«Терэн вся, кай тумэндэ тэ авэл ковло ди» и радуин лэ Иеговас

1. Саво сас о Моисеё, и со во стердя, кала лэсти поможыяс о Иегова?

АНДЭ БИБЛИЯ пистромэ, кай «Лэ Моисеёстэ сас со май ковло ди анда всаворэ мануша пэ ԥув» (Числа 12:3). Сыкавэлас када, кай во сас слабо, даралас варисо тэ терэл и лажалас тэ ԥэнэн важ пэстэ алав, кала лэстар асанаспэ? Кадя и гиндон дэсавэ мануша пала мануш, пэ саво ԥэнэн, кай лэстэ ковло ди. Но када найчачимос. Па чачимастэ кадэва лэ Дэвлэско служытелё сас зорало, смило и на даралас варисо тэ терэл. Кода, кай о Иегова поможыяс лэсти, во на дарайля тэ жал против фартэ зорало фараоно. Кадяжэ во на дарайля тэ андярэл варикай трин милионоря манушэн па пустыня и поможысардя лэ Израилёсти тэ победий лэ враӷонэн.

2. Васо амэнди трэбуй тэ сытярас пэско ди, кай тэ авэл ковло?

² Хоть амэндэ и нинай кацаво ԥаримос, саво прижыляпэ тэ пэрэжувэл лэ Моисеёсти, кажно дес амэндэ исин кацавэ ситуацыи, андэ савэ найвушэро тэ авэл ковло ди. Но амэндэ исин, васо тэ сытярас амаро ди, кай тэ авэл ковло. О Иегова дэл алав, кай «кастэ ковло ди ашэлапэ и ԥув» (Псалом 37:11). Ай сар ту гиндос, тутэ ковло ди? Ай со гиндон пала тутэ кодэла, ко паша тутэ? Кай тэ дас атвето пэ кадэла важни вопросоря, амэнди трэбуй тэ полас, со када ковло ди.

СО КАДА КОВЛО ДИ?

3, 4. а) Пэр со шолпэ кода, кала манушэстэ ковло ди? б) Савэ штар качестворя амэнди трэбуй, кай тэ авэл ковло ди и васо?

³ Мануш, савэстэ ковло диb, сар шукарни картина. О художнико рисуий разнонэ краскэнца, кай тэ авэл шукарни картина. Кадя и амэндэ трэбуй тэ авэн разни шукарнэ качестворя, кай тэ авэл ковло ди. Када, кала о мануш на заваздэл о шэро, кала кандэл, кала драго обжалпэ аврэнца и кала во смило. Васо трэбуй кадэла качестворя, сар камас тэ радосарас лэ Иеговас?

⁴ Кати кодэва мануш, саво на заваздэл о шэро, во кандэл и терэл кода, со камэл о Дэл. Но инке о Дэл камэл, кай амэ ковлэс тэ обжаспэ всаворэнца (2 Тимофею 2:24). Кала амэ кандас лэ Дэвлэс, кадэлэса фартэ холярас лэ Сатанас. Важ када, хоть амэ старысавас тэ на заваздас о шэро и ковлэс тэ обжаспэ всаворэнца, бут мануша, савэ терэн сар о Сатана, фартэ вэрыцын амэн (Иоанна 15:18, 19). Васо амэнди трэбуй тэ авас смили, кай тэ тердювас против о Сатана?

5. Васо о Сатана вэрыцый кодэлэн, кастэ ковло ди?

⁵ Мануш, кастэ ковло ди, совсем авэр и на шолпэ пэ кодэва, саво заваздэл о шэро. Ко заваздэл о шэро, во вишол пэсти холи и на кандэл лэ Иеговас. Кадя андярэл пэс о Сатана. Ай кодэлэса, кай и мануша ковлэс обжанпэ аврэнца, доԥэнэн, кай о Сатана ӷордо. Но важ о Сатана инке май хужэ, кай вонэ доԥэнэн, кай во хохавно. Важ када амэ и на удивисавас, кай о Сатана вэрыцый лэ манушэн, кастэ ковло ди. Но со бы о Сатана тэ на терэл и тэ на ԥэнэн, лэстэ на вижала, кай и мануша, кастэ ковло ди, тэ парашэн тэ служын лэ Иеговасти! (Иов 2:3—5).

6. Пэ савэ вопросоря амэнди трэбуй тэ дас атветоря?

⁶ Кала амэнди можэт тэ авэл найвушэро, кай тэ авэл ковло ди? Васо трэбуй и май дур тэ сытярас пэско ди, кай тэ авэл ковло? Кай тэ атветим пэ кадэла трин вопросоря, подам дума пала Моисеё, пала трин тэрнэ мануша и пала Иисусо.

КАЛА МОЖЭТ ТЭ АВЭЛ НАЙВУШЭРО, КАЙ ТЭ АВЭЛ КОВЛО ДИ?

7, 8. Со стердя о Моисеё, кала пэр лэстэ на стодэ патив?

⁷ Кала исин власть. Манушэсти ԥарэс тэ авэл ковло ди, кала лэстэ исин власть, ай май фартэ, кала кодэла пала кастэ во диқэл, на стон патив, и лэнди на чалёл, со во терэл. Туса сас кацаво? Ай кала варико анда тирэ чаче андярэл пэс кадя? Со ту терэса? Уӷанам, со тердя о Моисеё, кала лэстэ кадя сас.

⁸ О Иегова стодя лэ Моисеёс барэдэрэса по израильско народо. Во дя лэсти честь, кай тэ пистрой и законоря важ пэско народо. И мануша ӷанэнас, кай о Иегова поможый лэ Моисеёсти. Но всаек лэстири чачи ԥэй и о ԥрал линэ тэ подасанпэ кодэлэстар, савя хулаяса во жувэлас. Варико бы по Моисеёско ҭан фартэ холяйлоп и одрисардоп лэнди. Но о Моисеё кадя на стердя. Во ритярэлас пэс андэ вас и дажэ мангэлас лэ Иеговас тэ виличий ла Марияма́, пэ сави сас и чирки, савэндар тернёлас вся и тила (Числа 12:1—13). Васо о Моисеё стердя кадя?

9. Со о Иегова лэ Моисеёсти поможысардя тэ полэл?

⁹ О Моисеё домэкэлас, кай о Иегова лэс тэ сытярэл. Варикай 40 бэрш жы кадэлэстэ, сар о Моисеё инке жувэлас андо ери кай о фараоно, лэстэ на сас ковло ди. Еқвар во кадя росхоляйля, кай умардя манушэс, саво па лэстирятэ тердя найдраго. О Моисеё гиндояс, кай лэ Иеговасти када чалёла. Всаворэ 40 бэрш о Иегова сытярэлас лэ Моисеёс, кай тэ андярэл лэ израильтянонэн, лэсти на хутилэла кати тэ авэл смило, ай инке трэбуй тэ авэл ковло ди. Ай важ када во трэбуй сас тэ сытёл тэ на заваздэл о шэро, тэ кандэл и ковлэс тэ обжалпэ аврэнца. О Моисеё драго поля вся када и ля май драго тэ диқэл пала народо (Исход 2:11, 12; Деяния 7:21—30, 36).

10. Сости моӷут тэ сытён лэ Моисеёстар и хула́я андо ери и старейшыноря?

¹⁰ Лэ хула́нди андо ери и лэ старейшынонэнди фартэ важно тэ сытён лэ Моисеёстар. Кала тут на полэн и на стон пэр тутэ патив, старысав тэ ритярэс пэс андэ вас. На заваздэ о шэро и полэ, со тердян най кадя (Экклезиаст 7:9, 20). Кандэ и тер вся, со ԥэнэн о Иегова, кала трэбуй тэ поладис варикаса. Вся и время дэ дума аврэнца ковлэс (Притчи 15:1). И хула́я андо ери и старейшыноря, кала терэн кадя, радуин лэ Иеговас и всаворэнца ладин. Тоди и авэр лэна тэ сытён лэндар, со тэ терэн, кай тэ авэл ковло ди.

11—13. Сости сытярдэ амэн о Анания, Мисаило и Азария?

¹¹ Сар тэ авэл ковло ди, кала амэн ӷонин важ и вера? Вся и время лэ Иеговастирэ служытелёнэн ӷонинас важ и вера. Амэн и акана моӷут евья тэ дошалярэн андэ кода, со амэ на тердям. Но важ кода кай амэ кандас «лэ Дэвлэс, сар правителёс, ай най лэ манушэн», амэн ӷонин (Деяния 5:29). Амэндар моӷут тэ асанпэ, тэ бэшарэн андэ барунэ и дажэ тэ марэн. Но амэ на рисарас пала пэстэ. Амэнди поможый о Иегова, кай амэндэ тэ авэл ковло ди, дажэ кала амэндэ ԥаримос.

¹² Погиндосарам пала трин еврейски тэрнэ мануша, савэн ақарэнас Анания, Мисаил и Азария, савэ сас андо плено андо Вавилоноc. Вавилонско царё приԥэндя лэнди тэ тэлён лэ сомнаконэ истуканости, саво сас фартэ баро. Но вонэ ковлэс отԥэнделэ и на тердэ када. Вонэ на парашэлэ тэ кандэн лэ Дэвлэс, хоть о царё и ԥэндя тэ шон лэн андо бов, саво фартэ ԥаболас. О Иегова спасысардя пэстирэ служытелёнэн, хоть вонэ и на гиндонас, кай о Дэл трэбуй сас када тэ стерэл. Вонэ сас ӷотови каринг и вся (Даниил 3:1, 8—28). Кадэлэса вонэ сыкадэ, кай и мануша, кастэ ковло ди, па чачимастэ смили. Дажэ кала и барэдэра мануша андэ страна заставин тэ отԥэндювас лэ Иеговастар и пэрэдаравэн, кай варисо амэнца можэт тэ терэлпэ, амэ всаек на парашас тэ служысарас лэ Иеговасти «лэ Дэвлэсти, саво приԥэнэн тэ тэлён кати лэсти» (Исход 20:4, 5).

¹³ Сар амэ тэ терас кадя, сар о Анания, Мисаило и Азария, кала амэндэ ԥаримос через амари вера? Амэ на заваздас о шэро и патяс, кай о Иегова поможыя амэнди (Псалом 118:6, 7). Кодэлэнца, ко дошалярэл амэн, кай амэ варисо терас най кадя, амэ дас дума ковлэс и пативалэс (1 Петра 3:15). Со бы амэндэ тэ на авэл, амэ на отԥэндюваса и на придаса амарэ друӷос и любящёнэ Дадэс, лэ Иеговас.

14. Со можэт тэ терэлпэ, кала амэндэ бари пэрэжывания?

¹⁴ Сар тэ авэл ковло ди, кала амэндэ бари пэрэжывания. Амэндэ исин бут, состар амэ можэм тэ пэрэжываем. И бэятцэ андэ школа часто пэрэжывают, кала лэндэ экзаменоря, ай и взросли мануша пэрэжывают, кала лэндэ варисави важно дила пэ бути. Бут мануша лэн тэ пэрэжывают кодэлэстар, кай гиндон пала операцыя или пала авэр варисавэ обследования. Кала амэндэ барэ пэрэжывания, тэ авэл ковло ди найвушэро. Амэн андэ кодэя время можэт тэ холярэл вся, пэр со обычно амэ на шасас сама. Амэ можэм тэ на шас сама аврэн и дажэ тэ холярас лэн. Кала тумэнди прижылясаспэ кацаво, погиндон, сар терэлас о Иисус Христос.

15. Васо, сар пистромэ андэ Исаия 53:7, 10, о Иисусо важ амэндэ лашо примеро, кала амэндэ бари пэрэжывания, тэ авэл ковло ди?

¹⁵ Андэ послидни шона андэ пэсти жызня пэ ԥув о Иисусо фартэ пэрэжывал. Во ӷанэнас, со лэсти трэбуй тэ авэл, кай лэс фартэ мучина и потом умарэна (Иоанна 3:14, 15; Галатам 3:13). Сар ашэлэпэ набут шона каринг лэсти смэрть, во росԥэнэнас пэстирэ учениконэнди, сар ԥарэс лэсти сас по ди (Луки 12:50). Ай кала каринг лэсти смэрть ашэлэпэ набут деса, во ԥэндя: «Мэрно ди пэрэжывает». Анда лэсти молитва дицолас, кай во на заваздэлас о шэро и кандэлас пэстирэ Дадэс. Во мангэласпэ: «Дадэ, фэрисар ман кадэлэ часостар. Но важ кадэя время мэ и авелэм. Дадэ, стер, кай тиро алав тэ авэл ашунгло» (Иоанна 12:27, 28). Кала поджыля и время, о Иисусо би дарако отдя пэс андэ вас лэ Иеговастирэ враӷонэнди, кай лэс жэстоко и фартэ ԥарэс тэ умарэн. Кала лэстэ по ди сас бари пэрэжывания, лэстэ всаек сас ковло ди и во кангля пэстирэ Дадэс. О Иисусо лашо примеро андэ када, кала амэндэ бари пэрэжывания, всаек тэ авэл ковло ди. (Адиносар Исаия 53:7d, 10e.)

16. Сар лэ Ииусостирэ ученикоря диқлэ, кай лэстэ ковло ди?

¹⁶ Вэчэром, англа пэсти смэрть, и апостолоря андярдэ пэс кадя, кай лэ Иисусости моӷло бы тэ авэл ԥарэс тэ зритярэл пэс и тэ ашэлпэ оди ковло. Представь, сави бари пэрэжывания прижыляпэ тэ пэрэандярэл лэсти андэ кадэва вэчэро. Лэсти трэбуй сас тэ кандэл лэ Дэвлэс жы кай пэстири смэрть, важ кода кай и дума жалас пала милиардоря мануша (Римлянам 5:18, 19). Но со май важно, сар во пэс андярэла и сар кадэлэстар лэна тэ дэн дума важ лэско Дад, важ о Иегова (Иов 2:4). И акэ о Иисусо бэшэл пэстирэ учениконэнца послиднё вэчэро. Вонэ бэшлэ тэ хан и лэндэ зажыля дума, и вонэ заспорисайлэ «ко андар лэндэ май баро». О Иисусо ужэ най еқварэс лэн сытярэлас, кадяжэ и андэ кадэва вэчэро чуть май англал, кай вонэ нэправильно гиндон. На патяса, о Иисусо сас фартэ спокойно и дэлас дума лэнца ковлэс. Инке еқварэс во лэнди росԥэндя би холяко, но твэрдо, саво лэндэ трэбуй тэ авэл гиндо. Посли када о Иисусо лэн похвалисардя, важ кода кай вонэ лэс на ашавэнас (Луки 22:24—28; Иоанна 13:1—5, 12—15).

17. Андэр со амэ можэм тэ сытювас лэ Иисусостар?

¹⁷ Со ту тердоп тэ авелоп туса кацаво? Кала тутэ бари пэрэжывания, сытю кай о Иисусо и андяр пэс спокойно. Андэ лэ Дэвлэско алав пистромэ: «На холявэн ек пэ ек» (Колоссянам 3:13). Терэн када анда вся оди. Када май вушэро авэла тэ терас тоди, кала амэ полас, кай дэкала амаря диласа или алавэнца холярас аврэн (Притчи 12:18; Иакова 3:2, 5). Кадяжэ старыинпэ тэ хвалин аврэн важ лэндирэ лашэ качестворя (Эфесянам 4:29).

ВАСО ТРЭБУЙ И МАЙ ДУР ТЭ ТЕРАС ВСЯ, КАЙ ТЭ АВЭЛ КОВЛО ДИ?

18. Сар о Иегова поможый лэ манушэнди, кастэ ковло ди, тэ витидэн, сар правильно тэ терэн? Со во камэл, кай амэ тэ терас?

¹⁸ Амэ ласа тэ терас вся, кай тэ авэл правильно. Кала амэнди ԥарэс тэ витидас, сар правильно тэ терас, о Иегова поможыя амэнди. Но кати тоди, кала пэ дила сыкавас, кай амэндэ ковло ди. Во дэл алав, кай ашунэла «пала со мангэн кодэла, кастэ ковло ди» (Псалом 10:17). Во най кати просто амэн ашунэла, со амэ мангас. Андэ Библия пистромэ: «Во поможыя кодэлэнди, кастэ ковло ди, тэ жувэн правильно, сытярэла лэн пэстирэ дромэсти» (Псалом 25:9). О Иегова сытярэл амэн пэстирэ дромэсти через и Библия и через вся, со дэл амэнди о «верно и блаӷоразумно рабо», када и собрании, видео и журналоря (Матфея 24:45—47)f. Но со амэнди трэбуй тэ терас амаря ригатар? Амэнди трэбуй тэ на заваздас о шэро и тэ полас, кай би лэ Иеговаско амэ нисар на обжасапэ и кадяжэ тэ прилас вся, со во амэнди дэл. Инке тэ кандас лэс и тэ терас кода, пала со амэ уӷанас.

19—21. Сави ошыбка стердя о Моисеё, кала вонэ слинэ андо Кадесо? Сости амэн сытярэл кадэя ситуацыя?

¹⁹ Амэ можэм тэ на терас ошыбки. Рисавам каринг кода, со тердясас о Моисеё. Бут бэрша палпалэ, лэстэ сас ковло ди и во радуияс лэ Иеговас. Но кала и израильтяноря ԥирэнас 40 бэрш па пустыня, када сас фартэ ԥарэс. И кала вонэ ужэ почти дожылэсас каринг трэбуй, сас ек маменто, андэ саво кай о Моисеё на сас ковло ди. Андэ кодэя время лэстэ найдэлмут муля и ԥэй и Мариам, сави варикала спасысардясас лэстири жызня андо Египто. Ла гарадэ андо форо Кадесо. И катэ упалэ и израильтяноря линэ тэ холявэн, кай пала лэндэ нико на заботийпэ. «О народо ля тэ спорийпэ лэ Моисеёса» пала кода, кай лэнди на хутилэлас паи. Вонэ на диқлэ дажэ пэ кода, кай лэ Иеговастирэ зорэса о Моисеё стердясас бут чуда. Бут бэрша во на жалуияс пэс, андярэлас лэ израильтянонэн пала пэстэ, но вонэ всаек вазглэпэ пэр лэстэ. Вонэ холявэнас по Моисеё най кати, важ кода кай лэнди на хутилэлас паи. Но инке линэ найдраго тэ дэн дума пала Моисеё и тэ дошалярэн лэс андэ вся (Числа 20:1—5, 9—11).

²⁰ Андэ холи о Моисеё бистэрдя пала пэско ковло ди. Вместо кода, кай тэ сыкавэл, кай во патял лэ Дэвлэсти, во стердя па пэстирятэ. Во на банделя каринг о плай и на тердя кадя, сар ԥэндя лэсти о Иегова. Во фартэ холяйля, банделя каринг о народо и ԥэндя, кай стерэла и чуда екжэно. Посли кода о Моиесеё дувар дядап по плай, и андар лэстэ дя о паи. Кода, кай о Моисеё завазгля о шэро и подяпэ ла холяти, во стердя бари ошыбка (Псалом 106:32, 33). Андэ кадэя ситуацыя лэ Моисеёстэ на вижыля, кай тэ авэл ковло ди, и через када во на зажыля андэ ԥув, сави трэбуй сас тэ авэл лэндири (Числа 20:12).

²¹ Кадэва случаё бут сости амэн сытярэл. Пэрво, када, кай амэ трэбуй тэ на парашас тэ терас кадя, кай амаро ди вся и время тэ авэл ковло. Кала амэ парашаса тэ сытярас хоть набут пэско ди, тоди амэ можэм тэ заваздас о шэро и амэ можэм варисо тэ терас чи тэ ԥэнас па дилимастэ. Дуйто, када, кала амэ фартэ пэрэжываем. Важ када, кала амэндэ варисаво ԥаримос, трэбуй тэ стас зор, кай амаро ди тэ ашэлпэ ковло.

22, 23. а) Васо амэндэ и май дур трэбуй тэ авэл ковло ди? б) Пэр со сыкавэн и алава анда Софония 2:3?

²² Амэ спасысаваса. Йто о Иегова умарэла всаворэ найлашэ манушэн и ашэнапэ кати кодэла, кастэ ковло ди. Тоди пэ ԥув авэла па чачимастэ мирно и спокойно (Псалом 37:10, 11). Ай тумэ авэна машкар кодэла мануша, савэндэ ковло ди? Да, кала тумэ прилэна кода, кай о Иегова ақарэл анда вся оди. И пала када пистросардя о пророко Софония. (Адиносар Софония 2:3g.)

²³ Васо андэ книӷа Софония 2:3 пистромэ: «Можэт тумэ фэринапэ»? Када най важ кода, кай лэ Иеговастэ нинай зор тэ фэрий кодэлэн, ко лэс любий и камэл тэ радуий. Кадэла алава сыкавэн, фэрия амэн о Иегова чи най, зависит амэндар. Ай пэрэжуваса амэ «лэ Иеговаско дес» и жуваса вечно тоди, если амэ акана старысавас, кай тэ авэл амэндэ ковло ди и тэ радосарас лэ Иеговас.