О Дэл прижанэн найдошалэнца кодэлэн, кастэ исин вера и дила

1. Саво амэндэ можэт тэ авэл вопросо, кала гиндосарас пала лэ Авраамостири вера?

ХОТЬ бут мануша ашундэ пала Авраамо, всаек вонэ пала лэстэ бут со на ӷанэн. Но тумэ пала лэстэ ӷанэн май бут. Например, кай по Авраамо андэ Библия ԥэнэнпэ, кай во дад всаворэнго, кастэ исин вера (Рим. 4:11). Ту можэш тэ пушэс пэстар: «Ай моӷу мэ кадя жэ, сар о Авраамо тэ патяв андо Дэл?» Да, канешно.

2. Васо авелоп драго май бут тэ уӷанас пала Авраамо? (Иаково 2:22, 23).

² Амэндэ можэт тэ авэл кацави жэ вера, сар кай о Авраамо, если роздиқаса лэско примеро. О Дэл приԥэндя лэ Авраамости тэ жал андэ дурутни страна. Бут бэрша во жувэлас андэ катуны и сас ӷотово тэ анэн андэ жэртва пэстирэ любимонэ шавэс, лэ Исаакос. Андэ вся кадэя дила дицолас лэстири састи вера. О Авраамо через пэстири вера и дила сас уӷодно лэ Дэвлэсти. О Иегова дажэ ԥэндя, кай во лэско друӷо. (Проадинон Иаково 2:22, 23.) О Дэл камэл, кай кажно андар мэндэ тэ авэл лэско друӷо. Важ када во побудисардя лэ Павлос и лэ Иаковос тэ пистрон пала Авраамо. Давайте роздиқаса, со пала лэстэ пистромэ андэ 4 ӷлава Римлянам и андэ 2 ӷлава Иаково. Анда дуй кадэла ӷлавы амэ уӷанаса пала Авраамо фартэ важни гиндоря.

3. Пэ саво библейско стихо шутэ сама о Иаково и о Павло?

³ О Павло и о Иаково ԥэндэ и алава, савэ пистромэ андэ Бытие 15:6. Котэ пистромэ: «О Авраамо патяя лэ Иеговасти и важ када во прижангля лэс найдошалэса». Со сыкавэл о алав «найдошало»? Када мануш, саво андэ вся кандэл лэ Дэвлэс. Важ о Иегова кацаво мануш идиально и во лэса довольно. Саво дэ лашо гиндо! И нэсовершэни, ӷрешни мануша моӷут тэ авэн вужэ андэ лэ Дэвлэстирэ яқа. Возможно, ту камэс, кай о Иегова тэ диқэл пэр тутэ кадяжэ. И кадя можэт тэ авэл. Кай када тэ полас, давайте роздиқаса, васо о Иегова ԥэнэнас по Авраамо, кай во найдошало.

КАЙ ТЭ АВЭС НАЙДОШАЛО ТРЭБУЙ ТЭ ПАТЯС

4. Васо можно тэ ԥэнас, кай и мануша дошалэ англа Дэл?

⁴ Андо Письмо лэ христианонэнди андо Римо о Павло пистрой, кай всаворэ мануша бэзэхалэ (Рим. 3:23). Сар жэ о Дэл можэт тэ авэл амэнца довольно и тэ ԥэнэн, кай амэ идиальни и найдошалэ англа лэстэ? Кай тэ поможый всаворэ христианонэнди тэ дэн атвето пэ кадэва вопросо о Павло шутя сама по Авраамо.

5. Васо о Иегова прижангля лэ Авраамос найдошалэса? (Римлянам 4:2—4).

⁵ Васо кала о Авраамо жувэлас андо Ханаано о Иегова ԥэндя, кай во найдошало англа лэстэ? Можэт важ кода, кай о Авраамо андэ вся ритярэлас лэ Моисеёско законо? Канешно най! (Рим. 4:13). Амэ ӷанас, кай о Дэл дя кадэва законо май бут, чем через 400 лет посли кода, сар о Дэл прижангля лэ Авраамос найдошалэса. Тоди васо о Дэл ԥэндя по Авраамо кадя? Важ кода кай лэ Авраамостэ сас вера. Через када о Иегова сыкадя каринг лэстэ о лашымос, саво во на затердя, и ԥэндя по Авраамо, кай во найдошало. (Проадинон Римлянам 4:2—4.)

6. Васо о Иегова можэт тэ ԥэнэн по бэзэхало мануш, кай во найдошало?

⁶ О Павло ԥэндя кай, кала о мануш патял лэ Дэвлэсти, о Дэл прижанэн, кай во найдошало через лэстири вера (Рим. 4:5). О Павло кадяжэ пистросардя: «И о Давидо ԥэнэн, кай бахтало о мануш, савэс о Дэл прижанэн найдошалэса, хоть во и нисо на стердя важ када: „Бахталэ кодэла, кастири найлащи дила простимэ и ко ашэля вужо лэ бэзэхэстар, бахтало о мануш, каско бэзэх о Иегова на шол пэ яқа”» (Рим. 4:6—8; Пс. 32:1, 2). Если о мануш патял лэ Дэвлэсти, тоди о Дэл анда вся оди простий лэс и будэр на сэрэл пала лэстирэ бэзэха. О Дэл диқэл пэ кадэва мануш сар по найдошало через лэстири вера.

7. Васо можно тэ ԥэнас, кай лэ Дэвлэстирэ служытеля, савэ жувэнас андэ дэлмутни время, уӷодинас лэсти?

⁷ По Авраамо, по Давидо и пэ авэр верни лэ Дэвлэстирэ служытеля сас ԥэндо, кай вонэ найдошалэ англа Дэл, хоть вонэ сас нэсовершэни и бэзэхалэ. Но через лэндири вера, о Дэл диқэлас пэр лэндэ, сар пэ идиальни мануша, особено, кай вонэ на шонаспэ пэ кодэла, ко на патялас андо Иегова (Эф. 2:12). Андэ пэско письмо о Павло драго сыкадя, кай о мануш трэбуй тэ патял андо Дэл, кай тэ авэл лэстирэ друӷоса. О Авраамо и о Давидо трэбуй сас тэ патян лэ Дэвлэсти, кадяжэ трэбуй тэ терас и амэнди.

ВАСО И ВЕРА ТРЭБУЙ ТЭ ДИЦОЛ ПЭ ДИЛА?

8, 9. Сар дэсавэ нэправильно полэн лэ Павлостирэ и лэ Иакавостирэ алава и пала со вонэ споринпэ?

⁸ Машкар и рашая ужэ бут викоря жал споро: со май важно — и вера или и дила? Дэсавэ андар лэндэ сытярэн, кай вся, со трэбуй, кай о мануш тэ спасыйпэ, — када тэ патял андо Иисусо. Вонэ ԥэнэн: «Патя андо Иисусо и спасысапэ». Дэкала и рашая дажэ шон сама пэ лэ Павлостирэ алава: «О Дэл прижанэн найдошалэса, хоть... [о мануш] и нисо на стердя важ када» (Рим. 4:6). Но авэр ԥэнэн, кай если тэ на авэс андэ свынти ҭана и тэ на жувэс па ла қандирятирэ традицыи, тоди тэ спасыспэ нэвозможно. Кай тэ доԥэнэн пэстирэ алава, вонэ сыкавэн Иаково 2:24: «О Дэл прижанэн лэ манушэс найдошалэса па лэстири дила, ай най кати па лэстири вера».

⁹ Каринг со када андя? Дэсавэ верущи мануша, савэ пистрон и книжки пала Дэл, гиндон, кай о Павло и о Иаково сытярэнас по разному пала кода, со май важно — вера или дила. Сар ԥэнэн дэсавэ рашая, о Павло гиндояс, кай о Дэл тэ прижанэн лэ манушэс найдошалэса, трэбуй вера, ай най и дила. Ай о Иаково сытярэлас, кай нэвозможно тэ уӷодис лэ Дэвлэсти, если нинай дила. Ек учоно мануш ԥэндя кадэва гиндо кадя: «О Иаково на полэлас, васо о Павло доԥэнэнас, кай трэбуй кати и вера, кай лэ манушэс тэ прижанэн найдошалэса, ай и дила важ када на трэбуй». Но и о Павло и о Иаково пистросардэ кода, со лэнди дя о Иегова через пэско свынто зор (2 Тим. 3:16). Ай значит амэ можэм тэ полас, со вонэ камэнас тэ ԥэнэн. Важ када амэ трэбуй тэ погиндосарас, со инке вонэ пистросардэ андэ пэстирэ письморя.

10. Пала сави дила ԥэнэнас о Павло? (Римлянам 3:21, 28). (Диқэн кадяжэ и картинка.)

¹⁰ Пала сави дила пистросардя о Павло андэ 3 и 4 ӷлава Римлянам? Во шолас сама пэ дила, сави трэбуй сас тэ терэн па лэ Моисеёско законо, саво о Дэл дя паша плай Синаё. (Проадинон Римлянам 3:21, 28.) Андэ лэ Павлостирэ деса дэсавэ христианоря, савэ сас евреёря, на полэнас, кай будэр на трэбуй сас тэ ритярэн лэ Моисеёско законо. Важ када о Павло па лэ Авраамоско примеро доԥэндя, кай о Дэл прижанэн лэ манушэс найдошалэса най через кода, кай во ритярэл лэ Моисеёско законо, ай важ кода, кай лэстэ исин вера. Кадэва гиндо фартэ подритярэл амэн! Амэ драго диқас, кай если патяс андо Дэл и андо Иисусо, тоди о Иегова авэла амэнца довольно.

11. Пала сави дила пистрояс о Иаково?

¹¹ Дила, пала сави пистросардя о Иаково андэ 2 ӷлава андэ пэско письмо, када най кодэя дила, пала сави ԥэнэнпэ андэ лэ Моисеёско законо. О Иаково ԥэнэн пала лашымос, саво терэл о христианино андэ пэстири жызня. Имено кала о мануш кадя терэл, кадэлэса во сыкавэл, кай па чачимастэ патял андо Дэл. Роздиқаса дуй примероря, савэ призындярдя о Иаково.

12. Сар о Иаково сыкадя, кай и вера трэбуй тэ дицол пэ дила? (Диқэн кадяжэ и картинка.)

¹² Андо пэрво пэско примеро о Иаково дэл дума пала кода, кай о христианино трэбуй тэ обжалпэ всаворэнца еқэндар. Кай тэ авэл май понятно, о Иаково призындярэл примеро пала мануш, саво старыийпэ тэ уӷодий лэ барвалэсти, ай по чороро диқэл завазглэ шэрэса. Хоть кацаво мануш можэт тэ ԥэнэн, кай лэстэ исин вера, лэстири дила када на сыкавэл (Иак. 2:1—5, 9). Ай андо дуйто пэско примеро о Иаково ԥэнэн пала мануш, саво диқэл, кай «варикастэ анда ԥрала или ԥэя нинай ӥда и лэнди найсо тэ хан», но во нисоса на поможый лэнди. Дажэ если кацаво мануш ԥэнэн, кай лэстэ исин вера, но пэ дила када на сыкавэл, тоди латар нинай нисаво толко. О Иаково пистросардя, кай «амари вера: если вой на дицол пэ дила, тоди вой мули» (Иак. 2:14—17).

13. Пала кастэ пистрой о Иаково, кай тэ сыкавэл пэ скати дэ важно и вера и дила? (Иаково 2:25, 26).

¹³ О Иаково пистрой пала Раав, кай тэ сыкавэл, кай и вера трэбуй тэ дицол пэ дила. (Проадинон Иаково 2:25, 26.) Вой ашундя пала Иегова и поля, кай во подритярэл лэ израильтянонэн (Иис. Н. 2:9—11). Вой сыкадя пэстири вера пэ дила. Сар? Дуй мануша анда Израилё авелэ тэ роздиқэн и ԥув, кай жувэлас и Раав. Кала лэн камэнас тэ умарэн, вой лэн фэрисардя. Амэ диқас, кай о Дэл прижангля ла найдошаляса кадя жэ, сар лэ Авраамос. Хоть кадэя жувли сас нэсовершэно и на сас израильтянка. Кода, со стердя и Раав сыкавэл, кай и вера трэбуй тэ дицол пэ дила.

14. Сар зжанпэ машкар пэстэ лэ Павлостирэ и лэ Иаковостирэ алава?

¹⁴ Сар амэ диқлям, о Павло и о Иаково просто росԥэндэ пала вера и дила разнонэ ригэндар. О Павло ԥэнэнас лэ христианонэнди, савэ сас евреёря, кай вонэ нэ смоӷут тэ радуин лэ Иеговас, кати кодэлэса, кай ритярэн лэ Моисеёско законо. Ай о Иаково шутя сама, кай всаворэ́ христианонэнди трэбуй тэ сыкавэн пэстири вера пэ дила, тэ терэн лашымос аврэнди.

15. Сар можно тэ сыкавэс пэстири вера пэ дила? (Диқэн кадяжэ и картинка.)

¹⁵ О Иегова ԥэндя по Авраамо, кай во уӷодий лэсти. Кадэва мануш ужылятар анда пэстири страна, жувэлас андэ катуны и сас ӷотово тэ анэн андэ жэртва пэстирэ шавэс, савэс фартэ любияс. Но када на сыкавэл, кай о Дэл аштярэл, кай и амэ тэ терас кадя жэ. Па чачимастэ, амэндэ исин бут сар тэ сыкавас пэстири вера пэ дила. Амэ можэм анда вся оди тэ шас сама нэвэ манушэн андэ собрания, тэ поможысарас лэ ԥралэнди и лэ ԥэянди, савэнди трэбуй помощь, и тэ заботисавас пала пэско ери (Рим. 15:7; 1 Тим. 5:4, 8; 1 Иоан. 3:18). Ай инке ек фартэ важно дила, сави сыкавэла, кай амэндэ исин вера, када анда вся оди тэ росԥэнас пала Дэл (1 Тим. 4:16). Всаворэ амэ можэм тэ сыкавас пэ дила, кай патяс лэ Иеговасти. Амэ уверени, кай лэстирэ алава исполнинапэ и вся, со во терэл, када со май фэдэр. И тоди амэ сможэм тэ уӷодисарас лэ Дэвлэсти и во ԥэнэна пар мэндэ, кай амэ лэстирэ друӷоря.

КАЙ ТЭ ПАТЯС, ТРЭБУЙ ТЭ НАДЕИСАВАС

16. Пэр со надеияспэ о Авраамо и андэр со во патялас?

¹⁶ Андэ 4 ӷлава андо письмо лэ римлянонэнди исин инке ек важно гиндо пала Авраамо. Анда кадэя ӷлава амэ уӷанас, кай трэбуй тэ надеисавас. О Иегова дя алав, кай через о Авраамо авэна блаӷословлёни бут народоря. Прецтавь, сави дэ райкани надия о Дэл дя лэ Авраамости! (Быт. 12:3; 15:5; 17:4; Рим. 4:17). Но дажэ, кала лэ Авраамости сас 100 бэрш, ай ла Саррати 90, о шаво, пала саво о Дэл дя алав, кадя и на арақаделя. Лэ манушэнди моӷло тэ здэлпэ, кай када нэвозможно, кай лэ Авраамостэ и ла Сарратэ тэ авэл бэято. Када сас бари проверка важ и вера лэ Авраамости. Но во надеияспэ и патялас, кай авэла дадэса важ и бут народоря (Рим. 4:18, 19). Сар амэ ӷанас, кода пэр со во надеияспэ, исполнисайля. Лэстэ арақаделя о Исаако — шаво, савэс во фартэ аштярэлас (Рим. 4:20—22).

17. Катар амэ ӷанас, кай о Дэл можэт тэ прижанэн амэн найдошалэнца и тэ ԥэнэн, кай амэ лэстирэ друӷоря?

¹⁷ Кода, со амэ уӷанглям пала Авраамо, сыкавэл, кай амэ можэм тэ уӷодисарас лэ Дэвлэсти. Во можэт тэ прижанэн амэн найдошалэнца и кай амэ лэстирэ друӷоря. Имено пала када пистросардя о Павло: «Но и алава “прижангля лэс” пистромэ най кати важ лэстэ [важ о Авраамо], но и важ амэндэ. О Дэл и амэн прижанэна найдошалэнца, важ кода кай амэ патяс андэр лэстэ, кай во рисардя каринг и жызня амарэ Барэ Хулас лэ Иисусос» (Рим. 4:23, 24). Сар и лэ Авраамости, амэнди трэбуй тэ патяс, тэ сыкавас када пэ дила, ай кадяжэ тэ надеисавас. Андэ 5 ӷлава андо письмо лэ римлянонэнди о Павло ԥэнэн инке важни гиндоря пала надежда. Пала када амэ подаса дума андэ авэр статья.