэва Царство — о Исусо Христос. О Исусо сытярэлас амэн тэ мангаспэ, кай кадэва правительство тэ авэл па вся и ԥув (Даниил 2:44; Тайна 11:15).
«Мэк вся ашэл кадя, сар тути уӷодно, и пэ ԥув, и по небо»
По небо нинай найлашымос и смэрть. О Дэл камэл, кай и пэ ԥув тэ авэл мирно, безопасно и кай и мануша тэ жувэн пэр латэ вечно (Псалом 37:11, 29).
«Дэ амэнди котор марно пэ кадэва дес»
Андэ лэ Исусостири время о марно сас само ӷлавно хамос. Амэ трэбуй тэ сэрас, кай би лэ Дэвлэско амэ не сможэм тэ жувас (Дила 17:24, 25).
«Простисар амэнди амаро вужылимос, сар и амэ простисардям кодэлэн, ко амэнди вужылэ»
О алав «вужылимос», сыкавэл амаро бэзэх (Лука 11:4). Вса́ворэ мануша терэн бэзэх и лэнди трэбуй, кай лэн тэ простин. Если амэ камас, кай о Дэл амэн тэ простий, тоди и амэ тожэ трэбуй тэ простисарас аврэн (Матфеё 6:14, 15).
«Поможысар амэнди тэ на подаспэ лэ бэзэхэсти и фэрисар амэн лэ Бэнгэстар»
О Дэл Иегова никала амэн на подмарэл каринг о найлашымос (Иаково 1:13). Подмарэл амэн о Сатана (Матфеё 4:1—4; 1 Иоано 5:19). Кадэлэ алавэнца амэ мангас лэ Иеговас тэ поможый амэнди тэ на подаспэ лэ бэзэхэсти и тэ на жас против лэско законо.
И молитва Отче наш — када кати ек варианто, сар можно тэ мангэспэ?
И молитва Отче наш — када кати примеро. Важ када на трэбуй тэ ԥэнэс ла алав андэ алавэстэ. Англа кода, сар о Исусо тэ ԥэнэн кадэя молитва, во ԥэндя: «Кала мангэнпэ, на́ ԥэнэн ек и ек» (Матфеё 6:7). Кала о Исусо ля тэ сыкавэл примеро сар тэ мангэнпэ пэ авэр разо, во ужэ ԥэндя авэр алава (Лука 11:2—4).
Май фэдэр всаворэстар, када тэ мангаспэ анда вся оди и, пала со пережываем (Псалом 62:8).
Сар трэбуй тэ мангэспэ?
И молитва Отче наш, — када лашо примеро кодэлэсти, сар тэ мангаспэ, кай о Дэл амэн тэ ашунэн. Шув сама, сар и алава анда кадэя молитва шонпэ лэ гиндонэнца и анда авэр библейски стихоря пала молитва.
Мангэнпэ кати лэ Дэвлэсти
Стихо: «Ни пала со не пережывайте, но андэ любо ситуацыя взвинпэ каринг о Дэл андэ молитва — ясвэнца мангэн лэстар помощь и вся и время блаӷодарин лэс» (Филипы 4:6).
Со када сыкавэл. Тэ мангэспэ трэбуй кати лэ Дэвлэсти — най лэ Исусости, най ла Марияти и най лэ свынтонэнди. Кода, кай и молитва Отче наш залэлпэ лэ алавэнца «амаро небесно Дад», сыкавэл, кай тэ мангэспэ трэбуй кати лэ Дэвлэсти лэ Иеговасти.
Мангпэ пала кода, со уӷодно лэ Дэвлэсти
Стихо: «Со амэ тэ на манглоп лэ Дэвлэстар, во ашунэл амэн, если мангас кода, со уӷодно лэсти» (1 Иоано 5:14).
Со када сыкавэл. Амэ можэм тэ мангаспэ пала вся, со уӷодно лэ Дэвлэсти. Тэ терас кадя, сар камэл о Дэл, када фартэ важно. Када дицол анда лэ Исусостирэ алава, савэ во ԥэндя андэ молитва Отче наш «Мэк вся ашэл кадя, сар тути уӷодно». Тэ уӷанас пала кода, со о Дэл загиндосардя важ и ԥув и важ и мануша, можно, кати если ласа тэ изучаем и Библия.
Мангпэ пала кода, со тутэ по ди
Стихо: «Отдэ пэско ԥаримос лэ Иеговасти, и во поможыя тути» (Псалом 55:22).
Со када сыкавэл. Лэ Дэвлэсти най всаек, со амэнца терэлпэ. Анда молитва Отче наш дицол, кай амэ можэм тэ мангаспэ пала кода, со амэнди трэбуй пэ кажно дес. Кадяжэ можно тэ мангаспэ, кай о Дэл тэ поможый амэнди андэ ԥари ситуацыя, тэ подритярэл андэ ԥари время и тэ простий амаро бэзэхc.
a Например, андэ Библия запистромэ лэ Исусостирэ и лэстирэ учениконэндирэ молитвы, савэ фартэ на шонаспэ пэ кадэя молитва (Лука 23:34; Филипы 1:9).
b Андо Синодально переводо и молитва Отче наш заканчиваеца кацавэ алавэнца «Ибо Твоё есть Царство и сила и слава во веки. Аминь». Кадэла алава хвалин лэ Дэвлэс, и вонэ исин андэ дэсавэ авэр библейски переводоря. Но андэ ек библейско справочнико ԥэнэнпэ: «Андэ май точни лила... кадэла алава нинай» (The Jerome Biblical Commentary).
c Дэкала, важ пэстири дош лэ манушэс фартэ хал оди, и када на дэл лэсти тэ мангэл прощения кай о Дэл. Но о Иегова ԥэнэн кацавэ манушэнди: «Авэн и розласапэ машкар пэстэ» (Исайя 1:18). Во никала на отшол пэстар кодэлэс, ко анда вся оди мангэл лэстар прощения.