И читателя пушэн
Васо ла Ноеминяко родо, савэско алав нэизвесно, ԥэндя лэ Боазости, кай хасарэла вся пэско мищимос, если жэнияпэ пэ Руфь? (Руфь 4:1, 6).
Андэ библейско время, если кай о жэнато мануш на сас бэяцэ, и лэс на ашэлас, ваздэнаспэ серьёзни вопросоря. Со авэла лэстиря ԥувьяса? Бистрэна пала лэско алав и пала лэско ери? Атветоря можно сас тэ арақэн андэ лэ Моисеёско законо.
Со терэнас лэ манушэстиря ԥувьяса, если лэс на ашэлас, и лэстэ на сас бэяцэ? Вой пэрэжалас андо наслецтво лэстирэ ԥралэсти или аврэ пашутнэ родости. Ай если чороро мануш битинэлас пэстири ԥув, лэско пашутно родо моӷ ла тэ витинэл. Через када о ери на хасарэлас, со лэсти прижалас (Лев. 25:23—28; Чис. 27:8—11).
Сар фэринас о алав лэ израильтяниноско, кала лэс на ашэлас? Терэнас левиратно брако. Если о мурш мэрэлас, лэско ԥрал трэбуй сас тэ жэнийпэ пэ лэстири хулаи. Кала лэндэ арақадёласпэ о бэято, лэсти прижалас о алав и о наслецтво кодэлэ израильтяниноско, савэс на ашэля. Кацаво брако фэрияс и ла ԥивля (Втор. 25:5—7; Матф. 22:23—28).
Акэ ла Ноеминяко примеро. Лако хулай о Элимелехо и латирэ дуй шавэ мулинэ. Лати най ко сас тэ затерэл пэ хамастэ (Руфь 1:1—5). Кала и Ноеминь рисайля андэ Иудея, вой ԥэндя ла боряти ла Руфяти тэ мангэл лэ Боазос тэ витинэл латири ԥув. Во сас пашутно родо лэ Элимелехости (Руфь 2:1, 19, 20; 3:1—4). Но о Боазо ӷанэнас, кай авэр израильтянино, савэско алав андэ Библия на ԥэнэнпэ, прижалас лэ Элимелехости май чачо. Важ када тэ обратинпэ трэбуй сас спэрва лэстэ (Руфь 3:9, 12, 13).
Спэрва кадэва мурш соӷласисайля (Руфь 4:1—4). Хоть када и сыкавэлас, кай дэсавэ ловэ во хасарэла, во полэлас, кай ла Ноеминятэ ужэ на авэла бэято, савэсти пэрэжылоп лэ Элимелехостири ԥув. Тоди и ԥув моӷ тэ залэл кадэва израильтянино. Здэлпэ, кай пэ када можно тэ отдэс и ловэ и нисо на хасарэса.
Но во парудя пэско гиндо, кала уӷангля, кай лэсти трэбуй авэла кадяжэ тэ жэнийпэ пэ Руфь. Во ԥэндя пала лэ Элимелехостири мал: «Мэ нэ моӷу тэ витинав и мал, важ кода кай кадя мэ росшава пэско наследство!» (Руфь 4:5, 6). Васо во пэрэгиндосардя?
Если во или авэр жэнисайлоп пэ Руфь, и латэ арақаделоп шаво, тоди лэ Элимелехостири ԥув пэрэжылоп кадэлэ бэятости. Сар через када о израильтянино, савэско алав нэизвесно, хасардоп вся пэско мищимос? Андэ Библия пала када нисо на ԥэнэнпэ, но исин дэсо, со моӷло тэ авэл.
Пэрво, лэсти моӷло тэ здэлпэ, кай авэла евья тэ тинэл и ԥув, важ кода кай всаек вой лэстири на авелоп, ай пэрэжылоп ла Руфятирэ шавэсти.
Дуйто, во авелоп обязано тэ проправарэл ла Ноеминя и ла Руфя.
Трито, если лэндэ ла Руфяса арақаделоп бэяцэ, вонэ трэбуй авелоп тэ роздилин о наслецтво лэ бэятонэнца, савэ лэстэ ужэ сас.
Штарто, если лэстэ на сас бэяцэ, то ла Руфяко шаво получисардоп о право най кати пэ ԥув лэ Элимелехостири, но и пэ лэстири ԥув. Тоди, сар кадэлэ манушэс на ашэлоп, и ԥув пэрэжылоп лэ бэятости, савэс ӷанглоп сар лэ Элимелехостирэ шавэс. О израильтянино, савэско алав нэизвесно, на камэлас кадя тэ подстол пэско наслецтво и тэ поможый ла Ноеминяти. Во уступисардя лэ Боазости, важ кода кай лэстэ кадяжэ сас кадэва право. Сар андярдя пэс о Боазо? Во соӷласисайля. Во камэлас, кай лэ Элимелехоско алав «тэ ашэлпэ андэ лэско наслецтво» (Руфь 4:10).
Возможно, кодэва израильтянино май бут камэлас тэ фэрий пэско алав и о наслецтво. Во май бут гиндояс пала пэстэ. Но всаек, сар бы во тэ на старысайлоп, лэско алав ашэляпэ нэизвесно. Инке во хасардя и возможность, сави дорэсляпэ лэ Боазости, — тэ авэл ек анда кодэла, кастар жыля о Миси́я, о Иисус Христос. Кадэва примеро сыкавэл: если о мануш гиндой кати пала пэстэ и отԥэндёл тэ поможый, касти када трэбуй, лашымос када на анэна (Матф. 1:5; Луки 3:23, 32).