1, 2. Со и мануша пушэн пала о мануш, саво муля?

АНДЭ Библия пистромэ пала время, важ сави о Дэл дя алав, кай «и смэрть будэр на авэла» (Откровение 21:4). Сар ту уӷанглян анда 5 ӷлава, важ кода кай о выкупо сас потиндо, и мануша моӷут тэ жувэн вечно. Но пока и мануша мэрэн (Экклезиаст 9:5). Тоди камэлпэ тэ пушэс, со терэлпэ лэ манушэса, кала во мэрэл?

² Тэ уӷанэн атвето пэ кадэва вопросо май фартэ камэн кодэла, ко хасардя пэстирэ чачен. Вонэ моӷут тэ пушэн: «Кай во щяс сыно? Лэсти ԥарэс? Во диқэл пар мэндэ? Можэт во тэ дэл амэнди зор? Диқасапэ амэ лэса инке варикала?

3. Со сытярэн андэ разни веры пала кода, кала о мануш мэрэл?

³ Пэ кадэла вопросоря, андэ разни веры ԥэнэн по разному. Ек сытярэн, если о мануш сас лашо, тоди посли смэрть, во жала по нэбо. Ай если во сас найлашо, во ԥабола андо адо. Ай дэко ԥэнэн, кай кала о мануш мэрэл, лэско духо вижал андар лэстэ и ужал кай пэстирэ мулэ. Ай авэр гиндон, кай кала варико мэрэл, лэс спэрва сындон, ай потом во упалэ арақадёлпэ, но ужэ сар авэр мануш чи жывотно.

4. Сости сытярэн почти андэ всаворэ веры?

⁴ Здэлпэ, кай кажно вера сытярэл па пэстирятэ. Но почти всаворэ вонэ сытярэн, кай кала о мануш мэрэл, посли лэстири смэрть во варикай всаек жувэл. Но чачимос када чи най?

СО ТЕРЭЛПЭ ЛЭ МАНУШЭСА, КАЛА ВО МЭРЭЛ?

5, 6. Со терэлпэ лэ манушэса, кала во мэрэл?

⁵ О Иегова ӷанэн атвето по вопросо, со терэлпэ лэ манушэса, кала во мэрэл. Во ԥэндя, кала о мануш мэрэл, во парашэл тэ жувэл. Важ када, кала варико мэрэл, во парашэл тэ гиндой, тэ сэрэл и лэстэ по ди нинай ни радость, ни холиa. Посли смэрть о мануш будэр ни на диқэл, ни на ашунэл.

⁶ О царё Соломоно пистросардя: «И мулэ нисо на ӷанэн». И мулэ нэ моӷут ни тэ любин, ни тэ вэрыцын. Вонэ будэр ни на терэн бути, ни на гиндон, лэндэ нинай ни знания, ни мудрость. (Адиносар Экклезиаст 9:5, 6, 10.) Андо Псалом 146:4 пистромэ, кай вмести лэ манушэса мэрэн и лэстирэ гиндоря.

СО О ИИСУС ХРИСТОС ԤЭНЭНАС ПАЛА СМЭРТЬ?

7. Со пала смэрть ԥэндя о Иисусо?

⁷ Кала муля лэ Иисусоско лашо друӷо о Лазарё, о Иисусо ԥэндя лэ учениконэнди: «Амаро друӷо о Лазарё засутя». Но во на камля тэ ԥэнэн, кай о Лазарё отцыёл, важ кода кай потом во ворта ԥэндя: «О Лазарё муля» (Иоанна 11:11—14). Дицол, кай о Иисусо ԥэндя пала смэрть, сар пала суно. Во на ԥэндя, кай о Лазарё жыля по нэбо чи кай во жыля кай пэстирэ мулэ. Кадяжэ во на ԥэндя, кай о Лазарё ԥабол андо адо чи арақаделяпэ упалэ, но ужэ сар авэр мануш чи жывотно. Най, о Иисусо ԥэндя, кай кала о Лазарё муля, во фартэ засутя. И андэ авэр библейски стихоря пала смэрть ԥэнэнпэ, сар пала суно. Андэ Библия пистромэ, кала умардэ лэ Стефанос, пала лэстэ сас ԥэндо «засутя смэртяса» (Деяния 7:60). О апостоло Павло кадяжэ пистросардя, кай дэсавэ христианоря «засутэ смэртяса» (1 Коринфянам 15:6).

8. Катар ту ӷанэс, кай о Иегова на камэл, кай и мануша тэ мэрэн?

⁸ Создал о Дэл лэ Адамос и ла Ева, кай вонэ тэ мэрэн? Най! О Иегова создал лэн, кай вонэ никала тэ на насвавэн и тэ жувэн вечно. Кажнонэ манушэсти о Иегова стодя андо ди, кай во тэ камэл тэ жувэл вечно (Экклезиаст 3:11). О дад и дэй на камэн тэ диқэн, сар лэндирэ бэятцэ ԥурён и мэрэн. Кадяжэ о Иегова на камэл, кай амэ тэ ԥурювас и тэ мэрас. Тоди васо и мануша мэрэн?

ВАСО И МАНУША МЭРЭН?

9. Васо о Иегова дя лэ Адамости и ла Евати законо и ԥарэс лэс сас тэ ритярэн?

⁹ Андо Эдэмско садо о Иегова приԥэндя лэ Адамости: «Па всаворэ витки андо садо ха скати камэс. Кати на ха па витка, сави сыкавэл, со лашимос, ай со найлашимос. Важ кода кай андо дес, кала ту хаса пар латэ, мэрэса» (Бытие 2:9, 16, 17). Через кадэва законо о Иегова сыкадя, кай кати во можэт тэ витидэл, со лашимос, ай со найлашимос. Кадэва законо на сас ԥарэс тэ ритярэн. Тэ канглоп и мануша лэ Иеговас, вонэ сыкадоп, кай стон патив пэр лэстэ, кадяжэ андэ када дицэлоп, кай вонэ цэнин вся, со важ лэндэ стердя о Дэл.

10, 11. а) Со о Сатана тердя, кай о Адамо и Ева тэ на кандэн лэ Дэвлэс? б) Васо кодэлэсти, со вонэ стердэ нинай прощения?

¹⁰ О Адамо ла Еваса витидэ тэ на кандэн лэ Иеговас. О Сатана ԥэндя ла Евати: «Чаче, о Дэл ԥэндя, кай тумэнди нащи тэ хан па всаворэ витки андо садо?». Вой ԥэндя: «И плодоря па витки андо садо амэнди можно тэ хас. Но пала плодоря па витка, сави машкар садо, о Дэл ԥэндя: „На хан пар латэ, на лэнпэ каринг латэ, кай тумэ тэ на мэрэн“» (Бытие 3:1—3).

¹¹ Тоди о Сатана ԥэндя: «Най, тумэ на мэрэна. Ай инке о Дэл ӷанэн, кай андэ кодэва дес, кала тумэ хана пар латэ, тумарэ яқа ԥэрнадёнапэ и тумэ ашэна сар о Дэл, и лэна тэ ӷанэн, со лашимос, ай со найлашимос» (Бытие 3:4—6). О Сатана камля, кай и Ева тэ гиндой, кай вой екжэни можэт тэ витидэл, со лашимос, ай со най. Но во дилярдя ла. Во ԥэндя, кай вой на мэрэла, кала на кандэла лэ Дэвлэс. И Ева ля о плодо, халя набут, дя пэстирэ хуласти и во тожэ халя. О Адамо и Ева ӷанэнас, кай нащи тэ хан и плодоря па кодэя витка, но всаек халэ. Вонэ на стодэ патив по любящё Дад! Лэнди на сас ԥарэс тэ ритярэн о законо, саво дя о Дэл. Но вонэ на канглэ лэс, хоть и полэнас, со вонэ терэн. Важ када лэнди нинай прощения!

12. Со сас по ди кай о Иегова, кала о Адамо ла Еваса на канглэ лэс?

¹² Сар дэ найдраго, кай о Адамо ла Еваса на стодэ патив по Дэл. Со авелоп манушэстэ по ди, кала во бут со стердя важ пэстирэ бэятцэ, ай вонэ жылэ против лэстэ и ашадэ лэс?

13. Со о Иегова камля тэ ԥэнэн, кала ԥэндя, кай о Адамо рияпэ андо прахо?

¹³ Кала о Адамо ла Еваса на канглэ, вонэ хасардэ и вечно жызня. О Иегова ԥэндя лэ Адамости: «Важ кода кай ту сан анда прахо, андо прахо и рисапэ». (Адиносар Бытие 3:19.) Када сыкавэл, кай лэ Адамос будэр на авэла, кабута лэс никала и на сас (Бытие 2:7). Посли кода, сар о Адамо стердя бэзэх, во муля и лэс будэр ужэ на сас.

14. Васо и мануша мэрэн?

¹⁴ Тэ канглоп о Адамо ла Еваса лэ Дэвлэс, вонэ идоси жудоп. Но вонэ на канглэ. Вонэ стердэ бэзэх и кадэлэстар мулинэ. О бэзэх шолпэ по найлашо насвалимос, саво пэрэдяпэ лэ манушэнди лэ Адамостар и ла Еватар. Всаворэ мануша арақадёнпэ ӷрешни и важ када мэрэн (Римлянам 5:12). Но о Дэл на камля, кай кадя тэ авэл. Во никала на камэлас, кай и мануша тэ мэрэн. Важ када андэ Библия пистромэ, кай и смэрть, када вороӷо (1 Коринфянам 15:26).

СОСТЭ ТЭ ӶАНЭС О ЧАЧИМОС ПАЛА КОДЭЛА, КО МУЛЯ?

15. Васо трэбуй тэ ӷанэс о чачимос пала смэрть?

¹⁵ Кала ту ӷанэс о чачимос пала смэрть, тути авэла най ԥарэс тэ полэс, со нэправильно сытярэн пала кодэла, ко муля. Андэ Библия пистромэ, кай кала о мануш мэрэл, лэстэ ужэ нисо на дуқал и по ди лэсти ужэ най ԥарэс. И мануша ужэ нисар на дэна дума лэнца, ай и мулэ лэ манушэнца. О мануш ужэ нисоса на поможыя лэнди, ай и мулэ лэсти. О мануш най васо лэндар тэ дарал, важ кода кай и мулэ на терэна лэсти нисо вэрыто. Но всаек андэ бут веры ԥэнэн, кай и мулэ варикай жувэн. И кадяжэ вонэ ԥэнэн, кай о мануш поможыя лэнди, кала тинэла и свечки и о рашай адиноя и молитвы, кай о муло тэ на даравэл лэ ерес. Но, если о мануш ӷанэн о чачимос, лэс на дилярэна.

16. Со пала кодэла, ко муля росԥэнэн андэ разни веры?

¹⁶ О Сатана через и хохавнэ веры терэл вся, кай и мануша тэ гиндон, кай и мулэ всаек жувэн. Ԥэнаса, вонэ сытярэн, кай кала о мануш мэрэл, лэско духо чи душа варикай жувэл. Ай тут андэ қандири кадэлэсти сытярэн? Чи вой сытярэл тут кадя, сар сытярэл и Библия пала кодэла, ко муля? На бистэр, кай о Сатана хохавэл, кай тэ одындярэл лэ манушэн лэ Иеговастар.

17. Васо, кала сытярэн, кай и мануша ԥабон андэ яг, када холярэл лэ Иеговас?

¹⁷ И мануша фартэ даран кодэлэстар, сости сытярэн андэ бут веры важ и мулэ. Котэ сытярэн, кай и найлашэ мануша посли смэрть вечно ԥабон андэ яг. Кадэлэ хохаимаса терэн кадя, кай о Иегова тэ хасарэл и патив андэ лэ манушэндирэ яқа. Во кадя никала на тердоп! (Адиносар 1 Иоанна 4:8.) Со ту ԥэндоп пала мануш, саво ԥабарэл и вас пэстирэ бэятости пэ яг, важ кода кай во лэс на кангля? «Лэстэ баруно ди! Мэ кацавэ манушэс дажэ на камлоп тэ ӷанав». Ай о Сатана камэл, кай ту кадя и тэ гиндос, кай о Иегова жэстоко. И сар ту кадя гиндоса, тоди ту на закамэса тэ уӷанэс лэ Иеговас.

18. Васо на трэбуй тэ дарас кодэлэндар, ко муля?

¹⁸ Андэ дэсавэ веры ԥэнэн, кала и мануша мэрэн, лэнго духо лэл тэ ԥирэл. Андэ кадэла веры сытярэн, кай и мануша тэ полэн лэ мулэн и тэ на холярэн лэн, важ кода кай лэнго духо можэт тэ фэрий лэн чи тэ ашэл лэнго вороӷо. Бут мануша патян андэ кадэва хохаимос. Вонэ даран лэ мулэндар, важ када вонэ тэлён лэнди. Ту трэбуй тэ сэрэс, и мулэ нисо на ӷанэн и нисо на полэн, важ када тути на трэбуй лэндар тэ дарас. Кати о Иегова ашэл, кай лэсти тэ тэлёс, важ кода кай во чачуно Дэл и во вся создал (Откровение 4:11).

19. Состэ тэ ӷанэс о чачимос пала кодэла, ко муля?

¹⁹ Кала ту ӷанэс о чачимос пала смэрть, ту на патяса лэ хохаимасти, савэсти сытярэн андэ хохавнэ веры. Кадяжэ кадэва чачимос поможыя тути инке май фартэ тэ цэнис дэсавэ лэ Иеговастирэ обещянии, савэ авэна англэ.

20. Пала со ту уӷанэса анда авэр ӷлава?

²⁰ Фартэ дэлмут ек лэ Дэвлэско мануш, савэс ақарэнас Иово, пушля: «Если о мануш мэрэла, жувэла во упалэ?» (Иов 14:14). Ай чаче, лэна тэ жувэн варикала кодэла, ко мулинэ? Атвето, саво пистромэ андэ Библия пала када, тут удивия. Андэ авэр ӷлава ту уӷанэса пала када.

1, 2. Андэ саво «баруно» бэшэн всаворэ мануша?

ПРЕДСТАВЬ, кай лэ манушэс сындосардэ тэ бэшарэн андо баруно. Лэс бэшардэ пэ вся и жызня, важ кода со во на стердя. И акэ во бэшэл андо баруно. Во на аштярэл, кай лэс одмэкэна. Во полэл, кай нисо нэ можэт тэ парувэл. Во умэкэл и вас. Но акана, во уӷанэн, кай исин кодэва, ко можэт лэс котар тэ вилэл. Ай инке кодэва мануш дэл алав, кай стерэла када. Со тоди авэла андо ди кай о мануш, савэс бэшардэ важ кода, со во на стердя?

² Кацавэ барунэса, саво пэ вся и жызня можно тэ сыстосарас и смэрть. Со бы амэ тэ на терас, амэндэ на вижала ла тэ улас. Но кай о Иегова исин зор тэ улэл и смэрть. Во дэл алав, кай и смэрть будэр на авэла (1 Коринфянам 15:26).

3. Со о Иегова стерэла ла смэртяса?

³ Сави када бах тэ на дарас ла смэртятар! О Иегова дэл алав най кати тэ улэл и смэрть, но и тэ рий каринг и жызня кодэлэн, ко ужэ муля. О Дэл ԥэндя, кай кодэла, ко муля, лэна тэ жувэн упалэ (Исаия 26:19).

ТОДИ, КАЛА МЭРЭЛ ВАРИКО АНДА ЧАЧЕ

4. а) Со подритярэла амэн, кала амэндэ мэрэл варико анда чаче чи амаро друӷо? б) Каса дружыяс о Иисусо?

⁴ Со амэндэ андо ди, кала мэрэл варико анда амарэ чаче чи амаро друӷо? Амэнди фартэ ԥарэс и дуқал оди. Амэ нисо нащи стерас, важ кода кай нэ можэм тэ рисарас кодэлэс, ко муля. Но андэ Библия исин алава, савэ амэн подритярэн. (Адиносар 2 Коринфянам 1:3, 4.) Подам дума пала кода, со сыкавэл, кай о Иегова и о Иисус Христос фартэ камэн, кай амарэ чаче, савэ мулинэ, упалэ тэ жувэн. Кала о Иисусо сас пэ ԥув, во дружыяс лэ Лазарёса и лэстирэ ԥэянца ла Марфаса и ла Марияса. Андэ Библия пистромэ, кай «О Иисусо любияс лэ Лазарёс, ла Марфа и латиря ԥэя» (Иоанна 11:3—5).

5, 6. а) Со сас андо ди кай о Иисусо, кала во диқэлас, сар ровэн лэ Лазарёстирэ и лэстирэ ԥэяндирэ друӷоря? б) Васо амэнди ашэл май вушэро кодэлэстар, сар о Иисусо пэс андярдя, кала муля лэско друӷо?

⁵ Сас кадя, кай о Лазарё занасвайля и муля. О Иисусо жыля каринг и Марфа и Мария, кай тэ подритярэл лэн. Кала и Марфа ашундя, кай о Иисусо жал каринг лэндэ, вой вижыля, кай тэ додиқэл лэс. Хоть и Марфа сас фартэ лошали тэ диқэл лэ Иисусос, вой ԥэндя: «Тэ авелоп ту катэ, мэрно ԥрал на мулиноп». Лати здэласпэ, кай о Иисусо опоздал. Тоди о Иисусо додиқля латиря ԥэя, ла Мария. Вой ровэлас. О Иисусо фартэ приля каринг оди лэнго ԥаримос и тожэ заровдя (Иоанна 11:21, 33, 35). Лэстэ кадяжэ дуқал оди, сар амэндэ, кала амэндэ мэрэл варико анда чаче.

⁶ Сар жэ амэнди ашэл май вушэро кодэлэстар, кай о Иисусо полэл, со амэндэ андо ди! Кадэлэса во шутяпэ пэ пэско Дад (Иоанна 14:9). Йто о Иегова улэла и смэрть и лэстэ исин зор, кай тэ стерэл када.

«ЛАЗАРЁ, ВИЖА!»

7, 8. Васо и Марфа на камэлас, кай тэ улэн о бар? Со стердя о Иисусо?

⁷ О Иисусо поджыля каринг о ҭан, кай сас гарадо о Лазарё. Када сас пещера, сави ԥандавэнас барэ барэса. Во мангля: «Улэн о бар». Но и Марфа на камэлас, важ кода кай во сас гарадо ужэ штар дес (Иоанна 11:39). Вой на ӷанэнас, со камэл тэ стерэл о Иисусо, кай тэ поможый латирэ ԥралэсти, саво муля.

⁸ Кала о бар всаек улинэ, о Иисусо ԥэндя: «Лазарё, вижа!». Тоди стердяпэ кода, со и Марфа и Мария нисар на аштярэнас. «О мануш, саво сас муло, вижыля». «И вас и пэрнэ лэстэ слинэ обмотымэ кирпэнца» (Иоанна 11:43, 44). О Лазарё жунделя! О Иисусо рисардя лэс каринг и жызня! Представь, сар дэ лошалэ слинэ лэстирэ чаче и друӷоря. Во упалэ лэнца, вонэ упалэ моӷут лэс тэ облэн и тэ подэн дума лэса. Када па чачимастэ сас чуда!

«БЭЯТА, ԤЭНАВ ТУТИ, УЩИ!»

9, 10. а) Кастар лэ Иисусостэ сас зор тэ рий каринг и жызня лэ манушэн? б) Состэ андэ Библия сас запистромэ, сар варико рисайля каринг и жызня?

⁹ Кастар кай о Иисус Христос сас зор тэ рий лэ мулэн каринг и жызня? Англа кода, кай тэ рий лэ Лазарёс каринг и жызня, о Иисусо мангляпэ лэ Иеговасти. (Адиносар Иоанна 11:41, 42.) Но най кати о Лазарё рисайля каринг и жызня. Андэ Библия росԥэнэнпэ пала бэята, савяти сас 12 бэрш. Кадэя бэята фартэ занасвайля. Лако дад, о Иаиро, авеля кай о Иисусо и ля лэс тэ мангэл, кай во тэ исцэлий лэстиря бэята. Лэстэ будэр на слинэ бэятцэ. Кала о Иаиро дэлас дума лэ Иисусоса, лэсти ԥэндэ: «Тири бэята муля! Будэр на тревожысар лэ учителёс». Но о Иисусо ԥэндя лэ Иаирости: «На дар, кати патя и вой спасыяпэ». Тоди вонэ еқэҭанэ лэ Иисусоса жылэ андо цэр кай о Иаиро. Паша цэр о Иисусо додиқля лэ манушэн, савэ ровэнас. Во ԥэндя лэнди: «Авэла тэ ровэн, важ кода кай вой на муля, ай совэл». Латирэ дад и дэй нащи полэнас, пала со дэлас дума о Иисусо. Во мангля, кай всаворэ тэ вижан анда цэр. Посли када о Иисусо ла бэятатирэ дадэса и латиря даса зажыля андо цэр, кай вой пашлёлас. О Иисусо полокорэс ля ла вастэстар и ԥэндя: «Бэята, ԥэнав тути, ущи!» Савэ дэ бахталэ сас латирэ родителя, кала и бэята ущеля и ля тэ ԥирэл! Кадя о Иисусо рисардя каринг и жызня лэ Иаиростиря бэята (Марка 5:22—24, 35—42; Луки 8:49—56). Кажно дес, кала вонэ диқэн пэстиря бэята жундя, вонэ никала на бистрэна, со важ лэндэ стердя о Иеговаa.

¹⁰ Кодэла, кас о Иисусо рисардя каринг и жызня, упалэ мулинэ. Но через кадэла случаёря, савэ амэ адиносарас андэ Библия, амэ ӷанас, о Иегова камэл тэ рий каринг и жызня кодэлэн, ко муля и во стерэла када.

О ИЕГОВА КАМЭЛ ТЭ РИЙ КАРИНГ И ЖЫЗНЯ КОДЭЛЭН, КО МУЛЯ

11. Со амэ уӷанас пала Лазарё анда Экклезиаст 9:5?

¹¹ Андэ Библия пистромэ, кай и мулэ «нисо на ӷанэн». Кацаво жэ можно тэ ԥэнас и пала Лазарё (Экклезиаст 9:5). Лэстири смэрть шоласпэ по суно (Иоанна 11:11). Кала о Лазарё сас муло, во нисо на ӷанэнас.

12. Катар амэ ӷанас, кай о Лазарё па чачимастэ рисайля каринг и жызня?

¹² Сар о Лазарё рисайля каринг и жызня, диқлэ бут мануша. Дажэ кодэла, ко ӷонияс лэ Иисусос, полэнас, кай када сас чуда. О Лазарё упалэ сас жундо и када сыкадя, кай во па чачимастэ рисайля каринг и жызня (Иоанна 11:47). Каринг о Лазарё авэнас бут мануша. Вонэ диқэнас, кай во жундо и лэнас тэ патян, кай лэ Иисусос бишалдя о Дэл. Канешно, када на чалеля кодэлэнди, ко лэс ӷонияс и важ када вонэ загиндосардэ тэ умарэн лэ Иисусос и лэ Лазарёс (Иоанна 11:53; 12:9—11).

13. Васо амэ можэм тэ патяс, кай о Иегова рия каринг и жызня кодэлэн, ко муля?

¹³ О Иисусо ԥэндя, кай: «всаворэ, ко мулинэ ашунэна лэско ӷолосо и ущена [пала кастэ сэрэл о Дэл]» (Иоанна 5:28). Када сыкавэл, кай о Иегова сэрэл кодэлэн, ко упалэ лэна тэ жувэн. Но, кай тэ рий каринг и жызня лэ манушэн, о Иегова трэбуй вся тэ сэрэл пала лэндэ. Но кадя можэт тэ авэл? Погиндосарам пала када. Пэ люма милиардоря черӷая. Андэ Библия ԥэнэнпэ, кай о Иегова ӷанэн кажнона па алавэстэ. (Адиносар Исаия 40:26.) Если во сэрэл вса́ворэ черӷая па алавэндэ, тоди, хэба, во на сэрэла вся пала кодэла, кас камэл тэ рий каринг и жызня! Патя, важ кода кай о Иегова вся создал, лэстэ исин зор када тэ стерэл.

14, 15. Со амэ уӷанас анда лэ Иовостирэ алава, кай и мулэ ринапэ каринг и жызня?

¹⁴ Ек мануш, савэс ақарэнас Иов и саво на парашэлас тэ кандэл лэ Дэвлэс, патялас, кай кодэла, ко муля, ринапэ каринг и жызня. Еқварэс во пушля: «Если мэрэла о мануш, жувэла во упалэ?» Ай инке во ԥэндя лэ Иеговасти: «Ту ақарэса, и мэ взвисавава». Сар дицол анда кадэла алава, о Иово патялас, кай о Иегова екжэно фартэ аштярэл кодэя время, кала лэла тэ рий каринг и жызня кодэлэн, ко муля (Иов 14:13—15).

¹⁵ Со тутэ андо ди, кала ту гиндос, кай и мануша, савэ мулинэ ринапэ каринг и жызня? Ту можэт пушэс: «Ринапэ каринг и жызня мэрнэ чаче и друӷоря, савэ мулинэ?» Амэнди драго по ди кодэлэстар, кай о Иегова фартэ камэл, кай кодэла, ко муля, упалэ тэ жувэн. Акана подам дума, со пистромэ андэ Библия пала кода, кас о Дэл рия каринг и жызня и кай вонэ жувэна?

ВОНЭ «АШУНЭНА ЛЭСКО ӶОЛОСО И УЩЕНА»

16. Сави авэла жызня кодэлэндэ, ко рияпэ каринг и жызня пэ ԥув?

¹⁶ И мануша, савэ варикала рисайлэ каринг и жызня, моӷли упалэ тэ жувэн и тэ лошавэн кодэлэса, кай проандярэн и время лэ ереса и лэ друӷонэнца. Ай со авэла англэ? Кати погиндосар, кодэла, ко упалэ лэна тэ жувэн, моӷут никала тэ на мэрэн. Тоди авэла авэр жызня, андэ сави на авэна войны, преступность и насвалимос.

17. Кас о Дэл рия каринг и жызня?

¹⁷ Кас о Дэл рия каринг и жызня? О Иисусо ԥэндя: «Всаворэ, ко мулинэ, ашунэна лэско ӷолосо и ущена [пала кастэ сэрэл о Дэл]» (Иоанна 5:28, 29). Андэ Откровение 20:13 пистромэ: «И мо́ря отдя кодэлэн, ко муля, савэ сас андэр латэ, и смэрть, и моӷила отдинэ лэ мулэн, савэ сас андэр лэндэ». Моӷила, када, кай гаравэн лэ мулэн па вся и ԥув. Чаче, милиардоря мануша ринапэ каринг и жызня. О апостоло Павло ԥэндя, кай ринапэ каринг и жызня: «праведни и нэправедни». (Адиносар Деяния 24:15.) Пала кастэ жал и дума?

18. Ко када «праведни»?

¹⁸ Праведни, када и мануша, савэ кандэн лэ Иеговас. Када кодэла, ко жувэнас жы каринг и время, кала авеля о Иисусо пэ ԥув. Када о Ноё, о Авраамо, и Сарра, о Моисеё, и Руфь и Эсфирь. Пала авэр лэ Иеговастирэ служытеля амэ можэм тэ уӷанас анда книӷа Евреям 11 ӷлава. Всаворэ вонэ, сар ринапэ каринг и жызня, жувэна пэ ԥув. Ай можно тэ ԥэнэс пэ мануша, савэ андэ амарэ деса кандэн лэ Иеговас и савэ мэрэн, кай вонэ «праведни»? Канешно, и вонэ кадяжэ ринапэ каринг и жызня.

19. Ко када «нэправедни»? Со дэла лэнди о Иегова, кала вонэ ринапэ каринг и жызня?

¹⁹ «Нэправедни», када милиардоря мануша, савэ мулинэ и на ашундэ важ о Иегова. Но во лэн на бистэрдя. О Иегова рия лэн каринг и жызня, и тоди вонэ уӷанэна пала лэстэ и лэна тэ служын лэсти.

20. Васо дэсавэн манушэн о Иегова на рия каринг и жызня?

²⁰ Тоди со, вижал о Иегова рия каринг и жызня всаворэн, ко муля? О Иисусо ԥэндя, кай най. О Иегова жундярэла най всаворэн (Луки 12:5). О право, кай тэ сындой «лэ жундэн и лэ мулэн», во отдя лэ Иисусости (Деяния 10:42). Но послиднё алав андэ када ашэлпэ пала Иегова. О Иегова на рия каринг и жызня кодэлэн, ко андэ лэстирэ яқа сас найлашо и на камэлас тэ парудёл. (Дик и ссылка 19.)

РИНАПЭ КАРИНГ И ЖЫЗНЯ, КАЙ ТЭ ЖУВЭН ПО НЭБО

21, 22. а) Сави тила авэла кай кодэла, ко рияпэ каринг и жызня, кай тэ жувэн по нэбо? б) Кас пэрвонэс о Иегова рисардя каринг и жызня по нэбо?

²¹ Андэ Библия кадяжэ пистромэ, кай дэсавэ мануша ринапэ каринг и жызня, кай тэ жувэн по нэбо. Вонэ лэна тэ жувэн по нэбо, сар анӷелоря. Лэндэ на авэла манушыкани тила.

²² О Иисусо сас пэрво, кас о Иегова рисардя каринг и жызня по нэбо (Иоанна 3:13). Во рисайля каринг и жызня по трито дес посли кода, сар муля (Псалом 16:10; Деяния 13:34, 35). О Иисусо рисайля най андэ манушыкани тила, ай сар зорало анӷело (1 Коринфянам 15:3—6). О апостоло Пётро ԥэндя, кай лэ Иисусос «умардэ, кала во сас мануш, ай каринг и жызня во рисайля, сар анӷело» (1 Петра 3:18). Но най кати ек о Иисусо жувэла по нэбо.

23, 24. Пэр кастэ о Иисусо ԥэндя «найбаро стадо»? Скати лэн?

²³ Англа пэстири смэрть о Иисусо ԥэндя пэстирэ учениконэнди, савэ на парашэнас тэ кандэн: «Мэ жав, кай тэ приӷотовлю тумэнди место» (Иоанна 14:2). Вижал, кай дэсавэ лэстирэ ученикоря жундёна, кай тэ жувэн лэса по нэбо. Скати лэн? О Иисусо ԥэндя, кай лэн набут и ԥэндя пэр лэндэ «найбаро стадо» (Луки 12:32). О апостоло Иоанно ԥэндя точно число. Андэ видения во диқля лэ Иисусос «и лэса сто сорок четыре тысячи» (Откровение 14:1).

²⁴ Кала, кадэла сто сорок четыре тысячи лэна тэ ринпэ каринг и жызня? Када авэла, кала о Иисус Христос лэла тэ правий по нэбо. Када пистромэ андэ Библия (1 Коринфянам 15:23). О Иисусо ужэ ля тэ правий. И андэ амарэ деса ужэ май бут анда 144 000 христианоря, савэ кандэнас лэ Иеговас, рисайлэ каринг и жызня и жувэн по нэбо. Ай кодэла, савэ инке жувэн пэ ԥув, сар мэрэна, сразу жэ ринапэ каринг и жызня, кай тэ жувэн по нэбо. Вижал, май бут мануша, савэ ринапэ каринг и жызня лэна тэ жувэн пэ ԥув. Ай дэсавэ мануша, савэн май набут, лэна тэ жувэн по нэбо.

25. Со амэ уӷанаса анда авэр ӷлава?

²⁵ Йто о Иегова вилэла лэ манушэн анда рабство ла смэртятар. Смэрть ужэ на авэла. (Адиносар Исаия 25:8.) Но со лэна тэ терэн кодэла, ко жувэна по нэбо? Андэ Библия пистромэ, кай вонэ лэна тэ правин еқэҭанэ лэ Иисусоса андэ лэ Дэвлэско Царство. Май бут пала кадэва правительство амэ уӷанаса анда авэр ӷлава.