Evanjil Wafunday Luka

22 Chad Musambu wa Mikat Yakad Chivish watazukangau anch Pasak wading ukat kusej piswimp. 2 Amakurump a in kupesh nau alej a yijil ading akat kukimb mutapu uwamp wa kumujip Yesu, mulong ading ovil wom wa antu. 3 Chad Satan wamwandama Yudas, watazukangau anch Isakariyot, ndiy wading umwing wa atwimbuy dikum ni yaad (12), 4 waya kwambamb nau amakurump a in kupesh ni atulal a tempel piur pa mutapu wa kumupan Yesu kud awiy. 5 Asangara nakash ni ovijana kumwinkish nfalang.* 6 Niyend witiya ni wasambisha kukimb mutapu uwamp wa kumupan pakad chisak cha antu kwikalaku.

7 Dichuku da musambu wa Mikat Yakad Chivish dashika, dawiy dichuku dafanyinangau kupan chakupesh cha Pasak; 8 chawiy Yesu wamutuma Pita nend Yohan ni wayilej anch: “Yangany uturijekinany yakuda ya Pasak.” 9 Awiy amwipula anch: “Kwisu ukimbina etu tuya tukakurijekinay?” 10 Ndiy wayakula anch: “Teshany! Piukwandamanya mu musumb, ukumusankanany ikundj umwing usendin nsab ya mem. Mulondulany djat ni mu chikumbu mukwandamay. 11 Ni mulejany mwin chikumbu anch: ‘Mulej ukwipwil anch: “Kwisu kuda kapalakany* nikudila yakuda ya Pasak nau in kwilej am?” ’ 12 Ni ikundj winou ukukulejany kapalakany kajim ka piur, kakweta yom yawonsu. Rijekinany mwinamwa yakuda ya Pasak.” 13 Chawiy aya ni atana yom yawonsu mud mwayilejay, ni arijeka Pasak.

14 Chawiy pawanyina chisu, Yesu washakama ku tebur pamwing nau atwimbuy. 15 Ndiy wayileja anch: “Am nad nisotin nakash kuda yakuda ya Pasak yiney pamwing niyenen kurutu kwa kuman mar; 16 mulong nikulejinany anch, nikudap kand yakuda yiney djat ni payikuwanyina mu Want wa Nzamb.” 17 Kupwa kwa kutambul rupas, wamujikitisha Nzamb ni walond anch: “Kwatany ni nangany en awonsu, 18 mulong nikulejinany anch, kusambish kamu katat, kinikez kanap kand maar ma nviny minam djat ni pakwezina Want wa Nzamb.”

19 Chikwau kand, wanona mukat, wamujikitish Nzamb, waubukona, wayinkish in kwilej end ni walond anch: “Winou umekeshin mujimbu wam ukupanau mulong wenen. Dandamenany kusal mwamu mulong wa kwinvurik am.” 20 Wasala kand chilik chimwing piur pa rupas, papwishau kuda yakuda ya urel,* walonda anch: “Rupas riner rimekeshin mansuk masu mimedina pa mash mam, makwichilau mulong wenen.

21 “Pakwez talany! mwin kwimpan ud* pamwing niyamam ku tebur. 22 Mulong, chakin, Mwan a muntu ukat kuya kwend mud mutapu wasambelau kutenchik; pakwez riyind kud muntu ukumupana!” 23 Chawiy asambisha kwipulijan mulong wa kwijik nany pakach pau wading ukimbina chakin kamu kusal chom mud chinech.

24 Pakwez, asambisha kand kutadikijan nakash mulong wa kwijik nany wadinga mujim nakash pakach pau. 25 Pakwez ndiy wayileja anch: “Ant akat kuyikel michid, ni antu akweta ulabu pa michid yiney akat kuyitazuk anch in kukwash antu. 26 Pakwez en ufanyidinanyap kwikal mud awiy. Chawiy muntu uda mujim nakash pakach pen ikal mud mwan mukemp, ni muntu utakedina ikal mud mwin kukusadinany. 27 Mulong nany uda mujim nakash, ov, muntu udila* anch usadina mudimu? Kadap muntu udila?* Pakwez am nid mukach mwen mud muntu ukusadidinanya mudimu.

28 Pakwez en walamatinany kud am* mu mar mam; 29 niyam nasuk kal mansuk mulong wa want niyenen mud mutapu mwasukay Tatuku mansuk niyamam, 30 chakwel wez udany ni kuna ku tebur wam mu Want wam, ni kushakam pa matand mulong wa kurumburish michid dikum ni yaad (12) ya Isarel.

31 “Simon, Simon, tesh! Satan witin kal chakwel akupepany en awonsu mud tidiku. 32 Pakwez nakulembilang ey chakwel kangal ritiy rey raziy, niyey, anch kamu wachirik, yikasikesha akadivar ney.” 33 Chad Pita wamuleja anch: “Nsalejam, am nikutwish kuya ney mu rukan ni kufa ney.” 34 Pakwez Yesu wamwakula anch: “Pita, nikulejin kamu anch, kurutu kwa chikalambol kutend nlel, ey ukwintun tupamp tusatu anch wingijap.”

35 Wayileja kand anch: “Pinakutumanya pakad ntuku wa kusendin nfalang ap yakuda ni yisapat, ov, kud chom waburenanya?” Awiy amwakula anch: “Bwat!” 36 Kupwa wawejinaku kand anch: “Pakwez katat, mwawonsu ukweta ntuku wa nfalang amusenda, chilik chimwing ni ukweta ntuku wa kusendin yakuda, ni mwawonsu uburedina mpak ya musamun alandisha disun dend* chakwel alandap yimwing. 37 Mulong nikulejinany anch yom yafundau yifanyidin kuwanyin pad am, yom yilondina anch: ‘Amuchinda pakach pa antu akata kujip chijil.’ Mulong mazu minam makat kuwanyin kamu pad am.” 38 Awiy amuleja anch: “Nsalejetu, tal jimpak jaad ja musamun.” Ndiy wayakula anch: “Jiwanyidin kwau.”

39 Padokalay pinipa, waya ku Mukandu wa Mitond ya Oliv mud mwading chaku chend, niyau in kwilej end amulondula. 40 Pashikay pinapa, ndiy wayileja anch: “Lembilany chakwel kangal wawany mu choziu.” 41 Ndiy wayisha, waya palempaku mwamu,* was manungun ni wasambish kulembil, 42 ni kulond anch: “Tatuku, anch ey usotin, sutish rupas riner kulemp niyamam. Chikalap nchik mwamu, kangal rusot ram rasadik, pakwez reyey risadik.” 43 Kupwa mwangel umwing wadokala mwiur wamumekena ni wamukasikesh. 44 Pakwez mulong wading unenganen nakash, chawiy walembila kand chipandakena; ni masuril mend mikala mud manans ma mash madjila pansh. 45 Papwishay kulembil, watumbuka ni wachirik kud in kwilej, wayitana alalang kal, mulong ading aziyang kal nich ushon. 46 Ndiy wayela anch: “Mulong wak ulelany? Tumbukany ni dandamenany kulembil, chakwel kangal wawany mu choziu.”

47 Pading pachiday kulond, kukashimuk chisak cha antu cheza, ading achitakedin kud ikundj umwing utazukinau anch Yudas, umwing wa atwimbuy dikum ni yaad (12), ni wamusejina Yesu mulong wa kumubwikat. 48 Pakwez Yesu wamwela anch: “Yudas, ov, umupanin Mwan a muntu mu kumubwikat?” 49 Pamanau antu ading iminya piswimp nend yom yikimbina kusadik, amwipula anch: “Nsalejetu, ov, tufanyidin kuyitap ni jimpak ja musamun?” 50 Umwing wa pakach pau wamutapa kashalapol wa mwin kupesh mujim ni wamukatul ditu da katatuku. 51 Pakwez Yesu walonda anch: “Likany, kwapwa kal.” Kupwa wakwata ditu da kashalapol ni wamwok. 52 Chad Yesu wayipula amakurump a in kupesh, atulal a tempel ni amakurump eza kumukwat anch: “Ov, wezinany kwinkwat nich jimpak ja misamun ni mitond mud nid mwij? 53 Pinading niyenen machuku mawonsu mu tempel, en kiwankwatanyap bwat. Pakwez chinech chid chisu chen ni cha usu wa mididim.”

54 Kupwa amukwata aya nend, ni amutwala ku chikumbu cha mwin kupesh mujim; pakwez Pita wading uyilondwil palemp. 55 Pakishau kasu mukach mwa dibur ni kushakam pamwing, Pita niyend wading ushich pakach pau. 56 Pakwez mwilomb umwing pamumanay ushich ku chitokish cha kasu, wamutala neeng ni walond anch: “Ikundj ou niyend wading pamwing ni Yesu.” 57 Pakwez Pita watuna ni walond anch: “Mband ey, am nimwijap muntu winou.” 58 Kupwa kwa chisu chikemp, muntu mukwau wamumana ni walond anch: “Niyey ud umwing wa pakach pau.” Pakwez Pita wamwakula anch: “Ikundj ey, nidap wa pakach pau.” 59 Kupwa, kwasuta piswimp saa umwing, ikundj umwing wasambisha kujikish nakash anch: “Chakin kamu, muntu winou niyend wading pamwing ni Yesu, mulong ud mwin Galaliya!” 60 Pakwez Pita wamwakula anch: “Ikundj ey, niteshinap kwam kurumburik kwa yom ulondina.” Kapamp kamwing, pading pachiday kal kulond, chikalambol watenda. 61 Chad Nsalejetu wakarumuka, wamutal Pita neeng ni Pita wavurika mazu ma Nsalejetu mamulejay anch: “Kurutu kwa chikalambol kutend nlel, ey ukwintun tupamp tusatu.” 62 Ndiy wabudika pol ni wadila nakash.

63 Chad antu amukwata Yesu asambisha kumusip ni kumubul; 64 ni kupwa kwa kumubwik pa mes, asambisha kumwel anch: “Tuleja! Muntu ik wakubula kal?” 65 Ni amulonda yom yikwau yivud ya masaal.

66 Ni chikwacha, chisak cha amakurump a antu, pamwing nau amakurump a in kupesh, ni alej a yijil, akumangana pamwing, chad amutwala Yesu mu chikumbu chau cha dirumburish* ni amwel anch: 67 “Anch yey Kristu, tuleja.” Pakwez Yesu wayakula anch: “Ap anch nakulejany, ukwitiyijanyap kwen. 68 Chikwau kand, anch nakwipulany, en ukwakulanyap kwen. 69 Pakwez, kudosh kamu katat, Mwan a muntu ukushakam ku chikas cha katatuku cha dikand cha Nzamb.” 70 Chad awonsu amwipula anch: “Komb ey ud Mwan a Nzamb?” Ndiy wayakula anch: “Yen ayinen ulondinanya mwamu.” 71 Awiy alonda anch: “Ov, tukwet kand kuswir kwa uman ukwau? Mulong twiteshinap kal ayinetu mu kan mwend amwinend.”