Англа кастэ тумэ камэн тэ авэн лашэ?
«О Дэл обжалпэ аврэнца кати кадя, сар вонэ затердэ, и важ када во на бистрэла тумари дила и любовь, сави тумэ сыкадэ каринг лэско алав» (ЕВРЕЯМ 6:10).
1. Со камэл кажно мануш?
СО АВЕЛОП тутэ по ди, сар кодэла, ко тут драго ӷанэн, цэний и стол пэр тутэ патив, бистэрдоп тут и тиро алав? Ту на полиноп, васо кадя вижыля. Важ кода кай кажно камэл, кай важ лэстэ тэ сэрэн. Амэ камас, кай авэр мануша тэ ӷанэн, ко амэ исин и сави дила амэ стердям (Числа 11:16; Иов 31:6).
2, 3. Васо кода, кай о мануш камэл, кай лэс тэ цэнин, можэт тэ ашэл вэрыто? (Диқэн и картинка англа статья.)
2 О мануш камэл, кай лэс тэ цэнин. Кажно мануш ӷрешно и кода, со во камэл, можэт тэ ашэл вэрыто. О Сатана андэ пэско миро терэл кадя, кай и мануша тэ закамэн тэ авэн ашунглэ и тэ авэн барэ манушэнца. Кадэлэса о Сатана терэл кадя, кай и мануша тэ на шон сама и тэ на стон патив пэ кодэва, касти честь па чачимастэ прижал. Касти? Амарэ дадэсти лэ Иеговасти, саво по нэбо (Откровение 4:11).
3 Кала о Иисусо жувэлас пэ ԥув, дэсавэ барэ мануша андэ вера фартэ камэнас, кай пэр лэндэ тэ стон кацави жэ патив, сар по Дэл. О Иисусо ԥэндя пэстирэ учениконэнди: «Фэринпэ лэ книжниконэндар, савэнди чалёл тэ ԥирэн андэ лунго йда, савэ любин, кай лэн тэ шон сама котэ, кай и мануша тинэн и битинэн, тэ бэшэн англал андэ синагоги и любин, со май лашэ ҭана, кала бэшэн тэ хан лэ мироса». Инке во ԥэндя: «О Дэл виандярэла лэнди инке май баро сындо» (Луки 20:46, 47). Но андэ кадэя жэ время о Иисусо похвалисардя ла чорора ԥивля, сави шутя фартэ набут ловэ, и пэ када нико на шутя сама (Луки 21:1 жы кай 4). Дицол, кай о Иисусо па аврятэ гиндояс, со када, кала лэ манушэс цэнин. Андэ кадэя статья подаса дума, со поможыя амэнди тэ диқас пэ када кадя, сар о Иегова.
ЕКЖЭНО О ДЭЛ ӶАНЭН И ЦЭНИЙ АМЭН
4. Англа кастэ амэ камас тэ авас лашэ и васо?
4 Кала о мануш камэл, кай лэс тэ цэнин, во терэл вся, кай лэстэ тэ авэл бари образования чи во тэ авэл барэ манушэса пэ лащи бути, чи, кай лэс всаворэ тэ ӷанэн. Но англа кастэ амэ камас тэ авас лашэ? Шон сама пэ Павлостирэ алава: «Акана, кала тумэ уӷанглэ лэ Дэвлэс чи фэдэр тэ ԥэнас, кала о Дэл уӷангля тумэн, хэба, тумэ упалэ камэн тэ ринпэ каринг кода, пэр со ритярдёлпэ кадэва миро и нисо на анэн, и упалэ камэн тэ авэн лэндирэ рабонэнца?» (Галатам 4:9). Сави када дэ бари бах, кала о Дэл, о хулай пэ вся люма, ӷанэн амэн! Во камэл, кай амэ тэ ашас лэстирэ лашэ друӷонэнца и анда оди камэл тэ ӷанэн амэн. Кала амэ ашас лэ Иеговастирэ друӷонэнца, амэ полас, васо жувас (Экклезиаст 12:13, 14).
5. Со тути трэбуй тэ терэс, кай о Иегова тэ ӷанэн и тут?
5 Амэ ӷанас, кай о Моисеё сас лэ Иеговаско друӷо. О Моисеё мангля лэ Иеговас, кай во «тэ ԥэрнавэл лэсти пэско дром». Тоди о Иегова ԥэндя лэсти: «Кода, пала со ԥэндян, мэ кадяжэ стерава, важ кода кай ту ашэлян куч важ мандэ и мэ ӷанав тут па алавэстэ» (Исход 33:12 жы кай 17). О Иегова камэл тэ ӷанэн и тут. Со важ када тути трэбуй тэ терэс? Анда вся оди тэ любис лэ Дэвлэс и тэ дэс алав тэ жувэс важ лэстэ. (Адиносар 1 Коринфянам 8:3a).
6, 7. Через со амэ хасардоп и дружба лэ Иеговаса?
6 Трэбуй тэ цэнисарас амари кучутни дружба амарэ небеснонэ дадэса. Акэ, со пистросардя о апостоло Павло лэ христианонэнди андэ Галатия. О Павло пистросардя, кай вонэ тэ фэринпэ, кай тэ на ашэн раборя кодэлэсти пэр со ритярдёлпэ кадэва миро и саво нисо на анэн. Кадяжэ тэ фэринпэ, кай тэ на цырдэнпэ тэ авэн ашунглэ и барвалэ (Галатам 4:9). И христианоря анда Галатия ужэ ӷанэнас лэ Дэвлэс и о Дэл ӷанэнас лэн. Но прожыля время и вонэ рисайлэ каринг кода, со шушо и нисо на анэн. Можно тэ ԥэнас, кай о Павло ԥэндя лэнди: «Васо тумэ рисавэн каринг кодэя дила, сави шущи и нисо на анэн, и сави варикала тумэ ашадэ?»
7 Тердопэ кацаво и амэнца? Да. Кала амэ уӷанглям лэ Иеговас, бут андар мэндэ, сар и о Павло, отԥэнделямпэ тэ авас ашунглэ андэ лэ Сатанаско миро. (Адиносар Филиппийцам 3:7, 8b). Дэко витидя тэ отԥэндёлпэ ла баря образованиятар чи ла лащя бутятар, чи тэ затерэл барэ ловэ. Ай дэко отԥэнделяпэ тэ барвадёл и тэ авэл ашунгло, кала лэстэ драго вижал тэ дилабэл, тэ цэлэл чи тэ залэлпэ спортоса (Евреям 11:24 жы кай 27). Авелоп найгодявэрнэс тэ гиндосарас, кай амэ варисо хасардям, важ кода кай ашадям када. Сар кадя тэ гиндосарас, амэ закамлоп тэ рисавас каринг кода «пэр со ритярдёлпэ кадэва миро и нисо на анэнc».
ТЕРЭН ВСЯ, КАЙ ТУМЭ ТЭ АВЭН КУЧ ЛЭ ДЭВЛЭСТИ
8. Со поможыя амэнди тэ авас куч лэ Дэвлэсти?
8 Со поможыя амэнди тэ авас куч лэ Дэвлэсти, ай най тэ авас лашэ англа мануша андэ кадэва миро? Погиндосарам акэ пала со. Пэрво, о Иегова вся время сэрэл и важ лэстэ куч кодэла, ко на парашэл лэсти тэ служый. (Адиносар Евреям 6:10d; 11:6.) Важ о Иегова куч кажно мануш, саво на парашэл тэ терэл лэстири дила. Важ када о Иегова гиндой, кай найдраго авелоп тэ на цэний кацавэ манушэс. О Иегова «ӷанэн кодэлэн, ко лэско» (2 Тимофею 2:19). Во ӷанэн о дром кодэлэнго, ко ритярэл лэско законо, ай кадяжэ ӷанэн, сар тэ улэл лэндар о ԥаримос (Псалом 1:6; 2 Петра 2:9).
9. Росԥэнэн, сар о Иегова сыкадя, кай цэний пэстирэ народос.
9 О Иегова, кай тэ сыкавэл, кай цэний пэстирэ манушэн, дэкала терэлас кода, пала со вонэ и на гиндонас (2 Летопись 20:20, 29). Сэрэн, сар о Иегова спасысардя лэ манушэн паша лоли моря, кала лэндэ пашэля баро и зорало лэ фараоноско войско (Исход 14:21 жы кай 30; Псалом 106:9 жы кай 11). Кодэлэстар, сар о Дэл спасысардя пэстирэ народос, кадэва народо дя наздив. Прожыля сорок бэрш, ай и мануша инке дэнас дума пала када (Иисус Навин 2:9 жы кай 11). Кала амэ гиндосарас, сар о Иегова сыкадя пэстири любовь и пэско зор, када поможыя, кала пар мэндэ жала о Гого анда Магого (Иезекииль 38:8 жы кай 12). Андэ кодэя время амэ аваса фартэ лошалэ. Васо? Амэ терасас вся, кай тэ авас куч лэ Дэвлэсти, ай най тэ ашас лашэ англа мануша андэ кадэва миро!
10. Сар о Иегова дэкала сыкавэл, кай и мануша лэсти куч?
10 Дуйто, о Иегова сыкавэл, кай амэ куч важ лэстэ, дэкала кадя, сар амэ и на аштярасас. Анда Библия дицол, кай о мануш, саво терэл лащи дила, кай тэ ӷанэн авэр, лэсти на авэла нисаво лашимос лэ Иеговастар. Васо? Во ужэ ля пэско лашимос. Во лашо англа мануша. (Адиносар Матфея 6:1 жы кай 5e). О Иисусо ԥэндя, кай лэско дад диқэл вся, со на диқэл о мануш. О Дэл диқэл пала мануш, саво терэл лашимос, но пала када на ӷанэн авэр. Важ када о Иегова блаӷословий кацавэ манушэс. Но дэкала во терэл када кадя, сар о мануш и на аштярэл. Акана подаса дума пала када.
О ИЕГОВА СЫКАВЭЛ, КАЙ ЦЭНИЙ ЛА СЭЖОНА ЩЯ
11. Сар о Иегова сыкадя, кай и Мария куч важ лэстэ?
11 О Иегова витидя ла сэжона щя ла Мария, кай латэ тэ арақадёлпэ лэско шаво, о Иисусо. И Мария жувэлас андо найбаро форо андо Назарето. Кадэва форицэ сас дур лэ Иерусалимостар и лэ шукарнэ храмостар. (Адиносар Луки 1:26 жы кай 33f). Васо о Дэл витидя ла Мария? О анӷело Гавриило ԥэндя: «Ту фартэ куч важ о Иегова». Кода, кай о Иегова сас лашо друӷо ла Марияти, дицол анда латири дума ла Елизаветаса (Луки 1:46 жы кай 55). О Иегова диқэлас пала Мария и дя лати лашимос, саво вой и на аштярэлас.
12, 13. Сар о Иегова сыкадя, кай цэний лэ Иисусос, кала во арақаделяпэ и сар сыкадя, кай цэний, сар лэс андэ́ андо храмо, кала прожылэ сорок деса?
12 Кай и Мария арақаделяпэ о Иисусо и о Иегова на ля тэ росԥэнэн важ када лэ барэ манушэнди андо Иерусалимо и Вифлеемо. И анӷелоря авелэ каринг и пастухоря, савэ пасынас лэ бакрэн пэ мал андо Вифлеемо (Луки 2:8 жы кай 14). Тоди и пастухоря авелэ тэ диқэн лэ бэятос (Луки 2:15 жы кай 17). И Мария и о Иосифо фартэ динэ наздив, кай кадя шутэ сама лэ Иисусос. Акана погиндон, сар терэл о Иегова, ай сар терэл о Сатана. Кала о Сатана бишалдя лэ манушэн, савэ драбатярэн пэ черӷая каринг о Иисусо и лэстирэ родителя, пала када уӷангля вся о Иерусалимо и жыля бари бида (Матфея 2:3). Умардэ бутэ бэятонэн, савэ на слинэ ни андэр со дошалэ (Матфея 2:16).
13 Прожылэ сорок деса, сар арақаделяпэ о Иисусо, и Мария трэбуй сас тэ анэн жэртва андо Иерусалимско храмо. О храмо сас лэ Вифлеемостар девять километров (Луки 2:22 жы кай 24). Вой жыля андо дром пэстирэ хуласа и лэ цыкнорэ Иисусоса. Па дром и Мария, файма, гиндояс, ԥэнэна о рашай варисо пала Иисусо чи най. Но вся сас кадя, сар и Мария на аштярдя. О Иегова витидя лэ Симеонос, саво кандэлас и даралас лэ Дэвлэстар. Ай кадяжэ витидя ла Анна, ла ԥивля, сави ԥэнэнас, со авэла англэ и лати сас 84 бэрш. Через лэндэ о Иегова ԥэндя, кай всаворэ тэ ашунэн, кай о Иисусо кодэва, пала кастэ сас ԥэндо, кай авэла о Христос (Луки 2:25 жы кай 38).
14. Саво лашимос дя о Дэл ла Марияти?
14 И Мария диқэлас и сытярэлас лэ Иеговастирэ шавэс. Сыкавэлас о Иегова и май дур, кай цэнияс ла чи най? Да. О Дэл стердя кадя, кай андэ Библия тэ запистрон, со вой ԥэнэнас и терэлас. И Мария на ԥирэлас лэ Иисусоса кодэла трин епашэса бэрш, кала во росԥэнэнас важ о Дэл. Каринг кодэя время вой сас ужэ ԥивли и, файма, трэбуй сас тэ жувэл андо Назарето. Важ када вой промэкля бут со анда лэ Иисусостири жызня, кала во росԥэнэнас важ о Дэл. Но вой сас паша лэстэ, кала во мэрэлас (Иоанна 19:26). Май англэ и Мария сас лэ учениконэнца, кала андэ пятидесятница пэр лэндэ сжыля о свынто духо (Деяния 1:13, 14). Пэр латэ кадя жэ, сар и пэ авэр ученикоря, сжыля о свынто духо. Вижал, акана вой по нэбо лэ Иисусоса пэ вся вечность. Саво дэ райкано лашимос дя ла Марияти о Дэл!
О ИЕГОВА СЫКАВЭЛ, КАЙ ЦЭНИЙ ПЭСТИРЭ ШАВЭС
15. Сар о Иегова сыкадя, кай цэний лэ Иисусос, кала во жувэлас пэ ԥув?
15 О Иисусо на терэлас варисо, кай тэ авэл лашо англа барэ мануша андэ политика чи андэ вера. Но сар дэ драго лэ Иисусости сас тэ ашунэл, кай о Иегова тривар па нэбо ԥэндя, кай во чалёл лэсти. Йто, сар о Иисусо болделя андо Иордано, о Иегова ԥэндя: «Када мэрно любимо шаво, саво терэл кода, со манди чалёл» (Матфея 3:17). Здэлпэ, кай кадэла алава ашундя кати о Иоанно Крестителё. Май англэ, варикай важ о бэрш каринг лэ Иисусостири смэрть, трин лэстирэ ученикоря ашундэ, сар о Иегова ԥэндя: «Када мэрно любимо шаво, саво терэл кода, со манди чалёл. Ашунэн лэс» (Матфея 17:5). Инке, англа кода, сар о Иисусо тэ мэрэл, о Иегова упалэ подритярдя лэс алавэнца (Иоанна 12:28).
Сар о Иегова сыкадя, кай цэний пэстирэ шавэс и сости амэ анда када сытювас? (Диқэн и абзацоря 15 жы кай 17.)
16, 17. Сар о Иегова сыкадя, кай фартэ цэний вся, со тердя о Иисусо?
16 О Иисусо ӷанэнас, кай пэр лэстэ хохавэна, кай во ԥэнэн найлашэ алава по Дэл и умарэна. Но во мангэласпэ, кай тэ авэл най кода, со во камэл, ай кода, со камэл о Иегова (Матфея 26:39, 42). О Иисусо «виритярдя о ԥаримос, на шутя сама по лажаимос», важ кода кай во камэлас, кай лэс тэ цэний лэско дад, ай най и мануша (Евреям 12:2). Но, сар о Иегова сыкадя лэсти, кай цэний лэс?
17 Еқвар о Иисусо мангля кай пэско дад, кай во тэ стол лэс упалэ пэ кодэва ҭан, саво сас лэстэ по нэбо (Иоанна 17:5). Андэ Библия никай на ԥэнэнпэ, кай о Иисусо камэлас варисо май бут. Важ кода кай во терэлас пэ ԥув кода, со камэлас о Дэл, во на аштярэлас варисаво лашимос. Но, со стердя о Иегова? О Иегова сыкадя, кай цэний лэ Иисусос и стердя када кадя, сар о Иисусо и на аштярэлас. Кала о Иегова рисардя лэ Иисусос каринг и жызня и вазгля лэс, во дя лэсти кода, со никала никасти на дэлас. Кала о Иисусо упалэ ашэля анӷело, о Иегова дя лэсти вечно жызня по нэбо и тэ умарэн лэс никастэ будэр на вижала!g (Филиппийцам 2:9; 1 Тимофею 6:16). О Иегова сыкадя, кай цэний пэстирэ шавэс кодэлэса, кай дя лэсти кода, со никасти инке на дэлас!
18. Со поможыя тэ терас кадя, кай тэ авас лашэ англа Иегова, ай най англа мануша андэ кадэва миро?
18 Со поможыя амэнди тэ терас вся, кай тэ авас лашэ англа Иегова, ай най англа мануша андэ кадэва миро? Амэ трэбуй тэ на бистрас, кай о Иегова вся время дэл лашимос кодэлэнди, ко на парашэл лэсти тэ служый. Най еқвар о Иегова терэл када кадя, сар амэ и на аштярас. Амэнди дажэ на авэл андо шэро, саво лашимос дэла амэнди англэ о Иегова! Но андэ кадэя время бут ԥаримос, и амэнди трэбуй тэ сэрас, кай кадэва найлашо миро и вся, со во дэл, йто на авэла (1 Иоанна 2:17). Пала амаро любящё дад Иегова ԥэнэнпэ: «О Дэл обжалпэ аврэнца кати кадя, сар вонэ затердэ, и важ када во на бистрэла тумари дила и любовь, сави тумэ сыкадэ каринг лэско алав» (Евреям 6:10). Чаче, о Иегова виарақэла, сар тэ сыкавэл, кай амэ куч лэсти, и стерэла када кадя, сар амэ и на гиндосарас!
a 1 Коринфянам 8:3: «Но сар варико любий лэ Дэвлэс, тоди кацавэ манушэс ӷанэн о Дэл».
b Филиппийцам 3:7, 8: «Кода, со сас важ мандэ куч, мэ ашадэм важ о Христос. Чаче, мэ гиндосарав, кай вся со ашадэм, када най пэ скати дэ куч, сар тэ ӷанав пала Христос, пала амаро Ӷосподо. Пала лэстэ мэ ашадэм вся и гиндосарав, кай кода, со ашадэм, када гуной, кати кай тэ авав лэ Христоса».
c Андэ авэр Библейски переводоря о алав «нисо на анэн» пэрэандярдэ инке сар «на анэн нисаво лашимос», «чорэ» и «нисо на ашэн».
d Евреям 6:10: «О Дэл обжалпэ аврэнца кати кадя, сар вонэ затердэ, и важ када во на бистрэла тумари дила и любовь, сави тумэ сыкадэ каринг лэско алав».
e Матфея 6:1 жы кай 5: «Диқэн, на андярэн пэс англа мануша кадя, кай тумэ фартэ лашэ англа Дэл, кай вонэ пэр тумэндэ тэ шон сама. Важ кода кай тоди тумаро дад, саво по нэбо, на дэла тумэнди лашимос. Кала дэс варисо варикасти, важ кода кай жалуис лэс, на абуросар кадэлэстар англа мануша, сар када терэн андэ синагоги, пэ вулица, кодэла, савэ притерэнпэ, кай жалуин, кай лэн тэ хвалин и мануша. Чаче ԥэнав тумэнди, лэнди ужэ динэ вся лэнго лашимос. Ту жэ, кала дэс варисо варикасти, важ кода кай жалуис лэс, мэк тиро право вас на ӷанэн, со терэл авэр вас и пала када, кай ту дэс, важ кода кай жалуис манушэс, нико тэ на ӷанэн и тоди тиро дад, саво диқэл вся, со на диқэл о мануш, дэла тути май бут лашимос. Кадяжэ, кала мангэнпэ, на авэн, сар кодэла, ко притерэнпэ, савэнди чалёл тэ мангэнпэ, кала тердён андэ синагоги, пэ вуӷлоря лэ вулицэндэ, кай прожан бут мануша, кай и мануша тэ диқэн лэн. Чаче ԥэнав тумэнди, лэнди ужэ динэ лэнго лашимос».
f Луки 1:26 жы кай 33: «Андо шовто шон о Дэл бишалдя лэ анӷелос лэ Гавриилос андо галилейско форо Назарето каринг и щей, сави никала на сас миростэ. Вой сас просватано пала мануш, савэс ақарэнас Иосифо анда лэ Давидоско родо. Кадэла щя ақарэнас Мария. О анӷело авеля латэ и ԥэндя: „Доров, ту фартэ куч важ о Иегова!“ Кадэла алава линэ ла одестар и вой ля тэ гиндой, васо во ласа кадя доровкыисайля. Тоди о анӷело ԥэндя лати: „Мариё, ту затердян тэ авэс лащи англа лэ Иеговастирэ яқа! Ту заԥирэса и анэса бэятос, ту ақарэса лэс Иисус. Во авэла ашунгло и пэр лэстэ ԥэнэна, кай во лэ всевышнёнэско шаво. О Иегова дэла лэсти царство, лэстирэ дадэско лэ Давидоско. Во авэла тэ правий по Иаковоско родо вечно и лэстири правления на парашэла никала“».
g Кадэва лашимос, файма, на аштярэнас. Важ кода кай андэ еврейски писания на ԥэнэнпэ нисо пала кода, кай о Дэл дэла вечно жызня по нэбо и тэ умарэн кацавэс никастэ будэр на вижала.