Mukand wa Kasatu wa Yohan
1 Yam ipal ikundj,* kud Gayus, mukatish, unikatina chakin kamu.
2 Mukatish, nilembil chakwel yom yawonsu yidandamen kwend nawamp kud ey ni wikal ni ukash uwamp wa mujimbu, mud mutapu uda* katat. 3 Mulong novil musangar nakash pezinau akadivar ni kupan uman piur pa uyakin ulamina, anch udandamedin kwendin mu uyakin. 4 Kwikil chom chikwau chinsangareshina nakash* kusutamu ech: Kutesh anch anam adandamedin kwendin mu uyakin.
5 Mukatish, umekeshin kushinshaman kwey mu yom usadina mulong wa akadivar, ap anch uyijap. 6 Apanin uman piur pa rukat rey kurutu kwa chikumangen. Yikwasha amboku mu mutapu umusangareshina Nzamb mu weny wau. 7 Mulong chid mulong wa dijin dend kwawiy kwabudikinau, pakad kutambul chom ap chimwing kud antu a michid. 8 Chawiy tufanyidin kuyak nawamp antu a mutapu winou, chakwel twikal ambay a mudimu mu uyakin.
9 Nafundina chikumangen yom kanang, pakwez Diyotrefes, ukatina kwikal ni ndond ya kusambish pakach pau, kitiyinap chom ap chimwing chidokila kud etu nich kalimish. 10 Chawiy anch nez, nikulejan patok yom yisadinay mu kupalangesh nsang jiyimp piur petu.* Kimedinap kusu pa yiney, ulikin kand kuyak akadivar nich kalimish; ni antu akatina kuyak, ukat kukimb kuyikangesh ni kuyopat mu chikumangen.
11 Mukatish, kangal wimburij yom yiyimp, pakwez imburij yom yiwamp. Muntu usadina yom yiwamp udokil kud Nzamb. Muntu usadina yom yiyimp kand kal amuman Nzamb. 12 Akadivar awonsu alondin yom yiwamp piur pa Demetriyus, ni uyakin awinau upanin uman piur pend. Niyetwetu in tupanin uman piur pend, ni ey wij anch uman tupanina ud wakin.
13 Nading nikwet yom yivud ya kukufundin, pakwez nikatinap kudandamen kukufundinay nich mushiy ni ink.* 14 Pakwez, nichingejin kukuman piswimp ap, ni tukwisamb mes ni mes.
El chisambu chikal ney.
Arund ada kunoku akulangwishin. Nlangwishinau arund ada kwinaku muntu ni muntu pa dijin dend.