Evanjil Wafunday Mateu
11 Papwishay Yesu kuyinkish in kwilej end 12 mbil jinej, wadokala kwinakwa mulong wa kuya kufundish ni kulejan mu misumb yau.
2 Pakwez pateshay Yohan mu rukan piur pa yom yading yisadinay Kristu, wayituma in kwilej end 3 chakwel amwipul anch: “Ov, yey wada Ufanyidina Kwez, anch tufanyidin bil kuchingel mukwau?” 4 Yesu wayakula anch: “Yangany umulejany Yohan yom wateshanya kal ni kuman. 5 Katat amputames akat kuman, ayilim akat kwend, in musong wa mak akat kuyerik, atujikamatu akat kutesh, afu akat kuvumbuk, ni atuzwendj akat kuyilej rusangu ruwamp. 6 Wayuk kwend muntu wakad kwidjidjek* mulong wamam.”
7 Pading payilau in kwilej a Yohan, Yesu wasambisha kuyilej antu piur pa Yohan anch: “Yom ik wayanganya kutal mwi mpay? Ov, disuku danyikeshangau kud rinkind? 8 Chad wayangany kutal yom ik? Ov, wayangany kumutal muntu udjita masun ma ufun? Mulong antu adjiting masun ma ufun ashiching mu yipang ya ant. 9 Chad mulong wak wayanganya? Ov, wayangany kumutal muprofet? Mwaning, nikulejinany chakin, ud muntu mujim nakash kusutamu muprofet. 10 Afunda piur pend anch: ‘Tal! nitumin muruu* wam kurutu kwey,* ndiy ukurijeka njil kurutu kwey!’ 11 Nikulejinany chakin kamu, pakach pa antu awonsu,* kandikal kumekanap muntu ap umwing uda mujim nakash kumusutamu Yohan Mubatish, pakwez, muntu uda mukemp mu Want wa mwiur ud mujim nakash kumusutamu ndiy. 12 Kudosh pa chirung cha Yohan Mubatish kushik ni katat, Want wa mwiur chawiy chom chisadinau antu usu nakash wa kutambul, ni antu akata kwikasikesh nakash akat kuwikal nich. 13 Mulong Aprofet awonsu ni Chijil, alejana uprofet kushik ku Yohan, 14 ni anch ukatinany kwitiy chom chinech, ndiy kamu ‘Eliya ufanyidina kwez.’ 15 Muntu ukweta matu ma kutesh, atesha.
16 “Ov, antu a chirung chinech nikutwish kuyilakej nau anany? Ad mud an akemp ashicha pa sok ni ayitazukina akwau in kusengan nau, 17 ni kuyilej anch: ‘Twakupepinangany mishiy, pakwez wajanganyap maj, twakuwanginangany miminy ya chidil, pakwez en wadilanganyap ni kwiyasol pansh.’ 18 Chilik chimwing, pezay Yohan walika kuda ni kuna, pakwez antu alonda anch: ‘Ukwet chilembil.’ 19 Pezinay Mwan a muntu, ndiy ukat kuda ni kuna, pakwez antu akat kulond anch: ‘Talany! Ndiy upumbin kuda ni kuna, ud murund wa in kulambwish yitad ni akayitil.’ Pakwez, manangu makat kumekan anch mad makin kusutin yisalijok* yau.”
20 Kupwa wasambisha kuyipup antu ading ashicha mu misumb mwasadinay yilay yivud, mulong alika kukarumuk: 21 “Riyind kud en in Korazin! Riyind kud en in Betsayida! Mulong yilay yakusadinanyau, anch yasadikina ku Tir ni ku Sidon, ing antu au akarumuka kal pakur kusutin kudjal yinzany ni kushakam mu maut. 22 Pakwez nikulejinany anch, pa Dichuku da Dirumburish chikwikal chiswapela kud in Tir ni in Sidon kupandakanamu en. 23 Niyen in Kapernaum, ov, utonginany anch akez kakuzambwishany djat ni mwiur? Ukushirikany djat ni mwi Nzay,* mulong anch yilay yakusadinanyau yasadikina ku Sodom, ing musumb winou uchidaku kushik ni nlel unou. 24 Pakwez nikulejinany anch, pa Dichuku da Dirumburish, chikwikal chiswapela kud in Sodom kupandakanamu en.”
25 Pa chisu chinacha, Yesu walonda anch: “Tatuku, Mwant wa diur ni divu, nikutumbishin kurutu kwa antu, mulong ey wajindjika yom yiney kud in manangu ni antu ilejina, ni wayimekesha kud an akemp. 26 Mwaning, Tatuku, mulong ey wamana anch chiwapin kusal mwamu. 27 Tatukwam wanginkishin kal yom yawonsu. Kwikil muntu umwija Mwan nawamp kudoshaku Tatuku, ni kwikil muntu umwija Tatuku nawamp kudoshaku Mwan ni muntu mwawonsu ukatinay Mwan kumwijikish kud ndiy. 28 Ezany kud am, en awonsu uziyinanya ni usendinanya yisend yilimina, ni am nikez kakwambulany. 29 Itwikany mpand yam ni ilejinany kud am, mulong am nid mwin kwitudish ni mwin kwikepish mu muchim, chad ukwiswedishany. 30 Mulong mpand yam yiswapel kwitwik, ni chisend cham chipipel.”