MUKAND WA PAUL KUD IN GALATIYA

1 Paul, kambuy wadokala kadap kud antu ap kusutin muntu, pakwez kusutin Yesu Kristu ni Nzamb Tatuku wamuvumbula, 2 ni kud akadivar awonsu ada nam, ku yikumangen ya ku Galatiya:

3 El ranaken rijim ni chisambu cha Nzamb Tatukwetu ni cha Nsalejetu Yesu Kristu yikal nen. 4 Wipana amwinend mulong wa yitil yetu chakwel atukamunin ku mangand minam mayimp* kukwatijan ni rusot ra Nzamb wetu ni Tatukwetu, 5 atumba kwend Nzamb chikupu ni chikupu. Amen.

6 Chinshimwokishin nakash pa kuman mutapu umwombinanya nyim pakad kulab Ndiy wakutazukanya ku ranaken rijim ra Kristu ni kukarumukin ku mulad windj wa rusang ruwamp. 7 Nifidinap kulond anch kud rusang ruwamp rikwau; pakwez kud antu amwing akurumbangeshinanya ni akimbina kuchukul rusang ruwamp piur pa Kristu. 8 Pakwez, ap anch umwing wa pakach petu ap mwangel wa mwiur wakulejany mud rusang ruwamp chom chakad kukwatijan ni rusang ruwamp twakulejanya, riyind rend. 9 Mud mutapu twalondang, nichirikidinamu kand, mwawonsu ukulejinanya mud rusang ruwamp chom chakad kukwatijan ni yom witiyanya, riyind rend.

10 Ov, komb katat dilau da antu nikimbina kadap da Nzamb? Ap ov, nikimbin kuyisangaresh antu? Anch nad nidandamedin kuyisangaresh antu, mud ing nafanyinangap kwikal musuk wa Kristu. 11 Akadivar, nikatin wijikany anch, rusang ruwamp nakulejanya ridokilap kud antu; 12 mulong naritambulap kud muntu, ni kanfundishapar, pakwez naritambula kusutin kujingunik kwanjinguninay Yesu Kristu.

13 Chakin, wateshanya piur pa mwikadil nading nich pakur mu win Yuda, anch napompatang nich usu nakash* chikumangen cha Nzamb ni kuchishesh; 14 ni nading niyil kurutu nakash mu win Yuda kuyisutamu antu avud a chimbu cham a ku muchid wam, mulong nading nikwet mushiku upandakena mu yishankur ya angakam. 15 Pakwez Nzamb, wasala anch nivadik* ni wantazuka ku ranaken rend rijim, pamanay anch chiwapin 16 kumwijikish Mwanend kusutin am, chakwel nilejan rusang ruwamp piur pend ku michid, nitap chiyul kud muntu* pinipa kamu; 17 ni nayap ku Yerusalem kud asambela kwikal atwimbuy kurutu kwamam, pakwez naya ku Arabiya ni kupwa nachirika ku Damas.

18 Kupwa kwa mivu yisatu naya ku Yerusalem mulong wa kumutal Sefas,* ni nashakama nend mu machuku dikum ni yitan (15). 19 Pakwez kwikil kambuy mukwau namanap, ching Yakobu mwanamakwend a Nsalejetu. 20 Katat piur pa yom nikufundidinanya, nikwinkishinany kashinsh ku mes kwa Nzamb anch nidimbenap.

21 Kupwa naya ku jindond ja mu Siriya ni ja mu Silisiya. 22 Pakwez yikumangen ya mu Yudeya yida mu uumwing ni Kristu yadingap yingija. 23 Ateshang kwau kusu anch: “Ikundj watupompatang pakur ukat kulejan katat rusang ruwamp piur pa ritiy rakimbangay kushesh.” 24 Chawiy asambisha kumutumbish Nzamb mulong wamam.

2 Kupwa kwa mivu dikum ni yinying (14) nachirika kand ku Yerusalem pamwing ni Barinabas, namusenda kand Titus. 2 Nayaku pinatambula kujingunik, ni nashikija rusang ruwamp nilejena pakach pa michid. Pakwez nasala mwamu ku ujindj, kurutu kwa amakundj ading alimishinau nakash, mulong wa kwikal nich kashinsh anch nadingap nibambedina ap nabambelap chamwamu. 3 Ap anch Titus wantwalaku wading mwin Grek, kamushindilap kumutwal ku mukand.* 4 Pakwez mulong wasambisha mulong wa akadivar a makasu iyandjika ku ujindj, andama pakach petu mulong wa kutentish want ipetu tukweta mu uumwing ni Kristu Yesu, chakwel atukwat rawonsu mu usuk; 5 twayitiyap ni twayiziyinap ap pakemp,* chakwel uyakin wa rusang ruwamp udandamen kwikal pakach pen.

6 Pakwez piur pa antu ading amekena anch ad a usey—⁠mutapu wading umekenau ukwetap usey kud am, mulong Nzamb kakushinshikinangap pa mutapu umekenay muntu ku mes—⁠amakundj inay alimishinau nakash kanlejap chom chisu ap chimwing. 7 Chinyim ni chinech, pamanau anch anginkishin kal rusang ruwamp mulong wa antu akadau kutwal ku mukand,* mud mwamwinkishawar Pita mulong wa antu atwadinau kal ku mukand—⁠ 8 mulong ndiy wamwinkisha Pita usu wa kwikal kambuy mulong wa antu atwadinau kal ku mukand* wanginkisha niyam kand usu wa kwikal kambuy wa in michid—⁠ 9 ni pajinguninau anch ading anginkishin kal ranaken rijim, Yakobu, Sefas,* ni Yohan, ading amekena mud manguj, atutila am ni Barinabas chikas cha katatuku mulong wa kumekesh anch tusadin mudimu pamwing,* chakwel etu tuya kud in michid pakwez awiy kud antu atwadinau ku mukand.* 10 Atwita kusu kudandamen kuyivurik atuzwendj, ni nikasikeshin chakin kamu kusal mwamu.

11 Pakwez pezay Sefas* ku Antiyosh, namukanda patok, mulong chading chimeken patok anch wading urumbukin.* 12 Mulong kurutu amakundj amwing a kwa Yakobu ashik, wadangang pamwing ni in michid; pakwez pashikau, walikap kusal mwamu ni waurika nau, mulong wading wovil wom wa antu atwadinau ku mukand.* 13 In Yuda akwau niyau inunga nend ni kusambish kumekesh rubabek riner, ap Barinabas niyend wayilondula mu rubabek rau. 14 Pakwez pinamana anch kiyendishinap kukwatijan ni uyakin wa rusang ruwamp, namwela Sefas* kurutu kwa antu awonsu anch: “Anch ey uda mwin Yuda, ukwet mashakamin mud ma in michid kadap mud ma in Yuda, mutapu ik ukutwisha kuyibachik in michid kushakam kukwatijan ni yishankur ya win Yuda?”

15 Etu tuda in Yuda a chivadik, kadap akayitil adokila ku michid, 16 twij anch muntu akumwel anch utentamin, kadap mulong usadin yom yilejenau mu chijil, pakwez ching kusu kusutin ritiy muday Yesu Kristu. Chawiy twatekin kal ritiy retu muday Kristu Yesu, chakwel akutwish kutwel anch tutentamin kusutin ritiy muday Kristu kadap mulong tusadin yom yilejenau mu chijil, mulong kwikil muntu* ukwelau anch utentamin mulong usadin yom yilejenau mu chijil. 17 Katat anch etu niyetu atutanin anch tud akayitil pitukimbina kutuman anch tutentamin kusutin Kristu, ov, chirumburikin anch Kristu ud kashalapol wa chitil? Chakapuk chaya mwa! 18 Anch natungiril yom yinabumuna pakur, nimekeshin anch nid mwin kujip chijil. 19 Mulong nafa pantaliken ni chijil kusutin chijil, chakwel nikal mwom mulong wa Nzamb. 20 Ampampin pa mutond pamwing ni Kristu. Kiyamap kand nida mwom, pakwez Kristu ndiy uda mwom mu uumwing niyamam. Inge, mashakamin nikweta katat mu mujimbu nimakwet kusutin ritiy muday Mwan a Nzamb, wankata ni wipana amwinend mulong wamam. 21 Nidiburilap* ranaken rijim ra Nzamb, mulong anch kutentam kudokil ku chijil, komb Kristu wafa kwend chamwamu.

3 En in Galatiya akad manang! Nany wakupumbwilanya, en amekeshinau patok kurutu kwen Yesu Kristu mutapu wamupampau pa mutond? 2 Nikwet chipul chimwing cha kukwipulany: Ov, watambulanya spiritu mulong wading usadidinany yom yading yilejenau mu chijil anch chading mulong wa ritiy mu yom wateshanya? 3 Komb uburedinany manang mwamu? Kupwa kwa kusambish nich umutakel wa spiritu,* ukimbinany kupwish nich umutakel wa chiwuntu?* 4 Ov, komb wamananya kwen mar mavud mwamu chamwamu? Anch chakin kamu wamamananya chamwamu. 5 Kwawiy kulond anch ukwinkishinanya spiritu ni kusal midimu yishimwokishena pakach pen uyisadin mulong usadidinany yom yilejenau mu chijil anch chid mulong wa ritiy ren mu yom wateshanya? 6 Chid mud piur pa Aburaham: “Wikala ni ritiy muday Yehova,* ni amumana anch utentamin.”

7 Wijany nawamp anch antu alamatina ku ritiy awiy ada an a Aburaham. 8 Nzamb wasambela kulejan mu mifund anch ukez kayiman antu a michid anch atentamin mulong wa ritiy rau, chawiy wasambela kumulej Aburaham rusang ruwamp riner palonday anch: “Kusutin ey, michid yawonsu yikez kayuk.” 9 Chawiy, antu alamatina ku ritiy akat kuyiyukish pamwing ni Aburaham wading ni ritiy.

10 Awonsu imedina pa kusal yom yilejenau mu chijil ayindamin, mulong achifundin anch: “Riyind kud muntu mwawonsu wakad kudandamen mu yom yawonsu yifundinau mu muvungur wa Chijil, wakad kuyisadin.” 11 Chikwau kand, chimeken patok anch kwikil muntu ukumanau kud Nzamb anch utentamin mulong wa chijil, mulong “mwin kutentam ukez kikal mwom mulong wa ritiy.” 12 Chad Chijil chimedinap pa ritiy. Pakwez, “muntu mwawonsu usadidina yom yiney ukwikal mwom kusutin yom yiney.” 13 Kristu watukwola, mwamu watukamunina ku mashing ma Chijil kusutin kwikal mashing pa ndond yetu, mulong achifundin anch: “Riyind kud muntu mwawonsu ukudikinau ku mutond.” 14 Chinech chasadika mwamu chakwel chiyukish cha Aburaham chishik ku michid kusutin Kristu Yesu, ni chakwel kusutin ritiy retu tutambul spiritu wakanau.

15 Akadivar, nilondin kusutin kusadin chilakej cha chiwuntu: Anch mansuk amitiy, ap anch wamitiyang ud kwend muntu, kwikil muntu ukata kumajip ap kuwejaku chom. 16 Chad kushilamu kwading kumutadin Aburaham ni rubut rend. Kalondinap anch: “Ni kud mbut jey,”* mud jivud. Pakwez alondin anch: “Ni ku rubut rey,” charumburik anch rumwing, ndiy Kristu. 17 Chikwau kand, nilondin mwamu: Chijil cheza kupwa kwa mivu yitot yinying ni makum masatu (430) chijipinap mansuk mitiyay Nzamb, komb chijipinap kushilamu. 18 Mulong anch uswan wimedin pa chijil, kwawiy kulond anch wimedinap pa kushilamu; pakwez Nzamb wamwinkau Aburaham kwa kwikatin kusutin kushilamu.

19 Chad mulong wak Chijil cheza? Achiweja mulong wa kumekesh patok kurumbuk djat ni pakushikina rubut ratambula kushilamu; ni Nzamb wasadina angel mulong wa kupan Chijil kusutin mwin kusankesh. 20 Chad kwikiling mwin kusankesh anch mulong umutadin kusu muntu umwing, ni Nzamb ud kusu kwend amwinend. 21 Ov, komb Chijil chipompatijadin ni kushilamu kwa Nzamb? Bwat kamu! Mulong mud anch aleta chijil chikutwisha kupan mwom, chakin, mud ing muntu afanyinang kumuman anch utentamin kusutin chijil. 22 Pakwez Mifund yateka yom yawonsu mu rukan ra chitil, chakwel ayinkish antu amekeshina ritiy kushilamu kudokila ku ritiy muday Yesu Kristu.

23 Ap mwamu, kurutu ritiy rishik, ading atulamidin mwinshin mwa chijil, mu rukan rach, mulong wa kuchingel ritiy rafanyinau kumekesh patok. 24 Chawiy Chijil chikala kalam* wetu utwadina kuday Kristu, chakwel atuman anch tutentamin kusutin ritiy. 25 Pakwez katat mutapu ritiy rashika kal, tudap kand mu makas ma kalam.*

26 Chakin, udany en awonsu an a Nzamb kusutin ritiy ren muday Kristu Yesu. 27 Mulong en awonsu abatishau mu Kristu wamudjadinany kal Kristu. 28 Kwikil mwin Yuda ap mwin Grek, kwikil musuk ap mwant ipend, kwikil ikundj ap mband, mulong en awonsu udany muntu umwing mu uumwing nend Kristu Yesu. 29 Chikwau kand, anch udany a Kristu, chakin kamu udany rubut ra Aburaham, answan kukwatijan ni kushilamu.

4 Chad nilondin anch, anch nswan uchid mwan mukemp, kashalijadinap ni musuk, ap anch ud nsalej wa yom yawonsu, 2 pakwez adandamedining kumutakel kud anlij ni atushalapol djat ni pa dichuku datenchikay tatukwend. 3 Chilik chimwing niyetu, pitwading an akemp, twading asuk a yom* ya mangand. 4 Pakwez pawanyina chisu, Nzamb wamutuma Mwanend, wavalau kud mband ni wading mwinshin mwa chijil, 5 mulong wa kuyikamunin antu ading mwinshin mwa chijil kusutin kuyikwol, chakwel atuswan mud an.

6 Chad katat, mulong udany an, Nzamb watumin kal spiritu wa Mwanend mu michim yetu, ni spiritu winou ukat kutoy anch: “Abba,* Tatuku!” 7 Chawiy udap kand musuk, pakwez ud mwan; ni anch ud mwan, komb ud kand nswan kusutin Nzamb.

8 Ap mwamu, piwadinganya kand kal umwijikany Nzamb, wadinganya asuk a anzamb akad kwikal chakin kamu anzamb. 9 Chad katat wamwijikanya kal Nzamb ap kakwijikanyau kal kud Nzamb, mutapu ik uchirikidinanya kand yom ya mangand ya chamwamu ni yakad usey ni usotinany kand kuyisadin mud asuk? 10 Ukat kulimishany nakash machuku, angond, yirung ni mivu. 11 Novil wom mulong wenen, anch pikil nasheshin kwam usu wam chamwamu mulong wenen.

12 Akadivar, nakwilembinany, ikalany mud am, mulong niyam nading mud en. Wanrumbukidinanyap ap pakemp. 13 Pakwez wijany anch mayej mawiy manginkisha mutapu wa kukulejany rusang ruwamp kapamp ka kusambish. 14 Ap anch mayej mam makumeshanya mar, wampipejanyap ap kwingov ngangany;* pakwez wangakanya mud mwangel wa Nzamb, mud Kristu Yesu. 15 Musangar wadinganya nich ud kwisu? Mulong nipanin uman piur pen anch, anch chading chitwishikin, wafanyinanya kubwit mes men ni kwinginkisham. 16 Chad ov, nikal kal mukankuny nen mulong nikulejinany uyakin? 17 Asadin usu wau wawonsu chakwel akupandakanany, pakwez kadap nich chitongijok chiwamp; akimbin kukwaurilany niyamam, chakwel wovany kamu ching ja kuyilondul. 18 Pakwez chiyipinap kwau anch muntu wasal usu wend wawonsu wa kukukimbany nich chitongijok chiwamp, ni kangal ching kusu kwau pinida nen pamwing, 19 anam akatish, anovidina kand misong ya kuval djat ni pakusambishinay Kristu kwikal mu en. 20 Novil mud ing nid nen chisu chinech ni kulond nen mu mutapu windj, mulong manang manrumbangen piur pen.

21 Nlejany en ukatinanya kwikal mwinshin mwa chijil, ov, uteshinanyap yom yilondina Chijil? 22 Chilakej, achifundin anch Aburaham wading ni an aad, umwing wavalay ni mwilomb ni mukwau wavalay ni mband wading mwant ipend; 23 pakwez mwan wa mwilomb wavadika mud an akwau awonsu,* chad mwan a mband wading mwant ipend wavadika kusutin kushilamu. 24 Yom yiney yikwet kurumburik kwa chifanakesh, mulong amband inay arumburikin mansuk maad, mansuk mamwing ma ku mukandu wa Sinay, mavadin an mulong wa usuk ni mad mud Agar. 25 Agar urumburikin mukandu wa Sinay uda mu Arabiya, ni umekeshin Yerusalem wa nlel, mulong ud mu usuk nau anend. 26 Pakwez Yerusalem wa mwiur ud mwant ipend, ni ndiy uda makwetu.

27 Mulong achifundin anch: “Sangar ey mband mumb wakad kuval, matok ni toy nich musangar ey mband wakad misong ya kuval; mulong an a mband wadjubwilau kal ad avud nakash kusutamu enday mband ukweta ikundj.” 28 Chad, akadivar, en udany an a kushilamu mud mutapu wadingay Izak. 29 Pakwez mud mutapu yasadika pakur, mwan wavadika mud an akwau awonsu* wasambisha kumuzengol mwan wavadika kusutin spiritu, chilik chimwing kand ni nlel. 30 Chad mifund yilondin ik? “Mwopata mwilomb ni mwanend, mulong mwan a mwilomb kakuswanap ap pakemp pamwing ni mwan a mband uda mwant ipend.” 31 Chawiy, akadivar, etu tud an, kadap a mwilomb, pakwez a mband uda mwant ipend.

5 Kristu watukamunina mulong wa want ipetu mud winou. Chawiy imanany daang ni kangal wichirishany kand ayinen mwinshin mwa mpand ya usuk.

2 Teshany! Am Paul, nikulejinany anch, anch akutwalany ku mukand,* Kristu kakwikalap wa ukwash ap ukemp kud en. 3 Nichirikidinamu kand mulong wa kumuvurish muntu mwawonsu utwadinau ku mukand* anch chimwitin kulimish Chijil chawonsu. 4 Wiyaurilany kal ni Kristu, en ukimbinanya kumekan anch utentaminany kusutin chijil; washadishinany kal ranaken rend rijim. 5 Ku mutambu wetu, kusutin spiritu, tuchingedin nich impu kutentam tuchingejina kudokila ku ritiy. 6 Mulong kud ada mu uumwing ni Kristu Yesu, kutwalan ku mukand* ap kulik kutwalan ku mukand kukwetap usey ap ukemp, pakwez ritiy risadina mudimu kusutin rukat.

7 Wad ubambedinany nawamp. Nany wakukangeshinanya kudandamen kuziyin ku uyakin? 8 Mutapu winou wa kutong udokilap kud ukutazukinanya. 9 Chivish chikemp chikat kututwish mutand* wawonsu. 10 Nikwet kashinsh anch en udanya mu uumwing ni Nsalejetu ukutonganyap mu mutapu ukwau; pakwez mwawonsu ukuletidinanya kanrumbangesh, ap anch ud nany, ukutambul dipup dimuwanyidina. 11 Ku mutambu wam, akadivar, anch nidandamedin kulejan piur pa kutwalan ku mukand,* chad mulong wak udandamedinau kwinzengol? Anch chid mwamu, mutond wa mar* udap kand diyal da kupwakesh. 12 Nasotang ing amakundj apakishina kukuwishany itungunang ayinau.*

13 Akadivar, akutazukanya kwikal ni want ipen; chijim kangal kusadin want ipen winou mud mutapu wa kukudish maku ma mujimbu, pakwez nich rukat, salijadinany mud asuk umwing ni mukwau. 14 Mulong Chijil chawonsu chiwanyidin* mu chijidik chimwing chilondina anch: “Ufanyidin kumukat mukwen mud ey amwiney.” 15 Chad anch wadandamenany kusumijan ni kubwechilijan umwing ni mukwau, babalany, anch chamwamu ukujiyishijanany umwing ni mukwau.

16 Pakwez nikulejinany anch: Dandamenany kwend kukwatijan ni umutakel wa spiritu ni ukuwanyishanyap ap pakemp maku ma mujimbu. 17 Mujimbu, mulong wa maku mau, ukwovijanangap ni spiritu, ni spiritu kakwovijanangap ni mujimbu; yom yiney yipwitamijadining chimwing ni chikwau, chawiy ukangenyana kusal yom ukatinanya kusal. 18 Chikwau kand, anch akutakedinany kud spiritu, udanyap mwinshin mwa chijil.

19 Chad midimu ya mujimbu yimeken patok, ni yid yisal ya masandj,* kwijond, mwikadil uyimp ni wa mukomu,* 20 kwifukwil yirumbidij, yom ya ayilembil, ukankuny, matend, mukau, ujim upandakena, kupwitamijan, kwaurok, kusal tuyisak, 21 ris,* kuleu maar, misambu yisutina chipim, ni yom ya mutapu winou. Nikubabeshinany piur pa yom yiney, mud mutapu nakubabeshinanya kal kand anch antu asadina yom yiney kakuswanap Want wa Nzamb.

22 Ku mutambu ukwau, dibuj da spiritu did rukat, musangar, chisambu, kushimpish muchim, muchim uwamp,* kuwap, ritiy 23 kwitudish, kwilam. Kwikil chijil chikangeshina yom mud yiney. 24 Chikwau kand, antu ada a Kristu Yesu apampin kal pa mutond mujimbu wa mbij pamwing ni yovil yikash ni maku mau.

25 Anch tushich kukwatijan ni spiritu, tudandamenany kand kwiyendish kukwatijan ni umutakel wa spiritu pakad kanvundangesh. 26 Kangal twikalany in kwibaz, in kubachikijan kubechijan umwing ni mukwau, ni kwovijadin mukau umwing ni mukwau.

6 Akadivar, ap anch muntu waya kuns pakad amwinend kwijik, en uswilanya mu spiritu kimbany mutapu wa kumuchirish muntu winou mwi njil nich muchim wa kwitudish. Pakwez babal ey amwiney, chakwel kangal akupak niyey. 2 Dandamenany kusendijadin yisend yilimina umwing ni mukwau, mwamu ukuwanyishany chijil cha Kristu. 3 Mulong anch muntu wikwatin anch ud wa usey chad ndiy ud kwend wa chamwamu, widimbin amwinend. 4 Pakwez el muntu ni muntu ashinshikin yisal yend amwinend, mwamu ukwikal ni diyingishin da kusangar piur pend amwinend, kulik mu kwiyilakej ni muntu mukwau. 5 Mulong muntu ni muntu ukusend chisend chend amwinend.

6 Chikwau kand, el muntu ufundishinau* dizu angan yom yawonsu yiwamp nend muntu ufundishina.*

7 Kangal widimbany: kakumusipangap Nzamb. Mulong chikukunay muntu chawiy kand chikwangulay; 8 mulong muntu ukunina mulong wa mujimbu wend ukwangul ku mujimbu wend kusheshik, pakwez ukunina mulong wa spiritu ukwangul ku spiritu mwom wa chikupu. 9 Chawiy kangal twalikany kusal yom yiwamp, mulong pa chisu chiwanyidina tukwangul anch tuziyinap.* 10 Chawiy komb, pitukwetanya mutapu wa kusal mwamu,* el tuyisadinany antu awonsu yom yiwamp, pakwez pakampwil anamakwetu mu ritiy.

11 Talany kujimb kwa mamuny nakufundinanganya ku chikas cham amwinam.

12 Awonsu akatina kumekesh anch ad antu awamp ku mujimbu awiy akimbina kukubachikany chakwel akutwalany ku mukand,* ni asadin mwamu mulong kusu kwau wa kwipuk kuyizengol mulong wa mutond wa mar* wa Kristu. 13 Mulong ap ayinau in atwadinau ku mukand* kakatap kulimish Chijil, pakwez akimbin anch en akutwalany ku mukand chakwel aman mutapu wa kwibaz piur pa mujimbu wen. 14 Pakwez am, pikil nez nibaz, kwij ching anch piur pa mutond wa mar* wa Nsalejetu Yesu Kristu; kusutin ndiy, mangand amajipa* ku mes kwam mud mutapu niyam wanjipau ku mes ma mangand. 15 Mulong chida cha usey kadap kwikal utwadinau ku mukand* ap wakadau kutwal ku mukand, pakwez kwikal chitang chisu. 16 Kud awonsu ashicha kukwatijan ni mbil yiney pakad kanvundangesh, chisambu ni ranaken yikal pad awiy, inge pad Isarel wa Nzamb.

17 Kusambish katat kangal muntu wanletin milong, mulong nikwet pa mujimbu wam yijingidij ya musuk wa Yesu.

18 Akadivar, el ranaken rijim ra Nsalejetu Yesu Kristu rikal pamwing ni mwikadil uwamp umekeshinanya. Amen.