Midimu ya Atwimbuy
17 Chad asutina mu Anfipolis ni Apoloniya ni ashika ku Tesalonik, kwadinga sinagog wa in Yuda. 2 Chawiy mud mwading chaku chend, Paul wandama mu sinagog, ni mu machuku masatu ma sabat watongijoka nau pamwing kusutin Mifund, 3 wayirumburilang ni kuyilej nich kashinsh mu kujimbul mifund anch chading chifanyidin Kristu kuman mar ni kuvumbuk, ni wayilejang anch: “Yesu winou nikulejinanya, ndiy Kristu.” 4 Chawiy antu amwing pakach pau ikala in kwitiyij ni abombakana pamwing ni Paul nend Silas, mwawiy mwasalau kand in Grek avud nakash amwifukwilang Nzamb, pamwing ni amband avud ijikena.
5 Pakwez, mulong in Yuda ova mukau, ayikumangeja amakundj amwing a chisum imanijanang pa sok ni asala chisak chijim cha antu. Chad andama ku usu mu chikumbu cha Yazon ni ading amukimbin Paul nend Silas chakwel ayipana kud antu. 6 Mulong kayitanapamu, amukakalijana Yazon ni akadivar amwing ni ayitwala kud antakel a musumb, oku akat kutoy anch: “Amakundj inay aletishina kanvundangesh* pa divu da kabuj katat ad kunoku, 7 ni Yazon wayakin kwol kwend. Amakundj inay awonsu abwambwidin kwi mbil ya Kayisar, mulong alondin anch kud mwant mukwau, Yesu.” 8 Pateshau antu nau antakel a musumb yom yiney, iyakamisha nakash; 9 ni ayilikishaku kupwa kwa kutambul nfalang* jiwanyidinaku kud Yazon ni antu akwau.
10 Kapamp kamwing, akadivar amutuma Paul nend Silas ku Bereya uchuku. Pashikau, andama mu sinagog wa in Yuda. 11 In Yuda a ku Bereya akata kwilej nakash kusutamu a ku Tesalonik, mulong itiya dizu da Nzamb nich mushiku nakash, ashinshikinang Mifund nawamp dichuku dawonsu mulong wa kuman anch yom yiney yading yakin. 12 Chawiy avud pakach pau ikala in kwitiyij, chilik chimwing kand ni amband avud in Grek alimishangau ni amakundj amwing. 13 Pakwez pateshau in Yuda a ku Tesalonik anch Paul wading ukat kulejan dizu da Nzamb ku Bereya, eza kwinikwa mulong wa kuyisosil* antu ni kuletish kanvundangesh pakach pa antu. 14 Chad akadivar amutwala Paul kapamp kamwing ku karung, pakwez Silas ni Timote ashala kwinikwa. 15 Pakwez antu amutwala Paul amushikija kamu ku Aten, ni pachirikau, ayinkisha mbil ya kumulej Silas ni Timote anch aya kud Paul pakad kulab.
16 Chad padingay Paul ukat kuyichingel ku Aten, wajimana pamanay anch mu musumb winou mwading mwizwil atupwany. 17 Chawiy wasambisha kutongijok mu sinagog pamwing nau in Yuda ni antu akwau amwifukwilang Nzamb, ni dichuku dawonsu watongijokang mu sok pamwing nau antu atanangay mwinimwa. 18 Pakwez afilozof* amwing in Epikir ni in Stoyik asambisha kutadikijan nend, ni amwing alondang anch: “Yom ik yikimbinay kulond mwin kuchochok winou?” Akwau alondang anch: “Chimeken anch ulejen piur pa anzamb aeny.” Alonda mwamu mulong wading ulejen rusang ruwamp ra Yesu ni divumbuk. 19 Chawiy amukwata, amutwal ku dirumburish dijim da mu Aten,* ni alond anch: “Ov, tukutwish kwijikaku mafundish minam masu ufundishina? 20 Mulong ulondin yom yimwing yida yisu kud etu,* chawiy tusotin kwov kurumburik kwa yom yiney.” 21 Chakin kamu, anch ishadidin, in Aten awonsu ni angendj ading ashicha mwinimwa kasutishangap chisu chau mu kusal chom chikwau, pakwez achisutishang mu kulond ap mu kutesh yom yisu. 22 Paul wimana mukach mwa dirumburish dijim da mu Aten* ni walond anch:
“En amakundj a mu Aten, nimen anch mu yom yawonsu umekenany mud ukwetany wom wa anzamb kuyisutamu antu akwau. 23 Chilakej, panendanganang mu musumb wen ni kushinshikin nawamp yom wifukwidinanya, natanang chintamb pada pafundinau anch: ‘Kud Nzamb Wakad Kwijikan.’ Chawiy, Nzamb winou wifukwidinanya pakad kumwijik, ndiy nikulejinanya. 24 Nzamb watanga mangand ni yom yawonsu yidamu, ndiy uda Mwant wa diur ni divu, kashichingap mu matempel ma kusal ku makas ma antu; 25 ni kakumusadinangap kud antu mud kwel anch ukwet kuswir kwa chom, mulong ndiy amwinend ukata kuyinkish antu awonsu mwom, mupim ni yom yawonsu. 26 Ni kusutin muntu umwing, wasala michid yawonsu ya antu chakwel ashakam pa divu da kabuj, wateka kand yisu yatenchikay ni wayitekina antu mimbu ya jindond ja kushakam, 27 chakwel amukimb Nzamb, ap kwa kupapat, ni amutan chakin kamu, ap anch chakin kamu kadap kulemp ni umwing ni umwing wa pakach petu. 28 Mulong kusutin ndiy tukwet mwom, tukat kwinyikesh, ni tudaku; mud mwalondau in kufund en amwing anch: ‘Mulong niyetu tud anend.’
29 “Chawiy, mulong tud an a Nzamb, tufanyidinap kutong anch Nzamb win ud mud utad wa or ap utad wa argent ap diyal, mud chom chikutwishau antu kutongijokin ni kufatul ap kusal. 30 Chid chakin anch pasak antu asalang yom yiney pakad ronganyin ni Nzamb wadiula yom yiney, pakwez katat, ku jindond jawonsu, Nzamb ukat kuyilej antu awonsu anch afanyidin kukarumuk. 31 Mulong wateka dichuku dikurumburishay antu awonsu ashicha pa divu nich kutentam kusutin muntu umwing watonday, ni wapana chizu kud antu awonsu kusutin kumuvumbul.”
32 Chad pateshau piur pa divumbuk da afu, amwing asambisha kumusip, pakwez akwau alondang anch: “Tukukutesh kand kapamp kakwau piur pa chom chinech.” 33 Chawiy Paul wayisha, 34 pakwez antu amwing ibomba nend ni ikala in kwitiyij. Pakach pau pading Denis, wadinga nzuj mu dirumburish dijim da mu Aten,* ni mband umwing dijin dend Damaris, ni antu akwau kand.