14. Кала стердяпэ кода, со запистромэ андэ книӷа Иоиль 2:28, 29?

¹⁴ Андэ книӷа Иоиль запистромэ лащи новость. И ԥув упалэ авэла лащи (Иоиль 2:23—26). Посли када авэла кацави время, кала о чачимос важ о Дэл лэна тэ росԥэнэн бутэ манушэнди. О Иегова дя алав: «Мэ дава пэско свынто духо разнонэ манушэнди, и тумарэ шавэ и щея авэна тэ росԥэнэн, со авэла англэ. [...] И дажэ пэстирэ слуӷонэнди и лэ служанкэнди мэ дава пэско духо» (Иоиль 2:28, 29). О Дэл дя пэско свынто духо най тоди, кала и израильтяноря рисайлэ андэ пэстири ԥув анда Вавилоно, ай кала прожыля бут бэрша. Када сас андэ Пятидесятница андо 33 бэрш лэ И. Х. Катар амэ када ӷанас?

15. Савэ алава парудя о Пётро анда книӷа Иоиль 2:28 и со када сыкавэл?

¹⁵ О апостоло Пётро ԥэндя, кай о пророчество анда книӷа Иоиль 2:28, 29 поджал каринг кодэя время, кала сас и Пятидесятница андо 33 бэрш лэ И. Х. Кадэва гиндо лэстэ сас лэ Дэвлэстар. Андэ Пятидесятница варикай андо 9 часо тэсараса, о Дэл стердя чуда. Во дя пэско свынто духо лэ Иисусостирэ учениконэнди. Тоди вонэ линэ тэ дэн дума «пала бари лэ Дэвлэстири дила» (Деяния 2:11). О Иегова стердя кадя, кай о Пётро набут тэ парувэл и алава андо пророчество анда книӷа Иоиль. (Адиносар Деяния 2:16, 17f.) Шутэ тумэ сама, сар паруделэ и алава? И алава «посли кода» о Пётро парудя пэ алава «андэ послидни деса» (катэ и дума жал пала послиднё время англа кода, сар розмардэ о Иерусалимо андо 70 бэрш лэ И. Х.) О Дэл дэла пэско свынто духо «разнонэ манушэнди». Када сыкавэл, кай кадэва пророчество анда книӷа Иоиль стердяпэ кати тоди, сар прожыля най ек шэл бэрш.

16. Сар о свынто духо поможыяс тэ росԥэнэн пала Дэл андэ пэрво вико и андэ амарэ деса?

¹⁶ Посли кода, сар андэ пэрво вико о Дэл дя пэско свынто духо лэ христианонэнди, вонэ линэ тэ росԥэнэн пала лэстэ. Прожыля время и пала Иегова уӷангля вся и люма. Кала о апостоло Павло пистросардя пэско письмо важ и колоссяноря (када сас варикай андэ 61 бэрш лэ И. Х.), можно сас тэ ԥэнэн, кай лащи весть важ о Дэл «росԥэндэ всаворэнди пэ вся люма» (Колоссянам 1:23). Кала о Павло ԥэндя пала разни мануша, во дя дума пала мануша, савэ жувэнас андэ лэстири время. Андэ амарэ деса пала Дэл уӷанглэ фартэ бут мануша. И лащи весть росԥэнэнпэ «жы кай ла ԥувьятирэ краёря»! (Деяния 13:47). И вся када терэлпэ, важ кода кай о Дэл дэл пэско зор, када лэско свынто духо. (Диқэн и рамка «Мэ дава мэрно духо».)