MAZU MA CHIJIKISH
MIFUND Yitumbila ayifunda kusutin spiritu wa Nzamb mu dizu da Hebereu, da Aram ni da Grek. Chakwel antu a “michid yawonsu” ataninamu mu Dizu da Nzamb, chitin kukarumun Mifund yiney mu mazu mavud. (Mateu 24:14) Mabuku makum maad ni sambwad, kusambishin ku Mateu kushik ku Kujingunik amatazukin anch “Mifund ya Grek ya win Kristu,” mulong ayifunda bil cha kusambish mu Grek kud in Kristu a mu mivu chitot ya kusambish C.C.
Bibil—Dikarumun da Ngand Yisu—Mateu-Kujingunik amubudisha bil cha kusambish mu Anglais mu muvu wa 1950. Amukarumuna kukwatijan ni mifund yijikena nakash ya Westcott ni Hort, yikwatijadina nakash ni mamaniskri makur mavud ma Grek. Dikarumun da Ngand Yisu dikarumwin mifund ya Grek nich kushinshaman nakash. Dikarumun dined da Uruund dimedin pa dikarumun da Anglais da 2013, ni dasadin usu wa kulam kushinshaman kwinoku. Rutong retu radap kwau ching ra kubudish dikarumun dishinshamena ku mifund ya kusambish, pakwez kand dovakena ni diswapela kutang. Mitu ya milong yiney: “Mbil Piur pa Kukarumun Bibil,” “Yom Kushalijan Yida mu Dikarumun Dined,” ni “Mutapu Twashikena Kwikal ni Bibil” yisambidin mipak yimwing twalondwila mulong wa kukarumun dikarumun dined.
Dijin da pakampwil da Nzamb, Yehova, did tupamp 237 mu Bibil—Dikarumun da Ngand Yisu—Mateu-Kujingunik. Mulong wa usey wa kutumbish dijin da Nzamb ni chakwel antu awonsu atazuk pa dijin dined mulong wa kupand, dikarumun dined dachirishin dijin Yehova pa ndond yad mu Mifund Yitumbila. (Mateu 6:9; Rom 10:13) Mutu wa mulong “Dijin da Nzamb mu Mifund ya Grek ya win Kristu” uletin mayingishin mamwing matubachikina kutek dijin Yehova mu mifund yiney.
Mazu, Dikarumun da Ngand Yisu, mimedin pa kushilamu kwa Nzamb piur pa ngand yisu yitentamina mulong wa uwamp wa antu awonsu. (2 Pita 3:13) Antu akarumwina Bibil winou, amukatina Nzamb uda Musul wa Mifund Yitumbila, amana anch akwet chisend chijim nakash cha kukarumun yitongijok ni mazu ma Nzamb nich win kashinsh nakash. Tuchingejin kamu anch Bibil winou ukuyikwash nakash in kutang a kashinsh asadina usu wa kushiken “ku ronganyin rakin ra uyakin.”—1 Timote 2:4.