Evanjil Wafunday Marko

6 Yesu wadokala kwinakwa waya mu musumb wapaminay, ni in kwilej end amulondula. 2 Pashika dichuku da Sabat, wasambisha kufundish mu sinagog, antu amutesha ashimwoka ni kulond anch: “Ov, muntu winou udoshin yom yiney kwisu? Mulong wak amwinkisha manangu mud minam, ni mulong wak amwinkisha usu wa kusal yilay* mud yiney? 3 Ov, kindiyap nsong a mabay, mwan a Mariy ni mwanamakwend a Yakobu, Jozef, Yudas, ni Simon? Ni ampanyend tushiching nau kunoku, kimwawiyap? Chawiy asambisha kwipwakal mulong wendendiy. 4 Pakwez Yesu wayileja anch: “Muprofet amulimishining kwawonsu, kudoshaku mu ul wend, kud anamakwend ni mu dijuku* dend.” 5 Chawiy kasalap yilay* yivud kwinikwa, woka kusu ayej akemp kusutin kuyazwok makas. 6 Ndiy washimwoka mulong antu ading aburedin ritiy. Ni waya mu kufundish mu mal ma piswimp.

7 Ndiy wayitazuka in kwilej end 12, wasambish kuyitum aad aad, ni wayinkish ulabu wa kudosh ayilembil. 8 Chikwau kand, wayikangesha kusend chom ap chimwing mulong wa weny, ching kusu mukombu—kangal asend mukat, ap ntuku wa kusendin yakuda, ap nfalang*— 9 pakwez wayileja kudjal yisapat ni kulik kusend masun maad.* 10 Wayileja kand anch: “Anch muntu wakwakany ku chikumbu chend, shakamany kwinikwa djat ni piukudokalanya. 11 Kwi ndond kwawonsu kukulikau kukwakany ap kukuteshany, piukudokalanyaku, kukumunany rufunfut ra mu yidjatil yen chakwel wikala uman kud awiy.” 12 Chawiy aya kuyilej antu chakwel akarumuk, 13 awiy adosha ayilembil avud, ayipala ayej avud many ni kuyok.

14 Chad Mwant Herod watesha nsangu jinej, mulong dijin da Yesu dijikana nakash, ni antu alondang anch: “Yohan Mubatish amuvumbulang kal, chawiy chikwetay ulabu wa kusal yilay yiney.” 15 Pakwez akwau alondang anch: “Ndiy Eliya.” Akwau niyau alondang anch: “Ud muprofet mud aprofet akwau a pasak.” 16 Pakwez pateshay Herod mwamu, walonda anch: “Yohan Mubatish nakatwila mutu amuvumbulang kal.” 17 Mulong Herod amwinend watuma antu chakwel amukwata Yohan, wamukasikish, chad wamutek mu rukan mulong wa Herodias, mband wa mwanamakwend Filip, mulong Herod wamwata mband winou. 18 Mulong Yohan wamulejang Herod anch: “Ufanyidinap kumwat mband wa mwanamakwey.” 19 Pakwez Herodias wamulamina rukuny ni wading ukimbin kumujip, chad katwishap. 20 Mulong Herod wamwovang Yohan wom, wading wij anch ud muntu utentamina ni utumbila, chawiy chamuchidijangay. Chisu chawonsu chamuteshangay, kamanangap chom cha kusal, pakwez wadandamenang kumutesh nich musangar.

21 Pakwez Herodias wamana chisu chiwamp pa dichuku da musambu wa kuvurik kuvadik kwa Herod, Herod wayitazuka ayilol end, amakurump a amasalay, ni antu ajim a mu Galaliya. 22 Mwan mband wa Herodias wandama waja maj, wamusangaresha Herod ni antu atazukay,* chawiy mwant wamwela mwan mband anch: “Ngita chom chawonsu ukatina, chad am nikukwinkishach.” 23 Wamuchipina kand anch: “Nikukwinkish chom chawonsu ukwingita, ap chibar cha want wam.” 24 Chawiy wabudika ni wamwipul makwend anch: “Nita chom ik?” Makwend wamwakula anch: “Mutu wa Yohan Mubatish.” 25 Pawiy kamu pinapa, changadim wachirika kud mwant wamwit anch: “Nikimbin winginkisha pinap mutu wa Yohan Mubatish pa dilong.” 26 Ap anch chom chinech chamunenganesha mwant nakash, pakwez katwishap kulik mulong wa kuchip kwachipay kurutu kwa antu awonsu atazukay.* 27 Pawiy kamu pinapa, mwant wamutuma kalam wend umwing ni wamulej kumuletin mutu wa Yohan. Chawiy kalam waya mu rukan wamukatul Yohan mutu, 28 ni waleta mutu pa dilong. Wamwinkishau changadim, ni changadim wamwinkishau makwend. 29 Pateshau in kwilej a Yohan rusangu riner, aya asend mujimbu wend ni aujik mwi nzay.*

30 Atwimbuy eza amunyimburik Yesu, asambish kumulej yom yawonsu yasalau ni yafundishau. 31 Ndiy wayileja anch: “Ez tuyany kwi ndond ya ayinetu, chakwel wiswedishanaku pakemp. Mulong kwading antu avud, ay in kuya, ay in kwez, chawiy kamanap chisu cha kuda. 32 Chad andama mu waat, aya kwi ndond ya ayinau. 33 Pakwez antu ayimana akat kuya, ni antu akwau avud ijika, chawiy antu adokala mu misumb yawonsu aya mau ni asambel kushik kurutu kwa awiy. 34 Pashirikay mu waat, wamana chisak chijim cha antu, ni wayovila riy, mulong ading mud amikoku akad kafung. Chawiy wasambisha kuyifundish yom yivud.

35 Mulong chisu chading chayang kal nakash, in kwilej end eza kud ndiy ni amwel anch: “Kunoku kud kulemp, ni muten waya kal. 36 Yilika antu aya ku mal ni ku makunku ma piswimp chakwel alandap yakuda yau.” 37 Yesu wayileja anch: “En yinkishany yakuda.” Pakwez awiy amwakula anch: “Ov, tuya tulanda mikat ya a denye* 200 chakwel tuyinkish ada? 38 Ndiy wayipula anch: “Ukwetany mikat yinch? Yangany bil utalany!” Chayau atal, eza amulej anch: “Tukwet mikat yitan ni ansh aad.” 39 Ndiy wayileja antu awonsu kushakam pa masuku* mu yisak yisak. 40 Chawiy ashakama mu yisak yimwing antu 100 ni yikwau antu 50. 41 Chad watambula mikat yitan ni ansh aad, watal mwiur ni wit chiyukish cha Nzamb. Ni kupwa kwa kukatwol mikat, wayipana kud in kwilej end, chakwel in kwilej end ayangan kud antu, ni wangana kand ansh aad kud antu awonsu. 42 Chawiy antu awonsu ada ikut, 43 chad izwisha yimpay 12 ya yikunku ya mikat yashalap, pakad kuchind ansh. 44 Amakundj ada mikat yiney ading 5 000.

45 Ni pakad kulab, wayileja in kwilej end kwandam mu waat ni asambela kuya ushad ukwau wa karung, ku Betsayida, pashalay ndiy mulong wa kuyipalangesh antu. 46 Chapwishay kukanijan nau antu, ndiy waya ku mukandu mulong wa kulembil. 47 Chikwajala uchuku, waat wading washikang kal pakach pa karung, pakwez Yesu washala amwinend kwi mpat. 48 Chad wayimana akat kurish kwawish, mulong rinkind wading uyichirishin kwinyim, pakwez chikwashika piswimp ni kucha,* Yesu weza kud awiy ukat kwend pa mem, chad ndiy wasala mud ukimbin kuyisut. 49 Pamumanau ukat kwend pa mem, awiy atonga anch: “Chinech chid chishimushimu!” Chad awiy atoya. 50 Mulong awonsu amumana ni azazata. Pakwez kapamp kamwing, Yesu wayela anch: “Ikasikeshany! Yama, kangal wovany wom.” 51 Kupwa wandama mu waat mwadingau, ni rinkind waduta. Chawiy ashimwoka nakash, 52 kwovap kurumburik kwa chilay cha mikat, mulong michim yau yading yichinchikin pa kutesh.

53 Paukau karung, ashika mwi ngand ya Genesaret ni akas waat piswimp ni kwinakwa. 54 Pakwez pabudikau mu waat, antu amujingunina Yesu. 55 Aya mau ayijikish antu a mwi ngand yinaya yawonsu ni asambish kulet ayej pa maulal, ni ayitwalang kwi ndond kwawonsu kwadingay Yesu. 56 Payangangay mu mal, mu misumb ap mu makunku, antu ayitwalang ayej pa sok, ni amulembijekang chakwel ayilik akwata ku rizez ra masun mend.* Ni ayej awonsu apukunangaku ayerika.