СТАТЬЯ, КАЙ ТЭ СЫТЮВАС 21
Цэнис ту кода, со дя о Иегова?
«Иегова, мэрно Дэл, ту бут со стердян, бут удивительни дилы, и ту бут гиндосарэс пала амэндэ» (ПСАЛОМ 40:5).
ДИЛИ 5 Кода, со терэл о Дэл, удивительно
ПАЛА СО УӶАНАСА АНДА СТАТЬЯ?a
1, 2. а) Савэ подаркоря амэнди дя о Иегова, пала савэ пистромэ андэ Псалом 40:5? б) Васо амэ пала када трэбуй тэ погиндосарас?
О ИЕГОВА кодэва, ко дэл анда вся оди. Погиндон пала кода вся, со во амэнди дя. Пала амаро шукарно цэр, када амари Ԥув, пэ сави жувас, пала амари годи, сави о Иегова мудро стердя и пала лэ Дэвлэско Алав и Библия, сави куч важ амэндэ. О Иегова подарисардя амэнди кацави ԥув, сави будэр никай нинай, инке подарисардя кода, кай амэ можэм тэ гиндосарас и тэ дас дума, ай кадяжэ дя атветоря пэ сами важни вопросоря. (Адиносар Псалом 40:5b.)
2 Андэ кадэя статья амэ уӷанаса пала трин подаркоря, пала савэ ужэ ԥэндям. Со май бут ласа тэ гиндосарас пала лэндэ, со май фартэ ласа лэн тэ цэнисарас и со май фартэ закамаса тэ радуисарас амарэ любящёнэ Дадэс (Откровение 4:11). Амэ кадяжэ ласа май годявэрнэс тэ дас дума лэ манушэнца, савэ патян андо хохаимос, кай и жызня ляпэ корко пэстар.
АМАРИ ԤУВ, САВИ ЕК КАЦАВИ
3. Соса амари ԥув на шолпэ пэ авэр?
3 Лэ Дэвлэсти мудрость драго дицол андэ кода, сар во стердя амари Ԥув. Вой о цэр важ всаворэ (Римлянам 1:20; Евреям 3:4). Амари ԥув, най ек, сави болдэлпэ круӷом о Қам, но кати пэр латэ исин вся важ лэ манушэстири жызня.
4. Сар дицол лэ Иеговастири мудрость андэ кода, сар стерди амари Ԥув? Росԥэнэн пала када.
4 Амари ԥув набут шолпэ по космическо кораблё, саво стердэ и мануша. Но исин кода, соса вонэ на шонпэ. Погиндон, скати прожудоп и мануша, савэ андо космосо, если бы лэнди тэ на анэн нисо и лэнди нащи авелоп тэ вишон о мусоро анда космическо кораблё? Прожала дэсави время, и лэндэ кончисайлоп о кислородо, о паи и о хамос. Ай о мусоро, саво лэндэ стидэласпэ, авелоп инке май бут. Йто и мануша котэ мулиноп. Ай пэ ԥув исин вся, кай пэр латэ тэ жувэн милиардоря мануша и и жывотни. Пэ амари ԥув никала на кончийпэ о кислородо, о хамос и о паи. Вся и мэл, сави исин лэ манушэндар пэ ԥув, на вишон андо космосо. Но всаек и ԥув ашэлпэ шукарни и вужи, и пэр латэ можно тэ жувэс. Сар кадя вижал? О Иегова стердя и ԥув кадя, кай вся о мэлалимос лэ манушэндар, упалэ тэ вижал андо лашимос, савэстар польза всаворэнди. Уӷанам, сар дицол лэ Иеговастири мудрость андэ кода, кай пэ ԥув никала на кончийпэ о кислородо и о паи.
5. Васо амэндэ никала на кончийпэ о кислородо и со када доԥэнэн?
5 О кислородо, када о ӷазо би савэско на вижувэна ни и мануша ни и жывотни. Кай вонэ тэ жувэн пэ ԥув, трэбуй фартэ бут кислородо кажно бэрш. Ԥурдэн вонэ воздухоса, пэ саво ԥэнэн кислородо, ай виԥурдэн о уӷлекисло ӷазо. И всаек о кислородо никала на кончийпэ, ай андо воздухо на стидэлпэ фартэ бут уӷлекисло ӷазо. Васо? Важ кода кай о Иегова стердя фартэ бут и растении. Када фартэ цынёне водоросли, савэ дажэ на дицон и розбарэ витки. Вонэ залэн андэр пэстэ уӷлекисло ӷазо, ай отдэн о кислородо. Кода, кай о кислородо на кончийпэ, сыкавэл, кай о Иегова дэл всаворэнди тэ жувэн и тэ ԥурдэн (Деяния 17:24, 25).
6. Васо амэндэ никала пэ ԥув на кончийпэ о паи и со када доԥэнэн? (Диқэн кадяжэ и рамка «Кай о паи рийпэ андэ пэско ҭан, када даро лэ Иеговастар».)
6 О паи пэр латэ тэ на запаӷой и тэ на испарийпэ, важ кода кай амари Ԥув находийпэ лэ Қамэстар по лашо ҭан. Тэ авэл вой хоть набут май пашэ каринг о Қам, вся о паи испарисайлоп и и ԥув авелоп, сар и пустыня, пэ сави нинай жызня. Ай тэ авелоп вой чуть май дур лэ Қамэстар, вся о паи пэр латэ запаӷосайлоп и амари ԥув авелоп вся андо лёдо. Через кода, кай о Иегова стодя амари ԥув пэ само лашо ҭан лэ Қамэстар, пэр латэ вся и время исин о паи. О Қам терэл кадя, кай о паи тэ испарийпэ па ԥув и анда океаноря и тэ стидэлпэ андэ тучи. Кадэва паи ашэлпэ упрэ варикай дэш дес, ай потом пэрэл сар брышын чи йв. Кадя о паи рийпэ упалэ андэ океаноря и андэ всаворэ пая, и кадя терэлпэ вся и время. И кода, кай о паи на кончийпэ, доԥэнэн, кай о Иегова фартэ зорало и мудро (Иов 36:27, 28; Экклезиаст 1:7).
7. Сар тэ сыкавас, кай амэ блаӷодарни лэ Иеговасти важ лэско подарко, пала саво пистромэ андэ Псалом 115:16?
7 Со поможыя амэнди тэ авас инке май блаӷодарни лэ Иеговасти пала амари шукарни ԥув и пала вся, со пэр латэ? (Адиносар Псалом 115:16c.) Например, тэ гиндон пала вся кода, со создал о Иегова. Если ласа пала када тэ гиндосарас, тоди амэ закамаса кажно дес тэ ԥэнас лэ Иеговасти наис важ лэстирэ подаркоря. Амари блаӷодарность лэ Иеговасти важ амари ԥув амэ сыкавас, кала подритярас о вужимос котэ, кай жувас.
АМАРИ ГОДИ
8. Васо можно тэ ԥэнас, кай о Иегова мудро стердя амари годи?
8 О Иегова мудро стердя лэ манушэсти годи. Сар о бэято инке на арақаделяпэ, кажно минута андэ лэсти годи появинпэ фартэ бут нэвэ клетки. Сар ԥэнэн и учони мануша, андэ годи кай о взросло мануш исин варикай 100 милиардоря особи клетки, пэр лэндэ ԥэнэн нейроноря. Всаворэ вонэ стидэ андэ годи, савятэ весо май бут чем ек килаӷрамо. Подам дума пала кода, сар о Иегова мудро стердя амари годи.
9. Васо тумэ патян, кай кода, кай амэ дас дума, када подарко лэ Дэвлэстар?
9 Кода, кай амэ можэм тэ дас дума, па чачимастэ чуда. Погиндон, кай тэ ԥэнэн хоть ек алав, тумари годи трэбуй тэ стерэл кадя, кай варикай 100 мышц, савэ исин андо колин, андо кырло, андэ шыб и андэ вуш тэ терэн вмести, сар трэбуй. Кай о мануш тэ дэл дума понятно, всаворэ кадэла мышцы трэбуй тэ терэн по порядку. Андо 2019 бэрш сас пистромэ, кай и бэяцэ, савэ арақаделэпэ, моӷут тэ полэн отдельни алава. Када доԥэнэн кода, со гиндонас бут учони, кай кала о мануш арақадёлпэ, во можэт тэ полэл и дума и тэ сытёл и шыб. Амэ патяс, кай кода, кай амэ ӷанас тэ дас дума, када подарко лэ Дэвлэстар (Исход 4:11).
10. Сар амэ сыкавас амари блаӷодарность лэ Иеговасти пала кода, кай амэ дас дума?
10 Амэ можэм тэ сыкавас амари блаӷодарность лэ Иеговасти пала кода, кай амэ дас дума. Сар? Амэ можэм тэ росԥэнас кодэлэнди, ко патял, кай вся ляпэ корко пэстар, васо амэ патяс андо Дэл (Псалом 9:1; 1 Петра 3:15). Файма, вонэ лэна тэ ԥэнэн, кай и амари Ԥув и вся, со жундо, ляпэ корко пэстар. Если вонэ закамэна амэн тэ виашунэн, амэ росԥэнаса лэнди, васо амэ патяс, кай вся создал о Иегова. Андэ када амэнди поможыя и Библия и дэсавэ гиндоря анда кадэя статья. Кадя амэ сыкаваса, кай амэ пэ Иеговастири риг (Псалом 102:25; Исаия 40:25, 26).
11. Со инке доԥэнэн, кай амари годи о Иегова мудро стердя?
11 Инке амэ удивисавас кодэлэсти, кай можэм тэ сэрас кода, со трэбуй. Бут бэрша палпалэ ек учоно подадиносардя, кай лэ манушэстири годи можэт тэ сэрэл вся кода, со запистромэ андэ 20 милионоря барэ книжки. Ай акана гиндон, кай амэ можэм тэ сэрас инке май бут. Кода, кай амэ можэм тэ сэрас, амэ можэм тэ терас варисо удивительно. Со?
12. Соса амэ на шаспэ пэ жывотни андэ кода, сар трэбуй тэ жувас?
12 Анда вся жундо, со исин пэ ԥув, кати и мануша могут тэ сытён и тэ полэн, со лашо, ай со вэрыто. Вонэ сытён, важ кода кай моӷут тэ сэрэн и тэ гиндон, со лэнца сас. Када поможыя амэнди тэ парувас амарэ гиндоря и жызня и тэ ашас май лашэ (1 Коринфянам 6:9—11; Колоссянам 3:9, 10). Амэ можэм тэ сытярас амари совесть, кай вой тэ подԥэнэн амэнди, со лашо, ай со вэрыто (Евреям 5:14). Амэ сытювас тэ любисарас, тэ полас, со по ди аврэндэ и тэ жалуисарас анда вся оди. Инке, амэ можэм тэ сытювас лэ Иеговастар тэ авас справедливи.
13. Со амэ трэбуй тэ сэрас, сар пала када запистромэ андэ Псалом 77:11, 12?
13 Сар амэ можэм тэ сыкавас амари блаӷодарность лэ Иеговасти, кай амэ сэрас кода, со трэбуй? Амэ сыкавас када, кала сэрас, кай о Иегова поможыяс амэнди и подритярэлас амэн. Када поможыя амэнди тэ патяс, кай о Иегова на ашавэла амэн и май англэ. (Адиносар Псалом 77:11, 12d; 78:4, 7.) Инке амэ можэм тэ сэрас вся лашо, со терэн важ амэндэ авэр мануша, и тэ на бистрас тэ блаӷодарисарас лэн. И учони доԥэндэ, кай о блаӷодарно мануш май бахтало. Но исин и кода, со амэнди фэдэр тэ забистрас. Кадэлэсти амэ можэм тэ сытювас кай о Иегова. Хоть во можэт вся тэ сэрэл, но если во диқэл, кай амэ каисавас, тоди во простисарэл амэн и бистрэл амарэ ошыбки (Псалом 25:7; 130:3, 4). Во камэл, кай и амэ тэ простисарас кодэлэн, ко амэн холярэл, и тэ на сэрас кода, со вонэ най кадя стердэ (Матфея 6:14; Луки 17:3, 4).
Кай тэ сыкавас лэ Иеговасти амари блаӷодарность пала амари годи, амэ трэбуй тэ пользуисавас ласа кадя, кай тэ прославляем лэ Дэвлэс (Диқэн о абзацо 14.)f
14. Сар тэ сыкавас, кай амэ блаӷодарни лэ Иеговасти пала амари годи, сави во амэнди дя?
14 Кай тэ сыкавас, кай амэ блаӷодарни лэ Иеговасти пала амари годи, амэ трэбуй тэ пользуемся ласа кадя, кай тэ слависарас кодэлэс, ко ла амэнди дя. Дэко пользуеца ласа кати важ пэстэ. Вонэ екжэнэ ришают, со драго, ай со най. Но амэн создал о Иегова. Важ када во пэ бутэстэ май драго ӷанэн, со важ амэндэ авэла драго, ай со най (Римлянам 12:1, 2). Кала амэ кандас лэс, амэнди по ди драго (Исаия 48:17, 18). И амэ полас, васо жувас. Амэ жувас, важ кода кай тэ прославляем амарэ небеснонэ Дадэс и Создателёс, и кай тэ терас вся, кай во амэнца тэ абурой (Притчи 27:11).
БИБЛИЯ, КАДА КУЧУТНО ПОДАРКО ЛЭ ДЭВЛЭСТАР
15. Сар кода, кай о Дэл дя и Библия сыкавэл, кай о Иегова любий лэ манушэн?
15 И Библия, када кучутно подарко амарэ небеснонэ Дадэстар. Во дя кадэя книӷа амэнди, важ кода кай фартэ амэн любий. Котэ во дэл атветоря пэ сами важни вопросоря андэ амари жызня. Катар ляпэ и жызня? Васо амэ жувас? Со аштярэл амэн англэ? О Иегова камэл, кай всаворэ лэстирэ бэяцэ тэ уӷанэн и атветоря пэ кадэла вопросоря. Важ када во терэлас кадя, кай и мануша, савэ жувэнас дэлмут, тэ камэн тэ пэрэандярэн и Библия пэ бут шыба. Адес вся и Библия чи дэсо андар латэ можно тэ адинос май бут чем пэ 3 000 шыба! Пала вся и время, скати жувэн и мануша, кати и Библия пэрэандярдэ пэ фартэ бут шыба и кати вой исин почти кажнонэстэ. Почти всаворэ мануша, кай бы вонэ тэ на жудоп, моӷут тэ адинон и Библия пэ пэсти шыб. (Диқэн и рамка «Пэрэандярэн и Библия пэ африкански шыба».)
16. Сар дицол анда Матфея 28:19, 20 и анда авэр стихоря, савэ катэ пистромэ, амэ тэ сыкавас, кай блаӷодарни лэ Иеговасти пала Библия?
16 Амэ можэм тэ сыкавас, кай амэ блаӷодарни лэ Иеговасти пала Библия, если кажно дес адиносарас ла, гиндосарас пала кода, сости амэ сытювас андар латэ, и если ласа тэ старысавас тэ терас кадя, сар уӷанас. Инке амэ сыкавас, кай блаӷодарни лэ Дэвлэсти, кала на умэкас тэ росԥэнас и весть анда Библия аврэ манушэнди (Псалом 1:1—3; Матфея 24:14; адиносар Матфея 28:19, 20e).
17. а) Пала савэ дароря амэ подям дума андэ кадэя статья? б) Пала савэ подаркоря амэ подаса дума андэ авэр статья?
17 Андэ кадэя статья амэ подям дума пала амари шукарни Ԥув, сар мудро о Иегова стердя амари годи и пала лэ Дэвлэско Алав и Библия. Но о Иегова дя амэнди инке авэр подаркоря, со амэ на диқас амарэ яқэнца. Пала када амэ подаса дума андэ авэр статья.
ДИЛИ 12 Иегова Велико Царё
a Кадэя статья поможыя амэнди инке май фартэ тэ цэнисарас лэ Иеговас и лэстирэ дароря. Кадяжэ вой поможыя тэ росԥэнас кодэлэнди, ко на патял андо Дэл, васо амэ патяс андэр лэстэ.
b Псалом 40:5: «Иегова, мэрно Дэл, ту бут со стердян, бут удивительни дилы, и ту бут гиндосарэс пала амэндэ. Нико на сыстояпэ туса. Лава тэ ԥэнав и тэ росԥэнав пала лэндэ, нащи пэрэадиносарав кода, сар дэ бут лэн».
c Псалом 115:16: «О нэбо, о нэбо лэ Иеговаско. Ай и ԥув, во дя лэ манушэндирэ шавэнди».
d Псалом 77:11, 12: «Лава тэ сэрав пала тири дила, Иегова. Лава тэ сэрав пала чудеса, савэ ту стердян андэ дэлмутни время. Лава тэ гиндосарав пала вся тири дила и лава тэ гиндосарав пала кода, со ту терэс».
e Матфея 28:19, 20: Жан кай всаворэ народоря, сытярэн лэ манушэн, кай вонэ тэ авэн ученикоря. Болэн лэн через о алав лэ Дадэско, лэ Шавэско и лэ свынтонэ духоско. И сытярэн лэн тэ терэн вся, со мэ тумэнди приԥэндэм. И мэ авава тумэнца андэ всаворэ деса, пока кадэлэсти, со андэ люма, на авэла конец.
f ПЭ КАРТИНКА. И ԥэй сытёл авэр шыб, кай тэ росԥэнэн о чачимос анда Библия кодэлэнди, ко пэрэлагля андэ авэр страна.