Терэн вся точно кадя, сар о Иисусо

1, 2. Саво примеро поможый тэ полас и алава анда 1 Петра 2:21?

ПРЕДСТАВЬ, кай ту жас лэ друӷонэнца андо походо через о вэш, саво ԥарэс тэ прожас и саво зашуто ӥвэса. Ту никала на санас андэ кодэла ҭана, но тумэн андярэл о мануш, саво лэн драго ӷанэн. Во жал май англэ и ашавэл посли пэстэ слидоря. Андэ ек маменто тумэ шон сама, кай лэс на дицол. Но тумэ нэ пэрэжываете, важ кода кай по ӥв тумэ диқэн лэстирэ слидоря и жан пар лэндэ.

² Кадэя люма, сар опасно вэш. И амэнди кабута прижалпэ тэ прожас через кадэва вэш. Но блаӷодаря лэ Иеговасти амэндэ исин кодэва, ко можэт амэн тэ проандярэл через када вся. И када о Иисус Христос. Андэ 1 Петра 2:21 ԥэнэнпэ, кай амэ трэбуй тэ жас точно па лэ Иисусостирэ слидоря. И учони ԥэнэн, кай о Пётро сыстой лэ Иисусос лэ манушэса, саво можэт тэ проандярэл амэн через кацавэ ԥарэ ҭана. И сар кодэва мануш, о Иисусо ашавэл посли пэстэ кабута слидоря, па савэ амэ трэбуй тэ жас. Андэ кадэя статья амэ розласа трин вопросоря. Со сыкавэн и алава «тэ жас точно па лэ Иисусостирэ слидоря»? Состэ амэнди када трэбуй тэ терас? И сар када тэ терас?

СО СЫКАВЭН И АЛАВА «ТЭ ЖАС ТОЧНО ПА ЛЭ ИИСУСОСТИРЭ СЛИДОРЯ»?

3. Со сыкавэн и алава «тэ жас па варикастирэ слидоря»?

³ Сар тэ полас кадэла алава «тэ жас точно па лэ Иисусостирэ слидоря»? Андэ Библия и алава «тэ ԥирэс» и «тэ жас» моӷут тэ сыкавэн, сар о мануш прожувэл пэстири жызня (Быт. 6:9; Пс. 119:59). Кода, сар андярэл пэс о мануш, можно тэ сыстос кодэлэса, кай во ашавэл посли пэстэ слидоря. Вижал, и алава «тэ жас па варикастирэ слидоря» моӷут тэ сыкавэн, кай амэ сытювас кодэлэ манушэстар и андярас пэс сар во.

4. Со сыкавэн и алава тэ жас точно па лэ Иисусостирэ слидоря?

⁴ Ай со жэ тоди сыкавэн и алава, кай амэ трэбуй тэ жас точно па лэ Иисусостирэ слидоря? Если ворта тэ ԥэнас, када тэ терас вся точно кадя, сар во терэлас. Лэ Петростирэ алава, савэ пистромэ андэ ӷлавно стихо каринг кадэя статья, сыкавэн, кай амэ можэм тэ сытювас лэ Иисусостар, сар тэ пэрэандярас любо ԥаримос андэ жызня. Но амэ можэм лэстар тэ сытювас най кати андэ када (1 Пет. 2:18—25). Во важ амэндэ лашо примеро андэ вся.

5. Вижала кай и найсовершэни мануша тэ терэн точно кадя, сар терэлас о Иисусо? Росԥэнэн.

⁵ Хоть амэ найсовершэни мануша, амэндэ всаек можэт тэ вижал тэ терас кадяжэ сар о Иисусо. Да, када можэт амэндэ вижала най андэ вся. Но если амэ, ласа тэ жас точно па лэ Иисусостирэ слидоря, тоди амэндэ вижала тэ терас кадя сар во (1 Иоан. 2:6).

СОСТИ АМЭ ТРЭБУЙ ТЭ ЖАС ТОЧНО ПА ЛЭ ИИСУСОСТИРЭ СЛИДОРЯ?

6, 7. Васо можно тэ ԥэнас, кай если амэ терас точно кадя, сар о Иисусо, тоди амари дружба лэ Иеговаса авэла май лащи?

⁶ Если амэ терас точно кадя, сар о Иисусо, тоди амари дружба лэ Иеговаса авэла май лащи. Но васо амэ када ӷанас? Важ кода кай о Иисусо вся и время и андэ вся старыияспэ, кай лэ Иеговаско ди тэ лошавэл (Иоан. 8:29). Если амэ терас точно кадя, сар о Иисусо, амэ можэм тожэ тэ радуисарас лэ Иеговаско ди. Амэ ӷанас, кай если анда вся оди старысавас тэ авас лэ Иеговасти лашэ друӷоря, тоди во ашэла май пашэ каринг амэндэ (Иак. 4:8).

⁷ Инке о Иисусо терэлас вся точно кадя, сар лэско Дад. Важ кода во ԥэндя: «Ко диқля ман, диқля и мэрнэ Дадэс» (Иоан. 14:9). Амэ тожэ можэм тэ сытювас лэстар, сар пэс тэ андярас аврэнца. Лэ Иисусости ашэля фартэ жалко лэ манушэс, савэстэ тернёлас и тила и савэс во виличисардя. Авэр разо во поля, со сас по ди кай и манушни, савятэ сас ԥаро насвалимос бут бэрша. Инке во полэлас и жалуияс кодэлэн, ко хасардя пэстирэ чачен. Если амэ сытюваса лэ Иисусостар, тоди амэ ласа тэ терас кадяжэ, сар тердоп о Иегова (Мар. 1:40, 41; 5:25—34; Иоан. 11:33—35). Тоди амари дружба лэ Иеговаса авэла инке май лащи.

8. Сар амэнди поможый лэ Иисусоско примеро, кай и амэ тэ победисарас кадэя люма?

⁸ Если амэ терас, сар о Иисусо, тоди на домэкаса, кай через кода, со исин андэ кадэя люма, амэ тэ стас и служэния лэ Иеговасти по дуйто ҭан. Андэ послиднё вэчэро англа пэстири смэрть о Иисусо ԥэндя: «Мэ победисардэм кадэя люма» (Иоан. 16:33). Со во кадэлэса камля тэ ԥэнэн? Камля тэ ԥэнэн, кай во авеля тэ злэл о хохаимос, саво ԥэнэн по Иегова. И важ када во никала на бистрэлас, васо авеля пэ ԥув. Важ о Иисусо о Иегова сас вся и время по пэрво ҭан. Лэс на змарэлас кода, сар андярэн пэс авэр мануша, сар вонэ гиндон, и со камэн тэ домардён андэ жызня. Ай со можно тэ ԥэнас пала амэндэ? Амэн бут со можэт тэ змарэл андэ кадэя люма, кай и служэния лэ Иеговасти тэ на авэл по пэрво ҭан. Но если важ амэндэ, сар важ о Иисусо, ӷлавно тэ терас кода, со камэл о Дэл, тоди и амэ сможэм тэ победисарас кадэя люма (1 Иоан. 5:5).

9. Со амэнди трэбуй тэ терас, кай тэ жас па дром, саво андярэл каринг и вечно жызня?

⁹ Если амэ терас сар о Иисусо, тоди амэндэ авэла вечно жызня. Кала ек тэрно барвало мануш пушля кай о Иисусо, со лэсти тэ терэл, кай лэстэ тэ авэл вечно жызня, о Иисусо лэсти ԥэндя: «Ав и жа пала мандэ» (Матф. 19:16—21). Дэсавэ иудеёнэнди, савэ на патянас андо Иисусо, во ԥэндя, кай пэстирэ учениконэнди, во дэла вечно жызня (Иоан. 10:24—29). И лэ Никодимости, саво сас сындомари андо Синедрионо, во тожэ ԥэндя, кай кодэла, ко патян андэ лэ Дэвлэско Шаво, лэна тэ жувэн вечно (Иоан. 3:16). Амэ сыкавас, кай патяс андо Иисусо, если жувас кадя, сар во сытярэлас. Тоди амэ на парашаса тэ жас па дром, саво андярэл каринг и вечно жызня (Матф. 7:14).

САР АМЭ МОЖЭМ ТЭ ЖАС ТОЧНО ПА ЛЭ ИИСУСОСТИРЭ СЛИДОРЯ?

10. Со трэбуй тэ терас, кай май драго тэ уӷанас пала Иисусо, сар пистромэ андэ Иоанна 17:3?

¹⁰ Кай тэ терас кадя, сар терэлас о Иисусо, амэнди трэбуй вся и время тэ уӷанас май бут пала лэстэ. (Адиносар Иоанна 17:3.) Тэ уӷанас, сар андярэлас пэс о Иисусо, саво во сас, сар во гиндояс и со важ лэстэ сас лашимос, ай со най. Скати бэрша амэ тэ на служысардоп лэ Иеговасти, амэнди трэбуй тэ на парашас тэ уӷанас пала лэстэ и пала Иисусо.

11. Пала со росԥэнэнпэ андэ штар Евангелия?

¹¹ Андэ Библия исин штар книӷи, пэ савэ ԥэнэн Евангелия. О Иегова камэл, кай через лэндэ амэ май драго тэ уӷанас лэ Иисусос. Андэ кадэла штар книӷи пистромэ пала лэ Иисусостири жызня и пала лэстири служэния (Евр. 12:3). Кадяжэ котар можэм тэ уӷанас, пала со сытярэлас о Иисусо, сави дила во терэлас и со лэстэ сас по ди. Кала амэ адиносарас и Евангелия, амэ кабута диқас лэ Иисусостирэ слидоря, савэ во ашадя. Тоди амэ ласа тэ терас кадя, сар во.

12. Со трэбуй тэ терас, кай кода, со пистромэ андэ Евангелия, тэ поможый амэнди?

¹² Но кай амэнди тэ поможый кода, со амэ адиносарас анда кадэла штар книӷи, лэн трэбуй най просто тэ проадиносарас. Важно тэ виарақас время, кай драго тэ полас лэн и тэ гиндосарас пала кода, со адиносардям. (Диқэн Иисус Навин 1:8.) Исин дуй советоря, савэ поможына амэнди тэ гиндосарас пала кода, со проадиносардям анда Евангелия и тэ прилас када андэ пэстири жызня.

13. Со поможыя тэ представим, пала со адиносарас андэ Евангелия?

¹³ Пэрво совето, када тэ представляем, пала со адиносарас. Амэнди трэбуй, кала адиносарас и Евангелия, вся тэ представляем кадя, кабута диқас кино. Трэбуй тэ додиқас вся, со котэ терэласпэ, тэ полас о запахо, тэ полас со сас по ди кодэлэ манушэндэ, пала савэ адиносарас. Андэ када амэнди поможый и литература, сави дэл амари арӷанизацыя. Кадяжэ авэла интересно, если амэ проадиносараса, со сас пистромэ май англэ и со пистромэ посли. Тоди амэ май драго додиқаса вся и картина. Инке авэла драго тэ уӷанас май бут пала мануша, пала савэ котэ пистромэ и тэ уӷанас пала кода, кай вся када сас. Кадяжэ тэ шас сама, со авэр евангелисторя пистрон пала када. Дэкала ек можэт тэ пистрой пала варисо, ай авэр тэ умэкэл кадэва маменто.

14, 15. Со поможыя амэнди тэ прилас андэ пэстири жызня кода, со уӷанас анда Евангелия?

¹⁴ Дуйто совето, када тэ уӷанас пала Иисусо (Иоан. 13:17). Посли кода, сар пэ лично изучения, амэ уӷанглям варисо анда Евангелия, амэ можэм тэ пушас пэстар: «Сости мэ сытював анда кода, со проадиносардэм и сар тэ прилав када андэ пэстири жызня? Ай сар кадэва гиндо поможыя аврэнди?» Можэт амэ ӷанас лэ ԥралэс или ла ԥья, савэнди трэбуй помощь. Тоди амэ можэм тэ росԥэнас лэнди кодэва гиндо, саво амэнди поможысардя. Но трэбуй тэ стерас када ковлэс и анда вся оди.

¹⁵ Акана уӷанаса пала чороры ԥивли, савя додиқля о Иисусо андо храмо и уӷанаса, сар тэ прилас каринг пэстэ кадэла дуй советоря.

ЧОРОРЫ ԤИВЛИ АНДО ХРАМО

16. Со ту можэш пэсти представить, кала адинос Марка 12:41?

¹⁶ Представь пэсти кода, со адинос анда Евангелия. (Адиносар Марка 12:41.) Представь, кай ту андо храмо. Жал 11 нисана 33 бэрш лэ Иисусостар. Ашэляпэ май набут, чем курко, сар лэ Иисусос умарэна. Андэ кадэва дес о Иисусо почти вся и время сытярэл андо храмо. Када на чалёл лэ рашанди. И вонэ холяса пушэн, ко дя лэсти право, кай во тэ сытярэл лэ манушэн пала Дэл? Ай авэр камэн тэ астарэн лэс по алав (Мар. 11:27—33; 12:13—34). Потом о Иисусо пэрэжал пэ авэр риг андо храмо. Во бэшэл кадя, кай лэсти тэ дицон и кувшыноря, андэ савэ и мануша шон и ловэ важ и пожэртвования. Во шол сама, сар вонэ пэс андярэн. Во диқэл, сар поджан и барвалэ и шон бут ловэ. Во дажэ можэт ашунэн, сар ӷромко пэрэн и монеты андо кувшыно.

17. Со терэл и чороры ԥивли, сар ԥэнэнпэ андэ Марка 12:42?

¹⁷ Адиносар Марка 12:42. Акэ андо храмо во додиқэл еқа чорора ԥивля. Вой фартэ чорорэс жувэл, но вой всаек авеля андо храмо, кай тэ шол дуй найбарэ монетки. Вонэ сас фартэ цынёне, кай дажэ нико на ашунэн, сар вонэ пэрэн андо кувшыно. Пэ кодэя время када сас копийки, пэ савэ на тинэса дажэ цынёня чириклёра. Но о Иисусо ӷанэн, кай вой шутя послидни дуй монетки, савэ латэ сас.

18. Со ԥэндя о Иисусо пала пожэртвования, сави шутя и чороры ԥивли, сар ԥэнэнпэ андэ Марка 12:43, 44?

¹⁸ Адиносар Марка 12:43, 44. Лэ Иисусос, када фартэ лэл лэ одестар. Тоди во подақарэл каринг пэстэ лэ учениконэн и ԥэнэн лэнди: «Кадэя чороры ԥивли шутя андо кувшыно важ и пожэртвования май бут, чем всаворэ». И ԥэнэн лэнди васо: «Всаворэ, [ай особенно и барвалэ], шонас важ кода, кай лэндэ сас бут ловэ. Ай вой, хоть сас и чороры, отдя вся, со латэ сас». Кала кодэя манушни отдя послидни ловэ, вой сыкадя, кай патял лэ Иеговасти, кай во ла на ашавэла (Пс. 26:3).

19. Саво важно гиндо можэм тэ полас анда лэ Иисусостирэ алава пала ԥивли?

¹⁹ Тер кадя, сар уӷанглян. Пуш пэстар: «Сости мэ моӷу тэ сытював анда лэ Иисусостирэ алава пала ԥивли?». Погиндосар пала кадэя манушни. Вой камлоп тэ дэл май бут, но вой отдя вся, со латэ сас. О Иисусо ӷанэнас, кай кода со стердя кадэя ԥивли, фартэ куч важ о Иегова. Када сыкавэл ек лашо гиндо, кай о Иегова лошавэл, кала амэ отдас важ лэстэ вся со май лашо, со амэндэ исин (Матф. 22:37; Кол. 3:23). Када кала служысарас лэсти анда вся оди, отдас вся пэстири время и зор пэ служэния и на промэкас и собрании.

20. Касти амэ можэм тэ росԥэнас пала ԥивли, кай тэ поможысарас?

²⁰ Сар амэнди можэт тэ поможый кода, со амэ уӷанглям пала ԥивли? Погиндосарам пала ԥрал или ԥэй, савэнди трэбуй помощь. Можэт андэ собрания исин ԥэй андэ бэршэндэ, сави ужэ нэ можэт май бут тэ служый лэ Дэвлэсти и кадэлэстар лати ԥарэс по ди. Вой можэт тэ гиндой, кай на трэбуй андэ собрания. Ай можэт амэ ӷанас ԥралэс, саво най ек бэрш нащи виличий о насвалимос. И лэсти можэт тэ авэл ԥарэс, кай во нэ можэт тэ ԥирэл пэ всаворэ собрании. Тоди амэ можэм лэн тэ подритярас лашэ алавэнца и тэ ԥэнас, кай вонэ куч лэ Иеговасти (Эф. 4:29). Кадяжэ амэ можэм лэнди тэ росԥэнас, со проадиносардям пала ԥивли. И тэ ԥэнас, кай о Иегова цэний вся, со вонэ моӷут тэ терэн (Прит. 15:23; 1 Фес. 5:11). Если тумэ хвалин лэ ԥралэн и лэ ԥэян пала кода, со вонэ терэн важ о Иегова, тоди тумэ терэн кадяжэ, сар о Иисусо.

21. Со амэ камас тэ терас, сар проадиносардям кадэя статья?

²¹ Амэ фартэ блаӷодарни, кай анда Евангелия можэм май бут тэ уӷанас пала Иисусо. Када поможый амэнди тэ сытювас лэстар. Пэ лично или пэ семейно изучения можно май бут пала лэстэ тэ уӷанас. Но трэбуй тэ сэрас, кай када тэ анэн май бут лашимос, амэ трэбуй тэ представляем пэсти кода, со адиносарас пала Иисусо и тэ терас кадя, сар уӷанас. Ай инке важно най кати тэ терас кадя, сар о Иисусо, но и тэ шас сама, со во ԥэнэнас. Андэ авэр статья амэ подаса дума, со во ԥэндя англа пэстири смэрть и сости амэ можэм тэ сытювас анда лэстирэ алава.