MUKAND WA PAUL KUD IN EFES

1 Paul, kambuy wa Kristu Yesu ku rusot ra Nzamb, kud atumbila ada mu Efes ni ashinshamena mu uumwing ni Kristu Yesu:

2 El Nzamb Tatuku ni Nsalejetu Yesu Kristu akumekeshinany ranaken rijim ni akwinkishany chisambu.

3 Atumb kwend Nzamb, Tatukwend a Nsalejetu Yesu Kristu, mulong watuyukishin kal nich yiyukish ya mu spiritu kushalijan mu jindond ja mwiur mu uumwing ni Kristu, 4 mulong watutonda kwikal mu uumwing ni ndiy,* kurutu kwa kutek mufulandal wa mangand,* chakwel twikal atumbila ni akad chidik kurutu kwend mu rukat. 5 Mulong wasambela kututenchik kurutu kwa chisu mulong wa kutuswan mud anend kusutin Yesu Kristu, kukwatijan ni yom yikatinay, ni ku rusot rend, 6 mulong wa katumb ka ranaken rend rijim ra uyaj rakatay kutumekeshin kusutin mukatish nend. 7 Kusutin ndiy tukat kukwolik kusutin difut mulong wa mash mend, inge, akat kutulikishin kurumbok kwetu kukwatijan ni wimpich wa ranaken rend rijim.

8 Ranaken riner rijim, Nzamb wasala anch ripandakan pantaliken netu, mu manang mawonsu ni mutapu uwamp wa kutong 9 kusutin kutwijikish ujindj utumbila wa rusot rend. Wakwata mupak kukwatijan ni yom yikatinay 10 mulong wa kutenchik yom kwinsuden kwa yisu yatekau, mulong wa kukumangej pamwing yom yawonsu mu Kristu, yom yida mwiur ni yom yida pa divu. Inge, mwi ndiy 11 tuda nend mu uumwing ni watutondau nend mud answan, asambelau kutenchik kurutu kwa chisu kukwatijan ni kurijek kwendendiy ukata kuwanyish yom yawonsu mud mutapu ukwatinay mupak kukwatijan ni rusot rend, 12 chakwel ashiman uyaj wend kusutin etu ading a kusambish kwikal ni ruchingej muday Kristu. 13 Pakwez niyen wikalanya ni ruchingej muday ndiy kupwa kwa kutesh dizu da uyakin, rusang ruwamp piur pa dipandish den. Kupwa kwa kwitiyij, akutekanya chijingidij* kusutin ndiy nich spiritu utumbila wakanau, 14 uda chizu cha uswan wetu chasambelau kutwinkish, mulong wa kuyikwol antu a Nzamb kusutin difut, mulong wa katumb ka uyaj wend.

15 Chawiy niyam kudosh pinateshina piur pa ritiy ukwetanya mwi Nsalejetu Yesu ni rukat umekeshinanya kud atumbila awonsu, 16 nimikinap ap pakemp kumujikitish Nzamb mulong wenen. Nidandamedin kukujimbulany mu malembil mam, 17 chakwel Nzamb wa Nsalejetu Yesu Kristu, Tatuku wa uyaj, akwinkishany spiritu wa manang ni wa kujingunik mu ronganyin rakin piur pend. 18 Waburil kal mes ma muchim wen, chakwel wijikany ruchingej ra mutapu ik rakutazukinanyay, dipit da uyaj da mutapu ik diyilamidinay atumbila mud uswan, 19 ni mutapu upandakena kujimb usu wend pantaliken ni etu in kwitiyij. Kujimb kwinoku kumeken mu mutapu usadidinay usu wend upandakena, 20 mutapu wasadinay pad Kristu chisu chamuvumbulay ni kumushichik ku chikas chend cha katatuku mu jindond ja mwiur, 21 piur nakash pa guvernema win mwawonsu ni ulabu wawonsu ni usu wawonsu ni winsalej wawonsu ni pa dijin dawonsu dikutwishau kupil, kadap kusu kwau ching mu mangand minam* pakwez kand ni mu mangand makweza. 22 Wateka kand yom yawonsu mwinshin mwa yidjatil yend ni wamuteka kwikal mwant piur pa yom yawonsu yitadina chikumangen, 23 chida mujimbu wend, kwizul kwendendiy ukata kwizwish yom yawonsu mu yawonsu.

2 Chikwau kand, Nzamb wakwikadishanya aom ap anch wad wafilany kal mulong wa kurumbok ni yitil yen, 2 mwawendinanganya pakur kusutin kwimburij mashakamin ma* mangand minam kukwatijan ni mwant wa ulabu wa rinkind, spiritu* usadina katat mudimu mu an a kubwambwil. 3 Inge, pakur etu awonsu twiyendishang pakach pau kukwatijan ni maku ma mujimbu wetu, twawanyishang rusot ra mujimbu ni ra yitongijok yetu, ni kudosh ku kuvadik, twading an a ujim mud kand antu akwau. 4 Pakwez ku ranaken ripandakena kujimb ra Nzamb, mulong wa rukat rijim ratumekeshinay, 5 watwikadisha aom pamwing ni Kristu, ap patwading twafila kal mulong wa kurumbok kwetu—⁠akupandishanya ku ranaken rijim. 6 Chikwau kand, watuvumbula nend pamwing* ni watushichika nend pamwing* mu jindond ja mwiur mu uumwing ni Kristu Yesu, 7 chakwel mu yirung* yikweza, amekesh wimpich upandakena wa ranaken rend rijim ku riy rend mulong wetwetu tuda mu uumwing ni Kristu Yesu.

8 Akupandishanya ku ranaken rijim riner kusutin ritiy, ni chinech chidokilap kud en ayinen; pakwez chid chipan cha Nzamb. 9 Bwat, chidokilap ku yisal, chakwel kangal muntu wikal ni diyingishin da kwibaz. 10 Tud mudimu wa makas* ma Nzamb ni atutanga mu uumwing ni Kristu Yesu mulong wa kusal midimu yiwamp yasambelay kutenchik Nzamb kurutu kwa chisu chakwel tusal.*

11 Chawiy, vurikany anch pakur, en antu a michid ku mujimbu, akutazukanganya anch “akadau kutwal ku mukand”* kud atazukangau anch “atwadinau ku mukand,” atwalangau ku mukand ku mujimbu nich makas ma antu. 12 Pa chisu chinicha wadinganya pakad Kristu, wadinganya kulemp ni muchid wa Isarel, angendj ku mansuk ma kushilamu; wadinganyap ni ruchingej ni wadinganya pakad Nzamb mu mangand. 13 Pakwez katat mu uumwing ni Kristu Yesu, en wadinganya pakur kulemp, wikadinany piswimp kusutin mash ma Kristu. 14 Mulong ud chisambu chetu, ndiy wabomba yisak yaad kwikal chisak chimwing ni waupula rubumbu rading riyaurila. 15 Kusutin mujimbu wend, wadosha ukankuny, charumburik anch Chijil cha yijidik, mulong wa kusal muntu umwing musu kudokal ku yisak yaad yida mu umwing ni ndiy ni kusal chisambu, 16 ni kuchakwish chakin kamu nend Nzamb yisak yawonsu yaad mu mujimbu umwing kusutin mutond wa mar,* mulong wajipa ukankuny kusutin ndiy amwinend. 17 Ni weza walejan rusang ruwamp ra chisambu kud en wadinganya kulemp, ni chisambu kud ading piswimp, 18 mulong kusutin ndiy kwawiy tukweta etu, yisak yawonsu yaad, mutapu wa kumusejin Tatuku kusutin spiritu umwing.

19 Chawiy udanyap kand angendj ap angez, pakwez ukwetany wan a ngand umwing nau atumbila ni udany antu a mu chikumbu cha Nzamb, 20 ni akutunginany kal pa mufulandal wa atwimbuy ni aprofet, Kristu Yesu amwinend ndiy ud diyal da pa dikonk da mufulandal. 21 Mu uumwing ni ndiy, chikumbu cha kabuj chitunginau, chinunginau nawamp yikunku yach yawonsu, chikaninikin mulong wa kwikal tempel utumbila wa Yehova.* 22 Mu uumwing ni ndiy niyen akutunginany pamwing mulong wa kusal ndond ya kushakam Nzamb kusutin spiritu.

3 Mulong wa diyingishin dined am Paul, muntu wa rukan wa Kristu Yesu mulong wenen, antu a michid—⁠ 2 anch chakin kamu wateshinany anch anginkishin chisend cha kukukwashany kutaninamu mu ranaken rijim ra Nzamb mulong wa uwamp wen, 3 anch angijikisha ujindj utumbila kusutin kujingunik, mud mutapu nasambedina kufund mu wiswimp. 4 Chawiy piuyitanginanya, ukutwishany kuman mutapu novila kurumburik kwa ujindj utumbila wa Kristu. 5 Ujindj winou kawijikishap kud an a antu a yirung yikwau mud mwayijinguninangawau katat atwimbuy ni aprofet end atumbila kusutin spiritu, 6 charumburik anch in michid afanyina, mu uumwing ni Kristu Yesu ni kusutin rusang ruwamp, kwikal netu pamwing answan, yid ya mujimbu umwing ni kutaninamu netu pamwing mu kushilamu. 7 Nikadin kal kashalapol wa chom chinech kukwatijan ni chipan cha riy cha ranaken rijim ra Nzamb changinkishau ku mudimu wa usu wend.

8 Anmekeshina ranaken rijim riner, am, muntu mukemp nakash kusutamu mukemp nakash wa atumbila awonsu, chakwel nilejan ku michid rusang ruwamp piur pa dipit da Kristu dakad kutwish kupim 9 ni kushikij muntu mwawonsu kuman mutapu watakelau* kuwanyin kwa ujindj utumbila wajindjikau mu chisu chilemp mwi Nzamb watanga yom yawonsu. 10 Yom yiney yasadika mwamu chakwel katat, kusutin chikumangen, ijikish ku maguvernema ni anyikel ada mu jindond ja mwiur manang ma Nzamb mamekena mu mitapu yivud nakash kushalijan. 11 Chinech chikwatijadin ni chitongijok cha chikupu chatenchikay piur pa Kristu, Yesu Nsalejetu, 12 kusutin ndiy, tukat kulond nich kutakaman, ni tukat kumusejin Nzamb pakad chikangesh, nich kashinsh kusutin ritiy retu muday ndiy. 13 Chawiy nikwitinany chakwel kangal mar nimena mulong wenen makuziyishany, mulong marumburikin uyaj wen.

14 Mulong wa diyingishin dined, nasin manungun kud Tatuku, 15 kudokila dijin da dijuku dawonsu dida mwiur ni dida pansh. 16 Nilembil chakwel ku uyaj wend ujim, akwinkishany mutapu wa kwikal akash mu muntu udanya mukach, nich usu kusutin spiritu wend, 17 ni chakwel kusutin ritiy ren, umushichikany Kristu mu michim yen nich rukat. El ukunany mij ni kwiman daang pa mufulandal, 18 chakwel pamwing ni atumbila awonsu, utwishany chakin kamu kutesh nawamp kujimb, kulep, kulep pa kuya mwiur, ni kukurik, 19 ni kwijik rukat ra Kristu risutina ronganyin, chakwel akwizwishany nich yom yawonsu yiwamp yikatay kupan Nzamb.*

20 Katat ndiy ukutwisha, kukwatijan ni usu wend usadina mu etu, kusal yom yipandakena nakash kusutamu yom yawonsu twitina ap kutongin, 21 atumba kwend ndiy kusutin chikumangen, kusutin Kristu Yesu mu yirung yawonsu, chikupu ni chikupu. Amen.

4 Pa chinech, am, muntu wa rukan mwi Nsalejetu, nikwitinany kwiyendish kukwatijan ni kutazuk kwakutazukanyau, 2 nich kwikepish ni kwitudish kwawonsu, nich kushimpish muchim, mu kuduulijan* umwing ni mukwau mu rukat, 3 ni kwikasikesh chakin kamu kulam uumwing wa spiritu mu chisambu chikununginanya pamwing. 4 Kud mujimbu umwing, ni spiritu umwing, mud mutapu kuda kand ruchingej rumwing rakutazukinanyau; 5 Nsalej umwing, ritiy rimwing, dibatish dimwing; 6 Nzamb umwing ni Tatuku wa awonsu, uda piur pa awonsu ni kusutin awonsu ni mu awonsu.

7 Chad muntu ni muntu pakach petu watambula ranaken rijim kukwatijan ni mutapu Kristu wanganay chipan cha riy. 8 Mulong mufund ulondin anch: “Pakaninikay piur, wasenda ankwal; wapana antu mud yipan.” 9 Chad dizu “pakaninikay” dirumburikin ik anch dirumburishinap anch washirika kand mu jindond ja mwinshin, kwawiy kulond anch divu? 10 Win washirika awa, ndiy kand wakaninika piur nakash pa maur mawonsu, chakwel izwish* yom yawonsu.

11 Ni wapana amwing mud atwimbuy, akwau mud aprofet, akwau mud in kulejan,* akwau mud atufung ni alej, 12 mulong wa kuyifumb* atumbila, kuyisadin antu akwau, kutung mujimbu wa Kristu, 13 djat kamu ni patukushikena etu awonsu kwikal mu uumwing wa ritiy ni wa ronganyin rakin ra Mwan a Nzamb, kwikal muntu mukurump,* kushiken ku chilik chizwila cha Kristu. 14 Chawiy kangal twikalany kand an akemp, azambodinau mud kud mambek ni kuyiperil oku ni oku ku rinkind mwawonsu wa mafundish kusutin makasu ma antu, kusutin mipit ya manang yitenchikinau mulong wa kudimban nich. 15 Pakwez pitulondina uyakin, el kusutin rukat, tupamany mu yom yawonsu mwinshin mwendendiy uda mutu, Kristu. 16 Kusutin ndiy, mujimbu wa kabuj aunungin nawamp pamwing ni kusal anch wovijan ku ukwash wa chinungin ni chinungin. Anch chid ni chid chawanyish mudimu wach, chinech chikat kukwash mujimbu kupam pawitungina awinau mu rukat.

17 Chawiy ey yawiy yom nilondina ni uman nipanina mwi Nsalejetu, anch kangal kand wiyendishany mud mutapu ukatau kwiyendish antu a michid, mu manang mau ma chamwamu.* 18 Manang mau mad mu mididim ni ad kulemp ni mwom udokila kud Nzamb, mulong wa kukangany kwijik kwa kwisotil, mulong wa kuchinchik kwa michim yau. 19 Mulong usany wawonsu wayipwil kal, iyandjikin kal ayinau mu mwikadil uyimp ni wa mukomu* mulong wa kusal nich ris mitapu yawonsu ya yom yijondila.

20 Pakwez kiyawiyap yom wilejanya piur pa Kristu, 21 anch chakin kamu wamuteshanya ni akufundishanya kusutin ndiy, kukwatijan ni uyakin uda mu Yesu. 22 Akufundishanya kudjubul wuntu ukur ukwatijadina ni mwikadil wadinganya nich pakur ni uyipishinau nich maku mau ma kudimban. 23 Ni ufanyidinany kudandamen kwitiy akusalany kwikal asu mu usu uyikedila manang men,* 24 ni kudjal wuntu usu watangau kukwatijan ni rusot ra Nzamb mu kutentam ni kushinshaman kwakin.

25 Pa chinech, katat walikinanya kal makasu, muntu ni muntu pakach pen alond uyakin kud mukwau, mulong tud yid yikwatijadina chimwing ni chikwau. 26 Jimanany, pakwez kangal wasalany chitil; kangal walamany ujim kushik ni pakwandamina muten; 27 kangal wamushilany Djabul ndond.* 28 Mwij kangal kand wiy; pakwez asal mudimu ukash, asal mudimu uwamp nich makas mend, chakwel atwish kuman chom cha kwanganijan ni muntu uda mu maswir. 29 Kangal dizu divundina dabudik mu kan ken, pakwez ching kusu mazu mawamp mulong wa kukasikesh kukwatijan ni maswir, mulong wa kuyilej in kutesh chom cha ukwash. 30 Kupwa, kangal wanenganeshany* spiritu utumbila wa Nzamb, wakutekanyau nich chijingidij* mulong wa dichuku da kukwolik kusutin difut.

31 Djubulany kulemp rukuny rikash ra mitapu yawonsu, ujim, kuswej, kubarok, mazu ma masaal, ni yom yawonsu yikata kusalan nayimp. 32 Pakwez ikalany awamp kud umwing ni mukwau, in kuyanaken antu akwau nakash, ni kulikishijadin kwa kwisotin umwing ni mukwau mud mutapu Nzamb niyend mwakulikishinanyay kwa kwisotin kusutin Kristu.

5 Komb, mwimburijany Nzamb mud an akatish, 2 ni dandamenany kwendin mu rukat, mud mutapu Kristu niyend mwatukatay* ni wipana amwinend mulong wetwetu* kwikal mulambu ni chakupesh, res ruwamp kud Nzamb.

3 Yisal ya masandj* ni kwijond kwa mitapu yawonsu ap ris kangal ap ayijimbul pakach pen, mud mu chiwanyidina kud antu atumbila; 4 ap mwikadil wa usany ap mazu ma usup ap maswimbu mayimp—⁠yom yakad kuwanyin—⁠pakwez chinyim ni chinech, kumujikitish Nzamb. 5 Mulong wijany chom chinech, wijany nawamp ayinen, anch kwikil muntu ukata kusal yisal ya masandj* ap muntu wijondila ap mwin ris, charumburik anch mwin kwifukwil yirumbidij, ukuswana Want wa Kristu ni wa Nzamb.

6 Kangal muntu wakudimbany nich mazu ma chamwamu, mulong ujim wa Nzamb wezin pad an a kubwambwil mulong wa yom yiney. 7 Chawiy, kangal wasalany mud awiy;* 8 mulong pakur wadinganya mididim, pakwez katat udany chitokish mu uumwing ni Nsalejetu. Dandamenany kwiyendish mud an a chitokish, 9 mulong chitokish chikat kuval* mitapu yawonsu ya kuwap ni ya kutentam ni ya uyakin. 10 Dandamenany kushinshikin yom yimusangareshina Nsalejetu; 11 ni likany kwiyandjik mu midimu ya mididim yakad kusong mabuj; pakwez yisaulany chiyida kamu. 12 Mulong yom yisadilau ku ujindj yiletin usany ap pa kuyilond. 13 Chad yom yawonsu yisawilau* ayimekeshin patok kusutin chitokish, mulong chom chawonsu chimekeshinau patok chid chitokish. 14 Chawiy chilondinau anch: “Lank ey ulela, ni vumbuk, ni Kristu ukukumunyik.”

15 Chawiy babalany nakash chakwel kangal wiyendishany mud antu akad manang pakwez mud antu akweta manang, 16 sadinany nawamp nakash chisu chen,* mulong machuku minam mayipin. 17 Chawiy likany kwikal antu akad manang, pakwez dandamenany kwov kurumburik chida rusot ra Yehova.* 18 Chikwau kand, kangal walewany maar,* mulong kukat kushikij ku kusal yom yiyimp nakash,* pakwez dandamenany kwizul nich spiritu. 19 Isambany umwing ni mukwau* kusutin kuwang kuseng, kumushiman Nzamb, ni kuwang miminy ya mu spiritu; muwangilany ni kumubudin Yehova* mizik mu michim yen, 20 chisu chawonsu mujikitishany Nzamb wetu ni Tatuku mu dijin da Nsalejetu Yesu Kristu mulong wa yom yawonsu.

21 Ziyinany kud umwing ni mukwau mu wom wa Kristu. 22 Amband ayiziyin anfumwau mud mukatau kumuziyin Nsalejetu, 23 mulong ikundj ud mwant* wa mukajend mud mutapu uday Kristu mwant wa chikumangen, ndiy uda mupandish wa mujimbu winou. 24 Chawiy, mud mutapu chikumangen chimuziyidina Kristu, amband afanyidin niyau kuyiziyin anfumwau mu yom yawonsu. 25 Amakundj, dandamenany kuyikat akajen, mud mutapu Kristu niyend wakatay chikumangen, ni kwipan amwinend mulong wa chikumangen, 26 chakwel achishitwish, achinangish, mu kuchowish mem kusutin dizu, 27 chakwel amekesh kurutu kwend amwinend chikumangen mu uyaj wach, chakad chidik ap mukwich ap chom chikwau cha mutapu winou, pakwez chitumbila ni chakad kapad.

28 Chilik chimwing, amakundj afanyidin kuyikat akajau mud mijimbu yau ayinau. Ikundj umukatina mukajend wikatin amwinend, 29 mulong kwikil muntu wakisap kal mujimbu* wend amwinend, pakwez ukat kuudish ni kuubangin, mud mukatay Kristu kusal piur pa chikumangen, 30 mulong tud yid ya mujimbu wend. 31 “Pa chinech, ikundj ukez kudokal kud tatukwend ni makwend ni ukulamat kud* mukajend, ni awiy aad akwikal mujimbu* umwing.” 32 Ujindj utumbila winou ud ujim. Pinap nilondin piur pa Kristu ni chikumangen. 33 Ap mwamu, muntu ni muntu pakach pen ufanyidin kumukat mukajend mud mwikatinay amwinend; ku mutambu ukwau, mband ufanyidin kwikal ni kalimish kakurikina pantaliken ni nfumwend.

6 An, yiziyinany anvaj en mu uumwing ni Nsalejetu, mulong chinech chitentamin. 2 “Mulimisha tatukwey ni makwey” chawiy chijidik cha kusambish chikweta kushilamu oku: 3 “Chakwel yom yenda nawamp mu mwom wey* ni chakwel ushakam chisu chilemp pa divu.” 4 Ni atatuku, kangal wasambishany kuyijimesh anen, pakwez dandamenany kuyilidin mu dipup ni mu umutakel wa* Yehova.*

5 Asuk, yiziyinany ansalejen a chiwuntu,* nich wom ni kalimish* mu win kashinsh wa michim yen mud mutapu umuziyidinanya Kristu, 6 kadap ching anch akutadinany,* mulong kusu wa kuyisangaresh antu, pakwez mud asuk a Kristu asadina rusot ra Nzamb nich mupim wawonsu.* 7 Yisadinany ansalejen nich muchim uwamp mud umusadidinany Yehova,* kadap antu, 8 mulong wijany anch chom chiwamp chawonsu chisadinay muntu ni muntu, Yehova* ukumuchirishinach, ikala musuk ap mwant ipend. 9 Niyen ansalej, dandamenany kuyisadin mutapu umwing, pakad kuyovish wom, mulong wijany anch Nsalejau uda kand Nsalejen ud mwiur, ni ndiy kakwetingap kasolikany.

10 Kupwa, dandamenany kutambul usu kud Nsalejetu kusutin dikand da usu wend. 11 Djalany yom yawonsu ya njit ya Nzamb chakwel utwishany kwiman daang pantaliken ni mipit ya* Djabul; 12 mulong tufanyidin kurish, kadap ni mash ni mbij, pakwez ni maguvernema, ni anyikel, ni ant a mangand ma mididim yiney, ni usu wa aspiritu ayimp ada mu jindond ja mwiur. 13 Chawiy sendany yom yawonsu ya njit ya Nzamb, chakwel utwishany kujijaman pa dichuku diyimp, ni kupwa kwa kuwanyish yom yawonsu, wimanany daang.

14 Pa chinech, imanany daang, nich mukab* wa uyakin wa kukas mwi mbund yen, adjadina rikibu ra pa ntul ra kutentam, 15 ni adjadina ku mend* yen mushiku wa kulejan rusang ruwamp ra chisambu. 16 Kupwa kwa yawonsu yiney, sendany rikibu rijim ra ritiy riukutwishanya kujimish nich jinseu jawonsu ja kasu ja Djabul.* 17 Chikwau kand, tambulany mpup wa dipandish ni mpak ya musamun ya spiritu, charumburik anch dizu da Nzamb, 18 piudandamedinanya kulembil yisu yawonsu* mu spiritu kusutin mitapu yawonsu ya malembil ni kwilemb. Ni mulong wa diyingishin dined, dandamenany kuchish ku mes kusutin kudandamen kumwilembin Nzamb mulong wa atumbila awonsu. 19 Nlembilany kand niyam chakwel anginkish ya kulond pinifungwila kan kam, chakwel nitwish kulond nich kutakaman pinijikishina ujindj utumbila wa rusang ruwamp, 20 ringikadishina ntimesh ukasinau miyolal, ni chakwel nirilejan nich kutakaman, mud munifanyidina kusal.

21 Katat chakwel niyen wijikany mutapu nida ni yom nisadina, Tishik, mukadivar mukatish ni kashalapol ushinshamena wa Nsalejetu, ukukurumburilany yom yawonsu. 22 Yawiy kamu nimutumidina kwinaku, chakwel wijikany mutapu tuda ni chakwel ongoj michim yen.

23 El Nzamb Tatuku ni Nsalejetu Yesu Kristu ayinkish akadivar chisambu ni rukat pamwing ni ritiy. 24 El ranaken rijim rikal ni awonsu amukatina chakin kamu Nsalejetu Yesu Kristu.