Со ԥэнэнпэ андэ Библия пала аборто?

Со ԥэнэнпэ андэ Библия?

Андэ Библия нинай о гиндо, «кай о мануш можэт тэ стерэл кадя, кай о бэято тэ на арақадёл» или аврэ алавэнца, тэ стерэл аборто. Но исин бут библейски стихоря, савэ сыкавэн, сар о Дэл диқэл пэ лэ манушэстири жызня, ай кадяжэ пэ жызня лэ бэятости, саво инке на арақаделяпэ.

И жызня — када подарко лэ Дэвлэстар (Бытие 9:6; Псалом 36:9). И важ лэстэ куч кажнонэстири жызня, ай кадяжэ лэ бэятостири, саво инке на арақаделяпэ. И если варико спецыально терэл, кай о бэято тэ на арақадёл, важ о Дэл — када баро бэзэх. Важ лэстэ — када сар умарэн манушэс.

О Дэл дя законо пэстирэ народости лэ Израилёсти, котэ ԥэнэнпэ кадя: «Если о мануш дэладап каштэса варикас анда пэстирэ раборя и лэско рабо или рабыня сразу мэрэла, тоди пала лэндэ трэбуй тэ рин. Если и мурша марэнпэ и дэндап ла жувля, сави аштярэл бэятос и во арақадёл латэ май рано, чем трэбуй, но ашэлпэ жундо, тоди о дошало трэбуй тэ потинэл ловэ. Во трэбуй тэ потинэл скати, скати мангэла о хулай кадэла манушняко, и тэ отдэл када через сындомаря. Но если варико мэрэла, тоди трэбуй тэ отдэн и жызня важ и жызня» (Исход 21:22, 23).a

• Андэ сави время залэлпэ лэ манушэстири жызня?

• Простия о Дэл кодэла жувля, сави стердя аборто?

• Можэт ли и дэй тэ стерэл аборто, если или вой или о бэято моӷут тэ мэрэн?

Андэ сави время залэлпэ лэ манушэстири жызня?

Важ о Дэл лэ бэятостири жызня залэлпэ андо кодэва маменто, кала заԥирдя и жувли. Через и Библия о Дэл най еқвар ԥэнэн, кай о бэято, саво инке на арақаделяпэ, важ лэстэ во ужэ мануш. Давайте проадиносараса библейски стихоря анда савэ дицол, кай важ о Дэл куч и жызня лэ бэятостири, саво ужэ арақаделяпэ и саво инке на арақаделяпэ.

• Через лэ Дэвлэско свынто духо о Давидо ԥэндя пала Дэл: «Ту диқлян ман, кала мэрни жызня кати кати залэласпэ» (Псалом 139:16). Хоть о Давидо тоди инке на аракаделясаспэ, но о Дэл ужэ диқэлас пэр лэстэ, сар по мануш.

• Ай важ о пророко Иеремия сас ԥэндо, кай лэ Дэвлэстэ ужэ сас важ лэстэ особо задания, хоть о пророко инке на арақаделяпэ. О Дэл ԥэндя лэсти: «Англа кода, сар ту тэ появиспэ андо ӥло кай тири дэй, мэ ӷанавас тут. И англа кода, сар ту тэ появиспэ пэ люма, мэ витидэм тут и стодэм тут пророкоса важ и народоря» (Иеремия 1:5).

• О Лука сас врачо. И кала во пистрояс и Библия, кай тэ пэрэдэл о гиндо важ о бэято, кай ужэ арақаделяпэ, во пистросардя пэ ӷреческо шыб кацаво жэ алав, саво пэрэдэл о гиндо пала бэято, саво инке на арақаделяпэ (Луки 1:41; 2:12, 16).

Простия о Дэл кодэла жувля, сави стердя аборто?

Если и жувли, сави инке на ӷанэнас лэ Дэвлэс, стердя аборто, о Дэл можэт ла тэ простий. Если кати вой ля тэ диқэл пэ жызня кадя, сар о Дэл. Тоди лати на трэбуй будэр тэ загиндойпэ и тэ дошалярэл пэс андэ кода. Васо? Важ кода кай «О Иеговаb простий и жалуий анда вся оди... [...] Сар дур ек еқэстар о востоко и о западо, кадя дэ дур во одындярдя амэндар амарэ ӷрехоря» (Псалом 103:8—12). Если и жувли анда вся оди каийпэ, о Иегова простия ла (Псалом 86:5).

Можэт ли и дэй тэ стерэл аборто, если или вой или о бэято моӷут тэ мэрэн?

Амэ ӷанас па Библия, сар о Дэл диқэл пэ лэ бэятостири жызня, саво инке на арақаделяпэ. Важ када, дажэ если ԥэнэн, кай и дэй или о бэято можэт тэ на вижувэл, и дэй всаек на стерэла аборто.

Ай если во время родов по любому трэбуй тэ витидэн, кас тэ спасын ла да, чи лэ бэятос, тоди витидэл кодэва, ко важ када атвечает.