Кала прижалпэ тэ ашавэс и служэния, сави тути чалёл

1—3. Васо дэкала и полновременни служытеля ашавэн пэстири служэния?

О РОБЕРТО И МЭРИ росԥэнэн: «Амэ прослужысардям мисианеронэнца 21 бэрш. Када сас фартэ лащи время. Но амэнди трэбуй сас тэ диқас пала амарэ ԥурэ родителя. Амэ лошалэ самас пала лэндэ тэ диқас, но тэ ашавас и ҭана, савэ сас куч амарэ одести совсем на камэласпэ».

² О Уильямо и Терри росԥэнэн: «Кала амэ уӷанглям, кай через амаро зор амэндэ на вижала и май дур тэ служысарас, амэ нащи зритярасас и ясва. Амэнди вся и время камэласпэ тэ служысарас пала ӷраница, но акана када ужэ на вижала».

³ О Алексеё росԥэнэн: «Амэ ӷанасас, кай и власти камэн тэ ԥандавэн о филиало. Но кала када тердяпэ и всаворэнди сас трэбуй тэ уладэн анда Вефилё, амэ всаек када на аштярасас».

4. Пала со амэ подаса дума андэ кадэя статья?

⁴ Пала кацавэ маменторя моӷут тэ росԥэнэн тысячи вефильцоря, и авэр полновременни служытеля. Кадэлэ ԥралэнди и ԥэянди сас найвушэро тэ ашавэн и служэнияb, сави лэнди чалёлас. Сар лэнди тэ присытён тэ жувэн па аврятэ? Сар тумэ можэте лэн тэ подритярэн? И атветоря пэ кадэла вопросоря поможына амэнди всаворэнди тэ пэрэандярас кода, со паруделя, кала на аштярасас.

САР И МАЙ ДУР ТЭ ЖУВАС?

5. Со амэнца можэт тэ авэл, кала пэрэладас?

⁵ Кай бы амэ тэ на служысарас, андо Вефилё чи андэ авэр ҭан, амэ можэм фартэ тэ присытювас каринг и мануша и каринг о ҭан, кай служысарас. И важ када, кала уладас, можэт тэ авэл фартэ ԥарэс. Амэнди ԥарэс тэ ашавас кодэлэн, ко ашэля амэнди куч. И амэ можэм тэ пэрэжываем пала лэндэ. Ай инке май фартэ, кала уладас, важ кода кай ӷонин (Матфея 10:23; 2 Коринфянам 11:28, 29). Можэт тэ авэл фартэ ԥарэс кадяжэ кодэлэстар, кай нэви назначения или кала рисавас цэрэ. Васо? Важ кода кай трэбуй упалэ тэ присытювас каринг пэсти культура. Росԥэнэн о Роберто и Мэри: «Амари культура ашэля сар чужо. Найвушэро сас дажэ тэ росԥэнас важ о Дэл пэ амари шыб. Здэласпэ, кай амэндэ будэр на вижала тэ жувас кадя, сар жувасас варикала». Дэсавэ ԥралэнди и ԥэянди посли кода, сар пэрэладэн, ашэл ԥарэс лэ ловэнца. Важ када вонэ на патян андэр пэстэ, умэкэн и вас и гиндон, кай вонэ нисо на ашэн. Со лэнди можэт тэ поможый?

6. Сар тэ фэрисарас и дружба лэ Иеговаса?

⁶ Фэрин и дружба лэ Иеговаса (Иакова 4:8). Сар? Росԥэнэн, со тумэндэ по ди кодэлэсти, «Ко ашунэл и молитвы» (Псалом 65:2). Сар пистромэ андо Псалом 62:8, «ԥэрнавэн лэсти пэско ди». О Иегова «можэт тэ стерэл пэ бутэстэ май бут, пала со амэ мангас или можэм кати тэ погиндосарас» (Эфесянам 3:20). Во терэл най кати кода, пала со амэ мангас андэ молитва. Во можэт амэн кадя тэ удивий, кала ришыя амарэ проблемы, сар амэ и на аштярасас.

7. а) Со поможыя амэнди тэ фэрисарас и дружба лэ Иеговаса? б) Васо, сар пистромэ андэ Евреям 6:10—12, трэбуй тэ на парашас тэ служысарас лэ Иеговасти?

⁷ Кай тэ фэрисарас и дружба лэ Иеговаса, трэбуй кажно дес тэ адиносарас и Библия и драго тэ гиндосарас пала кода, со адиносардям. Акэ, со росԥэнэн ек ԥрал, саво сас мисианеро: «Старыинпэ тэ сытён лэ ереса па Библия па ӷрафико, и ӷотовьтесь каринг и собрания. Мэк вся авэла кадя, сар сас май англал, кала андэ тумари жызня инке нисо на паруделясас». Кадяжэ бут росԥэнэн важ о Дэл ла нэвя собранияса. О Иегова сэрэл всаворэн, ко на парашэл лэсти тэ служый, и дажэ кодэлэн, ко ужэ на служый кадя, сар служыяс варикала. (Адиносар Евреям 6:10—12c.)

8. Сар кода, со пистромэ андэ 1 Иоанна 2:15—17, поможыя тумэнди тэ жувэн по простому?

⁸ Жувэн по простому. На домэкэн, кай через «и пэрэжывании, савэ исин андэ кадэя люма», тумэ тэ парашэн тэ камэн тэ терэн и дила важ о Иегова (Матфея 13:22). На жан пэ кода, со анда оди подԥэнэн и друӷоря и о родо, кай тумэндэ тэ авэл барвалимос андэ лэ Сатанастири люма. (Адиносар 1 Иоанна 2:15—17d.) Патян лэ Иеговасти, саво дэл алав, кай кала авэла трэбуй, во позаботияпэ пала вся кода, со тумэнди трэбуй, пала кода кай тумари вера тэ авэл май састи и тэ авэл май вушэро по ди (Евреям 4:16; 13:5, 6).

9. Васо, сар пистромэ андэ Притчи 22:3, 7, на трэбуй тэ ӷулен андо вужылимос, саво нэ нужно? Со поможыя амэнди правильно тэ витидас?

⁹ На ӷулен андо вужылимос, саво на трэбуй. (Адиносар Притчи 22:3e, 7f.) Тэ пэрэладас можэт тэ авэл фартэ куч и можно тэ заӷулес андо вужылимос. Важ када на тинэн андо кредито кода, со тумэнди па чачимастэ на трэбуй. Кала тумэ фартэ пэрэжываете (например, кала диқэн пала пэско родо, саво насвало), найвушэро тэ витидэн, скати ловэ тэ залэн. Тоди на бистрэн, кай правильно тэ витидэн, со тэ терэн, поможыя и «молитва» и кай анда вся оди мангэнпэ. Кала тумэ росԥэнэна вся лэ Иеговасти, во дэла тумэнди спокойство по ди и «фэрия тумаро ди и годи» и поможыя пала вся драго тэ погиндон (Филиппийцам 4:6, 7; 1 Петра 5:7).

10. Сар тэ арақэс нэвэ друӷонэн?

¹⁰ На бистрэн пала друӷоря. Росԥэнэн кода, со тумэндэ по ди и пала ԥаримос лэ пашутнэ друӷонэнди. Ай май драго авелоп тэ росԥэнэн кодэлэнди, ко екжэно прожыля через кацаво. Када поможыя, кай тэ авэл по ди май вушэро (Экклезиаст 4:9, 10). И друӷоря, савэ сас тутэ варикала, ашэнапэ туса пэ вся и время, ай акана трэбуй тэ виарақэс аврэ друӷонэн. На бистэр, кай тутэ тэ авэн лашэ друӷоря, трэбуй екжэно тэ авэс лашо друӷо. Сар жэ тэ арақэс нэвэ друӷонэн? Росԥэн лэ ԥралэнди и лэ ԥэянди, сави радость тути анэнас кода, кай ту бут служысас лэ Иеговасти. Дажэ если варико андэ собрания нащи полэл, васо ту радуиспэ пала полновременно служэния, авэр моӷут тэ закамэн май бут тэ уӷанэн пала када и ашэна тути лашэ друӷоря. На дэ дума фартэ бут пала пэстэ и пала кода, со ту стердян андэ служэния лэ Иеговасти, и кадяжэ пала кода, со тути на чалёл.

11. Со трэбуй тэ терэн, кай о ери тэ авэл бахтало?

¹¹ Если тумэнди прижыляпэ тэ ашавэн и служэния, или пэрэлаглэ через кода, кай о хулай чи и хулаи занасвайлэ, на дошалярэн лэс. Авря ригатар, если варисо най кадя лэ зорэса тутэ, на дошаляр пэс, кай через када о хулай чи и хулаи парашэлэ тэ служын. На бистрэн, кай тумэ сар ек мануш и тумэ динэ алав лэ Иеговасти, тэ заботинпэ ек пала ек аврэстэ андэ бида и андэ радость (Матфея 19:5, 6). Если тумэ улаглэ через кода, кай трэбуй тэ арақадёлпэ бэято, савэс на аштярэнас, мэк тумаро бэято ӷанэн, кай во тумэнди май куч чем любо назначения. Вся и время ԥэнэн лэ бэятости, кай лэс тумэнди «дя о Иегова» (Псалом 127:3—5). Росԥэнэн лэсти, сави лащи сас тумэндэ и служэния. Через када во можэт тэ закамэл кадяжэ тэ служый лэ Дэвлэсти и тэ стол кацавэ жэ цэли.

САР МОӶУТ ТЭ ПОМОЖЫН АВЭР?

12. а) Сар амэ можэм тэ поможысарас кодэлэнди, ко служый полновременно, кай вонэ тэ на парашэн тэ служын? б) Со можно тэ стерэн, кай лэнди тэ авэл май вушэро, кала вонэ пэрэлаглэ?

¹² Фартэ драго, кай бут собрании и кажно вазвещятелё анда вся зор старыинпэ тэ поможын кодэлэнди, ко служый полновременно, май долӷо тэ ашэнпэ андэ пэстири служэния. Вонэ ԥэнэн лэнди, кай тэ на ашавэн и дила, сави лэнди динэ и подритярэн лэн всаворэса, со лэнди трэбуй. Кадяжэ вонэ подритярэн лэн лэ ловэнца, ай инке вонэ диқэн пала лэнго родо, савэ жувэн дур (Галатам 6:2). Если андэ тумари собрания авелэ тэ служын полновременно кодэла, кастэ сас май англал авэр назначения, на гиндон, кай лэндэ варисо на вижыля или вонэ варисо стердэ най кадяg, кай лэн одбишалдэ. Старыинпэ тэ подритярэн лэн, кай лэнди тэ авэл май вушэро, важ кода кай вонэ пэрэлаглэ пэ авэр ҭан. Сыкавэн, кай тумэ лэнди лошалэ. Хвалин лэн анда вся оди, пала кода со вонэ терэн, дажэ если лэндэ нинай зор тэ терэн кадя, сар терэнас варикала. Уӷанэн лэн май драго. Сытён лэндар, важ кода кай вонэ бут со ӷанэн и бут со стердэ андэ служэния лэ Иеговасти.

13. Сар тэ поможысарас кодэлэнди, кас бишалдэ андэ амари собрания?

¹³ Сар тэ поможысарас кодэлэнди, ко пэрэладэл? Можэт лэнди трэбуй авэла цэр, машына, бути и вся, со трэбуй важ и жызня. Кадяжэ лэнди трэбуй тэ уӷанэн, сар тэ потинэн и налоӷоря, тэ стерэн и страховка и бут со инке. Но май фартэ лэнди трэбуй, кай лэн тэ полэн, ай най тэ жалуин. Лэнди можэт тэ авэл фартэ ԥарэс через кода, со тердяпэ лэндирэ зорэса чи лэндирэ родостирэ зорэса. Ай можэт лэнди ԥарэс, кай лэндэ муля варико, ко лэнди сас фартэ кучh. Кадяжэ лэнди фартэ на хутилэл лэ друӷонэн анда собрания, савэн вонэ ашадэ, хоть вонэ ворта важ када и на дэн дума. Лэнди трэбуй время, кай лэндар тэ отжал кадэва ԥаримос анда оди.

14. Сар и катутнэ вазвещятеля, поможысардэ еқа ԥэяти тэ присытёл каринг и нэви служэния?

¹⁴ Кодэлэнди, ко пэрэлагля, важно тэ сытён тумэндар и инке лэнди трэбуй, кай тумэ лэн тэ подритярэн. Акэ со росԥэнэн ек ԥэй, сави бут бэрша служыяс пала ӷраница: «Май англал мэ кажно дес сытяравас па Библия, ай по нэво ҭан мандэ на вижалас дажэ тэ проадиносарав стихо анда Библия чи тэ сыкавав видео. Но и вазвещятеля, савэ катэ жувэн, ақарэнас ман пэса, кала жанас кай и мануша до дуйто или кала сытярэнас варикас па Библия. Кода, со мэ сытювавас кай кадэла смили ԥрала и ԥэя, савэ бут со терэнас важ о Иегова и драго сытярэнас аврэн па Библия, поможысардя манди тэ диқав пэ мэрни тиритория май драго. Мэ сытелэм тэ залав дума катутнэ манушэнца. Через када мэ упалэ ашэлэм лошали».

НА ТЕРДЁН ПЭ ЕК ҬАН

15. Со поможыя тумэнди май драго тэ служын андэ нэви собрания?

¹⁵ Тумэ можэте бут со тэ стерэн андэ нэви собрания. На гиндон, кай тумэндэ нисо на вижыля, и нэви назначения тумэнди динэ, важ кода кай тумэ нисо на ашэн. Старыинпэ тэ диқэн лэ Иеговаско вас андэ тумари жызня и на парашэн тэ росԥэнэн важ лэстэ. Сытён кай и пэрви христианоря, савэ жувэнас андэ пэрво вико. Со бы тэ на терэлпэ, вонэ «жанас и май дур тэ росԥэнэн и лащи весть» (Деяния 8:1, 4). Кода, со тумэ терэн, на авэла евья. И пианероря, савэн видарадэ анда ек страна, пэрэлаглэ андэ авэр страна, кай сас трэбуй мануша, савэ дэнас дума пэ кодэя жэ шыб, сар дэнас дума и пианероря. Прожылэ набут шона и котэ ашэлэ нэвэ ӷруппы, андэ савэ ашэнас май бут мануша.

16. Со тэ терэн, кай тумэнди тэ чалёл нэви назначения?

¹⁶ Андэ Неемия 8:10 пистромэ: «И радость, сави дэл о Иегова, када тумаро зор». Родэн радость кай о Иегова, ай най андэ пэстири назначения, сави бы кучутни вой тумэнди тэ на авэл. На парашэн тэ дружын лэ Иеговаса и бандён каринг лэстэ пала совето, кай во тэ подритярэл тумэн и тэ авэл май вушэро по ди. На бистрэн, кай и назначения, сави сас, чалеля тумэнди важ кода, кай камэнас анда вся оди тэ поможын лэ манушэнди. Терэн анда вся оди, вся со трэбуй андэ нэви назначения и тоди вой лэла тэ чалёл тумэнди. О Иегова андэ када поможыя тумэнди (Экклезиаст 7:10).

17. Пала со амэнди на трэбуй тэ бистрас?

¹⁷ На бистрам, кай лэ Иеговасти амэ ласа тэ служысарас вся и вечность, ай амари назначения, када временно. Андо раё пэ ԥув амэндэ всаворэндэ авэна нэвэ назначении. О Алексеё, пала саво ԥэнэнаспэ май англал андэ статья патял, кай кода, со паруделя андэ лэсти жызня, ӷотовит лэс каринг кода, со авэла англэ. Во ԥэнэн: «Мэ вся и время ӷанавас, кай о Иегова и о раё, када чачимос, но здэласпэ, кай када дур. И кати акана мэ лэ одеса полав, кай о Иегова паша мандэ и патяв, кай о раё пэ ԥув авэла йто» (Деяния 2:25). Сави бы тэ на авэл амари назначения, давайте и май дур тэ дружысарас лэ Иеговаса. Во вся и время авэла паша амэндэ и поможыя тэ авас лошалэ, и всаек кай амэ служысарас и скати амэндэ зор (Исаия 41:13).