MUKAND WA KUSAMBISH WA PAUL KUD IN KORINT

1 Mukand winou udokil kud Paul, watazukau ku rusot ra Nzamb kwikal kambuy wa Kristu Yesu, ni mukadivar netu Sositen, 2 ku chikumangen cha Nzamb chida mu Korint, kud en ikadishau atumbila mu uumwing ni Kristu Yesu, atazukau kwikal atumbila, pamwing ni awonsu ada ku jindond jawonsu akata kutazuk pa dijin da Nsalejetu Yesu Kristu, Nsalejau ni Nsalejetu:

3 El Nzamb Tatukwetu ni Nsalejetu Yesu Kristu akumekeshinany ranaken rijim ni akwinkishany chisambu.

4 Nikat kumujikitish chisu chawonsu Nzamb wam piur penen mulong wa ranaken rijim rakumekeshinanyay mu Kristu Yesu; 5 mulong udany mu uumwing ni ndiy, akupitishinany kal* mu yom yawonsu, mu ukaliweny wawonsu wa kulond ni mu ronganyin rawonsu, 6 mud mutapu uman piur pa Kristu wikunina kal pakach pen, 7 chakwel kangal waburenany chipan ap chimwing, pauchingedinanya nich impu nakash kumekan kwa Nsalejetu Yesu Kristu. 8 Ukukukasikeshany kand kushik ni kwinsuden, chakwel kangal akufishany nich piur pa chom ap chimwing pa dichuku da Nsalejetu Yesu Kristu. 9 Nzamb ushinshamen, ndiy wakutazukanya chakwel wikalany mu uumwing ni Mwanend, Yesu Kristu Nsalejetu.

10 Katat nikukasikeshinany akadivar mu dijin da Nsalejetu Yesu Kristu, kwikal en awonsu mu uumwing mu yom ulondinanya ni kulik kwaurok pakach pen, pakwez wikalany chakin kamu mu uumwing mu manang ni mu mutapu wa kutong. 11 Mulong in kwa Kulowe amwing anlejin anch kud kupwitamijan pakach pen akadivar. 12 Yinifidina kulond yawiy ey: Ukat kulondany anch “Am nid wa Paul,” ou anch “Am nid wa Apolos,” ou anch “Am nid wa Sefas,”* mukwau anch “Am nid wa Kristu.” 13 Komb Kristu waurokin? Paul kamupampap pa mutond mulong wenen, ov, kimwawiyap? Ap, ov, akubatishanya mu dijin da Paul? 14 Nimujikitishin Nzamb mutapu nabatishap kwam muntu ap umwing pakach pen, kudoshaku Kirisipus ni Gayus, 15 mwamu kwikil muntu ap umwing ukutwisha kulond anch akubatishanya mu dijin dam. 16 A! Bwat, namubatisha kand Sitefanas ni dijuku dend, pakwez kuyidoshaku awiy, nijap anch kud kand muntu mukwau nabatisha. 17 Mulong Kristu wantuma, kadap mulong wa kubatishan, pakwez mulong wa kulejan rusang ruwamp; ni nasalap mwamu nich mazu ma manang,* mulong wa kulik kupwishikish usey wa mutond wa mar wa Kristu.

18 Mulong uruu wa mutond wa mar ud usup kud antu ayila mu kusheshik, pakwez ud ukash wa Nzamb kud etu apandishinau. 19 Mulong achifundin anch: “Nikushesh manang ma in manang, ni manang ma antu ilejina nikumalik.” 20 Mwin manang ud kwisu? Kwisu kuday mulej wa yijil? Kwisu kuday mwin ntaad wa mangand minam?* Nzamb wasupishin kal manang ma mangand. 21 Mulong mangand mamwijikap Nzamb kusutin manang mau aminam, Nzamb, kusutin manang mend wamana anch chading chiwamp kuyipandish antu itiyija uruu wamanau akwau mud usup.

22 Mulong in Yuda itin yijingidij ni in Grek akimbin manang; 23 pakwez etu tulejen piur pa Kristu wapampau pa mutond. Uruu winou ukat kuyipwakesh in Yuda, ni in michid aumen mud usup. 24 Pakwez, kud atazukinau, ikala in Yuda ap in Grek, Kristu ud ukash wa Nzamb ni manang ma Nzamb. 25 Mulong chom cha usup chidokila kud Nzamb chid cha manang nakash kusutamu manang ma antu, ni chom chiziyina chidokila kud Nzamb chikwet usu nakash kusutamu usu wa antu.

26 Umenany akadivar, antu a mutapu ik atazukay. Ku mes ma antu, avud kadap in manang, avud kakwetap ulabu, avud kadokilap ku majuku mijikena, 27 pakwez Nzamb watonda yom ya usup ya mangand mulong wa kuyikwatish antu in manang usany, ni Nzamb watonda yom yiziyina ya mangand mulong wa kuyikwatish yom yikweta usu usany; 28 ni Nzamb watonda yom ya usweral ya mangand ni yom yipipejinau, yom yidiburilau, mulong wa kushesh nich yom yimekena mud ya usey, 29 chakwel kangal muntu ap umwing wibaz ku mes ma Nzamb. 30 Pakwez kusutin ndiy kwawiy udanya mu uumwing ni Kristu Yesu, watuletina manang madokila kud Nzamb. Kusutin Kristu, Nzamb wasala chakwel twikal atentamina ni atumbila, watukwola kand kusutin difut, 31 chakwel chikala mud muchifundinau: “Mwawonsu wibazina, ibaz mulong wa Yehova.”*

2 Chawiy pineza kud en akadivar, mulong wa kukulejany ujindj utumbila wa Nzamb, nezap nich mazu ap manang mashimwokishena. 2 Mulong nakwata mupak wa kulik kukulejany* chom ap chimwing, ching kusu piur pa Yesu Kristu, ni piur pa mutapu wamujipau pa mutond. 3 Ni pineza kud en nading niziyin ni kuzal wom; 4 mazu mam ni yom nalejana yadingap nich mazu ma manang ma kwiy nich michim. Pakwez mazu mam mading mamekeshin usu wa spiritu wa Nzamb, 5 chakwel wikalany ni ritiy, kadap mu manang ma antu, pakwez mu usu wa Nzamb.

6 Katat tulondin piur pa manang pakach pa antu aswila, pakwez kadap manang ma mangand minam* ap ma antakel a mangand minam, akusheshika. 7 Pakwez tulondin piur pa manang ma Nzamb mada mu ujindj utumbila, manang majindjikau, masambelay kutenchik Nzamb kurutu kwa yirung* mulong wa katumb ketu. 8 Mawiy manang minam makanganyau kwijik antakel awonsu a mangand minam,* mulong anch amijika, kafanyinap kumujip* Nsalejetu wa uyaj. 9 Pakwez mud muchifundinau: “Dis damanap, ni ditu dateshap, ni kwikil muntu watongina yom yarijekay Nzamb mulong wa antu amukatina ndiy.” 10 Mulong Nzamb watujinguninay etu kusutin spiritu wend, mulong spiritu ukat kushinshikin yom yawonsu, ap yom yikurikina ya Nzamb.

11 Mulong nany pakach pa antu wija yom yitonginay muntu mukwau? Muntu amwinend ndiy wija yida mu muchim wend. Chilik chimwing kand, kwikil muntu washikenap kal kwijik yom yitonginay Nzamb, ching kusu spiritu wa Nzamb. 12 Etu twatambula, kadap spiritu wa mangand, pakwez spiritu udokila kud Nzamb, chakwel tutwish kwijik yom yatwinkishay Nzamb kwa kwisotin. 13 Yom yiney niyetu tuyilondin, kadap nich mazu matufundishinau kusutin manang ma antu, pakwez nich mazu matufundishinau kusutin spiritu, paturumburila* yom ya mu spiritu nich mazu ma mu spiritu.

14 Pakwez muntu wa ku mujimbu kakatap kwitiy yom yidokila ku spiritu wa Nzamb, mulong yid usup kud ndiy; ni kakutwishap kuyitiy* mulong akat kuyishinshikin mu mutapu wa mu spiritu.* 15 Chinyim ni chinech, muntu wa mu spiritu ukat kushinshikin yom yawonsu, pakwez ndiy amwinend kwikil muntu ukata kumushinshikin. 16 Mulong nany washikenap kal kwijik chitongijok cha Yehova,* chakwel amufundish ndiy? Pakwez etu tukwet chitongijok cha Kristu.

3 Akadivar, natwishap kukulejany mud antu a mu spiritu, pakwez nakulejanya mud antu a ku mujimbu, mud an akemp mu Kristu. 2 Nakwinkishanya mayel, kadap yakuda yikash, mulong wadinganya kand kal uwanyinany kuda yakuda yikash. Ni katat, kand kal uwanyinany, 3 mulong uchidany kal antu a ku mujimbu. Mukau ni kupwitamijan yida pakach pen, ov, yimekeshinap anch udany antu a ku mujimbu ni wiyendishinany mud antu a mangand minam? 4 Mulong anch muntu walond anch: “Am nid wa Paul,” pakwez mukwau anch: “Am nid wa Apolos,” ov, usadinanyap yom mud antu a mangand minam?

5 Apolos ud nany, ap Paul ud nany? Tud kwetu Atushalapol akukwashanya kwitiyij. Twawanyisha kwetu chisend chatwinkishay Nsalejetu. 6 Am nakuna, Apolos wichilap mem, pakwez Nzamb ndiy wakudisha. 7 Chawiy ukunina ni wichila mem kadap a usey, pakwez Nzamb ukata kukudish. 8 Mwin kukun ni mwin kwichil mem asadin mudimu mu uumwing,* pakwez muntu ni muntu ukutambul difut dend kukwatijan ni mudimu wend. 9 Mulong tud ambay a mudimu a Nzamb. Udany chir chidiminay Nzamb, chikumbu chitunginay Nzamb.

10 Kukwatijan ni ranaken rijim ra Nzamb ranmekeshinau, nateka mufulandal mud mwin kutung mujim ukweta ukaliweny,* ni kud muntu mukwau utungina pa mufulandal winou. Pakwez chifanyidin muntu ni muntu adandamen kushinshikin mutapu utunginay pa mufulandal. 11 Mulong Nzamb wamutekin kal Yesu Kristu kwikal mufulandal, chawiy, kwikil muntu ukutwisha kutek mufulandal ukwau. 12 Katat anch muntu watung pa mufulandal nich utad wa or, argent, mayal ma usey, mabay, ap masuku kushalijan maumina, 13 mudimu wa muntu ni muntu ukumekan chiuda,* dichuku dikuumekesh patok, mulong ukumekan kusutin kasu, ni kasu kinak kakumekesh mudimu wa mutapu ik wasalay muntu ni muntu. 14 Anch mudimu wasalay muntu wa kutung pa mufulandal winou wadandamen kwiman, ukutambul difut; 15 anch mudimu wa muntu watem ku kasu, ndiy ukushadish, ap anch ndiy amwinend ukupand; pakwez chikwikal mud wapand kal mu kasu.

16 Ov, wijanyap anch udany tempel wa Nzamb ni anch spiritu wa Nzamb ud* mu en? 17 Anch muntu washesh tempel wa Nzamb, Nzamb ukumushesh niyend; mulong tempel wa Nzamb utumbil, ni tempel winou yenanya.

18 Kangal muntu widimb amwinend: Muntu mwawonsu pakach pen utongina anch ud mwin manang mu mangand minam,* ufanyidin kwikal chisup, chakwel ikal mwin manang. 19 Mulong manang ma mangand minam mad usup kud Nzamb, mulong achifundin anch: “Ukat kuyoz in manang mu mipit yau ya manang yitilau ayinau.” 20 Ni kupwa kand anch: “Yehova* wij anch yitongijok ya in manang yid kwau ya chamwamu.” 21 Chawiy kangal muntu wibaz piur pa antu; mulong yom yawonsu yid yenen, 22 ikala Paul, Apolos ap Sefas,* mikala mangand, mwom ap rufu, yikala yom yidaku katat ap yikweza, yom yawonsu yid yenen; 23 pakwez en udany a Kristu; ni Kristu ud wa Nzamb.

4 Chifanyidin kutuman mud atushalapol a Kristu inkishinau kal* ujindj utumbila wa Nzamb. 2 Atushalapol inay akuchingejin, ayichingejidin anch ikal ashinshamena. 3 Kud am chidap cha usey kwinshinshikin kud en ap ku dirumburish da antu. Mulong ap amwinam win nikatap kwishinshikin. 4 Mulong kwikil chom ap chimwing nifishina nich. Pakwez chinech chimekeshinap anch nitentamin; Yehova* ndiy ukata kwinshinshikin. 5 Chawiy, kangal wasambelany kurumburish chom ap chimwing kurutu kwa chisu, kushik ni pakwezinay Nsalejetu. Ukubudish ku chitokish yom yijingamina mu mididim ni kumekesh patok yitongijok ya muchim wa muntu ni muntu, kupwa muntu ni muntu ukutambul kushiman kumuwanyidina kud Nzamb.

6 Katat, akadivar, yom yiney nayilondang piur pa amwinam ni piur pa Apolos mulong wa uwamp wen, chakwel kusutin chilakej chetu wilejany chijil ech: “Kangal wawejinany yom yikwau pa yom yafundinau kal,” chakwel kangal witutulany kusutin kumuzambwish muntu kusutamu mukwau. 7 Mulong nany ukusadila anch ushalijan ni mukwen? Yom ik ukweta yalikau kukwinkish? Chad anch akwinkishay, mulong wak wibazina mud kakwinkishayap?

8 Ov, wawanyishinany kal yom yawonsu? Ov, wapitinany kal? Wasambishinany kal kuyikel mud ant pakad etu? Mud ing kach wasambishanyaku kuyikel mud ant, chakwel niyetu tuyikel nen pamwing. 9 Mulong am nimen anch etu atwimbuy atuteka a nsuden kud Nzamb pa dibur kurutu kwa antu, mud antu afishinau nich kuyijip, mulong atwandjika mu chiwandj kurutu kwa mangand, kwa angel ni kwa antu. 10 Etu tusupin mulong wa Kristu, pakwez en ubabelany mu Kristu; etu tuziyin, pakwez en ukwetany usu; en akulimishinany, pakwez etu atupipejin. 11 Kushik ni katat tudandamedin kufa nzal, kwov impu, kufa mudj,* kutubul,* kuburen yikumbu 12 ni kuziy mulong wa midimu tusadina nich makas metu ayinetu. Anch atusaal, tukat kuyukish; anch atuzengol, tukat kujijaman nich kushimpish muchim; 13 anch atufukejin, tukat kwakul nich kwitudish;* kushik ni katat twikadil kal yishoshot ya mangand, yishoku ya yom yawonsu.

14 Nifundin yom yiney, kadap mulong wa kukukwatishany usany, pakwez mulong wa kukubabeshany mud anam akatish. 15 Mulong ap anch ukwetany atulam tunan dikum (10 000) mu Kristu, chakin kamu ukwetanyap atatuku avud; mulong yam nikadila kal tatukwen mu Kristu Yesu, kusutin rusang ruwamp. 16 Chawiy nikukasikeshinany kwingimburij am. 17 Yawiy nikutumidinanyay Timote, mulong ud mwanam mukatish mwi Nsalejetu, ni ushinshamen. Ukukuvurishany milad yam* piur pa Kristu Yesu, mud mutapu nikata kufundish kwawonsu mu yikumangen yawonsu.

18 Amwing ibazin mulong atongin anch nikuchirikap kand kwinaku. 19 Pakwez nikwez kwinaku piswimp ap, anch Yehova* wakatish, kadap mulong wa kutesh mazu ma antu itutwila, pakwez mulong wa kuman usu wau. 20 Mulong Want wa Nzamb wimedinap pa mazu, pakwez wimedin pa usu. 21 Ukatinany ik? Nikwezinany ni nfimbu anch neza nich rukat ni kwitudish?

5 Niteshin anch pakach pen pad yisal ya masandj,* yisal ya masandj yakad kwikal ap pakach pa antu a michid—⁠kud ikundj umwing wendina ni mband wa tatukwend. 2 Ov, wibazinany mulong wa yom yiney? Umenanyap anch ufanyidinany kudil, chakwel amwopat ikundj wasalang yom yiney pakach pen? 3 Ap anch nidap nen pamwing ku mujimbu, pakwez nid nen pamwing mu spiritu,* ni namurumburishang kal ikundj wasalang yom yiney mud nid nen pamwing. 4 Piukukumangananya pamwing mu dijin da Nsalejetu Yesu, ni kwijik anch nid nen mu spiritu pamwing ni usu wa Nsalejetu Yesu, 5 ufanyidinany kumupan ikundj winou mu makas ma Satan mulong wa kushesh mujimbu,* chakwel spiritu apand pa dichuku da Nsalejetu.

6 Kwibaz kwen kuwapinap. Ov, wijanyap anch chivish chikemp chikat kututwish mutand* wawonsu? 7 Doshany chivish chikur chakwel wikalany mutand usu, wakad chivish ni ushalany akad chivish. Mulong Kristu, mwan a mukoku wetu wa Pasak, amupeshin kal. 8 Komb tusalany musambu, kadap nich chivish chikur ap nich chivish cha chitil ni cha uyimp, pakwez nich mukat wakad chivish, wa win kashinsh ni wa uyakin.

9 Mu mukand wam nakufundidinany anch kangal wadandamenany kwibomb ni antu in yisal ya masandj,* 10 nadap nisambidina piur pa antu a mangand minam ada in yisal ya masandj ap in ris ap ij* ap in kwifukwil akish. Chamwamu ing wafanyinangany kudokal kamu chad mu mangand minam. 11 Katat nikufundidinany kulik kudandamen kwibomb ni muntu utazukinau anch mukadivar, uda mwin yisal ya masandj* ap mwin ris ap mwin kwifukwil akish ap mwin masaal* ap mwin kuleu maar ap mwij, ni ufanyidinanyap ap kuda ni muntu wa mutapu winou. 12 Ov, yama nikweta chisend cha kuyirumburish antu ada pol pa chikumangen? Ov, kadap antu ada mukach mwa chikumangen ufanyidinanya kurumburish, 13 parumburishinay Nzamb antu ada pol pa chikumangen? “Mudoshany muntu muyimp mukach mwen.”

6 Anch pakach pen muntu upwitamijadin ni mukwau, ov, ukat kupakish kumutwal ku dirumburish, kurutu kwa antu akad kutentam pa ndond pa kumutwal kud atumbila? 2 Ov, wijanyap anch atumbila akurumburish mangand? Chad anch ukurumburishany mangand, ov, ukutwishanyap kupwish tumilong twa usweral? 3 Ov, wijanyap anch tukuyirumburish angel? Chad ukukanganyany nchik kupwish milong ya mwom winou? 4 Anch ukwetany milong ya mwom winou yifanyidina kurumburish, chad mulong wak ukat kuyitwalany kud anzuj apipejinau mu chikumangen? 5 Nilondin mulong wa kukwovishany usany. Ov, pakach pen pikil muntu ukweta manang ukutwisha kurumburish pakach pa akadivar nend? 6 Pakwez mukadivar ukat kumutwal mukadivar nend ku dirumburish, umutwadin kand kurutu kwa antu akad kwitiyij!

7 Chakin, anch wafundijanany umwing ni mukwau, wakanganyangan kal kwen. Ov, ukutwishanyap kwen kwitiyin kukurumbukinany? Ov, ukutwishanyap kwen kwitiy kukwiyany? 8 Chinyim ni chinech, yen urumbukinanya ni kwiy, ni akadivar nen kand usadinanya mwamu!

9 Ap ov, kiwijanyap anch antu akad kutentam kakuswanap Want wa Nzamb? Kangal widimbany.* In yisal ya masandj,* in kwifukwil akish, akamakaj, in utun,* 10 ij, in ris, in kuleu maar, in masaal,* ni ambwitan kakuswanap Want wa Nzamb. 11 Ni wawiy mutapu wadingau amwing pakach pen. Pakwez katat akwowishinany kal; akusadinany kal kwikal atumbila; akumenany kal kwikal atentamina mu dijin da Nsalejetu Yesu Kristu ni kusutin spiritu wa Nzamb wetu.

12 Nikwet mbil ya* kusal yom yawonsu, pakwez yom yawonsu yidap ya ukwash. Nikwet mbil ya kusal yom yawonsu, pakwez nikwitiyap anch chom ap chimwing chinyikel. 13 Yakuda yid mulong wa ditont ni ditont did mulong wa yakuda, pakwez Nzamb ukuyishesh yawonsu. Mujimbu udap mulong wa yisal ya masandj,* pakwez ud mulong wa Nsalejetu, ni Nsalejetu ud mulong wa mujimbu. 14 Pakwez kusutin usu wend, Nzamb wamuvumbula Nsalejetu ni ukutuvumbul kand niyetu.

15 Ov, wijanyap anch mijimbu yen yid yid ya Kristu? Chad ov, nifanyidin kudosh yid ya Kristu ni kuyibomb kud ndumb? Nikutwishap kusal mwamu ap pakemp! 16 Ov, wijanyap anch, anch muntu wibomb ni ndumb ikal kal mujimbu umwing? Mulong Nzamb ulondin anch: “Awiy aad akwikal mujimbu* umwing.” 17 Pakwez mwawonsu wibombina ni Nsalejetu ud nend mu uumwing mu spiritu. 18 Chinany yisal ya masandj!* Chitil chikwau chin chawonsu chikutwishay kusal muntu chid pol pa mujimbu wend, pakwez usadina yisal ya masandj uurumbukidin mujimbu wend.* 19 Ov, wijanyap anch mujimbu wen ud tempel wa spiritu utumbila uda mu en wakwinkishanyau kud Nzamb? Chikwau kand, udanyap enen ayinen, 20 mulong akulandanya nich usey ukash. Komb mutumbishany Nzamb mu mujimbu wen.

7 Katat piur pa yom wafundinanya, chid chiwamp kud ikundj kulik kumupukunaku* mband; 2 pakwez mulong wa kuvulijan kwa yisal ya masandj,* chifanyidin ikundj mwawonsu ikal ni mukajend ni mband mwawonsu ikal ni nfumwend. 3 Ikundj ufanyidin kuwanyish maswir* ma mukajend, ni mband niyend ufanyidin kuwanyish maswir ma nfumwend. 4 Mband kakwetap ulabu pa mujimbu wend amwinend, pakwez nfumwend ndiy uukweta, chilik chimwing kand ikundj kakwetap ulabu pa mujimbu wend amwinend, pakwez mukajend ndiy uukweta. 5 Kangal wakishijanany umwing ni mukwau, ching kusu anch wovijanany kusal mwamu mu chisu kanang, mulong wa kwikal ni chisu cha kwipan mu malembil kupwa chad watanijanany kand, chakwel kangal Satan wakwozany mulong wa kukangany kwilam kwen. 6 Ukutwish kusadinany yom yiney nalonda kal, pakwez chidap chijil. 7 Nikatin mud ing amakundj awonsu ikalang mud am. Pakwez muntu ni muntu ukwet chipan chend chamwinkishau kud Nzamb, ou mu mutapu kanang, mukwau mu mutapu kampand.

8 Katat niyilejin ajich ni adaafu anch chid chiwamp nakash anch ashal kwau mud am. 9 Pakwez anch katwishinap kwilam, atana ap achika, mulong chiwapin kwatan ap kwachik kusutamu kwikal ni maku mapandakena.*

10 Niyinkishin antu atijadina kal mbil ej, kadap am, pakwez Nsalejetu: Mband kangal waurik ni nfumwend. 11 Pakwez anch waurik, ashakam mwamu pakad kwachik, anch bwat achirik kwa nfumwend; ikundj niyend kafanyidinap kumulik mukajend.

12 Pakwez kud antu akwau nilondin mwamu, inge, yama nilondina, kadap Nsalejetu: Anch mukadivar ukwet mband wakad kwitiyij witiyina kushakam nend, kangal wamulik; 13 ni anch mband ukwet ikundj wakad kwitiyij witiyina kushakam nend, kangal wamulik nfumwend. 14 Mulong ikundj wakad kwitiyij, amusadil kwikal utumbila, mulong ud mu uumwing ni mukajend, ni mband wakad kwitiyij amusadil kwikal utumbila mulong ud mu uumwing ni mukadivar; anch chamwamu anen afanyinang kwikal ijondila, pakwez katat ad atumbila. 15 Pakwez anch mbay wakad kwitiyij watond kwaurik, mulikany kwend aurik; pinipa mukadivar ap nambaz kadap ku moj, pakwez Nzamb wakutazukinany kal kushakam mu chisambu. 16 Mulong ey mband, nany wija anch yey ukumupandisha nfumwey? Ap ey ikundj, nany wija anch yey ukumupandisha mukajey?

17 Ap mwamu, chifanyidin muntu ni muntu adandamen kushakam mutapu wadingay pamutazukau kud Yehova* Nzamb. Ni winou wawiy umutakel nipanina mu yikumangen yawonsu. 18 Ov, kud muntu wada watwadinau kal ku mukand* pamutazukau? Adandamen kushal mwamu. Ov, kud muntu wakad kutwal ku mukand watazukau? Kangal amutwal ku mukand. 19 Kumutwal muntu ku mukand* ap bwat kudap kwa usey; chida cha usey kud kuziyin kwi mbil ja Nzamb. 20 Muntu ni muntu ufanyidin kushal mutapu wadingay pamutazukau. 21 Ov, wading musuk pakutazukau? Kangal wiyakamish; pakwez anch ukutwish kukwolik, sal mwamu. 22 Mulong muntu mwawonsu wading musuk pamutazukau kud Nsalejetu, ud kashalapol wakwolikina kal wa Nsalejetu; chilik chimwing, muntu mwawonsu wading wakad kwikal musuk pamutazukau, ud musuk wa Kristu. 23 Akulandanya nich usey; kangal wikalany asuk a antu. 24 Akadivar, muntu ni muntu ufanyidin kushal kurutu kwa Nzamb mutapu wadingay pamutazukau.

25 Nikwetap mbil ya Nsalejetu piur pa atujik,* pakwez niletin chitongijok cham mud muntu ushinshamena wamekeshinau ranaken kud Nsalejetu. 26 Chawiy, mulong wa mar madaku katat, nimen anch chiwapin muntu adandamen kushakam mud muday. 27 Ov, ukwet mband? Kangal wapakish kumulik. Ov, ukwetap mband, kangal wamukimb. 28 Pakwez anch watan, usadinap chitil. Ni anch mujich* watan ap wachik, kasadinap chitil. Pakwez antu asadina mwamu, akuman mar mu mwom wau. Ni nikimbin kukwiyepishany milong yiney.

29 Chikwau kand, nilondin mwamu akadivar, chisu chashala kal chikepin. Kusambish katat, akweta amband ikal mud kayikwetap, 30 ni adidina mud akad kudil, asangera mud akad kusangar, alandina mud akad kwikal ni chom, 31 ni asadidina mangand minam mud akad kumasadin chipandakena; mulong yom yisadikina mu mangand minam yikat kuswimp. 32 Inge, nikatinap wikalany ni yakamish. Ikundj wakad kwatan ukat kwiyakamish mulong wa yom ya Nsalejetu, mutapu wa kumusangaresh Nsalejetu. 33 Pakwez ngatan ukat kwiyakamish mulong wa yom ya mangand, mutapu wa kumusangaresh mukajend, 34 ni manang mend madap ndond yimwing. Chilik chimwing kand, mband wakad kwachik ap uda kajik ukat kwiyakamish mulong wa yom ya Nsalejetu, chakwel ikal utumbila ku mujimbu ni mu manang. Pakwez ngachik ukat kwiyakamish mulong wa yom ya mangand, mutapu wa kumusangaresh nfumwend. 35 Nilondin yom yiney mulong wa uwamp wen ayinen, kadap mulong wa kukukangeshany,* pakwez mulong wa kukukasikeshany kusal yom yiwamp chakwel udandamenany kumusadin Nsalejetu pakad kampuw.

36 Pakwez anch muntu umen anch mulong wa kulik kwatan ap kwachik,* usadin yom yakad kuwanyin, ni anch wakudil kal ku mujimbu ni mu manang,* asala yom yiney: Asala yisotinay; kasadinap kwend chitil. Atan ap achik. 37 Pakwez anch muntu ukwet kashinsh mu muchim wend anch kakwetap kwend kuswir kwa kwatan ap kwachik, ni uyikedil maku mend, kupwa wakwat mupak mu muchim wend wa kulik kwatan ap kwachik,* wasal kal nawamp. 38 Komb, watena ap wachikina* usadin nawamp, pakwez ukulika kwatan ap kwachik ukusal nawamp nakash.

39 Mband ud ku moj pachiday nfumwend mwom. Pakwez anch nfumwend walal tul mu rufu, ukutwish kwatijan ni muntu mwawonsu ukatinay, pakwez ching anch ud mwin kwilej wa Nsalejetu. 40 Pakwez am nimen anch ukwikal ni musangar nakash anch washal kwend mwamu; ni chakin kamu nitongin anch niyam nikwet spiritu wa Nzamb.

8 Katat nifundin piur pa yakuda yipeshilau kwa atupwany: Twij anch etu awonsu tukwet ronganyin. Ronganyin rikat kulet kwitutul, pakwez rukat rikat kukasikesh. 2 Anch muntu utongin anch wij chom, kand kal kwend achijik mud mufanyidinay kuchijik. 3 Pakwez anch muntu umukatin Nzamb, Nzamb niyend umwij muntu winou.

4 Katat piur pa kuda yakuda yipeshilau kwa atupwany, twij anch kapwany chid chom chamwamu mu mangand ni anch kud Nzamb umwing kusu. 5 Mulong ap anch kud atazukinau anch anzamb, ikala mwiur ap pa divu, mwawiy kud “anzamb” avud ni “ansalej” avud, 6 pakwez kud etu, kud Nzamb umwing kusu, Tatuku, kwadokala yom yawonsu, niyetu tudaku mulong wendendiy; ni kud Nsalej umwing, Yesu Kristu, ni yom yawonsu yikalaku kusutin ndiy, niyetu tudaku kusutin ndiy.

7 Ap mwamu, kadap awonsu akweta ronganyin riner. Amwing, mulong ifukwilang atupwany pakur, akat kuda yakuda mud yom yipeshilau ku kapwany, ni kom kau kaziyina kakat kuyibindish. 8 Pakwez yakuda yikutwishap kutusejish piswimp ni Nzamb; kwikil chom tukushadisha anch twalik kuda, ni kwikil chom tukutaninamu anch twada. 9 Pakwez babalany chakwel want ipen wa kutond kangal wayipwakesh aziyina. 10 Mulong anch muntu ukweta kom kaziyina wakuman ey ukweta ronganyin ukat kudiil mu tempel wa kapwany, ov, kom kend kakumubachikap kuda yakuda yipeshilau kwa atupwany? 11 Mwamu kusutin ronganyin rey, muntu uziyina ukat kusheshik, mukadivar ney wafilay Kristu. 12 Anch ukat kuyirumbukinany* akadivar nen mu mutapu winou ni kubindish kom kau kaziyina, umurumbukidinany Kristu. 13 Chawiy anch yakuda yimupwakeshin mukadivar nam, nikezap kand kada mbij ap pakemp, chakwel kangal namupwakesh mukadivar nam.

9 Ov, nikwetap want ipam? Ov, nidap kambuy? Ov, namumanap Yesu Nsalejetu? Ov, udanyap yibudikin ya mudimu wam mwi Nsalejetu? 2 Ap anch antu akwau kanmenap mud kambuy, pakwez kud en nid chakin kamu kambuy, mulong en udany uman* umekeshina anch nid kambuy wa Nsalejetu.

3 Ou wawiy mutapu niyakwila antu akata kwinrumburish: 4 Tukwet mbil ya kuda ni kuna, ov, kimwawiyap? 5 Ov, tukwetap mbil ya kwatan chakwel atutwalaku kud mband mwin kwitiyij, mud atwimbuy akwau, akadivar nend a Nsalejetu ni Sefas?* 6 Ap, ov ching kusu am ni Barinabas yetu twakad mbil ya kulik kusal mudimu mulong wa kuwanyish maswir metu? 7 Isalay ik ukata kusal mudimu ni kwiwanyishin maswir mend amwinend? Nany ukata kudim chir cha nviny ni kulik kuda mabuj mau? Ap kafung ik ukata kulam amikoku ni kulik kunaku mayel mau?

8 Ov, nilondin kwam yom yiney nich manang ma chiwuntu? Ap, ov, Chijil ni chawiy chilondinap yom yawiy yimwing? 9 Mulong afundin mu Chijil cha Moses anch: “Kangal wamukas ikwal a ngomb ku kan chisu chidjatinay tidiku.” Ov, Nzamb ukat kuyibangin ching kusu amakwal a angomb? 10 Mu win yakin, ov, kalondinap yom yiney mulong wetwetu? Chakin kamu yom yiney ayifunda mulong wetwetu, mulong muntu udimina ni muntu ubudina mbut afanyidin kusal mwamu nich ruchingej ra kuyinkish chikunku cha yom yikwangulau.

11 Anch etu twakuna yom ya mu spiritu pakach pen, ov, komb turumbukin anch twangul ukwash wa ku mujimbu kud en? 12 Anch antu akwau akwet mbil ya kuchingej kutambul ukwash kud en, ov, etu tukwetap mbil yiney kupandakan? Ap mwamu, twasadinap mbil yiney, pakwez tukat kujijaman mu yom yawonsu chakwel kangal twamukangesh muntu ap umwing kwitiyij rusang ruwamp piur pa Kristu. 13 Ov, wijanyap anch antu akata kuwanyish yisend yitumbila adiling yom ya ku tempel, ni anch antu asadidining chisu chawonsu ku chintamb atambwiling chikunku cha yom yipeshilau pa chintamb? 14 Chilik chimwing kand, Nsalejetu wapana mbil anch antu alejena rusang ruwamp afanyidin kudiil mu rusang ruwamp.

15 Kand kal nisadinangap mbil ap yimwing pakach pa mbil jinej. Ni nifundinap yom yiney chakwel en winsadinany mwamu, mulong chikwikal chiwamp kud am kufa kusutamu . . . Kwikil muntu ap umwing ukutwisha kukangesh diyingishin dined dinikweta da kwibaz! 16 Katat anch nilejen rusang ruwamp, kadap diyingishin kud am da kwibaz, mulong chifanyidin am kusal mwamu. Inge, riyind kud am anch nilejenap rusang ruwamp! 17 Anch nasal mwamu kwa kwisotin, nikutambul difut; pakwez ap anch nasal mwamu pakad kukat, nichikwet chisend chijim changinkishinau kal kud Nzamb. 18 Chad difut ik nikutambula? Did anch pinilejena rusang ruwamp, nikutwish kusal mwamu pakad kwit chom, mulong wa kulik kusadin nayimp mbil yinikweta ya kulejan rusang ruwamp.

19 Mulong ap anch nid mwant ipam, nisadil kal musuk wa antu awonsu chakwel anch chitwishikin, nitwisha kupwit antu avud. 20 Kud in Yuda nikala mud mwin Yuda, mulong wa kuyipwit in Yuda; kud ada mwinshin mwa chijil nikala niyam mud nid mwinshin mwa chijil, ap anch am nidap mwinshin mwa chijil, mulong wa kuyipwit antu ada mwinshin mwa chijil. 21 Kud akad chijil niyam nikala mud wakad chijil, ap anch nidap muntu wakad chijil kurutu kwa Nzamb pakwez nid mwinshin mwa chijil cha Kristu, mulong wa kuyipwit antu akad chijil. 22 Kud aziyina niyam nikala muntu uziyina, mulong wa kuyipwit aziyina. Nikala yom yawonsu kud antu a mitapu yawonsu, chakwel kusutin mitapu yawonsu yitwishikina, nipandishap amwing. 23 Pakwez nisadin yom yawonsu mulong wa rusang ruwamp, chakwel nirilejan kud antu akwau.

24 Ov, kiwijanyap anch mu kubambil, in kubambil awonsu akat kuya mau, pakwez umwing kusu ndiy ukata kutambul difut? Bambilany mu mutapu wa kutambul difut. 25 Antu awonsu akata kubambil akat kwilam mu yom yawonsu. Chakin, awiy akat kusal mwamu mulong wa kutambul chibangul chikutwisha kusheshik, pakwez etu tukutambul chibangul chikushakama chikupu. 26 Chawiy, nikat kubambil mu mutapu umekeshina anch nij kuniyila; nikat kuzwiy yinkany mu mutapu wa kwel anch kangal nabul mu rinkind; 27 pakwez nikat kuuzakas* mujimbu wam yinkany* ni kuutakel mud musuk, chakwel kupwa kwa kuyifundish antu akwau, kangal amwinam nashadish dilau da Nzamb mu mutapu kanang.

10 Akadivar, nikatin wijikany anch angakiril etu ading awonsu mwinshin mwa didj ni awonsu auka karung 2 ni awonsu ayibatisha mu Moses kusutin didj ni karung, 3 ni awonsu ada chakuda cha mu spiritu cha mutapu umwing 4 ni awonsu ana mem ma mu spiritu ma mutapu umwing. Mulong anangang mem madokalang ku diyal da mu spiritu dayilondulang, ni diyal dined dading dimumekeshin* Kristu. 5 Pakwez, Nzamb kayisangerap avud pakach pau; mud chibudikin, afa mwi mpay.

6 Yom yiney yayishikena yid yilakej ya kutubabesh nich etu, chakwel kangal niyetu twasot yom yiyimp mud mwasalau awiy. 7 Kangal wikalany in kwifukwil atupwany, mud mutapu wasalau amwing pakach pau; mud muchifundinau: “Antu ashakama mulong wa kuda ni kuna. Kupwa atumbuka mulong wa kwisangaresh.” 8 Kangal twasalany yisal ya masandj,* mud mwasalau amwing pakach pau, ni antu tunan makum maad ni tusatu (23 000) afa mu dichuku dimwing. 9 Kangal twamupakany Yehova,* mud mwamupakau kud amwing pakach pau, ni ayijipa kud annak. 10 Kangal twanyinyitany,* mud mwanyinyitau amwing pakach pau, ni ayijipa kud mwangel wa kujipan. 11 Yom yiney yayishikena yid yilakej kud etu, ni ayifunda mulong wa kutubabesh nich etu tushicha kwinsuden kwa yirung.*

12 Chawiy muntu mwawonsu utongina anch wiminy ababal chakwel kangal wawa. 13 Kwikil choziu warishinanya kal nich chakad kuyishiken antu akwau. Pakwez Nzamb ushinshamen, ni kakwitiyap anch akupakany mu chilik wakadany kutwish kujijaman, pakwez anch choziu chashiken, ukukwinkishany mutapu wa kukwasinik chakwel utwishany kuchijijamen.

14 Chawiy, akatish nam, chinany difukwil da atupwany. 15 Nikulejinany mud antu akweta manang; rumburishany ayinen yom nilondina. 16 Rupas ra chiyukish tukata kuyukish, ov, rikatap kutukwash kutaninamu mu mash ma Kristu? Mukat tukata kubukon, ov, ukatap kutukwash kutaninamu ku mujimbu wa Kristu? 17 Mulong kud mukat umwing, chawiy ap anch etu tud avud, tud kwetu mujimbu umwing, mulong etu awonsu tukat kwanganijan mukat winou umwing.

18 Talany in Isarel a ku mujimbu: Ov, antu akata kuda yakupesh chidap mud akat kuda pamwing ni Nzamb yom yipeshinau pa chintamb?* 19 Chad yom ik nikimbina kulond? Ov, yom yipeshinau ku kapwany yid kamu yakin, ap kapwany win ud kamu wakin? 20 Bwat; pakwez nilondin anch yom yikatau kupesh antu a michid, akat kuyipesh kud ayilembil kadap kud Nzamb; ni nikatinap anch wibombany pamwing nau ayilembil. 21 Ukutwishanyap kuna mu rupas ra Yehova* ni mu rupas ra ayilembil; ukutwishanyap kuda ku “tebur wa Yehova”* ni ku tebur wa ayilembil. 22 Ap ‘ov, tukimbin kumwovish Yehova* mukau’? Kitukwetap usu kumupandakanamu ndiy, kimwawiyap?

23 Tukwet mbil ya kusal yom yawonsu, pakwez yom yawonsu yidap ya ukwash. Tukwet mbil ya kusal yom yawonsu, pakwez yom yawonsu yikatap kukasikesh. 24 Chifanyidin muntu ni muntu kudandamen kukimb, kadap uwamp wa amwinend, pakwez uwamp wa mukwau.

25 Dangany yom yawonsu yilandishinau mu sok wa mbij, pakad kwipul mulong wa kom ken, 26 mulong “divu ni yom yawonsu yidap yid ya Yehova.”* 27 Anch muntu wakad kwitiyij wakutazukany ni witiyany kuya, dangany yawonsu yikutekau kurutu kwen, pakad kwipul mulong wa kom ken. 28 Pakwez anch muntu wakulejany anch: “Mbij jinej ajipeshang ku kapwany,” kangal wadany mulong wa muntu winou wakwijikishanganya ni mulong wa kom. 29 Nisambidinap piur pa kom kenen, pakwez kom ka muntu mukwau. Mulong wak ukutwishau kurumburish want ipam kud kom ka muntu mukwau? 30 Anch nidiil ni kumujikitish Nzamb, mulong wak kwinlond nayimp piur pa yom nipanidina kujikitish kud Nzamb?

31 Chawiy, ap anch wadany, ap wanany, ap chom chikwau chawonsu ukusalanya, salany yawonsu mulong wa katumb ka Nzamb. 32 Babalany chakwel kangal wikalany in kuyipwakesh in Yuda, in Grek, ap antu a mu chikumangen cha Nzamb, 33 mud munisadina amwinam usu wa kuyisangaresh antu awonsu mu yom yawonsu, pakad kukimb uwamp wa amwinam, pakwez wa antu avud, chakwel ashiken ku kupand.

11 Ngimburijany am, mud munikata niyam kumwimburij Kristu.

2 Nikujikitishinany mulong mu yom yawonsu ukat kwinvurikany ni ulaminany fe yishankur* mud kamu mutapu nakushilanyay. 3 Nikatin wijikany anch mwant* wa ikundj mwawonsu ud Kristu, ni mwant wa mband ud ikundj, ni mwant wa Kristu ud Nzamb. 4 Ikundj mwawonsu ubwikina chom ku mutu palembilay ap palejenay uprofet umukwatishin mwant wend usany; 5 pakwez mband mwawonsu ulembila ap ulejena uprofet pakad kubwik chom ku mutu umukwatishin mwant wend usany, mulong ud kamu mud mband wakwolangau kal nsuk ku mutu. 6 Mulong anch mband kabwikinap chom ku mutu, ufanyidin kukidish nsuk jend; pakwez anch chid chom cha usany kud mband kukidish ap kukwodish nsuk ku mutu wend, ufanyidin kubwik chom ku mutu.

7 Ikundj kafanyidinap kubwik chom ku mutu wend, mulong ud chifu ni uyaj wa Nzamb, pakwez mband ud uyaj wa ikundj. 8 Mulong ikundj kadokalap kud mband, pakwez mband ndiy wadokala kud ikundj. 9 Chikwau kand, ikundj kamutangap mulong wa mband, pakwez mband amutanga mulong wa ikundj. 10 Chawiy chifanyidinay mband kwikal ni chijingidij cha kuziyin ku mutu wend, mulong wa angel.

11 Pakwez, pakach pa in kwilej a Nsalejetu, mband kaurikinap ni ikundj ap ikundj kaurikinap ni mband. 12 Mulong mud mwadokalay mband kud ikundj, chilik chimwing ikundj niyend udaku kusutin mband; pakwez yom yawonsu yidokil kud Nzamb. 13 Rumburishany ayinen: Ov, chid chiwamp kud mband kumulembil Nzamb pakad kubwik chom ku mutu? 14 Mutapu wayitangau antu, ov, ukufundishinanyap anch chid cha usany kud ikundj kwikal ni nsuk jilemp, 15 pakwez ud uyaj kud mband kwikal ni nsuk jilemp? Mulong amwinkisha nsuk mud chom cha kubwik ku mutu wend. 16 Pakwez, anch muntu ukatin kutadikijan pa mulong winou, etu tukwetap kwetu chaku chikwau, ap yikumangen ya Nzamb niyawiy yikwetap.

17 Pakwez pinikwinkishinanya mbil jinej, kinikujikitishinanyap, mulong ukat kukumanganany, kadap mulong wa yom yiwamp, pakwez mulong wa yom yiyimp nakash. 18 Cha kusambish, niteshin anch piukata kukumanganany pamwing mu chikumangen, kud kwaurok pakach pen; ni nitiyin anch mu yom yiney mud uyakin kanang. 19 Mulong kukwikal chakin kamu kwaurok pakach pen, chakwel antu akweta dilau da Nzamb pakach pen amekan patok.

20 Piukata kukumanganany pamwing, kichidap kamu mulong wa kuda Yakuda ya Urel ya Mwant. 21 Mulong pakata kuwanyin chisu cha kuyida, muntu ni muntu ukat kusambel kuda yakuda yend ya urel kurutu kwa chisu, chad ukuman ou ud ni nzal, ou walewang kal. 22 Ov, kiukwetanyap yikumbu kwa kudiil ni kuniil? Ov, upipejinany chikumangen cha Nzamb ni kuyikwatish aburedina usany? Usotilany nikulejany ik? Ov, nifanyidin kukujikitishany? Pa mulong winou nikutwishap kukujikitishany.

23 Mulong yom nileja kud Nsalejetu yawiy kamu nakufundishinanya, anch Nsalejetu Yesu, uchuku wading ufanyidinau kumupan, wanona mukat, 24 ni kupwa kwa kumujikitish Nzamb, waubukona, ni walonda anch: “Winou umekeshin mujimbu wam upaninau mulong wenen. Dandamenany kusal mwamu mulong wa kwinvurik am.” 25 Wasala kand chilik chimwing piur pa rupas, papwishau kuda yakuda ya urel,* walonda anch: “Rupas riner rimekeshin mansuk masu mimedina pa mash mam. Dandamenany kusal mwamu mulong wa kwinvurik am chisu chawonsu ukunanya rupas riner.” 26 Mulong tupamp twawonsu ukudanya mukat winou ni ukunanya rupas riner, udandamedinany kulejan rufu ra Nsalejetu, djat ni pakwezinay.

27 Chawiy, muntu mwawonsu udila mukat ap unila rupas ra Nsalejetu pakwez ndiy kawanyidinap kuda ap kuna, ukufa nich pantaliken ni mujimbu ni mash ma Nsalejetu. 28 Cha kusambish, chifanyidin bil muntu kwishinshikin amwinend nawamp, ni ching anch wapwish kusal mwamu chad wada lel mukat ni kuna rupas. 29 Mulong muntu udila ni unila pakad kwov kurumburik kwa mujimbu, udil ni unil dirumburish dend amwinend. 30 Chawiy chiziyinau avud pakach pen ni kuyel, ni avud afil kal.* 31 Pakwez anch twijingunina ayinetu chituda,* ing kafanyinap kuturumburish. 32 Ap mwamu, anch aturumburish, chirumburikin anch Yehova* utupupin, chakwel kangal atufish nich pamwing ni mangand. 33 Pa chinech, akadivar nam, anch wakumanganany pamwing mulong wa kuda Yakuda ya Urel ya Mwant, chingelijanany umwing ni mukwau. 34 Anch muntu wovil nzal, ada kwol kwend, chakwel chisu ukukumangananya pamwing, kangal chikal mulong wa dirumburish. Pakwez piur pa milong yikwau yashala kal, nikuyipwish panikweza kwinaku.

12 Akadivar, katat piur pa yipan ya mu spiritu, nikatin wijikany nawamp yom yiney. 2 Wijany anch piwadinganya antu a michid,* akupumbulanya ni kukutwalany kwa atupwany akad kulondang, walondulanganya kwawonsu kwakutwalanganyau. 3 Katat nikatin en wijikany anch kwikil muntu utakedilau kud spiritu wa Nzamb ukutwisha kulond anch: “Yesu amushingin kal!” ni kwikil muntu ukutwisha kulond anch: “Yesu ud Nsalej!” ching anch amutakedin kud spiritu utumbila.

4 Kud yipan kushalijan, pakwez yidokil ku spiritu umwing; 5 kud midimu kushalijan, pakwez kud kwau Nsalej umwing; 6 kud mitapu kushalijan yikatay Nzamb kusal mu antu, pakwez kud kwau Nzamb umwing. 7 Pakwez spiritu ukat kumekan kud muntu mwawonsu mulong wa uwamp wa antu akwau. 8 Mulong kusutin spiritu, muntu ukat kutambul ukaliweny wa kulond nich manang; kusutin spiritu ndiy umwing, muntu mukwau ukat kutambul ukaliweny wa kulond nich ronganyin; 9 kusutin kand spiritu winou, mukwau ukat kutambul ritiy, mukwau yipan ya kwokan kusutin spiritu winou umwing; 10 mukwau kand ukaliweny wa kusal yilay, mukwau ukaliweny wa kulejan uprofet, mukwau ukaliweny wa kujingunin yom yipepidilau, mukwau ukaliweny wa kulond mu mazu kushalijan, ni mukwau kand ukaliweny wa kukarumun mazu makad kwijikan. 11 Pakwez yom yiney yawonsu ayiwanyishin kud spiritu ndiy umwing, ukata kwangan yipan yiney mud mukatinay kud muntu ni muntu.

12 Mulong mud mutapu mujimbu wa muntu uda umwing pakwez ukwet yid yivud, ni yid yawonsu ya ku mujimbu, ap anch yidap nchik yivud, pakwez yisadin kwau mujimbu umwing, mwamu muday niyend Kristu. 13 Mulong etu awonsu, kusutin spiritu umwing, atubatisha mu mujimbu umwing, twikala in Yuda ap in Grek, twikala asuk ap ant ipau,* ni etu awonsu twatambula* spiritu umwing.

14 Chakin, mujimbu ukwetap chid chimwing pakwez ukwet yid yivud. 15 Anch mwend walond anch: “Mulong am nidap chikas, nidap chid cha mujimbu,” chinech chikusalap anch mwend ulik kwikal chid cha mujimbu. 16 Anch ditu dalond anch: “Mulong am nidap kwam dis, nidap kwam chid cha mujimbu,” chinech chikusalap anch ditu dilik kwikal chid cha mujimbu. 17 Anch mujimbu wawonsu wading dis, mutapu ik welangay muntu kutesh? Anch mujimbu wawonsu wading ditu, mutapu ik welangay muntu kwov madjimb? 18 Pakwez Nzamb wateka yid yawonsu ya mujimbu mud mwakatay.

19 Anch yid yawonsu yading kwau chid chimwing, kwisu kwafanyinang kwikal mujimbu? 20 Chawiy, kud yid yivud, pakwez mujimbu ud kwau umwing. 21 Dis dikutwishap kuchel chikas anch: “Nikwetap ney kuswir,” ap kand, mutu ukutwishap kumel mend anch: “Nikwetap nen kuswir.” 22 Chinyim ni chinech, yid ya mujimbu yimekena mud yiziyin nakash, yid niyau ya usey, 23 ni yid ya mujimbu tutongining anch yidap kamu kwau ya usey, tukat kuyibangin nakash, chawiy, yid yakad kumekan ku mes tukat kuyilam nich kalimish nakash, 24 pakwez yid ya usey yikwetap kuswir kwa kuyibangin mwamu. Ap mwamu, Nzamb wanunga mujimbu pamwing, ni kupan kalimish kavud kud yid yading yikweta kuswir kwa kuyilimish, 25 chakwel kangal kwikal kwaurok mu mujimbu, pakwez yid ya mujimbu yibangijadin yimwing ni yikwau. 26 Anch chid chimwing chaman mar, yid yikwau yawonsu yikat kuman nach mar pamwing; ap anch chid chimwing achitumbish, yid yikwau yawonsu yikat kusangar nach pamwing.

27 Chawiy en udany mujimbu wa Kristu, ni muntu ni muntu pakach pen ud chid cha mujimbu. 28 Ni Nzamb wateka yid kushalijan mu chikumangen: cha kusambish atwimbuy; cha kaad aprofet; cha kasatu alej; kupwa in kusal yilay, in yipan ya kwokan, in kuyikwash akwau, in kutakel, ni akweta chipan cha kulond mazu kushalijan. 29 Awonsu kadap atwimbuy, kimwawiyap? Awonsu kadap aprofet, kimwawiyap? Awonsu kadap alej, kimwawiyap? Awonsu kadap in kusal yilay, kimwawiyap? 30 Awonsu kakwetap yipan ya kwokan, kimwawiyap? Awonsu kakwetap chipan cha kulond mu mazu makad kwijikan, kimwawiyap? Awonsu kakwetap chipan cha kukarumun mu mazu makad kwijikan, kimwawiyap? 31 Chawiy dandamenany kukimb nich mushiku yipan yida yijim nakash. Pakwez nikimbin kukulejany kand njil yipandakena kuwap.

13 Anch nalond mu mazu ma antu ni ma angel pakwez kinikwetap rukat, nid mud rupwambu ridjimina ap mud rubemb riletina masok. 2 Ni anch nikwet chipan cha kulejan uprofet ni novil kurumburik kwa ujindj wawonsu utumbila ni nikwet ronganyin rawonsu, ni anch nikwet ritiy rijim mu chilik cha kushemunin mikandu, pakwez nikwetap rukat, nid kwam wa chamwamu. 3 Anch napan yom yawonsu nikweta mulong wa kuyidish antu akwau, ni anch napan mujimbu wam chakwel niibaz, pakwez nikwetap rukat, yom yiney yawonsu yikwinkwashap ku chom.

4 Rukat rikat kushimpish muchim ni kumekesh kuwap. Rukat rikwetingap mukau. Rikatap kwibaz, rikatap kwitutul, 5 rikatap kusal yom ya usany,* rikatap kukimb uwamp wa arinar, rikatap kujiman swa. Rikatap kulam rukuny. 6 Rikatap kusanger yom yakad kutentam,* pakwez rikat kusanger mu uyakin. 7 Rikat kuduul yom yawonsu, rikat kwitiyij yom yawonsu, rikat kuchingej yom yawonsu, rikat kujijamen yom yawonsu.

8 Rukat rikujiyangap. Pakwez chipan cha uprofet chikez kapwa, cha kulond mu mazu makad kwijikan* chikez kapwa, cha ronganyin chikez kapwa. 9 Mulong tukwet ronganyin ra chikunku ni tulejen uprofet wa chikunku, 10 pakwez pakushika chiwanyidina, chida cha chikunku chikez kapwa. 11 Pinading mwanikanch, nalondang mud mwanikanch, natongang mud mwanikanch, nashinshikinang yom mud mwanikanch; pakwez katat nikala kal muntu mukurump, nalikang kal yaku ya wanikanch. 12 Mulong katat tumen kwa kufiyamijan mud mu dikalash da chikung, pakwez kurutu oku tukuman mes ni mes.* Katat nikwet ronganyin ra chikunku, pakwez kurutu oku nikwijik nawamp yom yawonsu, mud mwingijay am nawamp. 13 Ap mwamu, katat yom yiney yisatu yidandamedin: ritiy, ruchingej, rukat; pakwez chom chijim nakash pa yawonsu yiney rid rukat.

14 Londulany njil ya rukat, pakwez dandamenany kusurab yipan ya mu spiritu, pakampwil chipan cha kulejan uprofet. 2 Mulong muntu ulondina mu dizu dakad kwijikan, kalondinap kud antu, pakwez kud Nzamb, mulong kwikil muntu umuteshina, pakwez ulondin ujindj utumbila kusutin spiritu. 3 Pakwez muntu ukata kulejan uprofet ukat kutung, kukasikesh ni kwongoj antu kusutin mazu mend. 4 Muntu ulondina mu dizu dakad kwijikan wikasikeshin amwinend. Pakwez ulejena uprofet ukasikeshin chikumangen. 5 Nasotang mud ing en awonsu walondangany mu mazu makad kwijikan, pakwez nikatin anch ulejanany uprofet. Mulong muntu ulejena uprofet umupandakenamu muntu ulondina mu mazu makad kwijikan, kwij anch warumburil yilondinay, chakwel akasikesh chikumangen. 6 Pakwez pa chisu chinech, akadivar, mud anch nez kud en, nalond mazu mawakadany kwijik, yikukukwashany ku yik anch nikulejinanyap kujingunik kudokila kud Nzamb, ap ronganyin, ap uprofet, ap mafundish?

7 Chid mutapu umwing ni yom yakad mwom yikata kudjim, mud mushiy ap kadad. Anch kwikil kushalijan kwa yidjimin, mutapu ik tukutwisha kujingunin yom yipepinau ku mushiy ap yibudinau ku kadad? 8 Mulong anch chidjimin cha mpuny chovikenap nawamp, nany ukwirijeka mulong wa kurish njit? 9 Chilik chimwing, anch nich rudim ren, ulondinanyap mazu maswapela kutesh, mutapu ik ukutwishay muntu kwijik yom ulondinanya? Mwamu ulondinany kwen mu rinkind. 10 Kukutwish kwikal mazu mavud mu mangand, pakwez kwikil ap dimwing diburedina mutapu wa kudirumburil. 11 Mulong anch novilap kurumburik kwa yom yilondinau, nikwikal ngendj kud muntu ulondina, ni ndiy ukwikal ngendj kud am. 12 Chid kand mwamu piur penen, mulong ukimbinany nich impu nakash yipan ya spiritu, kimbany yipan yikukasikesha chikumangen.

13 Chawiy, muntu ulondina mu dizu dakad kwijikan ufanyidin kulembil chakwel atwish kudikarumun. 14 Mulong anch nilembil mu dizu dakad kwijikan, chipan cham cha spiritu chawiy chilembila, pakwez manang mam masadinap chom. 15 Chad yom ik nifanyidina kusal? Nikulembil nich chipan cha spiritu, pakwez nikulembil kand nich manang mam. Nikuwang miminy ya kushiman nich chipan cha spiritu, pakwez nikuwang kand miminy ya kushiman nich manang mam. 16 Chamwamu, anch wapan kushiman nich chipan cha spiritu, mutapu ik ukutwishay muntu wamwamu* uda pakach pen kwakul anch “Amen” ku malembil mey ma kujikitish, anch kateshinap yom ulondina? 17 Chakin, umujikitishin Nzamb mu mutapu uwamp, pakwez umukasikeshinap muntu mukwau. 18 Nimujikitishin Nzamb mulong nilondin mu mazu mavud kukusutanyamu en awonsu. 19 Ap mwamu, mu chikumangen nikusanger kulond mazu matan manovila kurumburik mulong wa kuyifundish antu akwau, pa ndond pa kulond mazu tunan dikum (10 000) mu jindim jakad kwijikan.*

20 Akadivar, kangal wikalany an akemp mu mutapu wen wa kutesh yom, pakwez ikalany an akemp mu yom yiyimp; ni ikalany antu amakurump mu mutapu wen wa kutesh. 21 Mu Chijil afundin anch: “ ‘Nikulond kud antu inay nich mazu ma wingendj ni milamu ya angendj, pakwez ap mwamu akulik kwau kwintesh,’ mwamu mulondinay Yehova.”* 22 Chipan cha kulond mu mazu makad kwijikan chid chijingidij mulong wa antu akad kwitiyij, kadap mulong wa antu itiyijina; pakwez kulejan uprofet kud mulong wa antu itiyijina, kadap mulong wa antu akad kwitiyij. 23 Chawiy anch chikumangen chawonsu chakumangan pamwing ni antu awonsu asambish kulond mu mazu makad kwijikan, chad kwez antu amwamu, ap akad kwitiyij, ov, kakulondap anch wazarikangany kal? 24 Pakwez anch en awonsu ulejenany uprofet ni kwez muntu wakad kwitiyij ap wamwamu, yom yawonsu yikuteshay yikumukwash kuswimp ni kwishinshikin nawamp amwinend. 25 Mwamu ujindj wa mu muchim wend ukumekan patok, chawiy ukwas manungun, wazendjik mpal pansh, wamwifukwil Nzamb ni kulond anch: “Nzamb ud chakin pakach pen.”

26 Akadivar, yom ik chad yifanyidina kusal? Anch wakumanganany pamwing, umwing ufanyidin kuwang kuseng, mukwau kufundish, mukwau kulejan kujingunik, mukwau kulond mu dizu dakad kwijikan, ni mukwau kukarumun yom yilondinau. Salany yom yiney yawonsu mulong wa kukasikeshijan. 27 Ni anch kud antu alondina mu mazu makad kwijikan, afanyidin kwikal aad ap asatu anch avul nakash, afanyidin kuchingelijan, ni kufanyidin kwikal mwin kukarumun. 28 Pakwez anch kwikil mwin kukarumun, afanyidin kuninet mu chikumangen, ni kulondin mu michim yau ni kud Nzamb. 29 Aprofet aad ap asatu akutwish kulond, ni antu akwau afanyidin kusal usu wa kwov kurumburik. 30 Pakwez anch muntu mukwau pashichay watambul kujingunik, muntu wa kusambish wada ulondina ufanyidin kuninet zoong. 31 Mulong en awonsu ukutwish kulejanany uprofet muntu ni muntu pa chisu chend, chakwel antu awonsu akutwish kwilej ni kwikal akasikeshinau. 32 Aprofet afanyidin kuyikel chipan chau cha spiritu. 33 Mulong Nzamb kadap Nzamb wa kanvundangesh pakwez wa chisambu.

Mud mu yikumangen yawonsu ya atumbila, 34 amband afanyidin kuninet mu yikumangen, mulong kakwetap mbil ya kulond, pakwez afanyidin kuziyin mud mulondina kand Chijil. 35 Anch asotin kwov kurumburik kwa chom, afanyidin kuyipul anfumwau ku yikumbu, mulong chid cha usany kud mband kulond mukach mwa chikumangen.

36 Ov, dizu da Nzamb dadokala kud en, ap ov, yenanya kusu waditambulanya?

37 Anch muntu utongin anch ud muprofet ap ukwet chipan cha spiritu, ufanyidin kwijik anch yom nikufundidinanya yid mbil yidokila kud Nsalejetu. 38 Pakwez anch muntu kijap yom yiney, niyend kakumwijikap.* 39 Chawiy, akadivar nam, dandamenany kukimb nich mushiku chipan cha kulejan uprofet, pakwez kangal wakangeshany chipan cha kulond mu mazu makad kwijikan. 40 Pakwez yom yawonsu yifanyidin kusadik kwa kalimish* ni pakad kanvundangesh.

15 Katat nikuvurishinany, akadivar, piur pa rusang ruwamp nakulejanya, rawitiyanya, ni riwimenanya. 2 Akat kukupandishany kand kusutin rusang ruwamp riner nakulejanya anch walamatanyaku ba, kwij anch wikalanya kwen in kwitiyij chamwamu.

3 Mulong pakach pa yom ya kusambish nakulejanya pading yom natambula niyam, anch kukwatijan ni Mifund, Kristu wafa mulong wa yitil yetu; 4 ni anch amujika, inge, anch amuvumbula pa dichuku da chisatu kukwatijan ni Mifund; 5 ni anch wamubudikina Sefas,* kupwa wayibudikina atwimbuy dikum ni yaad (12). 6 Ni kupwa kwa yiney, wayibudikina akadivar yitot yitan (500) ni kusut pa chisu chimwing, avud pakach pau ad netu pamwing, ap anch amwing alel kal tul mu rufu.* 7 Chad wamubudikina Yakobu, kupwa wayibudikina atwimbuy awonsu. 8 Pakwez kwinsuden wambudikina niyamam kand mud mwan wavadika kal kabish.*

9 Mulong nid mukemp nakash pakach pa atwimbuy, ni niwanyidinap kwintazuk anch kambuy, mulong nazengola chikumangen cha Nzamb. 10 Pakwez nid chinida kusutin ranaken rijim ra Nzamb. Ni ranaken rend rijim ranmekeshinay radingap ra chamwamu, mulong nasala mudimu nakash kuyisutamu awonsu; ap mwamu kadap am, pakwez ranaken rijim ra Nzamb rida niyamam. 11 Ap anch yama, ap anch awiy akufundishanya, winou wawiy uruu tulejena, ni wawiy winou uruu witiyijanya.

12 Katat anch tulejen anch Kristu amuvumbula mu rufu, chad mutapu ik ulondinau amwing pakach pen anch kwikil kwau divumbuk da afu? 13 Anch chakin kwikil divumbuk da afu, komb Kristu niyend kamuvumbulap kwend. 14 Ni anch Kristu kamuvumbulap, mudimu wetu wa kulejan ud kwau wa chamwamu, ni ritiy ren kand rid kwau ra chamwamu. 15 Chikwau kand, chimeken anch tud atuman a makasu a Nzamb, mulong anch afu kakuvumbukap, komb tupanin uman wa makasu piur pa Nzamb anch wamuvumbula Kristu, chad ndiy kavumbukap kwend. 16 Mulong anch afu kakuvumbukap, komb Kristu niyend kavumbukap. 17 Ni anch Kristu kamuvumbulap, ritiy ren rid kwau ra chamwamu; udandamedinany kushal mu yitil yen. 18 Kupwa kand, alela kal tul mu rufu mu uumwing ni Kristu ashadikin kal chikupu. 19 Anch twamuchingejina Kristu mulong kwau kusu wa mwom winou, tud antu afanyidina kwovil riy nakash kusutamu antu awonsu.

20 Pakwez twij anch Kristu amuvumbwil kal mu rufu, ud mabuj ma kusambish ma* antu alela kal tul mu rufu. 21 Mud mutapu weza rufu kusutin muntu umwing, divumbuk da afu ni dawiy dezin kusutin muntu umwing. 22 Mulong mud mutapu ukatau antu awonsu kufa mulong wa Adam, chilik chimwing antu awonsu akuyichirish ku mwom kusutin Kristu. 23 Pakwez muntu ni muntu ukuvumbuk pa chisu chend: Kristu mabuj ma kusambish, kupwa antu ada a Kristu pa chirung cha kwikalaku kwend. 24 Chad kwinsuden ukuchirish Want mu makas ma Nzamb wend uda kand Tatukwend, kupwa kwa kushesh maguvernema mawonsu ni ulabu wawonsu ni ukash wawonsu. 25 Mulong ufanyidin kuyikel mud mwant djat ni pakutekinay Nzamb akankuny awonsu mwinshin mwa yidjatil yend. 26 Ni mukankuny wa nsuden ukusheshau ud rufu. 27 Mifund yilondin anch Nzamb “wateka yom yawonsu mwinshin mwa yidjatil yend.” Pakwez palondinay anch ‘yom yawonsu ayiteka mwinshin mwend,’ chovaken kamu patok anch kamubombinapaku Nzamb wateka yom yawonsu mwinshin mwend. 28 Pakwez pakutekay Nzamb yom yawonsu mwinshin mwend, chad Mwan amwinend ni ndiy ukwitek mwinshin mwa ulabu wa Nzamb wateka yom yawonsu mwinshin mwend, kupwa Nzamb ukwikal yom yawonsu kud muntu mwawonsu.

29 Anch bwat, chikwikal nchik piur pa antu akatau kubatish mulong wa kwikal afu? Anch afu kakuvumbukap ap pakemp, mulong wak ukatau kuyibatish mulong wa kwikal afu? 30 Ni mulong wak tukata kwitekang kand mu ubaj chisu chawonsu? 31 Dichuku dawonsu nikat kurezik ku rufu. Chinech chid kamu niyau chakin akadivar, mud musangar nikweta piur penen mu Kristu Yesu Nsalejetu. 32 Anch mud antu akwau,* niyam narisha ni annam ayidany ku Efes, yinkwashin ku yik? Anch afu kakuyivumbulap, “el tudany ni kuna, mulong damashik tukufa kwetu.” 33 Kangal akudimbany. Arund ayimp akat kuyipish yaku yiwamp. 34 Chirishany manang ni salany yom yiwamp, kangal wadandamenany kusal chitil, mulong amwing pakach pen kamwijap kamu Nzamb. Nilondin mwamu mulong wa kukwovishany usany.

35 Pakwez muntu ukutwish kwipul anch: “Mutapu ik ukuvumbukau afu? Inge, akwikal ni mujimbu wa mutapu ik?” 36 Muntu wakad manang ey! Yom ukunina yikutwishap kwikal ni mwom anch kand kal yifa. 37 Ni mud yom ukata kukun, ukatap kukun mutond* wapamina kal, pakwez ukat kukun kusu ritit ra kubol, rikal ra tidiku ap ra rubut rikwau; 38 pakwez Nzamb ukat kuwinkish mutond ni mutond mujimbu mud mukatinay, ni ukat kurinkish rubut ni rubut mujimbu war arinar. 39 Mijimbu yawonsu yidingap ya mutapu umwing, pakwez kuding mujimbu wa antu, ukwau wa annam, ukwau wa atujil, ni ukwau kand wa ansh. 40 Ni kud mijimbu ya mwiur ni mijimbu ya pansh; pakwez uyaj wa mijimbu ya mwiur ushalijadin ni wa mijimbu ya pansh. 41 Uyaj wa* muten ushalijadin ni uyaj wa ngond ap ni uyaj wa atutumbu; chakin kamu, katumbu ni katumbu ukwet uyaj wend ushalijadina ni wa mukwau.

42 Chilik chimwing ni divumbuk da afu. Mujimbu ukatau kujik* ukat kuvund,* pakwez ukatau kuvumbul ukezap kavund. 43 Akat kuujik nich usany, pakwez akat kuuvumbul nich uyaj. Akat kuujik uziyina, pakwez akat kuuvumbul nich usu. 44 Akat kuujik mujimbu wa mbij, pakwez akat kuuvumbul mujimbu wa mu spiritu. Anch kud mujimbu wa mbij, kwawiy kulond anch kud kand mujimbu wa mu spiritu. 45 Chawiy achifundin anch: “Adam wa kusambish* wikala muntu ukweta mwom.” Adam wa nsuden wikala spiritu upanina mwom. 46 Pakwez, wa mu spiritu kendiyap wasambela. Wa ku mujimbu ndiy wasambela, kupwa chad wa mu spiritu. 47 Muntu wa kusambish udokil ku divu ni amusala nich rufunfut; muntu wa kaad udokil mwiur. 48 Antu asalau nich rufunfut ad mud muntu wasalau nich rufunfut, ni antu a mwiur ad mud muntu wa mwiur. 49 Ni mud mutapu tumufanina muntu wasalau nich rufunfut, chilik chimwing tukumufan kand muntu wa mwiur.

50 Pakwez nikulejinany mwamu, akadivar: Mujimbu wa mbij ni mash ukutwishap kuswan Want wa Nzamb, ni yikata kuvund yikutwishap kuswan yakad kuvundang. 51 Talany! Nikulejinany ujindj utumbila: Tukulalap etu awonsu tul mu rufu, pakwez akutukarumun etu awonsu, 52 mu kachisu kakemp, mu kukapul kwa dis, pakubulau mpuny ya nsuden. Mulong mpuny yikudjim, ni afu akuvumbuk akad kutwish kuvund, ni akutukarumun. 53 Mulong mujimbu winou ukata kuvund ufanyidin wikal wakad kuvundang, ni mujimbu winou ukata kufa ufanyidin wikal wakad kufang. 54 Pakwez yikata kuvund payikwikala yakad kuvundang, ni yikata kufa payikwikala yakad kufang, pawiy chad pakuwanyina yom yilondina Mifund anch: “Rufu ariminy kal chikupu.” 55 Rufu, kuwin kwey kud kwisu? Rufu, rumuny rey rid kwisu? 56 Rumuny rikata kulet rufu chid chitil, ni usu wa chitil chid Chijil.* 57 Pakwez wajikit kwend Nzamb, mulong ukat kutukwash kuwin kusutin Nsalejetu Yesu Kristu!

58 Chawiy, akadivar nam akatish, imanany daang, akad kunyikek, chisu chawonsu ikalany ni yom yivud ya kusal mu mudimu wa Nsalejetu, vurikany anch mudimu wen ukash usadinanya mu mudimu wa Nsalejetu udap wa chamwamu.

16 Katat piur pa kusangish nfalang mulong wa atumbila, londulany umutakel napanina ku yikumangen ya Galatiya. 2 Dichuku da kusambish da rubing ni rubing, muntu ni muntu pakach pen ufanyidin kutekaku chom kuns kukwatijan ni mutapu ukwetay, chakwel pinikushika kangal kand kwikal kusangish nfalang. 3 Pakwez pinikushika kwinaku, nikuyitum amakundj ukutondanya mu mikand yen chakwel atwal ku Yerusalem chipan chen upaninanya nich muchim umwing. 4 Pakwez, anch chamekan kand anch chiwapin niyam kuya kwinikwa, nikuya nau pamwing.

5 Nikwez kwinaku kupwa kwa kusut ku Masedon, mulong nikusutin ku Masedon; 6 nikutwish kushakamaku nen, ni pamwing ap chirung chawonsu cha mashik chikwimpwil kwinaku, kupwa ukutwish kwimbachikijanyaku chikalap nchik ndond yinikuya. 7 Nikatinap kwez kukumanany katat ni kusut kapamp kamwing, mulong nitongin kwez kusutishaku nen chisu pamwing anch Yehova* wakatish. 8 Pakwez nikushakam ku Efes djat ni ku musambu wa Pantekot, 9 mulong angazurilang kal chis chijim mulong wa kutanduril mudimu wam, pakwez akankuny ad avud.

10 Anch Timote washik, salany usu chakwel kangal kwikal chom chikumwovisha wom pakwikalay pakach pen, mulong usadin mudimu wa Yehova* mud am. 11 Chawiy kangal muntu wamupipej. Ntuminanay kunoku mu chisambu, mulong nimuchingedin pamwing nau akadivar.

12 Piur pa mukadivar netu Apolos, namwilembinang nakash chakwel eza kud en pamwing nau akadivar. Kadap katongina kwez katat, pakwez ukwez anch waman mutapu.

13 Chishany ku mes, imanany daang mu ritiy, ikalany atakamena ni akweta usu. 14 Salany yom yawonsu nich rukat.

15 Akadivar, wijany anch Sitefanas ni antu a mu chikumbu chend awiy ikala in kwitiyij a kusambish mu Akay ni anch ipana nakash mu kuyisadil atumbila. 16 Dandamenany niyen kuyiziyin antu a mutapu winou, yiziyinany kand awonsu asadina mudimu ukash ni asadina nau pamwing. 17 Nisangaredin nakash kwez kwa Sitefanas, Foritunatus, ni Akayikus, mulong ankwashin nakash pa ndond yen. 18 Mulong atukasikeshin nakash am niyenen. Chawiy yikwatany nich usey antu a mutapu winou.

19 Yikumangen ya mu Aziy yikulangwishinany. Akila ni Priska, pamwing ni chikumangen chikata kukumangen mu chikumbu chau akulangwishinany nich chirungul mwi Nsalejetu. 20 Langwishijanany umwing ni mukwau nich rukat.*

21 Yam Paul nikutumidinanya moy winou wa kufund ku chikas cham amwinam.

22 Anch muntu kamukatinap Nsalejetu, riyind rend. A Nsalejetu, ez! 23 El ranaken rijim ra Nsalejetu Yesu rikal nen. 24 El rukat ram rikal niyenen awonsu mu uumwing nend Kristu Yesu.