Kujingunik kud Yohan
7 Kupwa kwa yom yiney, namana angel anying iminy ku makonk manying ma divu, ading alamin fe rinkind munying wa pa divu, chakwel kangal rinkind ap umwing atut pa divu ap pa karung ap pa mutond ap umwing. 2 Ni namana mwangel mukwau udokil kwingangel, ni wading ukwet chijingidij cha* Nzamb mwom; ni walonda nich dizu dikash kud angel anying inkishau ulabu wa kudisal divu nayimp ni karung, 3 anch: “Kangal wadisalany divu nayimp, ap karung ap mitond, kushik ni patukuyitekina atushalapol a Nzamb wetu yijingidij* pa jimpal jau.”
4 Chad natesha uvud wa antu awonsu atekau yijingidij: tunan chitot makum manying ni tunying (144 000), atekau yijingidij, adokala ku michid yawonsu ya an a Isarel:
5 Ku muchid wa Yuda tunan dikum ni twaad (12 000) atekau yijingidij;
ku muchid wa Ruben tunan dikum ni twaad (12 000);
ku muchid wa Gad tunan dikum ni twaad (12 000);
6 ku muchid wa Azer tunan dikum ni twaad (12 000);
ku muchid wa Nefitali tunan dikum ni twaad (12 000);
ku muchid wa Manase tunan dikum ni twaad (12 000);
7 ku muchid wa Simeyon tunan dikum ni twaad (12 000);
ku muchid wa Levi tunan dikum ni twaad (12 000);
ku muchid wa Isakar tunan dikum ni twaad (12 000);
8 ku muchid wa Zabulon tunan dikum ni twaad (12 000);
ku muchid wa Jozef tunan dikum ni twaad (12 000);
ku muchid wa Benjamin tunan dikum ni twaad (12 000) atekau yijingidij.
9 Kupwa kwa yom yiney, namana chisak chijim cha antu, kwikil muntu ap umwing watwisha kuyichind, ading adokil mu jingand jawonsu, ku michid yawonsu, ku antu awonsu, ni ku mazu mawonsu.* Ni ading iminy kurutu kwa ditand ni kurutu kwa Mwan a Mukoku, adjit ankandj alemp atok; ni ading akwet milal ya mabu mu makas. 10 Chad adandamena kutoy anch: “Dipandish detu didokil kud Nzamb wetu, ushicha pa ditand, ni kud Mwan a Mukoku.”
11 Angel awonsu ading anyingumukin ku ditand ni amakurump ni yitang yinying yikweta mwom, chad asa manungun* kurutu kwa ditand ni amwifukwila Nzamb, 12 ni kulond anch: “Amen! Chifanyidin kushiman, ni uyaj, ni manang, ni kujikitish, ni kalimish, ni ukash, ni usu yikal kud Nzamb wetu chikupu ni chikupu. Amen.”
13 Chad mukurump umwing wangipula anch: “Antu inay adjita ankandj alemp atok, ad anany ni kwisu kudokilau?” 14 Kapamp kamwing namwakula anch: “Nsalejam, yey wija.” Chad ndiy wanleja anch: “Inay awiy antu adokila mu mar makash, ni atutin kal ankandj au alemp ni kuyitokishin mu mash ma Mwan a Mukoku. 15 Chawiy chidau kurutu kwa ditand da Nzamb ni akat kumusadin mudimu utumbila muten ni uchuku mu tempel wend; ni Muntu ushicha pa ditand ukutandjek mwinkand wend pad awiy. 16 Awiy kakez kwovap kand nzal ap impu, ni kakez kwovap kand kuswan kwa muten ap kwa chirungul chin chawonsu chisansena, 17 mulong Mwan a Mukoku, uda pakach ni pakach pa ditand, ukwikal kafung wau ni ukuyitwal ku misul ya mem ma mwom. Ni Nzamb ukez kakuswol mansoj mawonsu ku mes mau.”