Midimu ya Atwimbuy

23 Paul wayitala in Sanedrin neeng ni wayel anch: “Amakundj en, akadivar, am nashakamin nich kom kada kamu zwang kurutu kwa Nzamb djat ni nlel unou.” 2 Pateshay mwamu, mwin kupesh mujim Ananiyas wamuleja muntu wading wiminya piswimp ni Paul kumubul pa kan. 3 Chad Paul wamwela anch: “Nzamb ukukubul niyey, mwin rubabek ey.* Ov, ushich pinap mulong wa kwinrumburish kukwatijan ni Chijil, pakwez pa chisu chawiy chimwing ukat kujip Chijil chinech kusutin kupan mbil ya kwimbul?” 4 Antu ading iminya pinipa amwela anch: “Ov, umusaadin mwin kupesh mujim wa Nzamb?” 5 Chad Paul wayileja anch: “Akadivar, nadap kwam nija anch ud mwin kupesh mujim. Mulong afundin anch: ‘Ufanyidinap kumwel nyikel wa antwey yom yiyimp.’ ”

6 Chad pijikay Paul anch pakach pau, amwing ading Asadus ni akwau Afaris, watoya mukach mwa in Sanedrin anch: “Amakundj en, akadivar, niyam nid Mufaris, mwan wa Afaris. Anrumburishin mulong wa ruchingej ra divumbuk da afu.” 7 Palonday mwamu, Afaris nau Asadus asambisha kupwitamijan, ni chikumangen chaurika. 8 Mulong Asadus alondining anch kwikiling kwau divumbuk ap mwangel ap spiritu, pakwez Afaris itiyining* yom yiney yawonsu. 9 Chawiy kwalanka kanvundangesh mukash, ni alej a yijil amwing adinga mu chisak cha Afaris atumbuka piur ni asambish kulond nich chisum anch: “Etu tumenap kwetu chom chiyimp muday muntu winou, pakwez anch spiritu ap mwangel wambambang nend⁠—⁠.” 10 Mulong kupwitamijan kwapandakana nakash, kalal wa amasalay wova wom, mulong watonga anch akutwish kumuzanon Paul, chawiy wayileja amasalay kushirik chakwel amudosh pakach pau ni kumutwal mwi ndond mushichingau amasalay.

11 Pakwez uchuku walondulaku, Nsalejetu weza kud Paul ni wamwel anch: “Ikal utakamena! Mulong mud mutapu wapana kal uman wawonsu piur pamam mu Yerusalem, wawiy kand mutapu ufanyidina kupan uman mu Rom.”

12 Chikwacha pamanch, in Yuda asala dingumb ni achipa anch kakudap ap kuna chom ap chimwing anch kamujipinap Paul. 13 Mu dingumb dined mwading amakundj makum manying (40) ni kusut asala machip minam. 14 Amakundj inay aya kudau amakurump a in kupesh nau amakurump ayilej anch: “Etu awonsu twachipang kal anch* tukudap chom ap chimwing anch tumujipinap Paul. 15 Chawiy katat, en pamwing nau in Sanedrin ufanyidinany kumulej kalal wa amasalay anch akuletinanyay chakwel usalany mud ukimbinany kushinshikin mulong wend nawamp. Pakwez kurutu ashik, etu tukwikal kwaku mulong wa kumujip.”

16 Chad mwan ikundj wa mpanyend a Paul watesha mpung yakwatau, waya mau mwi ndond mushichingau amasalay ni wamulejamu Paul yom yiney. 17 Chad Paul wamutazuka mukurump wa amasalay umwing ni wamulej anch: “Mutwala nsand ou kuday kalal wa amasalay, mulong ukwet chom cha kumulej.” 18 Chawiy wamusenda, waya nend kuday kalal wa amasalay ni wamulej anch: “Paul, muntu wa rukan, wantazuk kal ni wanlej kal kukuletin nsand ou mulong ukwet chom cha kukulej.” 19 Kalal wa amasalay wamukwata ku chikas, waya nend kuns ni wamwipul anch: “Yom ik usotina kwinlej?” 20 Ndiy wamwakula anch: “In Yuda ovijanang kal kukwit ey mulong umupan Paul kud in Sanedrin damashik, chakwel asal mud akimbin kwijik yom yivud piur pa mulong wend. 21 Pakwez kangal wayitesh, mulong akwet amakundj makum manying (40) ni kusut amubataminang kal, ni achipang kal anch* kakudap ap kuna chom ap chimwing anch kamujipinap; ni pinap ad kwaku, achingedin kwau ey upana mbil.” 22 Chawiy kalal wa amasalay wamuleja nsand anch: “Kangal wamulejamu muntu ap umwing anch wanlej kal yom yiney.” Kupwa wamulika waya kwend.

23 Chad wayitazuka amakurump a amasalay aad ni wayilej anch: “Rijekany amasalay yitot yaad (200), in kwendish atubar makum sambwad (70), ni in kwas jinseu yitot yaad (200), mulong wa kuya ku Sezarey piswimp pa saa ya chidivu ya urel.* 24 Chikwau kand, murijekinany Paul atubar, mulong wa kumutwal mu diking kwa guverner Felikis.” 25 Chad wafunda mukand anch:

26 “Yam Kulod Lisiyas, kud ey Mwant Mujim, Guverner Felikis: Tambulany kulangwish! 27 Ikundj ou amukwatin kud in Yuda ni ad asotin kumujip, pakwez nayil mau pamwing nau amasalay am namukamunin, mulong nateshin anch ud mwin Rom. 28 Mulong nading nisotin kwijik mulong wada umufishinau nich, namutwadin kud in Sanedrin au. 29 Najinguninang anch amufundin kwau mulong wa yom yitadina Chijil chau, pakwez kwikil chom ap chimwing chifanyidinau kumujipin ap kumutek mu rukan. 30 Pakwez mulong angijikishin mpung yamukwatidinau ikundj winou, nakwatang mupak wa kukutuminay kapamp kamwing ni kuyilej antu amufundina alejan yom yimufishinau nich kurutu kwey.”

31 Chawiy amasalay amusenda Paul mud mwayilejau ni aya nend uchuku uchuku ku Antipatris. 32 Dichuku dalondulaku, amusha mu makas ma in kwendish atubar chakwel adandamen kuya nend, pakwez awiy achirika kwi ndond kushichingau amasalay. 33 In kwendish atubar ashika ku Sezarey, apan mukand kud guverner ni amuleta kand Paul kurutu kwend. 34 Chawiy watanga mukand ni wipula mulong wa kwijik mu provens wadokalay ni amuleja anch ud wa mu Silisiya. 35 Kupwa wamuleja anch: “Nikutesh nawamp mulong wey pakushikau antu akufundina.” Chad wayileja atulam kumulamin mu chipang cha* Herod.