Evanjil Wafunday Yohan
10 “Nikulejinany chakin kamu anch, muntu ukulika kwandam mu ditang da amikoku kusutin chis pakwez wamatikin pa ndond yindj, muntu winou ud mwij ni mbwitan. 2 Pakwez muntu ukwandamina ku chis ndiy kafung wa amikoku. 3 Kalam wa ku chis ukumwazuril, ni amikoku akutesh dizu dend. Ukat kutazuk amikoku end pa majin mau ni kuyibingin pol. 4 Anch wayibudish awonsu pol, ukat kusut kurutu kwau ni amikoku akat kumulondul, mulong ij dizu dend. 5 Amikoku kakutwishap kumulondul muntu wakadau kwijik* pakwez akumuchin, mulong kijap dizu dend.” 6 Yesu wayileja chilakej chinech, pakwez kateshap kwau yom yading yiyilejinay.
7 Chawiy Yesu wayileja kand anch: “Nikulejinany chakin kamu anch, am yam chis cha amikoku. 8 Antu awonsu atakelaku kwez pa ndond yam ad ij ni ambwitan; pakwez amikoku kayiteshap. 9 Am yam chis, muntu mwawonsu ukwandama kusutin am ukez kapand, muntu winou ukwandam ni kubudik ni ukutan yakuda. 10 Mwij ukat kwez ching kusu mulong wa kwiy, kujipan ni kushesh yom. Am neza chakwel amikoku ikal ni mwom, mwom wakad disuden.* 11 Am nid kafung muwamp; kafung muwamp ukat kupan mwom* wend mulong wa amikoku. 12 Muntu wa mudimu wakad kwikal kafung ni wakad kwikal mwin amikoku, anch wamuman kangol ukat kwez, ndiy ukat kusha amikoku ni kuchin—chad kangol ukat kuyikwat ni kuyipalangesh— 13 mulong ud muntu wa mudimu ni kayibangidinap kwend amikoku. 14 Am nid kafung muwamp. Nij amikoku am ni amikoku am angij, 15 mud mutapu wingijay Tatuku niyam nimwij Tatuku; ni nikat kupan mwom* wam mulong wa amikoku.
16 “Nikwet amikoku akwau, akad kwikal a mu ditang dined; niyawiy nifanyidin kuyandjik, akutesh dizu dam, awonsu akwikal chisak chimwing, ni akwikal ni kafung umwing. 17 Chawiy chinkatidinay Tatuku, mulong am nikat kupan mwom* wam, chakwel nez niutambul kand kapamp kakwau. 18 Kwikil muntu wintambwilau ku usu, pakwez niupanin ku rusot ram amwinam. Nikwet ulabu wa kuupan ni nikwet kand ulabu wa kuutambul kapamp kakwau. Chijil chinech anginkishach kud Tatukwam.”
19 Kwikala kand kwaurok pakach pa in Yuda mulong wa mazu minam. 20 Avud pakach pau alondang anch: “Ukwet chilembil ni uzarikin.* Mulong wak umuteshinany?” 21 Akwau alondang anch: “Minam madap mazu ma muntu ukweta chilembil. Chilembil kakutwishap kuburil mes ma amputames, kimwawiyap?”
22 Pa chisu chinicha, mu Yerusalem mwasadika Musambu wa Kupan Tempel kud Nzamb. Chading chirung cha mashik nakash, 23 ni Yesu wading ukat kwendangan mu tempel mwinshin mwa nzezil ya Salomon. 24 Chad in Yuda amunyingumuka ni asambish kumwipul anch: “Chisu ik ukupwisha ntaad jida pakach petu? Anch yeya Kristu, tuleja patok.” 25 Yesu wayakula anch: “Am nakulejangany kal, pakwez en wingitiyijinanyap kwen. Midimu nisadina mu dijin da Tatukwam yawiy yipanina uman piur pamam. 26 Pakwez en witiyijinanyap, mulong udanyap amikoku am. 27 Amikoku am akat kutesh dizu dam, am niyij, niyau akat kwinlondul. 28 Am nikat kuyinkish mwom wa chikupu, kakez kayisheshap ap pakemp, ni kwikil muntu ukuyitambula mu chikas cham. 29 Chom changinkishay Tatukwam chikwet usey nakash kusutamu yom yikwau yawonsu, ni kwikil muntu ukutwisha kuyitambul mu chikas cha Tatuku. 30 Am ni Tatuku tud mu uumwing.”*
31 In Yuda anona kand mayal kapamp kakwau mulong wa kumwas. 32 Yesu wayela anch: “Namekesh kal kud en midimu yivud yiwamp yidokila kud Tatuku. Mudimu ik umwing wingasidinanya mayal?” 33 In Yuda amwakula anch: “Tukwasinap mayal mulong wa mudimu uwamp, pakwez mulong umusaadin Nzamb; mulong ey, ap anch ud kwey muntu, ulondin anch ud nzamb.” 34 Yesu wayakula anch: “Ov, kafundinap mu Chijil chen anch: ‘Nalonda anch: “Udany anzamb” ’?* 35 Anch wayitazuka antu afishau nich kud dizu da Nzamb anch ‘anzamb’—pakwez mifund kakutwishap kuyiswimp— 36 ov, wingedinany am wasalau kwikal utumbila kud Tatuku ni watumau mu mangand anch: ‘Usaalen,’ mulong nalond kal anch: ‘Nid Mwan a Nzamb’? 37 Anch nisadinap midimu ya Tatukwam, kangal wangitiyijany. 38 Pakwez anch yawiy nisadina, ap anch wingitiyijinanyap, itiyijany midimu yiney, chakwel ushikenany kwijik ni udandamenany kwijik anch Tatuku ud mu uumwing niyam ni am nid mu uumwing ni Tatuku.” 39 Chawiy akimba kand kumukwat, pakwez ndiy wayiwemburika.
40 Yesu waya kand ushad wa Yordan pa ndond yabatishenangay Yohan kwisambishin, ni washakama kwinikwa. 41 Chad antu avud eza kud ndiy ni asambish kulond anch: “Yohan kasalap chilay ap chimwing, pakwez yom yawonsu yalonday Yohan piur pa ikundj winou yading kamu yakin.” 42 Ni antu avud kwinikwa amwitiyija Yesu.