Evanjil Wafunday Luka
14 Pa dichuku dikwau da Sabat, Yesu waya kuda ku chikumbu cha mukurump umwing wa Afaris, ni ading amushinshikidin nakash. 2 Kukashimuk, kurutu kwend kwading ikundj ukweta mayej makata kunanish mujimbu.* 3 Chawiy Yesu wayipula antu ading ija Chijil nakash nau Afaris anch: “Ov, chijil chitiyin kwokan pa dichuku da Sabat anch bwat?” 4 Pakwez awiy kamwakulap. Chawiy wamukwata ikundj winou, wamwok ni wamulik waya kwend. 5 Kupwa wayipula anch: “Anch mwaney ap ikwal a ngomb wey wawil mu dibuku, ov, nany wa pakach pen ukulika kuya kumutuntwish kapamp kamwing ap anch did dichuku da Sabat?” 6 Pakwez awiy kamanap cha kulond.
7 Pamanay anch antu atazukau ku musambu ading itondidinap jindond ja kalimish nakash, ndiy wayileja chilakej ech: 8 “Anch muntu wakutazuk ku musambu wa uruw, kangal kushakam pa ndond ya kalimish nakash. Pamwing ap atazukangaku kand muntu mujim ukupandakenamu ey. 9 Chad muntu wakutazukanganya en awonsu ukwez kud ey ni wakwel anch: ‘Mushila muntu ou ndond yiney.’ Mwamu ukwov usany wa kuya kushakam pa ndond ya pansh nakash. 10 Pakwez anch muntu wakutazuk, yang, ni shakam pa ndond ya pansh nakash, chad muntu wakutazukang ukwez kud ey ni wakwel anch: ‘Murunam, yang pa ndond ya kalimish nakash.’ Mwamu antu awonsu atazukangau ku musambu akukulimish. 11 Mulong muntu mwawonsu ukeza kwizambwish akez kamushikumwish, ni mwawonsu ukwishikumwisha akez kumuzambwish.”
12 Kupwa wamuleja kand muntu wamutazuka anch: “Anch ukimbin kupan yakuda ya midi ap ya urel, kangal wayitazuk aruney ap akadivar ney ap anamakwey ap amutej ney ada ampich. Mulong niyau akutwish kukutazuk ey, ni chinech chikwikal difut kud ey. 13 Pakwez anch usadin musambu, yitazuka atuzwendj, ayibid, ayilim, ni amputames; 14 mwamu ukwikal ni musangar, mulong awiy kakwetap chom cha kukufut ni ukutambul difut dey pa chisu chikuyivumbulau antu atentamina.”
15 Pateshay muntu umwing watazukau ku musambu yom yiney, walonda anch: “Wayuk kwend muntu udila* mu Want wa Nzamb.”
16 Yesu wamwakula anch: “Muntu umwing wading urijekin musambu ujim nakash, ni wayitazuka antu avud. 17 Pawanyina chisu cha musambu, ndiy wamutuma kashalapol wend kuyilej antu atazukay anch: ‘Ezany, mulong yom yawonsu yawanyinang kal.’ 18 Pakwez awonsu asambisha kulik ni kulet mayingishin. Wa kusambish wamuleja anch: ‘Nlikishinaku amboku; nalandang chir ni nifanyidin kuya kuchital.’ 19 Mukwau wamuleja anch: ‘Nlikishinaku amboku; nalandang angomb dikum a kudim nich, niyil kutal mutapu usadinau mudimu.’ 20 Mukwau niyend wamuleja anch: ‘Naten kwam machuku minam, chawiy nikutwishap kwez.’ 21 Chawiy kashalapol wachirika ni wamulej mwant wend yom yiney. Ni mwant wa chikumbu wajimana, wamulej kashalapol wend anch: ‘Yang kamu swa mu jinjil jijim ni mu jinjil jikemp ja musumb, yitazuka atuzwendj, ayibid, amputames, ni ayilim.’ 22 Kashalapol pachirikay, walonda anch: ‘Mwant wam, nasal kal mud muwanlejang, pakwez kuchid kand jindond jikwau.’ 23 Chad mwant wamuleja kashalapol anch: ‘Yang kand mu jinjil ni mu mabalibal, yishindila antu kwez chakwel chikumbu cham chizul. 24 Mulong nikulejinany anch, kwikil muntu ap umwing natazukang ukuda ku musambu winou.’ ”
25 Dichuku dimwing, chisak chijim cha antu chading chikat kumulondul Yesu, ndiy wakarumuka ni wayel anch: 26 “Muntu mwawonsu ukweza kud am pakad kumukis tatukwend, makwend, mukajend, anend, ni anamakwend amakundj nau amband, ap kukis mwom* wend amwinend, kakutwishap kwikal mwin kwilej wam. 27 Muntu mwawonsu wakad kusend mutond wend wa mar* ni wakad kwinlondul am, kakutwishap kwikal mwin kwilej wam. 28 Chilakej, nany wa pakach pen anch ukimbin kutung rubumbu rilemp, kakushakamap bil ni kusal tupamp mulong wa kuman anch ukwet nfalang ja kurupwish nich? 29 Chamwamu ukutwish kutek mufulandal pakwez wakangany kurupwish, ni antu awonsu akumana akusambish kumusip, 30 ni kulond anch: ‘Muntu winou wasambishin kutung pakwez wakangany kal kupwish.’ 31 Ap, anch mwant ukimbin kuya kurish njit ni mwant mukwau, ov, kakushakamap bil ni kwit chiyul mulong wa kuman anch ukutwish kumupandakan mukwau ukweta amasalay tunan makum maad (20 000), anch ndiy ukwet amasalay tunan dikum (10 000)? 32 Ni anch waman anch kakutwishap kumupandakan, pachiday kal mukwau kulemp, ukumutumin antimesh mulong wa kwit chisambu. 33 Chilik chimwing, ijikany anch kwikil muntu ap umwing pakach pen ukutwisha kwikal mwin kwilej wam anch kashilap* yom yend yawonsu.
34 “Chakin kamu, mung ud chom chiwamp. Pakwez anch mung washadish kutaal kwau, ov, akuutaadish kand ni yik? 35 Ukwikalap kand ni usey ku divu ap ku yiyimp ya annam.* Antu akat kuudjubul. Muntu ukweta matu ma kutesh, atesha.”