Ту ӷанэс?

Савэ налоӷоря трэбуй сас тэ потинэн андэ кодэя время, кала о Иисусо сас пэ ԥув?

Андэ дэлмутни время и израильтяноря дэнас ловэ кай, тэ жал лэ Иеговастири дила. Но каринг кодэя время, кала о Иисусо сас пэ ԥув, лэ манушэнди ашэля фартэ ԥарэс тэ потинэн и налоӷоря.

Кажно мурш анда евреёря трэбуй сас кажно бэрш тэ потинэл о налоӷо дуй драхмы, кай тэ жал и служэния лэ Иеговасти. Андо пэрво вико кадэла ловэ жанас, кай андо храмо, саво пэрэстроисардя о Иродо, тэ авэл вся, со трэбуй важ и служэния. Еқвар и иудеёря пушлэ кай о Пётро, со о Иисусо гиндой пала налоӷоря. Важ о Иисусо андэ када нисо вэрыто нинай. И во дажэ ԥэндя, кай тэ лэл о Пётро монета, кай тэ потинэн кадэва налоӷо (Матф. 17:24—27).

Инке лэ Дэвлэско народо трэбуй сас тэ потинэн десято часть или десять процэнтов всаворэстар, со затердэ или со стидэ па пэско уражаё (Лев. 27:30—32; Чис. 18:26—28). Ай и фарисеёря сас кацавэ жадни, кай дажэ мангэнас, кай о мануш тэ потинэн десято часть «ла мятатар, лэ укропостар и лэ тминостар». О Иисусо на ԥэнэнас, кай на трэбуй тэ потинэн кадэя десятина, но во сындояс лэ фарисеёнэн и лэ книжниконэн, кай вонэ на шонас сама пэ кода, «со май важно андо законо» (Матф. 23:23).

Ай инке и евреёря, андэ лэ Иисусостири время, трэбуй сас тэ потинэн и налоӷоря андо Римско ӷосударство. Например, и мануша, савэндэ сас маля па савэ вонэ стидэнас уражаё, трэбуй сас тэ отдэн 20—25 процэнтов кодэлэстар, со стидэ. Или тэ отдэн када ловэнца или тэ отдэн товаро важ када. Кадяжэ кажно евреё трэбуй сас тэ потинэн налоӷо важ кажно мануш андо ери. Кала и фарисеёря пушлэ кай о Иисусо пала када, во ԥэндя лэнди: «Отдэн лэ цезарёско лэ цезарёсти, ай лэ Дэвлэско лэ Дэвлэсти» (Матф. 22:15—22).

Кадяжэ и налоӷоря лэнас па товаро, саво андярэнас анда ек ҭан андэ авэр. Кадэла налоӷоря лэнас андо порторя, пэ мосторя, па дрома, кала тэ зажан андо форо и пэ базароря.

Кала правияс о Римско правительство, лэ манушэнди ашэля фартэ ԥарэс тэ потинэн всаворэ налоӷоря. Ек учоно анда Римо, савэс ақарэнас Тацито ԥэндя пала время, кала о Иисусо сас пэ ԥув: «Кала правияс о императаро Тибериё, тоди и Сирия и Иудея фартэ мангэнас, кай тэ потинэн май набут налоӷоря, важ кода кай лэнди сас ужэ фартэ ԥарэс тэ потинэн всаворэ кадэла налоӷоря».

Инке сас май ԥарэс кодэлэстар, сар вонэ стидэнас кадэла налоӷоря. Право, пэ кода, кай тэ стидэн и налоӷоря пэрэпэрэлас, кодэлэсти, ко май бут потинэнас. Ай ужэ кадэва мануш лэлас пэсти аврэ манушэн, кай вонэ тэ жан и тэ стидэн налоӷоря па авэр. И кодэла и авэр мануша розбарвадёнас пэ кодэла ловэ, савэ злэнас па прости мануша. И можэт дажэ кай о Закхеё сас кацаво право. Лэстэ сас мануша, савэ злэнас и налоӷоря па авэр мануша (Луки 19:1, 2). Акана понятно, васо лэ манушэнди када фартэ на чалёлас и васо вонэ вэрыцынас кодэлэн, ко стидэлас налоӷоря.