Evanjil Wafunday Marko

14 Chawiy kwashala machuku maad ni kushik ku musambu wa Pasak ni wa Mikat Yakad Chivish. Amakurump a in kupesh nau alej a yijil ading akat kukimb makasu ma kumukwat nich Yesu chakwel amujip; 2 pakwez alondang anch: “Chifanyidinap kumukwat pa chisu cha musambu, chamwamu antu akulet kanvundangesh.”

3 Chad padingay Yesu ukat kuda* mu chikumbu cha Simon mwin musong wa mak mu ul wa Betaniya, mband umwing wading ni nsab ya alibater yikweta malash ma usey nakash washika, mading malash mawamp ma nard.* Wafungula nsab yend ya malash ni wasambish kumuzizilam Yesu pa mutu. 4 Pakwez antu amwing ajimana ni ipulijan anch: “Mulong wak washesh kal malash minam? 5 Mulong many minam afanyinang kumalandish a denye* 300 ni nfalang jinej afanyinang kuyinkishaj atuzwendj!” Chawiy amujimena mband winou nakash.* 6 Pakwez Yesu walonda anch: “Mulikany. Mulong wak ukimbinanya kumwakamish mband winou? Ndiy wansadin kal chom chiwamp. 7 Mulong atuzwendj udingany nau machuku mawonsu ni ukutwishany kuyisadil yom yiwamp chisu chawonsu ukatinanya, pakwez am nikwikalap nen machuku mawonsu. 8 Ndiy wasal kal chom chatwishay kal kusal; wazizil kal malash minam mu mujimbu wam kurutu kwa chisu mulong wa kwinjik. 9 Nikulejinany chakin anch, kwi ndond kwawonsu kukez kalejanau rusangu ruwamp pa mangand mawonsu, akez kalejan kand yom yasalay kal mband winou mulong wa kumuvurikinaku.”

10 Chad Yudas Isakariyot, umwing wa in kwilej 12, waya kuyital amakurump a in kupesh chakwel amupana Yesu kud awiy. 11 Awiy pateshau yom yayilejay, asangara nakash ni amukan kumwinkish nfalang.* Chawiy ndiy wasambisha kukimb mutapu wa kumupan.

12 Chad pa dichuku da kusambish da musambu wa Mikat Yakad Chivish, dapanangau chakupesh cha Pasak mud mwading chishankur, in kwilej end amwipula anch: “Kwisu ukimbina etu tuya tukakurijekin yakuda ya Pasak?” 13 Chad wayituma in kwilej end aad ni wayilej anch: “Yangany mu musumb, ni ukumusankanany ikundj umwing usendin nsab ya mem. Mulondulany, 14 ni kwawonsu kukwandamay, mulejany mwin chikumbu anch: ‘Mulej wipwil anch: “Kwisu kuda kapalakany* nikudila yakuda ya Pasak nau in kwilej am?”’ 15 Ndiy ukukulejany kapalakany kajim ka piur, kakweta yom yawonsu ni kakurijek. Rijekinany mwinamwa yakuda ya Pasak.” 16 Chawiy in kwilej aya, ni pandamau mu musumb, atana yom yawonsu mud mwayilejau, ni arijeka Pasak.

17 Chikwazweka urel, Yesu washika nau in kwilej 12. 18 Pading pashichau ku tebur oku akat kuda, Yesu walonda anch: “Nikulejinany chakin anch, umwing wa pakach pen udila pamwing niyamam ukwimpan.” 19 Awiy ova ushon ni asambish kumwipul umwing ku umwing anch: “Kadap am, kimwawiyap? 20 Ndiy wayakula anch: “Ud umwing wa pakach penen 12, utekina chikas chend pamwing niyamam mu chibakud. 21 Mulong Mwan a muntu ukat kuya kwend,* mud mwafundau piur pend, pakwez riyind kud muntu ukumupana Mwan a muntu! Chafanyina kwikal chiwamp nakash anch muntu winou kavadikap kwend.”

22 Ni pading padandamedinau kuda, wanona mukat, wit chiyukish cha Nzamb, waubukon, wayinkish in kwilej end, ni walond anch: “Kwatany, winou umekeshin mujimbu wam.” 23 Ndiy wanona kand rupas, wamujikitish Nzamb, kupwa wayinkish in kwilej end, ni awonsu ana. 24 Ni wayileja anch: “Maar ma nviny minam mamekeshin mash mam, ‘mash ma manswik,’ makwichilau mulong wa antu avud. 25 Chakin kamu nikulejinany anch, kinikez kanap kand maar ma nviny minam djat ni pa dichuku dinikeza kana pamwing niyenen maar ma nviny masu mu Want wa Nzamb.” 26 Kwinsuden, kupwa kwa kuwang miminy ya kushiman, aya ku Mukandu wa Mitond ya Oliv.

27 Chad Yesu wayileja anch: “En awonsu ukwipwakalany, mulong afundin anch: “Nikez kamubul kafung, ni amikoku akez kupalangan.’ 28 Pakwez panikuvumbuka,* nikez katakelaku kurutu kwenen mu Galaliya.” 29 Pakwez Pita wamwela anch: “Ap anch akwetu awonsu akwipwakal, am nikwipwakalap.” 30 Chad Yesu wamwakula anch: “Nikulejin chakin kamu anch, nlel, uchuku winou, kurutu kwa chikalambol kutend tupamp twaad, ey ukwintun tupamp tusatu.” 31 Pakwez Pita wadandamena kulond anch: “Ap anch nifanyidin kufa pamwing niyeyey, nikukutunap ap pakemp.” In kwilej akwau awonsu niyau alonda kand mwamu.

32 Chawiy ashika kwi ndond yitazukinau anch Getiseman, ni Yesu wayileja in kwilej end anch: “Shakamany pinap panikimbina kulembil.” 33 Ndiy wamusenda Pita, Yakobu, ni Yohan, chad wasambisha kwov ushon nakash ni kurumbangan mu manangu. 34 Ndiy wayileja anch: “Novil ushon nakash, ushon wa rufu. Shalany pinap ni chishany ku mes.” 35 Ndiy wendaku pakemp mwamu, was manungun ni walembil, chakwel anch chiswapel, chikokujol* chinech chisutin kulemp ni ndiy. 36 Walond kand anch: “Abba,* Tatuku, yom yawonsu yiswapel kud ey; sutish rupas riner kulemp niyamam. Chawiy kangal chisadik mud munisotila am, pakwez mud muusotila ey.” 37 Pachirikay kuyital in kwilej end, wayitana alalang kal tul, chad wamwel Pita anch: “Simon, ulel? Ov, ukwetap usu wa kuchish ku mes mu saa umwing? 38 Dandamenany kuchish ku mes ni kulembil chisu chawonsu, chakwel kangal wawany mu choziu. Chakin kamu, muchim usotil* kusal yom yiwamp, pakwez mujimbu uziyin.” 39 Ndiy wachirika kand kulembil, ni walond mazu mawiy mamwing. 40 Chad wachirika kand kapamp kakwau, wayitan in kwilej end alalang kal tul, mulong ku mes kwading kuyilimin, ni kamanap chom cha kumwakul. 41 Ndiy wachirika kapamp ka chisatu wayel anch: “Pa chisu mud chinech, en ulelany ni kwiswedish! Kwapwa kal! Talany! Chisu cha kumupan Mwan a muntu mu makas ma akayitil chawanyin kal. 42 Tumbukany tuyany. Talany! Muntu ukwimpana wasej kal piswimp.”

43 Pading pachiday kulond, kukashimuk Yudas, umwing wa in kwilej 12 washika, weza ni chisak cha antu ading akweta jimpak ja misamun ni mitond, ayituma kud amakurump a in kupesh, alej a yijil ni amakurump. 44 Chad mwin kumupan wayileja chijingidij chikusadinay, ni walond anch: “Muntu mwawonsu nikubwikatijana* nend, ndiy winawa; mukwatany ni umulamangany kamu nawamp.” 45 Ndiy waya kamu kapamp kamwing kuday Yesu ni wamwel anch: “Rabi!” chad wamubwikata kwa chirungul. 46 Chawiy amukwata Yesu ni amulam ku makas. 47 Pakwez umwing wa antu ading iminya kwinakwa wapurila mpak yend ya musamun, wamubul kashalapol wa mwin kupesh mujim ni wamukatul ditu. 48 Chad Yesu wayipula antu awonsu ading pinapa anch: “Ov, wezinany kwinkwat nich jimpak ja misamun ni mitond mud nid mwij? 49 Machuku mawonsu nading kukufundishany mu tempel, pakwez en kiwankwatanyap bwat. Chawiy yom yiney yashiken kal mulong wa kuwanyish Mifund.”

50 Chad in kwilej awonsu amusha ni achin mau. 51 Nsand umwing wading udjita ching kusu disun da ndand muwamp wading umulondwil Yesu, awiy akimba kumukwat, 52 pakwez washa disun dend, wachin mau kanzikis.*

53 Awiy amutwala Yesu kwa mwin kupesh mujim, ni amakurump a in kupesh awonsu, amakurump nau alej a yijil akumangana kwinikwa. 54 Pakwez Pita wading ukat kumulondwil palemp, djat ni pashikinay mu dibur da mwin kupesh mujim; chad washakama nau atulam a chikumbu, wasambish kwot kasu kading kakweta muzuzu nakash. 55 Chad amakurump a in kupesh ni chisak chawonsu cha in Sanedrin ading akat kukimb uman mulong wa kumufish nich Yesu chakwel amujip, pakwez kamanap. 56 Antu avud apana uman wa makasu piur pa Yesu, pakwez uman wau wadingap ukwatijadina. 57 Chikwau kand, antu amwing atumbuka apan uman wa makasu piur pend anch: 58 “Twamuteshin ukat kulond anch: ‘Am nikubumwon tempel winou watungau nich makas ma antu, ni nikutungiril mukwau mu machuku masatu, wakadau kutung nich makas ma antu.’” 59 Pakwez ap pa mulong winou, uman wau wadingap ukwatijadina.

60 Chawiy mwin kupesh mujim watumbuka mukach mwau ni wamwipul Yesu anch: “Ov, ukwetap kwey dizu da kwakul? Yom ik yikufundidinau antu inay?” 61 Pakwez wanineta zoong, ni kamwakulap dizu ap dimwing. Mwin kupesh mujim wamwipula kand anch: “Yeya Kristu Mwan a Nzamb Utumbila?” 62 Kupwa Yesu wamwakula anch: “Yama; ni ukumumanany Mwan a muntu ushich ku chikas cha katatuku cha dikand ni ukat kwez mu madj ma mwiur.” 63 Chad mwin kupesh mujim wapola masun mend ni walond anch: “Ov, tukwet kand kuswir kwa atuman akwau? 64 Wateshany kal mutapu wamusaalay kal Nzamb. Ov, en utonginany nchik?”* Antu awonsu amufisha nich anch chifanyidin kumujip. 65 Ni antu amwing asambisha kumuchidin mat, amubwik pa mes, asambish kumubul yinkany ni kumwel anch: “Tuleja! Nany wakubula kal?” Kupwa kwa kumubul, atulam amusenda.

66 Chad padingay Pita mu dibur, mband umwing wading kashalapol wa mwin kupesh mujim weza. 67 Pamumanay Pita ukat kwot kasu, washinshakesha kumutal ni wamwel anch: “Ey niyey wading pamwing ni Yesu wa ku Nazaret.” 68 Pakwez Pita watuna, ni walond anch: “Nimwijap muntu winou ni novilap kurumburik kwa yom yiulondina,” chad waya ku chis cha kwandamin mu chipang. 69 Kashalapol mband wamumana kand kwinakwa ni wayilej antu ading iminya anch: “Ikundj winou ud umwing wa pakach pau.” 70 Ndiy watuna kand kapamp kakwau. Chipasuta chisu chikemp, antu adingay nend amwela kand anch: “Chakin kamu, ud umwing wa antu inay, mulong ud mwin Galaliya.” 71 Pakwez watuna ni kuchip anch: “Kinimwijap muntu winou ulondinanya!” 72 Pa chisu chinacha kamu, chikalambol watenda kapamp ka kaad, ni Pita wavurika yom yamulejau kud Yesu anch: “Kurutu kwa chikalambol kutend tupamp twaad, ey ukwintun tupamp tusatu.” Ndiy waziya nakash ni wasambish kudil.