«Никала на ашавава тут»!

1. Кала всаворэ памазаникоря авэна стидэ по нэбо?

РАНЬШЭ лэ Иеговастирэ служытеля пушэнас: «Кала о послиднё памазанико жала упрэ?» Варикала амэ гиндосарасас, кай дэсавэ памазаникоря, возможно, ашэнапэ пэ ԥув посли кода, сар прожала о Армагидоно. Но анда «Сторожэво башня» важ 15 июлё 2013 бэрш амэ уӷанглям, кай всаворэ памазаникоря, савэ инке жувэн пэ ԥув, авэна по нэбо жы каринг кода, сар залэлапэ о Армагидоно (Матф. 24:31).

2. Пала со дэсавэ гиндон и со амэ роздиқаса андэ кадэя статья?

² Но можэт амэ гиндосарас: кала залэлапэ и «бари бида», со авэла лэ Христостирэ «аврэ бакрорэнца», савэ на парашэн тэ служын лэ Иеговасти пэ ԥув? (Иоан. 10:16; Матф. 24:21). Дэсавэ пэрэжывают, кай ашэнапэ екжэнэ и на ӷанэна, со тэ терэн, кала и памазаникоря, савэ куч лэндирэ одести, жана по нэбо. Возможно, вонэ гиндон пала дуй случаёря анда Библия. Давайте лэн роздиқаса и уӷанаса, васо амэнди на трэбуй тэ дарас?

СО НА АВЭЛА?

3, 4. Пала со дэсавэ пэрэжывают и васо?

³ Дэкастэ найспокойно по ди, кала гиндон пала время, кала и памазани ԥрала анда Руководящё совето будэр на авэна пэ ԥув. Вонэ пэрэжывают, кай тоди авэр бакрорэ парашэна тэ служын лэ Иеговасти. Возможно, вонэ даран, важ кода кай андэ библейско время ужэ сас кадя. Роздиқаса дуй примероря. Погиндосарам пала ӷлавно рашай Иодаё. Во сас ашунгло лэ Дэвлэско служытелё. Во и лэстири хулаи Иехошева фэрисардэ лэ цыкнорэ шаворэс, савэс ақарэнас Иоасо. Вонэ поможысардэ лэсти тэ ашэл лашо царё, саво ритярэлас лэ Иеговаско законо. Пока о Иодаё сас жундо, кадэва царё тэлёлас лэ Иеговасти. Но кала о ӷлавно рашай муля, о Иоасо ля тэ андярэл пэс фартэ вэрыто. Во ля тэ ашунэл лэ князёнэн, савэндэ сас найлашо ди, и одбанделя лэ Иеговастар (2 Лет. 24:2, 15—19).

⁴ Кадяжэ подаса дума пала христианоря, савэ жувэнас андэ время, кала мулинэ всаворэ апосталоря. О Иоано сас послиднё апостало. Пока во инке сас жундо, во поможыяс бутэ христианонэнди тэ на парашэн тэ служын лэ Иеговасти (3 Иоан. 4). Во и авэр апосталоря анда вся зор фэринас лэ Иеговастирэ народос кодэлэндар, ко отжыля лэ Дэвлэстирэ чачимастар (2 Фес. 2:7; 1 Иоан. 2:18). Но посли кода, сар о Иоано муля, кацавэ мануша линэ тэ сытярэн лэ хохаимасти. Када ля тэ розжалпэ машкар лэ Дэвлэстирэ служытеля, сар и яг пэ шуки сулум. Прожыля набут время и христианоря фартэ дур отжылэ кодэлэстар, сости сытярэлас о Иисусо. Бут ԥрала и ԥэя парашэлэ тэ андярэн пэс сар чачунэ христианоря.

5. Амэ роздиқлям, со росԥэнэнпэ андэ Библия. Но савэ гиндоря амэндэ на трэбуй тэ авэн?

⁵ Амэ диқлям, со андэ Библия росԥэнэнаспэ пала царё Иодаё и пала христианоря, савэ жылэ против о Дэл. Сыкавэл када, кай кадяжэ андярэна пэс и лэ Христостирэ авэр бакрорэ, кала и памазаникоря жана по нэбо? Лэна вонэ андэ кодэя время тэ терэн найлашымос, сар о Иоасо? Или вонэ отжана лэ Дэвлэстар, сар бут христианоря андэ время, кала мулинэ всаворэ апосталоря? Атвето — канешно «най». Амэ можэм тэ патяс: кала и памазаникоря жана по нэбо, о Иегова вся кадя жэ лэла драго тэ диқэл пала авэр бакрорэ. Вонэ на парашэна тэ тэлён лэсти кадя, сар лэсти уӷодно. Катар амэ када ӷанас?

ЛЭ ИЕГОВАСТИРЭ СЛУЖЫТЕЛЯ НА ПАРАШЭНА ТЭ ТЭЛЁН ЛЭСТИ КАДЯ, САР ВО КАМЭЛ

6. Пала сави время амэ уӷанаса?

⁶ Англэ амэн аштярэл фартэ ԥари время. Васо амэ можэм тэ патяс, кай лэ Дэвлэсти лэна тэ тэлён кадя, сар лэсти чалёл? Важ кода кай андэ Библия пистромэ пала время, андэ сави амэ жувас. Вой на шолпэ пэ время, кала жувэнас и израильтяноря и кала мулинэ и апосталоря. Важ када давайте уӷанаса: 1) пала дэлмутни израильско время, 2) пала время, кала мулинэ и апосталоря и 3) пала амари «время, андэ сави вся трэбуй тэ рийпэ, сар сас» (Дила 3:21).

7. Васо дэсавэ израильтяноря на парашэнас тэ служын лэ Дэвлэсти дажэ тоди, кала вся о народо и царёря змардёнас па лэско дром?

⁷ Дэлмутни израильско время. Англа пэстири смэрть о Маисеё ԥэндя лэ израильтянонэнди: «Мэ драго ӷанав, кай посли кода, сар мэ мэрава, тумэ лэна тэ терэн гряцаливо дила и зжана па дром, па саво мэ приԥэндэм тумэнди тэ жан» (Втор. 31:29). Кадяжэ о Маисеё приԥэндя лэ израильтянонэнди, кай если вонэ жана против о Дэл, лэн ундярэна андо плено (Втор. 28:35, 36). Исполнисайлэ кадэла алава? Да. Всаворэ викоря бут царёря тердёнас по нэправильно дром и ундярэнас пала пэстэ лэ Дэвлэстирэ народос. Важ када о Дэл просытярдя пэско найкандино народо и будэр на домэкэлас, кай и израильски царёря тэ правин (Иез. 21:25—27). Но кодэла, ко на ашавэнас лэ Иеговас, диқэнас, кай во зритярэл пэско алав (Ис. 55:10, 11). Када придэлас лэнди смилость тэ на парашэн тэ служын лэсти.

8. Трэбуй амэнди тэ удивисавас, кай и христианоря, савэ жувэнас андо дуйто вико, жылэ против о Дэл? Росԥэнэн.

⁸ Время посли кода, сар мулинэ и апосталоря. Трэбуй амэнди тэ удивисавас, кай и христианоря, савэ жувэнас андо дуйто вико, оджылэ лэ Дэвлэстирэ чачимастар? О Иисусо май данглал ԥэндя, кай бут мануша, савэ служын лэ Дэвлэсти, жана против лэстэ (Матф. 7:21—23; 13:24—30, 36—43). О апостало Павло, Пётро и Иоано шутэ сама, кай кода, пала со ԥэндя о Иисусо, ля тэ терэлпэ ужэ андо пэрво вико (2 Фес. 2:3, 7; 2 Пёт. 2:1; 1 Иоан. 2:18). Ӷэт май интя, сар муля о послиднё апостало, и христианоря, савэ жылэ против о Дэл, попэлинэ андо Вавилоно Велико, — када всаворэ хохавнэ веры, савэ исин пэ ԥув. Кода, со ԥэндя о Иисусо, исполнисайля.

9. Андэр со амарэ деса на шонпэ пэ дэлмутни израильско время и пэ время, кала мулинэ всаворэ апосталоря?

⁹ «Время, андэ сави вся трэбуй тэ рийпэ, сар сас». Амэ подям дума пала дэлмутни израильско время, ай кадяжэ пала время, кала мулинэ всаворэ апосталоря и розбут лэ Дэвлэстирэ служытеля жылэ против лэстэ. Но вся када на шолпэ пэ амари время. Давай вспомним, со андэ Библия ԥэнэнпэ пала амарэ деса. Со пэрво авэл тути по гиндо? Например, андэр латэ ԥэнэнпэ, кай амэ жувас андэ «послидни деса» кадэла люмати (2 Тим. 3:1). Но и Библия сыкавэл, кай кала залинэпэ и послидни деса, вмести лэнца заляпэ инке ек особено бари время. Кадэя бари время закончица тоди, кала лэ Дэвлэско Царство стерэла пэ ԥув раё и поможыя лэ манушэнди тэ ашэн идиальни. Андэ Библия пистромэ, кай када «время, андэ сави вся трэбуй тэ рийпэ, сар сас» (Дила 3:21). Вой заляпэ андо 1914 бэрш. Со сас рисардо андэ кодэя время? О Иисусо ашэля Царё андо небесно Царство. Важ када упалэ появисайля правителё, саво дэлас дума лэ Иеговастирэ алавэстар. По царско троно упалэ рисайля лэ Давидоско потомко. Но о Иегова рисардя най кати када. Во поможысардя пэстирэ служытелёнэнди пэ ԥув упалэ тэ тэлён лэсти кадя, сар во камэл (Ис. 2:2—4; Иез. 11:17—20). Но можэт лэ Дэвлэстирэ служытеля упалэ ашавэна лэс? Или кацаво на авэла?

10. а) Андэ амарэ деса лэ Иеговаско народо тэлёл лэсти кадя, сар во камэл. Со пала када сас пистромэ андэ Библия? (Исайя 54:17). б) Васо кода, со сас пистромэ андэ Библия пала амари время, поможый би дарако тэ диқас англэ?

¹⁰ Проадинон Исайя 54:17. Кати погиндон пала кадэла алава: «Ни ек оружыя, сави стердэ против тутэ, на вицэлэла»! Адес кадя и исин. Кадяжэ амэ можэм тэ диқас пэстирэ яқэнца, сар исполнинпэ и кадэла алава анда Библия: «Всаворэн тирэ шавэн сытярэла о Иегова, и тирэ шавэндэ авэла бут лашимос и мирно жызня. ...Ту нисостар на лэса тэ дарас и тутэ на авэла бари дар — вой на лэла пэр тутэ тэ хулаий» (Ис. 54:13, 14). Дажэ кай о Сатана, саво дэл «кадэла люмако», нинай скати зор, кай тэ тердярэл лэ Дэвлэстири дила. Адес лэ Иеговастирэ служытеля росԥэнэн всаворэнди пала лэстэ (2 Кор. 4:4). Лэ Иеговаско народо будэр никала на парашэла тэ тэлёл лэсти кадя, сар во камэл. Када авэла вся и вечность и никала на парудёла. Любо оружыя, сави стерди против амэндэ на вицэлэла!

СО АВЭЛА?

11. Лэ Иеговастирэ служытеля пэ ԥув на лэна тэ даран тоди, кала всаворэ памазаникоря жана по нэбо. Васо амэ андэ када патяс?

¹¹ Со авэла, кала и памазаникоря ужана по нэбо? Сэрэн, кай амаро Пастухо — о Иисусо. Во Хулай пэ христианско собрания. Во екжэно ԥэндя: «Тумэндэ ек Ӷосподино — о Христос» (Матф. 23:10). Амаро Царё, савэстэ исин право тэ хулаий, вся и время лэла драго тэ диқэл пала пэстирэ чачунэ ученикоря. Пала амэндэ диқэл о Христос. Важ када амэнди най состар тэ дарас. Канешно, амэ бут со на ӷанас, сар имено о Иисусо лэла тэ андярэл амэн андэ кодэя время. Но амэнди можэт тэ придэл зор, кала амэ гиндосарас, со терэласпэ андэ библейско время. Давайте уӷанаса пала када май бут.

12. Сар о Иегова заботияспэ пала пэско народо: а) кала муля о Маисеё? б) кала лэ Ильясти динэ нэви дила? (Диқэн кадяжэ и картинка.)

¹² О Маисеё муля жы каринг кода, сар и израильтяноря авелэ пэ ԥув, пала сави о Иегова дя лэнди алав. О Маисеё анда вся оди служыяс лэ Иеговасти. Но кала лэс на ашэля, со сас лэ Дэвлэстирэ народоса? Хэба ашэлэпэ и израильтяноря екжэнэ? Най. Пока вонэ кандэнас лэ Иеговас, во заботияспэ пала лэндэ. Англа кода, сар о Маисеё тэ мэрэл, о Дэл ԥэндя, кай во тэ стол барэдэрэса андо народо лэ Иисусос Навинос. Ужэ бут бэрша май данглал о Маисеё сытярэлас лэ Иисусос (Исх. 33:11; Втор. 34:9). Инке андо народо сас авэр мурша, савэ моӷли драго тэ терэн и дила. Вонэ сас барэдэр пэ мануша, савэн сас 1000, 100, 50 и дажэ 10 (Втор. 1:15). Амэ диқас, кай пала лэ Дэвлэско народо драго заботинаспэ. Кадя сас и тоди, кала жувэлас о Илья, саво пэрэдэлас и алава лэ Дэвлэстар. Во бут бэрша поможыяс лэ израильтянонэнди тэ тэлён лэ Иеговасти. Но поджыля и время, кала о Дэл дя лэсти авэр дила андэ Иудея (2 Цар. 2:1; 2 Лет. 21:12). Ай со сас лэ Дэвлэстирэ служытелёнэнца, савэ жувэнас андо израильско царство? Можэт вонэ ашэлэпэ екжэнэ и на ӷанэнас, со тэ терэн? Най. Ужэ дэсавэ бэрша о Илья сытярэлас лэ Елисеёс. Кадяжэ андэ Библия ԥэнэнпэ, кай лэ манушэндэ, савэ пэрэдэнас и алава лэ Дэвлэстар, сас шавэ. Сар амэ полас, кадя ԥэнэнас пэ мануша, савэн вонэ сытярэнас тэ терэн лэ Дэвлэстири дила (2 Цар. 2:7). Дицол, кай сас бут надёжни мурша, савэ моӷли тэ диқэн пала лэ Дэвлэско народо. О Иегова драго диқэлас пала пэстирэ предани служытеля и на парашэлас тэ терэл кода, со загиндосардя.

13. Савэ алава анда Евреям 13:5 подритярэн амэн? (Диқэн кадяжэ и картинка.)

¹³ И акэ, амэ тумэнца роздиқлям, со сас андэ дэлмутни время. Сар тумэ гиндон, со авэла, кала по нэбо жала о послиднё памазанико? Андэ Библия ворта ԥэндо, кай о Иегова никала на ашавэла пэско народо. (Проадинон Евреям 13:5.) Адес пэ ԥув жувэн набут мануша, савэ витидэ свынтонэ зорэса. Вонэ кадя жэ, сар о Маисеё и о Илья, диқэн пала амэндэ и пристон бут зор, кай тэ сытярэн аврэн. Бут бэрша и ԥрала анда Руководящё совето сытярэн лэ муршэн анда авэр бакрорэ, кай вонэ тэ диқэн пала лэ Иеговаско народо. Например, вонэ терэн, кай тэ авэн школы важ и барэдэр ԥрала, раёни барэдэр ԥрала, и ԥрала анда камитето филиало, важ и отвецтвени ԥрала андо Вефилё и авэр. О Руководящё совето екжэно сытярэл лэ помошниконэн важ и камитеторя андо Руководящё совето. Кадэла помошникоря ужэ адес андярэн бари отвецтвеность и драго терэн пэстири дила андэ арӷанизацыя. Вонэ ӷотови тэ заботинпэ пала лэ Христостирэ бакрорэ, кала и памазаникоря ужана по нэбо.

14. Саво ӷлавно гиндо андэ кадэя статья?

¹⁴ Акэ ӷлавно гиндо андэ кадэя статья. О послиднё памазанико жала по нэбо тоди, кала ашэлапэ набут время, кай тэ закончица и бари бида. Тоди лэ Дэвлэско народо пэ ԥув на парашэла тэ тэлёл лэ Иеговасти кадя, сар во камэл. Блаӷодаря кодэлэсти, кай о Иисус Христос руководий амэнца, амэ на парашаса тэ служысарас лэ Иеговасти. Андэ кодэя время пар мэндэ дэна и объединёни правительстворя, пэ савэ андэ Библия ԥэнэнпэ о Гого анда Магого. Но кала вонэ дэна пар мэндэ, када авэла найдолӷо и лэндэ нисо на вижала (Иез. 38:18—20). Када на тердярэла амэн тэ служысарас лэ Иеговасти. Ай во обязательно амэн спасыя! О апостало Иоано додиқля андэ видения фартэ бутэ манушэн, лэ Христостирэ аврэ бакрорэн. Лэ Иоаности сас ԥэндо, кай када кодэла, ко пэрэжудэ и бари бида (Отк. 7:9, 14). Да, о Иегова точно спасыя амэн!

15, 16. Сар ԥэнэнпэ андэ Откровение 17:14, со лэна тэ терэн и памазаникоря, кала авэла Армагидоно и васо када придэл зор?

¹⁵ Всаек можэт тэ авэл вопросо: «Ай со терэна и памазаникоря, савэ жана по нэбо?» И Библия ворта дэл атвето. Кай и правительстворя андэ кадэва миро «авэла война лэ Бакрорэса». Канешно, вонэ процэлэна. Амэ адиносарас: «О Бакроро победия лэн». Ай ко лэсти поможыя? Атвето исин андэ кадэва жэ стихо: «Лэса победина кодэла, ко сас ақардо, витидо и кандино». (Проадинон Откровение 17:14.) Ко када? И памазаникоря, савэ авэна рисардэ каринг и жызня! О послиднё памазанико жала по нэбо тоди, кала ашэлапэ набут время, кай тэ закончица и бари бида. Пэрво дила, сави вонэ лэна тэ терэн — када тэ марэнпэ. Сави дэ бари и нэобычно дила! Дэсавэ памазаникоря англа кода, сар тэ уӷанэн о чачимос, вороӷуинас аврэнца. Варико дажэ сас пэ война. Но потом вонэ ашэлэ чачунэ христианоря и сытелэ тэ ладин аврэнца (Гал. 5:22; 2 Фес. 3:16). Кадэла памазаникоря вишутэ всаворэ мардя. Ай по нэбо вонэ вмести лэ Христоса и лэстирэ свынтонэ анӷелонэнца жана андэ послиднё война лэ Дэвлэстирэ вороӷонэнца.

¹⁶ Кати погиндосар! Дэсавэ памазаникоря ужэ андэ бэршэндэ и лэндэ набут зор. Но, кала вонэ ринапэ каринг и жызня, кай тэ жувэн по нэбо, вонэ ашэна сар анӷелоря. Вонэ авэна зоралэ и бисмертни. Вонэ лэна тэ марэнпэ вмести пэстирэ Царёса, лэ Иисусоса, саво победий пэстирэ вороӷонэн. Посли кода, сар прожала и война Армагидоно, вонэ вмести лэ Христоса лэна тэ поможын лэ манушэнди тэ ашэн идиальни. И памазаникоря фартэ любин пэстирэ ԥралэн и ԥэян, савэ жувэн пэ ԥув. Кала вонэ жана по нэбо, вонэ смоӷут тэ стерэн важ лэндэ пэ бутэстэ май бут, чем кала сас пэ ԥув сар найидиальни мануша!

17. Катар амэ ӷанас, кай кала авэла Армагидоно, всаворэ лэ Дэвлэстирэ служытеля авэна фэрисардэ?

¹⁷ Ай со трэбуй тэ терэн авэр бакрорэ, кала авэла о Армагидоно? Нинай нисаво секрето: трэбуй тэ патян лэ Иеговасти и тэ приашундён каринг кода, со во ԥэнэн. Со андэ када можэт тэ ужал? Андэ Библия исин алава, савэ подритярэн амэн: «Зажа, мэрно народо, андэ комнаты, савэ андрэ, и ԥандав пала пэстэ и вудара. Гарадю пэ най бари время, пока на прожала и холи» (Ис. 26:20). Андэ кодэя время, всаворэ кандинэ лэ Дэвлэстирэ служытеля, по нэбо и пэ ԥув, авэна фэрисардэ. Сар и о апостало Павло, амэ патяс, кай «ни и власти, ни кода, со исин акана, ни кода, со авэла... нэ смоӷут тэ одлэн амэндар лэ Дэвлэстири любовь» (Рим. 8:38, 39). Вся и время сэрэн: о Иегова тумэн любий и во никала тумэн на ашавэла!