Бут мануша парашэн тэ ԥирэн андэ қандиря. Васо? Котэ лэ манушэнди на ашэл май вушэро по ди и котэ на росԥэнэн о чачимос важ о Дэл. Васо тоди трэбуй тэ ԥирэс пэ христиански собрании кай лэ Иеговастирэ свидетеля?

Проандярас и время лэ лашэ манушэнца. Андо пэрво вико лэ христианонэн стидэ андэ собрании, кай вонэ вмести тэ тэлён лэ Дэвлэсти и тэ сытён па Свынто Писания, ай кадяжэ тэ подритярэн ек еқэс (Евреям 10:24, 25). Вонэ любинас еқаврэс и кажно полэлас, кай паша лэстэ чачунэ друӷоря, када и ԥрала и ԥэя анда собрания (2 Фессалоникийцам 1:3; 3 Иоанна 14). Амэ терас кадя жэ, сар вонэ, и амэндэ кацави жэ радость.

Сытювас тэ жувас па библейски принцыпоря. Андэ Библия пистромэ, кай андэ дэлмутни время и мурша, и жувля и и бэятцэ стидэнаспэ еқэҭанэ, кай тэ уӷанэн пала Дэл. Амэ терас кадяжэ. И лашэ учителя поможын амэнди тэ полас, сар тэ жувас па библейски принцыпоря кажно дес (Второзаконие 31:12; Неемия 8:8). Всаворэ моӷут тэ дэн каминтарии и тэ дилабэн диля. Кадя амэ можэм «англа всаворэ тэ росԥэнас пала лашимос, саво аштярас англэ» (Евреям 10:23).

Лас май фартэ тэ патяс. О апостоло Павло пистросардя еқа собранияти: «Мэ фартэ камав тэ диқав тумэн... кай через пэстири вера тумэ тэ подритярэн ман, ай мэ через пэстири вера тэ подритярав тумэн» (Римлянам 1:11, 12). Кала амэ проандярас и время лэ ԥралэнца и лэ ԥэянца, амари вера ашэл май састи и када поможый тэ ритярас лэ Дэвлэско законо.

Анда вся оди ақарас тут пэ амари собрания, кай ту вся екжэно тэ диқэс. Тути авэна фартэ ради. Кай тэ авэс пэ амарэ собрании, на трэбуй тэ потинэс ловэ. Кадяжэ котэ нико ни пар кастэ ловэ на стидэл.

• Кастар лэ Иеговастирэ свидетеля сытелэ тэ стидэнпэ вмести?

• Васо трэбуй тэ авас пэ христиански собрании?

Дажэ если трэбуй дур тэ ладас или пэ вулица вэрыто поӷода, амэ всаек ԥирас пэ амарэ собрании. Васо лэ Иеговастирэ свидетеля стон бут зор, кай тэ стидэнпэ, хоть лэндэ андэ жызня ԥаримос и вонэ авэн па бути цыенэ?

Када дэл амэнди бари помощь. Пала кодэла, ко ԥирэл пэ христиански собрании, о Павло ԥэндя: «Ласа тэ шас сама еқаврэс» (Евреям 10:24). Кадэла алава сыкавэн, кай амэ трэбуй драго тэ уӷанас ек еқэс. Кадяжэ вонэ дэн тэ полас, кай трэбуй тэ подритярас амарэ ԥралэн и ԥэян андэ собрания. Если амэ май драго уӷанаса аврэн андэ собрания, тоди амэ диқаса, кай дэсавэндэ сас ԥаримос, сар и амэндэ, но вонэ виритярдэ лэс. Кода, со подԥэнэн кадэла христианоря, поможыя амэнди.

Амэ виарақас чачунэ друӷонэн. Кодэла, ко авэн пэ христиански собрании, када амарэ лашэ друӷоря. Инке амэ вмести проандярас и время и отцыювас. Со када амэнди дэл? Амэ сытювас май фартэ тэ цэнисарас еқаврэс, ай када поможый инке май фартэ тэ любисарас ек еқэс. Кала кай и ԥрала и и ԥэя анда собрания исин ԥаримос, амэ камас лэнди вся и время тэ поможысарас, важ кода кай амэ лашэ друӷоря (Притчи 17:17). Кала амэ проандярас и время всаворэнца анда собрания, амэ сыкавас пэ дила, кай подритярас еқаврэс (1 Коринфянам 12:25, 26).

Амэ камас, кай ту тэ виарақэс пэсти друӷонэн машкар кодэла, ко кандэн лэ Дэвлэс. Кацавэ друӷонэн ту виарақэса кай лэ Иеговастирэ свидетеля. На домэк, кай тут варисо тэ тердярэл тэ проандярэс амэнца и время!

• Саво лашимос анэн кода, кай амэ стидаспэ пэ христиански собрании?

• Кала ту камэс тэ уӷанэс лэ ԥралэн и лэ ԥэян анда собрания?

И пэрви христианоря пэ собрании дилабэнас диля и мангэнаспэ, ай кадяжэ адинонас и Свынто Писания и дэнас дума пала кода, со адиносардэ (1 Коринфянам 14:26). Андэ амари время и собрании прожан кадяжэ.

Амэ сытювас па Библия и амари жызня ашэл май лащи. Пэ выходни андэ кажно собрания росԥэнэн библейско речь, сави жал 30 минут. Андэр латэ росԥэнэнпэ, сар и Библия поможый андэ амари жызня и васо андэ люма скати ԥаримос. Всаворэ моӷут тэ ԥэрнавэн и Библия и тэ диқэн, со адинойпэ. Посли речь амэ ек часо сытювас па «Сторожэво башня». Всаворэ, ко камэн, моӷут тэ дэн каминтарии. Кацави проӷрамма поможый амэнди тэ жувас па библейски принцыпоря. Андэ кажно анда 120 000 собрании па вся и ԥув сытён па ек тема.

Амэ лас инке май драго тэ сытярас аврэн. Амэ кадяжэ стидаспэ еқвар по курко вэчэром. Пэ кадэя собрания ԥэнэн «Амаро христианско дром и служэния» и андэр латэ исин трин части. Вой жал па тетрадка «Дром и служэния». И пэрво часть «Сомнак анда Библия» поможый амэнди май драго тэ полас и ӷлавы анда Библия, савэ адиносардям май англал. Андэ авэр часть «Сытювас май драго тэ росԥэнас важ о Дэл» и ԥрала и ԥэя сыкавэн, сар трэбуй тэ дэн дума па Библия аврэ манушэнца. О ԥрал, саво проандярэл и собрания, поможый кадэлэ ԥралэнди и ԥэянди май драго тэ адинон и тэ сытярэн (1 Тимофею 4:13). Андэ послиднё часть, пэ сави ԥэнэн «Христианско дром», амэ сытювас тэ жувас па библейски принцыпоря. Кала пэ кадэя собрания амэ дас дума па вопросоря и атветоря, када поможый амэнди май драго тэ полас и Библия.

Пэ амарэ собрании можно драго тэ сытён. Ту екжэно полэса када, кала авэса пэ ек андар лэндэ (Исаия 54:13).

• Сар прожан и собрании кай лэ Иеговастирэ свидетеля?

• Пэ сави собрания ту май фартэ камлоп тэ авэс?

Ту шутян сама пэ картинки андэ кадэя брашура, сар дэ драго утидэ лэ Иеговастирэ свидетеля пэ собрании? Васо амэ кадя шас сама пэ йда и пэ кода, сар амэ утидэ?

Сыкавас, кай стас патив пэ амаро Дэл. Чаче, важ о Дэл май куч кода, со кай о мануш андо ди, ай най саво во пар пэстэ (1 Самуила 16:7). Но кала амэ стидаспэ тэ тэлювас лэ Иеговасти, амэ камас тэ стас патив пэр лэстэ и пэ ԥрала и ԥэя анда собрания. Если амэнди прижылопэ тэ жас кай о президенто, амэ драго погиндосардоп, со тэ лас пэр пэстэ, кай тэ сыкавас патив каринг лэстэ. Кадяжэ и амари йда пэ христиански собрании сыкавэл, кай амэндэ исин патив каринг «о Царё ла времяко», каринг о Дэл Иегова, и каринг о зало, кай амэ тэлювас лэсти (1 Тимофею 1:17).

Сыкавас, кай ритярас лэ Дэвлэско законо. Андэ Библия пистромэ, кай и христианоря трэбуй тэ утидэнпэ «годяса и тэ авэн сэжи» (1 Тимофею 2:9, 10). Кала амэ утидаспэ годяса, када поможыя шукарнэс и драго тэ подтидас и йда. Ай кай тэ авэл када сэжо, трэбуй тэ на витидас йда, сави шолпэ андэ яқа, фартэ сыкавэл и тила и савятар аврэндэ моӷут тэ авэн билажавардэ гиндоря. Кала амэ сэрас кадэла принцыпоря, амэ можэм тэ витидас бут разно йда. Кала амэ драго утидаспэ, када прославляет амарэ Дэвлэс (Титу 2:10; 1 Петра 2:12). Кода, сар амэ утидаспэ пэ собрании, можэт тэ поможый лэ манушэнди па аврятэ тэ гиндон пала Иегова.

Если тутэ нинай шукарни йда, пала када фартэ нэ пэрэжывай! Андо зало, кай прожан амарэ собрании, тути вся и время авэна ради. Само ӷлавно, кай и йда тэ авэл вужи и сэжо.

• Васо трэбуй тэ шас сама, сар амэ утидаспэ пэ христиански собрании?

• Пэ савэ библейски принцыпоря амэ шас сама, кала витидас йда и причоска?

Если ту сытёс па Библия лэ Иеговастирэ свидетелёнэнца, тоди, наверно, ту май англал ӷотовишся каринг и изучения. Но кадяжэ тути трэбуй тэ ӷотовишся и каринг и собрания. Драго, если ту присытёса кадя тэ терэс. Тоди када анэна тути лашимос.

Витидэ, кала и кай ту лэса тэ сытёс. Андэ сави время тути май вушэро тэ сытёс? Тэсара, сар инке на лян тэ терэс бути? Или вэчэром, кала и бэятцэ ужэ совэн? Дажэ если тутэ на вижал бут время тэ сытёс, погиндосар, скати время тутэ исин. Стер вся, кай тэ на шос сама пэ варисо авэр. Виарак тихо лашо ҭан, кай нисо тути тэ на мешает. Мудар о телефоно, о телевизоро и о радио. Мангпэ англа кода, сар тэ сытёс па Библия, када поможыя тути фартэ тэ нэ пэрэжываеш пала проблемы, ай тэ шос сама по лэ Дэвлэско алав (Филиппийцам 4:6, 7).

Драго розлэ кода, пар со сытёс, и подӷотовся тэ дэс каминтарии. Спэрва продик кода, пар со лэса тэ сытёс. Погиндосар, сар называеца и статья или и ӷлава, ай кадяжэ, сар кажно подзаӷоловко поджал каринг и тема. Шу сама пэ картинки и пэ вопросоря важ и повторения. Кадэла вопросоря сыкавэн и ӷлавни гиндоря андэ кадэя тема. Посли када проадиносар кажно абзацо и арак андэр лэстэ о атвето по вопросо. Ԥэрнав и Библия и проадиносар и стихоря, савэ пистромэ андэ скобки. Погиндосар, сар кадэла стихоря поджан каринг и тема (Деяния 17:11). Кала ту арақлян о атвето, подчеркни дэсавэ ӷлавни алава андо абзацо, кай потом тэ вспомнишь пэско гиндо. Тоди пэ собрания ту сможэш тэ ваздэс о вас и тэ дэс найбаро каминтариё пэстирэ алавэнца.

Кала ту май драго уӷанэс разни темы, па савэ дэн дума кажно курко пэ собрании, тоди ту сможэш тэ виарақэс бут сомнак анда Библия (Матфея 13:51, 52).

• Кай и андэ сави время ту можэш тэ ӷотовишся каринг и собрания?

• Сар трэбуй тэ ӷотовишся, кай тэ дэс лашэ каминтарии пэ собрания?

О Иегова вся и время камэлас, кай о ери тэ стидэлпэ вмести, кай лэндири вера тэ ашэл май састи и вонэ инке май фартэ тэ любин ек еқэс (Второзаконие 6:6, 7). Важ када лэ Иеговастирэ свидетеля еқвар андо курко витидэн время, кай цэрэ лэ ереса тэ сытён па Библия (инке пэ када ԥэнэн семейно изучения). Вонэ дэн дума пала кацавэ темы, савэ трэбуй важ кажно андо ери. Если ту жувэс екжэно, ту можэш тэ витидэс время, кай май драго тэ уӷанэс лэ Дэвлэс и тема, па сави тэ сытёс па Библия кадя, сар тути чалёл.

Кадя амэ ашас май пашэ каринг о Иегова. Андэ Библия ԥэнэнпэ: «Авэн май пашэ каринг о Дэл, и во пашола каринг тумэндэ» (Иакова 4:8). Май драго тэ уӷанас лэ Иеговас амэнди поможый и Библия, андэ сави росԥэнэнпэ пала лэстири дила и качестворя. Пэ семейно изучения спэрва можно тэ адинон и Библия вслух. Када моӷут тэ авэн и ӷлавы, савэ адиносарас кажно курко каринг и собрания «Дром и служэния». Роздилин, ко скати лэла тэ адиной. И сар проадиносардэ, подэн дума, со кажно виарақля важ пэстэ.

Кадя андо ери инке май драго полэн ек еқэс. Кала о ери вмести сытёл па Библия, кадэлэстар о хулай и хулаи ашэн май пашэ. Кадяжэ о дад и дэй ашэн май пашэ каринг и бэятцэ. Када трэбуй тэ авэл радосно время, сави аштярэл кажно андо ери. И дада и дэя трэбуй тэ витидэн тема важ о бэято, сави поджала каринг лэстирэ бэрша. Например, вонэ моӷут тэ лэн и статьи анда журналоря «Сторожэво башня» и «Пробудитесь!», ай кадяжэ пэ амаро сайто, jw.org. Када поможыя тэ подэн дума лэ бэятонэнца пала ԥаримос, саво лэндэ исин андэ школа. Диқэн видео пэ амари телевидения (tv.jw.org^®), ай тоди подэн дума пала лэстэ. Дилабэн и диля, савэ авэна пэ собрания. Ай сар прожала и семейно, стон варисо тэ хан или поцэлэн андэ иӷры.

Если кажно курко тэ витидэн и время, кай тэ сытён кай о Иегова, тоди всаворэндэ андо ери вижала тэ любин и Библия. И патя, о Иегова анда оди дэла тути лашимос, важ кода кай ту кадя терэс (Псалом 1:1—3).

• Васо амэ витидас время, кай тэ сытювас лэ ереса па Библия?

• Со о дад и дэй моӷут тэ стерэн, кай всаворэнди андо ери тэ чалёл тэ сытён па Библия?

Васо кадэла мануша кацавэ радосни? Важ кода кай вонэ авелэ по канӷрэсо. Андэ дэлмутни время лэ Дэвлэстирэ служытеля трэбуй сас всаворэ тэ стидэнпэ тривар андо бэрш (Второзаконие 16:16). Адес амэ тожэ аштярас время, кай тэ стидаспэ пэ барэ собрании. Кажно бэрш амэндэ прожан трин канӷрэсоря. Дуй жан по ек дес, када раёни канӷрэсоря и ек жал трин дес, када регионально канӷрэсо. Васо амэ кадя цэнисарас кадэя время?

Амэ инке май драго полас, кай амэ андэ ек баро ери. Андэ дэлмутни время израильтяноря анда вся оди хвалинас лэ Иеговас «андэ барэ собрании», и адес амэ тожэ стидаспэ, кай тэ тэлювас лэ Дэвлэсти (Псалом 26:12; 111:1). Пэ кацавэ канӷрэсоря амэ можэм тэ уӷанас лэ Иеговастирэ свидетелёнэн анда авэр собрании и дажэ анда авэр страны и тэ подас дума лэнца. По обедо амэ на жас цэрэ, ай ашаспэ, кай вмести тэ хас и кай тэ уӷанас ек еқэс май драго (Деяния 2:42). По канӷрэсо амэ инке май драго диқас и любовь, сави исин андэ амаро баро ери па вся и ԥув (1 Петра 2:17).

Када поможый, кай и вера тэ авэл май састи. И израильтяноря стидэнаспэ, кай тэ ашунэн лэ Дэвлэско законо и кай май драго лэс тэ полэн (Неемия 8:8, 12). Амэ кадяжэ цэнисарас, кай пэ кацавэ канӷрэсоря сытярэн па Библия. И тема важ кажно канӷрэсо жал па лэ Дэвлэско Алав. Лашэ речи и видеороликоря поможын амэнди тэ жувас па библейски принцыпоря кажно дес. Амэн кадяжэ подритярэн и ԥрала и ԥэя, савэ андэ кадэя найвушэро время виритярдэ о ԥаримос, саво исин по христианско дром. И видеороликоря, савэ сыкавэн пэ региональни канӷрэсоря, поможын амэнди май драго тэ полас кода, со пистромэ андэ Библия и тэ сытювас кадэлэстар. По кажно канӷрэсо кодэла, ко динэ лэ Иеговасти алав тэ жувэн важ лэстэ, сыкавэн када, кала болдён андо паи.

• Васо пэ канӷрэсоря амэ кацавэ радосни?

• Васо тути трэбуй тэ авэс по канӷрэсо?

Англа пэстири смэрть о Иисусо ԥэндя: «Кадэя лащи... [новость] пала царство росԥэнэна па вся и ԥув, кай тэ уӷанэн всаворэ народоря, и тоди авэла конец» (Матфея 24:14). Но сар тэ стерас, кай и лащи новость тэ ашундёл па вся и ԥув? Если амэ сытювас кай о Иисусо и терас сар во (Луки 8:1).

Амэ жас кай и мануша, кала вонэ цэрэ. О Иисусо сытярэлас пэстирэ учениконэн тэ росԥэнэн и лащи новость па цэра (Матфея 10:11—13; Деяния 5:42; 20:20). Андо пэрво вико кай и ученикоря сас каринг тэ жан тэ росԥэнэн важ о Дэл (Матфея 10:5, 6; 2 Коринфянам 10:13). Андэ амарэ деса амэ кадяжэ драго терас кадэя дила. Кай кажно собрания исин пэстири территория, кай тэ росԥэнэн важ о Дэл. Кадя амэ терас и дила, пала сави ԥэндя о Иисусо, кай «драго тэ росԥэнас пала Дэл» (Деяния 10:42).

Амэ росԥэнас важ о Дэл котэ, кай исин мануша. О Иисусо росԥэнэнас котэ, кай слинэ мануша, например по бэрэӷо паша моря и паша хаинг (Марка 4:1; Иоанна 4:5—15). Амэ терас сар о Иисусо и дас дума лэ манушэнца важ и Библия визде, кай вонэ исин. Пэ вулица, котэ, кай терэн бути, андэ паркоря и дажэ па телефоно. Кадяжэ амэ росԥэнас лэ родости, амарэ сосидонэнди, кодэлэнди, каса терас бути и каса сытювас андэ школа. Важ када милионоря мануша па вся и ԥув ашунэн и лащи новость важ и спасения (Псалом 96:2).

Касти ту камлоп тэ росԥэнэс и лащи новость важ лэ Дэвлэско Царство и важ о лашимос, саво аштярас англэ? На умэк и время, кай тэ росԥэнэс пала када!

• Сави новость трэбуй тэ росԥэнэн па вся и ԥув?

• Сар лэ Иеговастирэ свидетеля терэн кадя, сар о Иисусо?

Алав «пианеро» часто ԥэнэн пэ кодэва, ко жал пэрво па нэвэ дрома и сыкавэл лэн аврэнди. Можно тэ ԥэнас, кай о Иисусо кадяжэ сас пианеро. Во авеля пэ ԥув, кай тэ служый лэ манушэнди и тэ ԥэрнавэл о дром, кай вонэ тэ спасынпэ (Матфея 20:28). Лэ Иеговастирэ свидетеля терэн кадя жэ, сар о Иисусо, кала отдэн бут время, кай тэ сытярэн нэвэ учениконэн (Матфея 28:19, 20). Кай дэсавэ андар лэндэ вижал тэ служын пианеронэнца.

Пианеро бут служый. Всаворэ лэ Иеговастирэ свидетеля росԥэнэн и лащи новость. Но варикастэ вижал тэ служын 70 часов андо шон. Пэ кацавэ мануша ԥэнэн общи пианероря. Кай кадя тэ служын, бут андар лэндэ парувэн и бути, кай тэ терэн най вся о дес. Дэкасти ԥэнэн тэ служын сар спецыальни пианероря котэ, кай трэбуй май бут тэ росԥэнэн важ о Дэл. Кажно шон кацавэ служытеля росԥэнэн важ о Дэл 130 часов и май бут. И пианероря жувэн попростому. Вонэ патян, кай о Иегова на ашавэла лэн и дэла вся, со трэбуй лэнди важ и жызня (Матфея 6:31—33; 1 Тимофею 6:6—8). Кодэла, кастэ на вижал бут тэ служын, моӷут тэ служын сар подсобни пианероря и тэ росԥэнэн важ о Дэл 30 или 50 часов андо шон.

И пианероря любин лэ Дэвлэс и лэ манушэн. Сар и о Иисусо, амэ диқас, кай адес бутэ манушэнди фартэ трэбуй тэ уӷанэн пала Дэл (Марка 6:34). Амэ поможысарас кадэлэ манушэнди, кала росԥэнас лэнди важ о лашимос, саво о Дэл камэл тэ стерэл англэ. Важ кода кай и пианероря любин лэ манушэн, вонэ отдэн бут время и зор, кай тэ поможын лэнди тэ уӷанэн важ о Дэл (Матфея 22:39; 1 Фессалоникийцам 2:8). Андэ кацави служэния кай о пианеро и вера ашэл май састи и во ашэл май пашэ каринг о Иегова. Кадэлэстар о пианеро фартэ лошало (Деяния 20:35).

• Сар ту ԥэндоп, ко када пианеро?

• Васо дэсавэ камэн тэ служын пианеронэнца?

Лэ Иеговастирэ свидетелёнэн дэлмут ӷанэн, сар кодэлэн, ко сытён тэ росԥэнэн важ о Дэл. Важ кодэла, ко бут время росԥэнэн важ лэ Дэвлэско Царство, исин спецыальни школы. Через када и ԥрала и ԥэя лэн инке май драго тэ росԥэнэн важ о Дэл (2 Тимофею 4:5).

Школа важ и пианерско служэния. Через бэршэстэ андэ кацави служэния, лэ пианерос ақарэн пэ шов дес, кай тэ сытёл. Кадэя школа обычно прожал андэ амарэ залоря. Вой поможый лэ пианерости тэ ашэл май пашэ каринг о Иегова, май драго тэ терэл пэстири служэния и тэ на парашэл тэ кандэл лэ Дэвлэс.

Школа важ кодэла, ко росԥэнэн пала Царство. Кадэя школа жал дуй шон. Андэр латэ сытён и пианероря, савэ камэн тэ служын котэ, кай трэбуй помощь. Кадя вонэ ԥэнэн: «Акэтало мэ! Бишал ман!» (Исаия 6:8). Вонэ терэн кадя, сар о Иисусо, саво сас со май ашунгло анда кодэла, ко росԥэнэнас пала лэ Дэвлэско Царство (Иоанна 7:29). Лэ пианеронэнди, савэ пэрэладэн, трэбуй тэ сытён тэ жувэн май просто. И культура, о хамос и поӷода моӷут тэ авэн най кацавэ, каринг савэ присытеля о пианеро. Можэт лэсти дажэ прижалапэ тэ сытёл тэ дэл дума пэ авэр шыб. Андэ кадэя школа ақарэн лэ ԥралэн, савэ найжэнати, лэ ԥэян, савэ наймиростэ, и семейни пары. Лэнго возрасто трэбуй тэ авэл 23 жы кай 65 бэрш. И школа поможый, кай лэндэ тэ авэн качестворя, савэ чалён лэ Дэвлэсти и савэ трэбуй важ и служэния. Кадяжэ котэ вонэ сытён май бут тэ терэн важ о Иегова и важ лэстири арӷанизацыя.

Библейско школа Галаадо. Со сыкавэл о алав «Галаадо»? Када «плай свидетелё» или «плай, саво росԥэнэн». Кадэя школа ԥэрнадэ андо 1943 бэрш. Кодэла времятар май бут чем 8 000 манушэн, савэ висытелэ андэ кадэя школа, бишалдэ тэ росԥэнэн важ о Дэл андэ авэр страны «жы кай о краё ԥув» (Деяния 13:47). Када андя бут лашимос. Кала кадэла мануша авелэ андэ Перу котэ на сас ни ек собрания, ай акана лэн май бут чем 1 000! Кала амарэ мисианероря линэ тэ служын андэ Япония, котэ на слинэ дажэ и 10 свидетеля, ай адес лэн май бут чем 200 000. Андэ кадэя школа и мануша панч шон сытён май драго тэ уӷанэн и Библия. Котэ моӷут тэ сытён и спецыальни пианероря, мисианероря, вефильцоря и раёни надзирателя. Кода, сар вонэ сытён, поможый лэнди инке май драго тэ подритярэн лэ Дэвлэстири арӷанизацыя па вся и ԥув.

• Состэ трэбуй и Школа важ и пианероря?

• Ко сытёл андэ Школа важ кодэла, ко росԥэнэн пала Царство?