На ашав лэ Иеговас, дажэ кала хасардёл о патяимос андэр пэстэ или андэ авэр

1. Савэ подаркоря о Иегова стердя пэстирэ служытелёнэнди?

И ЖЫЗНЯ андэ люма ашэл май ԥари и май ԥари. Но через пэстири арӷанизацыя о Иегова фэрий амэн. О Дэл подарисардя амэнди баро дэвликуно ери (Пс. 133:1). Кадяжэ во поможый, кай о хулай и хулаи тэ ладин (Еф. 5:33—6:1). Ай инке во сытярэл, со тэ терас, кай тэ авэл спокойство андо ди.

2. Васо тэ служыс лэ Иеговасти най вся и время вушэро?

² Но тэ служыс лэ Иеговасти най вся и время вушэро. Дэкала и ԥрала и ԥэя дэн дума или терэн кода, через со амэнди можэт тэ авэл ԥарэс по ди. Или амэ умэкас и вас, кала шылисавас, особено, если када терас упалэ и упалэ. Но амэнди нащи тэ сдаспэ. Амэнди трэбуй тэ на парашас тэ служысарас лэ Иеговасти, дажэ кала: 1) амэнца обжалпэ найдраго о ԥрал или ԥэй, 2) подвэдий о хулай или хулаи и 3) на патяс, кай амэндар авэла варисаво толко. Роздиқаса, сар андэ кацавэ ситуацыи андярдэ пэс трин лэ Дэвлэстирэ служытеля андэ дэлмутни время. Амэ уӷанаса, сости амэ можэм лэндар тэ сытювас.

НА АШАВ ЛЭ ИЕГОВАС, КАЛА О ԤРАЛ ИЛИ ԤЭЙ НАЙДРАГО ТУСА ОБЖАЛПЭ

3. Саво ԥаримос исин кай лэ Дэвлэстирэ служытеля?

³ Ԥаримос. Дэкала амэ умэкас и вас через и ԥрала и ԥэя. Васо? Амэнди можэт тэ на чалёл дэсо андэ лэнго характеро. Или амэн холярэл кода, сар вонэ пэс андярэн или дэн дума. Ай дэкала амэ дас наздив через кода, сави ришэния прилинэ и барэдэр ԥрала андэ собрания. Через када дэсавэ моӷут тэ гиндон: «Сар кадя можэт тэ авэл андэ лэ Дэвлэско народо?» Вместо кода, кай еқэҭанэ лэ ԥралэнца и лэ ԥэянца тэ служын лэ Дэвлэсти, вонэ лэн тэ обнашэн кодэлэн, ко лэн холярдя (Соф. 3:9). Или вобще парашэн тэ ԥирэн пэ собрании. Но годявэрнэс када чи най? Андэ Библия ԥэнэнпэ пала мануш, савэстэ сас кацаво ԥаримос. Давайте уӷанаса, сар во пэс андярдя.

4. Саво ԥаримос сас кай о апостало Павло?

⁴ Примеро анда Библия. О апостало Павло драго ӷанэнас, кай и ԥрала и ԥэя найидиальни. Например, кала во кати ашэля христианино, андэ собрания лэсти на допатянас (Дила 9:26). Ӷэт май интя, пала лэстэ розындярэнас и сплетни и камэнас тэ мэлярэн лэско алав (2 Кр. 10:10). О Павло диқэлас, сар ек барэдэр ԥрал нэправильно пэс андярэлас, и через када бут ко моӷ тэ парашэл тэ патял андо Дэл (Гал. 2:11, 12). Ек анда лэстирэ амала, о Марко, фартэ лэс подвэдисардя (Дила 15:37, 38). Андэ кажно ситуацыя о Павло моӷ тэ ришый важ пэстэ, кай парашэла тэ общяеца кадэлэ манушэнца. Но во старыияспэ тэ диқэл андэ ԥрала и ԥэя лашо и на парашэлас тэ служый лэ Иеговасти. Со лэсти андэ када поможысардя?

5. Со поможысардя лэ Павлости тэ на дурёл лэ ԥралэндар и лэ ԥэяндар? (Калосы 3:13, 14) (Диқэн кадяжэ и картинка.)

⁵ О Павло любияс пэстирэ ԥралэн и ԥэян. Через када во май бут шолас сама пэ лэнго лашымос, ай най пэ лэндирэ нэдостаткоря. Кадяжэ када поможыяс лэ Павлости тэ терэл кода, со во екжэно запистросардя андэ Калосы 3:13, 14 (проадинон). Во сытярэлас лэ ԥралэн и лэ ԥэян тэ простин. И акэ сар во екжэно приля кадэва совето андэ пэстири ситуацыя лэ Маркоса. Хоть андэ пэрво мисианерско служэния о Марко ашадя лэ Павлос, во на ля тэ ритярэл пэр лэстэ и холи. Ӷэт май интя во пистросардя о письмо лэ христианонэнди андэ Калосы. Андэр лэстэ во похвалисардя лэ Маркос, кай во подритярэлас лэс и ԥэндя, кай во лашо амал (Клс. 4:10, 11). Кала о Павло бэшэлас андо баруно андо Римо, во помангля, кай каринг лэстэ тэ авэл имено о Марко (2 Тим. 4:11). Дицол, кай о Павло простияс пэстирэ ԥралэн и ԥэян и на дурёлас лэндар. Сости амэн када сытярэл?

6, 7. Со поможыя амэнди тэ любисарас лэ ԥралэн и лэ ԥэян, хоть лэндэ исин нэдостаткоря? (Евреёря 13:1).

⁶ Сости амэн када сытярэл. О Иегова камэл, кай амэ тэ на парашас тэ любисарас лэ ԥралэн и лэ ԥэян. (Проадинон Евреёря 13:1.) Если вонэ андярдэ пэс амэнца най кадя, сар прижал лэ христианонэнди, амэ на ласа тэ гиндосарас, кай вонэ камэнас тэ стерэн амэнди найлашымос (Прит. 12:18). Патян, кай вонэ камэн тэ терэн кода, со ԥэнэн о Иегова, просто лэндэ када най вся и время вижал. О Дэл на отԥэндёл пэстирэ служытелёнэндар, савэ кандэн и любин лэс, хоть лэндэ исин нэдостаткоря и вонэ шылинпэ. Андэ Библия ԥэнэнпэ: «Во... най вся и вечность лэла тэ холявэл» (Пс. 103:9). Амэнди трэбуй тэ сытювас кай амаро небесно Дад и тэ простисарас аврэн (Еф. 4:32—5:1).

⁷ Сэрэн, кай и время кадэла люмати фартэ пашэ. Важ када терэн вся, кай и дружба лэ ԥралэнца и лэ ԥэянца тэ авэл инке май састи. Возможно, пар мэндэ лэна инке май фартэ тэ тасавэн. Амэн дажэ моӷут тэ шон андо бар, важ кода кай амэ патяс андо Дэл. Тоди амэнди трэбуй авэла, кай и ԥрала и ԥэя амэн тэ подритярэн май фартэ, чем варикала (Прит. 17:17). Акэ со сас андэ жызня кай о барэдэр ԥрал Мануэлёa анда Испания. Во и авэр ԥрала бэшэнас андо бар, важ кода кай на линэ андэ вас и мардя. Во росԥэнэн: «Андо баруно никастэ андар мэндэ на сас пэско кутко. И важ када амэ моӷли вушэро пала варисо тэ заспорисавас. Амэнди трэбуй сас тэ сытювас тэ на шас сама пэ ек еқэстирэ нэдостаткоря и ӥто тэ простисарас. Када поможысардя амэнди, кай амэ тэ ладисарас машкар пэстэ и тэ авас дружни. Кадя амэ моӷли тэ фэрисарас ек еқэс, важ кода кай андо бар сас кодэла, ко на служынас лэ Иеговасти. Еқвар мэ шындэм о вас и манди пэрэԥанглэ лэс. Мэ нэ моӷ екжэно варисо тэ терав. Манди трэбуй сас помощь. Важ када ек ԥрал поможыяс манди. Например, халавэлас мэрни ӥда. Кала мандэ андэ жызня сас ԥаримос, мэ полэм, со када чачуни ԥралицко любовь». Давайте на ласа тэ аштярас ԥари время, ай сытюваса ужэ акана тэ ладисарас.

НА АШАВ ЛЭ ИЕГОВАС, КАЛА ПОДВЭДИЙ О ХУЛАЙ ИЛИ ХУЛАИ

8. Саво ԥаримос можэт тэ авэл андэ еря?

⁸ Ԥаримос. Андэ кажно ери исин трудности. Андэ Библия ворта ԥэнэнпэ, кай лэ манушэндэ, савэ жэнинпэ и жан миростэ «авэла нэво ԥаримос андэ жызня» (1 Кр. 7:28). Васо? Важ кода кай о хулай и хулаи — када найидиальни мануша. Кажнонэстэ андар лэндэ исин пэско характеро, и лэнди можэт най еқэндар варисо тэ чалёл. Вонэ моӷут тэ авэн анда разни культуры или лэн барярдэ по разному. Сар прожал время посли ябьяв, андэ лэнго характеро можэт тэ дицол кода, пэр со вонэ варикала на шонас сама. Через када лэндэ можэт тэ на авэл ладо. Вместо кода, кай тэ улэн кадэя проблема, о хулай и хулаи моӷут алавэнца тэ долэнпэ ек еқэстэ. Вонэ моӷут дажэ тэ гиндон, кай ек, со лэнди ашэляпэ, — када тэ жувэн отдельно или тэ подэн по розводо. Но ашэна вонэ кадэлэстар май бахталэ?b Подаса дума пала ек жувли, сави жувэлас андэ библейско время. Вой на парашэлас тэ кандэл лэ Иеговас, хоть латири жызня сас фартэ ԥари через лако хулай.

9. Саво ԥаримос сас андо ери кай и Авигея?

⁹ Примеро анда Библия. И Авигея сас лэ Навалостири хулаи. Андэ Библия ԥэнэнпэ, кай во сас ӷрубо мануш, и лэстэ сас баруно ди (1 Сам. 25:3). Наверно, ла Авигеяти сас фартэ ԥарэс тэ жувэл кацавэ манушэса. Моӷла вой тэ ужалтар лэстар? Вой моӷла када тэ стерэл, кала о Давидо, саво трэбуй сас тэ авэл царё андо Израилё, камэлас тэ умарэл латирэ хулас. О Давидо закамля када тэ стерэл, важ кода кай о Навало лажавардя лэс и лэстирэ халавдэн (1 Сам. 25:9—13). И Авигея моӷла тэ унашэл и тэ домэкэл, кай о Давидо тэ стерэл кода, со камля. Но вой на ашадя када вся кадя и мангля лэ Давидос, кай во тэ на умарэл лэ Навалос (1 Сам. 25:23—27). Васо вой кадя пэс андярдя?

10. Со побудисардя ла Авигея тэ фэрий пэско ери, хоть во сас найидиально?

¹⁰ И Авигея любияс лэ Иеговас и столас патив по законо важ о ери. Возможно, вой ӷанэнас, сави дила о Дэл дя лэ Адамости и ла Евати, кала стидя пэрво ери (Быт. 2:24). И Авигея полэлас, кай важ о Иегова о ери — када свынто. Вой камэлас тэ радуий лэ Иеговас и када побудияс ла тэ стерэл вся, кай тэ спасый пэстирэ хулас и кодэлэн, ко сас андэ лако цэр. Вой ӥто вся стердя и на дя лэ Давидости тэ умарэл лэ Навалос. Вой сас кадяжэ ӷотово тэ мангэл патив пала найлашымос, саво вой на стердя. Дицолас, кай о Иегова любияс кадэла жувля, вой сас смило и ӷотово сас тэ жал пэ жэртвы. Сости моӷут тэ сытён и хула́я и хулая́ кай и Авигея?

11. а) Со о Иегова аштярэл лэ хуластар и ла хулаятар? (Ефесо 5:33). б) Сости сытярэл тумэн кода, сар ек ԥэй старыияспэ тэ фэрий пэско ери? (Диқэн кадяжэ и картинка.)

¹¹ Сости амэн када сытярэл. О Иегова камэл, кай о хулай и хулаи тэ на росжанпэ, дажэ тоди, кала лэнди найвушэро тэ ужувэнпэ ек еқэса. О Дэл фартэ радуийпэ, кала вонэ старыинпэ тэ ришын пэстирэ проблемы и тэ сыкавэн ек еқэсти пэстири любовь и патив. (Проадинон Ефесо 5:33.) Акэ со сас андэ жызня кай и ԥэй Ка́рмен. Варикай через шов бэрш посли кода, сар вой жыля миростэ, вой ля тэ сытёл па Библия лэ Иеговастирэ свидетелёнэнца, ай ӷэт май интя болделя. Вой росԥэнэн: «Мэрнэ хуласти на чалеля, кай мэ отдав и время лэ Иеговасти. Во ԥэнэнас пэр мандэ найлашэ алава и даравэлас кодэлэса, кай ашавэла лэ ерес». Но и Кармен терэлас вся, кай тэ фэрий пэско ери. Вой старыияспэ тэ стол патив пэ пэско хулай и тэ любий лэс. Вой кадя терэлас 50 бэрш. Вой ԥэнэн: «Прожылэ бэрша, и мэ лэм май драго тэ полав, со по ди кай мэрно хулай, и сытелэм тэ дав дума лэса ковлэс. Мэ приставас вся пэско зор, кай тэ фэрисарав амаро ери. Мэ ӷанавас, кай важ о Иегова о ери свынто. Мэ любисарав лэ Иеговас, важ када мандэ дажэ гиндо на сас тэ ужавтар пэстирэ хуластар»c. Если андэ тумаро ери появинпэ трудности, патян лэ Иеговасти. Во подритярэла тумэн и поможыя вся тэ виритярэн.

НА АШАВ ЛЭ ИЕГОВАС, КАЛА НА ПАТЯС, КАЙ ТУТАР АВЭЛА ВАРИСАВО ТОЛКО

12. Саво ԥаримос исин кай о мануш, саво стердя баро бэзэх?

¹² Ԥаримос. Через о баро бэзэх мануш хасарэл патив каринг пэстэ. Андэ Библия ԥэнэнпэ, кай кацавэ манушэстэ бари дук по ди (Пс. 51:17). О ԥрал, савэс ақарэн Робе́рто, бут бэрша пристолас зор, кай тэ парудёлпэ и тэ ашэл помошнико андэ собрания. Но ӷэт май интя во стердя баро бэзэх и поля, кай придя лэ Иеговас. Во росԥэнэн: «Мэрно ди фартэ халас ман. Мэ сымас ӷидко корко пэсти и по ди сас баро бар. Мэ фартэ ровавас и анда вся оди мангаваспэ лэ Иеговасти. Сэрав, кай мэ гиндосаравас кадя: о Дэл будэр никала на лэла ман тэ ашунэл, сости лэсти када трэбуй? Мэ кадя лэс подвэдисардэм». Если амэ подямпэ лэ бэзэхэсти, амэндэ моӷут тэ умэкэнпэ и вас. Андо кацаво маменто оди упалэ и упалэ ԥэнэн амэнди, кай о Иегова одбанделя амэндар и лэсти найсо тэ служысарас (Пс. 38:4). Если тутэ по ди кацаво, погиндосар пала ек христианино, саво жувэлас андо пэрво вико. Во на парашэля тэ служый лэ Иеговасти дажэ посли кода, сар стердя баро бэзэх.

13. Саво баро бэзэх стердя о апостало Пётро и каринг со када андя?

¹³ Примеро анда Библия. И рят англа лэ Исусостири смэрть о Пётро най еқвар шылисайля, и када андя лэс каринг о баро бэзэх. Спэрва о Пётро фартэ патялас андэр пэстэ и хвалияспэ кодэлэса, кай никала на ашавэла лэ Исусос, дажэ если авэр апосталоря кадя стерэна (Мар. 14:27—29). Потом андо Гифсиманско садо во най еқвар засутя (Мар. 14:32, 37—41). Ӷэт май интя ӷурто мануша авелэ, кай тэ залэн лэ Исусос, ай о Пётро занашля (Мар. 14:50). Инке во триварэс отԥэнделя, кай на ӷанэн лэ Исусос, и дажэ солахадя (Мар. 14:66—71). Кала о Пётро поля, саво дэ баро бэзэх стердя, во на виритярдя и заровья. Наверно, андэ кодэва маменто во поля, сави дэ бари лэстири дош (Мар. 14:72). Через дэсавэ часоря лэстирэ друӷос умардэ. Кати погиндон, саво дэ баро бар сас лэстэ по ди! Возможно, во гиндояс пала пэстэ, кай во най мануш.

14. Со поможысардя лэ Петрости тэ на парашэл тэ служый лэ Иеговасти? (Диқэн кадяжэ и картинка пэ обложка.)

¹⁴ Но о Пётро на сдяпэ и на парашэля тэ служый лэ Иеговасти. Со андэ када лэсти поможысардя? О Пётро на дурёлас аврэндар. Во жыля кай авэр ученикоря, и вонэ придинэ лэсти зор (Лука 24:33). Инке, посли кода сар о Исусо рисайля каринг и жызня, во авеля каринг о Пётро — наверно, кай тэ подритярэл лэс (Лука 24:34; 1 Кр. 15:5). Ӷэт май интя о Исусо на ля тэ лажаварэл лэ Петрос, кай во шылияспэ, ай дя пэстирэ друӷости бари дила (Иоан. 21:15—17). О Пётро полэлас, кай во стердя баро бэзэх. Но во на гиндояс, кай акана лэстар нинай нисаво толко. Васо? Во ӷанэнас, кай о Исусо пэр лэстэ кадя на диқэл. Авэр ученикоря и май дур подритярэнас лэ Петрос. Сости амэ сытювас кай о Пётро?

15. Со о Иегова ԥэнэн амэнди? (Псалом 86:5; Римо 8:38, 39). (Диқэн кадяжэ и картинка.)

¹⁵ Сости амэн када сытярэл. О Иегова камэл, кай амэ тэ патяс, кай во любий амэн и ӷотово тэ простий. (Проадинон Псалом 86:5; Римо 8:38, 39.) Кала амэ терас бэзэх, амэн хал оди. Када нормально. Но амэнди нащи тэ гиндосарас, кай о Иегова будэр на любий амэн и никала на простия. Фэдэр май ӥто тэ мангас и помощь. О Роберто, пала саво амэ дям дума, ԥэнэн: «Мэ стердэм бэзэх, важ кода кай надеисававас пэр пэстэ и гиндосаравас, кай пэстирэ зорэса смоӷу тэ на подавпэ лэ бэзэхэсти». Во поля, кай лэсти трэбуй тэ подэл дума лэ барэдэрэ ԥралэнца андэ собрания. Акэ со во инке ԥэнэн: «Через и барэдэр ԥрала о Иегова сыкадя, кай любий ман. Мэ диқлэм, кай и ԥрала тожэ цэнин ман. Вонэ поможысардэ манди тэ полав, кай о Иегова на одбанделя мандар». Амэ тожэ можэм тэ патяс, кай лэ Иеговасти амэ фартэ куч. Во точно амэн простия, если каисавас, родас помощь и анда вся зор старысавас тэ на шылисавас упалэ (1 Иоан. 1:8, 9). Если амэ патяс, кай о Иегова любий амэн, када поможыя тэ на парашас тэ служысарас лэсти, дажэ если амэ шылисавас.

16. Васо тумэ камэн и май дур тэ служын лэ Иеговасти?

¹⁶ О Иегова цэнуий, кала амэ пристас о зор тэ служысарас лэсти андэ кадэла ԥарэ послидни деса. Тэ терас када найвушэро, кала хасарас о патяимос андэр пэстэ и андэ авэр. Но лэ Иеговастирэ зорэса амэндэ вся вижала. Амэ можэм тэ састярас пэстири любовь каринг и ԥрала и ԥэя и тэ простисарас, кала вонэ амэн холярэн. О хулай и хулаи моӷут вмести тэ ришын и проблемы, савэ моӷут тэ авэн андэ лэнго ери. Кадя вонэ сыкавэна и любовь и патив каринг кодэва, ко создал о ери. Кала подаспэ лэ бэзэхэсти, амэ родас помощь кай о Иегова. Амэ патяс, кай во любий и простия, и через када амэ на парашас тэ служысарас лэсти. Если амэ «на ласа тэ умэкас и вас, кала терас лашымос», тоди можэм тэ патяс, кай о Иегова дэла амэнди бут блаӷословении! (Гал. 6:9).