Цэнин лэ ԥралэн и лэ ԥэян андэ собрания, савэ андэ бэршэндэ

1, 2. а) Сар амэ трэбуй тэ андярас пэс лэ ԥралэнца и лэ ԥэянца, савэ андэ бэршэндэ, сар ԥэнэнпэ андэ Притчи 16:31? б) Пэ савэ вопросоря амэ уӷанаса атветоря андэ кадэя статья?

АНДО форо Арканзасо андэ Америка исин особенно парко. Кала и мануша ԥирэн котэ, вонэ моӷут тэ виарақэн алмазоря. Дэсавэ анда кадэла кучутнэ бара пашлён ворта пэ ԥув. Но вонэ инке на шонпэ пэ бриллианторя. Важ када бут мануша диқэн ворта пэр лэндэ и на шон сама, прожан мимо и дажэ на ӷанэн, кай англа лэндэ пашлён кучутнэ бара.

² Кадяжэ и ԥрала и ԥэя, савэ андэ бэршэндэ, сар бриллианторя, вонэ па чачимастэ фартэ куч андэ собрания. Андэ Библия ԥэнэнпэ, кай лэнди сиди бал, када, сар шукарно винко лэндэ по шэро. (Адиносар Притчи 16:31; 20:29.) Но всаек дэкала амэ можэм тэ на шас сама пэр лэндэ. Но если амэ сытювас тэ додиқас, савэ вонэ амэндэ па чачимастэ райканэ, тоди амэ поласа, кай вонэ важ амэндэ фартэ куч. И када на сыстоса нисавэ барвалимаса. Подаса дума пала трин вопросоря. Васо важ о Иегова кадэла ԥрала и ԥэя фартэ куч? Со вонэ моӷут тэ терэн андэ лэ Иеговастири арӷанизацыя? И со амэ трэбуй тэ терас амаря ригатар, кай тэ сытювас кай кадэла ԥрала и ԥэя?

ВАСО И ԤРАЛА И ԤЭЯ АНДЭ БЭРШЭНДЭ ФАРТЭ КУЧ ВАЖ О ИЕГОВА?

3. Васо важ о Иегова и ԥрала и ԥэя андэ бэршэндэ, савэ на парашэн тэ кандэн лэс, фартэ куч? (Псалом 92:12—15).

³ Важ о Иегова фартэ куч лэстирэ служытеля, савэ андэ бэршэндэ. Во лэн драго ӷанэн и цэний, савэ вонэ. Лэсти чалёл, кала вонэ подԥэнэн лэ тэрнэ ԥралэнди и ԥэянди андэ собрания (Иов 12:12; Прит. 1:1—4). Кадяжэ лэ Иеговасти фартэ куч, кай вонэ виритярэн о ԥаримос (Мал. 3:16). И хоть лэндири жызня на сас спокойно, вонэ всаек на парашэлэ тэ патян андэр лэстэ. И вонэ на парашэлэ тэ аштярэн о лашимос англэ, ай наоборот, инке май фартэ линэ тэ патян андэ када. Ай инке о Иегова лэн фартэ любий важ кода, кай вонэ андэ ԥурэ бэрша на парашэн тэ росԥэнэн пала лэстэ аврэ мирости. (Адиносар Псалом 92:12—15.)

4. Со можэт тэ подритярэл лэ ԥралэн и лэ ԥэян андэ собрания, савэ андэ бэршэндэ?

⁴ Ԥрала и ԥэя, савэ андэ бэршэндэ и савэ куч амэнди, мангас тумэн, на парашэн тэ патян, кай о Иегова сэрэл вся, со тумэ важ лэстэ стердэ! (Евр. 6:10). Дицол, кай тумэ фартэ любин тэ служын лэ Иеговасти. Важ када о Иегова фартэ лошавэл кадэлэсти. Андэ тумари жызня сас бут ԥаримос, но тумэ лэс виритярдэ. Всаворэ кадэла бэрша тумэ жувэн па лэ Дэвлэско законо, и тумэ терэнас бари дила андэ собрания и сытярэнас аврэн. Тумэ вся и время подритярэнас лэ Иеговастири арӷанизацыя. Кадяжэ подритярэнас кодэлэн, ко служынас полновременно. Амаро Дэл о Иегова любий тумэн пала кода, кай тумэ на парашэн тэ кандэн лэс, и дэл алав, кай «во на ашавэла кодэлэн, ко на парашэн тэ кандэн лэс» (Пс. 37:28). О Иегова ԥэнэн тумэнди кацавэ алава: «Пока тирэ бал на ашэна сиди, мэ на парашава тэ ԥиравав тут пэ вас» (Ис. 46:4). Важ када на трэбуй тэ гиндос, кай кодэлэстар, кай тутэ ашэлэ ԥурэ бэрша, тут ужэ най кадя цэнин андэ лэ Дэвлэстири арӷанизацыя.

И ԤРАЛА И ԤЭЯ, САВЭ АНДЭ БЭРШЭНДЭ, МОӶУТ ТЭ СТЕРЭН БАРИ ДИЛА АНДЭ СОБРАНИЯ

5. Пала со важно тэ сэрэн и ԥрала и ԥэя андэ бэршэндэ?

⁵ Чаче, кадэла ԥрала и ԥэя бут со моӷут тэ стерэн андэ лэ Иеговастири арӷанизацыя. И хоть лэндэ зор най кодэва, но вонэ бут со полэн андэ жызня. И лэ Иеговастэ важ лэндэ идоси исин бут дила. И када доԥэнэн, кай андэ Библия исин запистромэ пала лэстирэ служытеля, савэ андэ бэршэнди и савэнди во дэлас тэ терэн бут дила.

6, 7. Росԥэнэн пала лэ Дэвлэстирэ служытеля анда Библия, савэ сас андэ бэршэндэ и савэн о Иегова блаӷословисардя.

⁶ Андэ Библия запистромэ пала бут лэ Дэвлэстирэ служытеля, савэ на парашэнас лэс тэ кандэн и терэнас лэстири дила, хоть вонэ и сас ужэ андэ бэршэндэ. Например, о Иегова ԥэндя лэ Моисеёсти, кай во авэла барэдэр андо израильско народо и авэла лэско пророко, ай лэсти ужэ сас варикай 80 лет. Ай лэ пророкости лэ Даниилости, о Иегова ԥэндя, кай во тэ пэрэԥэнэн лэстирэ алава хоть лэсти ужэ сас варикай пала 90. И варикай андэ кацавэ жэ бэрша сас и о апостоло Иоанно, кала о Иегова ԥэндя лэсти тэ пистрой и книӷа Откровение.

⁷ Пала бут авэр лэ Иеговастирэ служытеля, савэ на парашэнас лэс тэ кандэн, набут пистромэ андэ Библия. Дэсавэ мануша, савэ адинон и Библия, дажэ моӷут тэ на шон сама пэр лэндэ. Но о Иегова на бистэрдя пала лэндэ и блаӷословисардя лэн, важ кода кай вонэ на ашавэнас лэс. Например, андэ Библия кати еқвар пистромэ пала Симеоно. Во даралас лэ Дэвлэстар и ритярэлас лэско законо. Но о Иегова драго лэс ӷанэнас и лэсти випэля кацави бах лэ Дэвлэстар, кай во тэ додиқэл лэ Иисусос цынёнеса и тэ ԥэнэн и пророчества пала лэстэ и пала лэстири дэй (Луки 2:22, 25—35). Кадяжэ можэм тэ сгиндосарас пала Анна, сави сас пророчица. Вой сас ԥивли и лати сас 84 ӷода. Вой вся и время ԥирэлас андо храмо. Можно тэ ԥэнэс, вой никала на промэкэлас и собрания. И о Иегова ла тожэ блаӷословисардя тэ диқэл лэ цынёне Иисусос. Да, и о Симеоно и и Анна сас фартэ куч важ о Иегова (Луки 2:36—38).

8, 9. Сости моӷут тэ сытён тэрнэ ԥрала и ԥэя лэ ԥивляндар?

⁸ Андэ амарэ деса бут ԥрала и ԥэя сыкавэн лашо примеро лэ тэрнэнди андэ собрания. И ԥэй Лоис Дидур, кала лати сас 21 ӷод, вой ля тэ служый, сар спецыально пианеро андэ Канада. Потом вой пэстирэ хуласа бут бэрша проандярдя андэ разъезно служэния. Посли када, вонэ май бут чем 20 бэрш служынас андо Вефилё андэ Канада. Кала кадэла ԥьяти сас 58 бэрш, латирэ хуласти и лати ԥэндэ, кай вонэ моӷут тэ пэрэладэн андэ Украина. Када найвушэро сас тэ стерэн, важ кода кай вонэ сас ужэ андэ бэршэндэ. Но вонэ всаек пэрэлаглэ и сас кадэлэстар бахталэ. Лако хулай ля тэ служый андо Камитето филиала андэ Украина. Но через 7 бэрш во муля. Но и Лоис на парашэля тэ служый андо украинско филиало. Акана лати 81 бэрш и вой всаек терэл бут со важ о Иегова. И всаворэ ԥрала и ԥэя андо Вефилё ла фартэ любин.

⁹ Канешно, кацавэ ԥэя, сар Лоис, ужэ най кадя дицон, сар тоди, кала лако хулай, сас жундо. Но о Иегова всаек гиндой, кай вонэ, сар бриллианторя. Во лэнди фартэ блаӷодарно, кай вонэ бут бэрша подритярэнас пэстирэ хулан андэ служэния, и акана вонэ на парашэн лэс тэ кандэн (1 Тим. 5:3). Инке кацавэ ԥэя моӷут тэ дэн лашо совето лэ тэрнэнди андэ собрания.

10. Сости амэ можэм тэ сытювас кай о ԥрал Тони?

¹⁰ Важ амэндэ кадяжэ куч и ԥрала и ԥэя, савэ через и ԥурэ бэрша нэ моӷут тэ вижан анда цэр и пала савэ трэбуй вся и время тэ диқэн. Подам дума пала амаро ԥрал анда США, савэс ақарэн Тони. Акана во жувэл котэ, кай диқэн важ и ԥурэ. Во болделя андо 1942 бэрш андо авӷусто, кала лэсти сас 20 лет. Посли кода, сар во болделя, лэс бэшардэ, важ кода кай во на жыля тэ служый андэ халавдэ. Пала када во одбэшля дуй епашэса бэрш. Во и лэстири хулаи вибарярдэ пэстиря щя и шавэс кадя, кай вонэ тэ служын лэ Иеговасти. Пала кадэла бэрша, во служыяс андэ трин собрании, сар щяс ԥэнэн Координаторо андо совето старейшын. Ай кадяжэ во сас надзирателё по канӷрэсо андэ пэско теократическо раёно. Ай инке андэ ек баруно во проандярэлас и собрании, проандярэлас изучении Библии лэ барунаренца. И хоть лэсти акана 98 бэрш, во на парашэл тэ отдэл андэ служэния лэ Иеговасти вся, со па лэско зор. Во служый лэ ԥралэнца и лэ ԥэянца андэ пэстири собрания.

11. Сар амэ можэм тэ поможысарас лэ ԥралэнди и лэ ԥэянди, савэ андэ бэршэндэ, пала савэ трэбуй вся и время тэ диқэн?

¹¹ Амэ трэбуй тэ поможысарас кодэлэ ԥралэнди и ԥэянди, савэ андэ бэршэндэ и пала савэ трэбуй вся и время тэ диқэл варико. Старейшыноря поможын кацавэ ԥралэнди и ԥэянди, кай вонэ тэ служын, ай кадяжэ тэ авэн пэ собрания или тэ проашунэн и проӷрамма. Амэ всаворэ можэм тэ авас каринг лэндэ или тэ диқаспэ па видеосвязь. Но со май фартэ трэбуй тэ шас сама лэ ԥурэн, савэ жувэнас паша собрания, ай потом лэн заля о родо, кай тэ диқэл пала лэндэ, и саво на служый лэ Иеговасти. Ай кадяжэ трэбуй тэ шас сама лэ ԥурэ ԥралэн и ԥэян, савэ жувэн андо цэр, кай диқэн пала ԥурэ мануша. Если амэ на шаса сама лэн, тоди амэ нэ сможэм тэ ӷанас, сар вонэ котэ, и тэ поможысарас лэнди. Можэт, дэко анда кадэла ԥрала и ԥэя лажан тэ росԥэнэн пала пэстэ. Но кала амэ на жалуисарас пэстири время, кай тэ дас дума лэнца, и мангас, кай вонэ тэ росԥэнэн амэнди пала пэстирэ тэрнэ бэрша, савэ вонэ проандярдэ андэ служэния лэ Иеговасти, тоди амэ бут сости лэндар сытюваса.

12. Со интересно тумэ можэте тэ уӷанэн лэ ԥралэндар и лэ ԥэяндар, савэ андэ бэршэндэ?

¹² Кала тумэ май драго уӷанэна андэ пэстири собрания лэ ԥралэн и лэ ԥэян, савэ андэ бэршэндэ, тумэн лэла лэ одестар, сар вонэ вся и жызня на парашэнас тэ патян лэ Иеговасти. Например, и ԥэй Харриетт болделя андэ 1920-ти бэрша и фартэ бут бэрша служыяс андэ пэстири собрания андэ США. Но потом вой пэрэлагля каринг пэстири щей тэ жувэл. И ԥрала андэ нэви собрания витидэ время, кай май драго ла тэ уӷанэн и полинэ, кай када сомнакуни ԥэй. Лэн фартэ ля лэ одестар, со вой росԥэндя пала кода, со сас андэ латири жызня, кала вой кати болделя. Кала вой жалас андэ служэния, вой лэлас пэса вся и время и зубно щётка, если ла бэшарэна андо бар. И чаче, андо 1933 бэрш, ла дувар бэшарэнас пэ куртестэ. Лако хулай на служыяс лэ Иеговасти, но во ла всегда подритярэлас и заботияспэ пала лэндирэ трин бэяцэ, пока вой бэшэлас андо бар. Чаче кацавэ ԥрала и ԥэя андэ бэршэндэ, сар Харриетт, ашэн, кай амэ тэ цэнисарас лэн.

13. Васо и ԥрала и ԥэя, савэ андэ бэршэндэ, фартэ куч?

¹³ Важ о Иегова фартэ куч кадэла ԥрала и ԥэя андэ собрания. Важ кода кай андэ жызня вонэ най еқвар диқэнас, кай о Иегова чаче подритярэл пэстири арӷанизацыя, ай кадяжэ, сар подритярэлас и лэн. Андэ пэстири жызня дэкала вонэ терэнас варисо най кадя, но вонэ сытёнас, кай будэр кадя тэ на терэн. Кадэла ԥрала и ԥэя фартэ мудри и важ када амэ можэм лэндар бут состар тэ сытювас (Прит. 18:4). Если тумэ лэна май драго лэн тэ уӷанэн, тоди тумэ лэна инке май фартэ тэ патян лэ Дэвлэсти и тэ сытён лэндар.

ШОН САМА КАДЭЛЭ СОМНАКУНЭ МАНУШЭН!

14. Сости и тэрнэ андэ собрания моӷут тэ сытён анда кода, со пистромэ андэ Второзаконие 32:7?

¹⁴ Екжэнэ варисо роспушэн кадэлэ ԥралэндар и ԥэяндар. (Адиносар Второзаконие 32:7.) Да, амэ полас, кай, можэт, лэндирэ яқа ужэ най кадя драго диқэн, ԥирэн вонэ ужэ най кадя ӥто, и о ӷолосо ужэ най кацаво ӷромко, но андо ди вонэ всаек кабута тэрнорэ, и лэн о Иегова фартэ любий (Эккл. 7:1). На бистрэн, васо о Иегова лэн цэний, и на парашэн тэ стон патив пэ кадэла ԥрала и ԥэя. Сытён кай о Елисеё. Во на камэлас тэ ашавэл лэ Ильяс андо послиднё дес андэ лэндири служэния. Во тривар ԥэндя: «Мэ на ашавава тут» (2 Цар. 2:2, 4, 6).

15. Пала со можно тэ пушэн кай и ԥрала и ԥэя, савэ андэ бэршэндэ?

¹⁵ Анда вся оди и пативаса уӷанэн кай и ԥрала и ԥэя, савэ андэ бэршэндэ, пала лэндири жызня (Прит. 1:5; 20:5; 1 Тим. 5:1, 2). Тумэ можэте тэ пушэн лэндар, сар вонэ полинэ, кай виарақлэ о чачимос пала Дэл? Со сас лэндэ андэ жызня, через со лэндири дружба лэ Иеговаса ашэля май лащи? Со лэнди поможыяс всаворэ кадэлэ бэрша тэ на парашэн тэ радуинпэ андэ служэния? (1 Тим. 6:6—8). И кала вонэ тумэнди лэна када тэ росԥэнэн, драго ашунэн лэн.

16. Саво лашимос анэн и лэ ԥурэ ԥралэнди и ԥэянди, и лэ тэрнэнди андэ собрания, кала вонэ уӷанэн ек еқэс май драго?

¹⁶ Кала и ԥрала и ԥэя андэ бэршэндэ общяюца лэ тэрнэнца андэ собрания, када анэн лашимос всаворэнди (Рим. 1:12). И тэрнэ ԥрала и ԥэя андэ собрания инке еқвар моӷут тэ додиқэн, сар о Иегова заботийпэ пала служытеля, савэ лэс на парашэн тэ кандэн. Ай и ԥурэ ԥрала и ԥэя моӷут тэ полэн, сар лэн любин и цэнин. Ай инке лэнди фартэ чалёл тэ росԥэнэн аврэнди, сар о Иегова блаӷословияс лэн пала кода, кай вонэ лэс на парашэнас тэ кандэн.

17. Васо амарэ ԥрала и ԥэя андэ собрания, савэ андэ бэршэндэ, бэрш бэршэстар ашэн кати май шукарнэ?

¹⁷ Прожан бэрша и о шукаримос лэ манушэстар ужэ ужал. Но андэ лэ Иеговастирэ яқа кодэла, ко лэс на парашэн тэ кандэн, ашэн кати май шукарнэ (1 Фес. 1:2, 3). Ай вся важ кода, кай вся пэстири жызня кадэлэ христианоря домэкэнас, кай лэ Иеговаско свынто духо тэ парувэл лэн и вонэ тэ авэн лэсти уӷодни. Если амэ май драго уӷанас лэ ԥурэ ԥралэн и ԥэян и сытювас лэндар, тоди амэнди май вушэро авэла тэ полас, пэ скати вонэ дэ куч, и амэ трэбуй пэр лэндэ тэ стас бари патив!

18. Пала со амэ подаса дума андэ авэр статья?

¹⁸ Кай андэ собрания тэ авэл драго и бахталэс, важно, кай и молодёжь тэ цэний лэ ԥралэн и лэ ԥэян, савэ андэ бэршэндэ. Ай и ԥурэ ԥрала и ԥэя трэбуй тэ цэнин лэ тэрнэн. Ай сар вонэ када моӷут тэ терэн, амэ подаса дума андэ авэр статья.