MUKAND WA PAUL KUD IN FILIP

1 Paul ni Timote, asuk a Kristu Yesu kud atumbila awonsu ada mu uumwing ni Kristu Yesu ada ku Filip, pamwing ni amakurump ni ankwash a mudimu:

2 El ranaken rijim ni chisambu cha Nzamb Tatukwetu ni cha Nsalejetu Yesu Kristu yikal nen.

3 Nikat kumujikitish chisu chawonsu Nzamb wam pinikata kukuvurikany 4 mu kwilemb kwam kwawonsu mulong wenen awonsu. Nikat kusal malembil min mawonsu ma kwilemb nich musangar, 5 mulong wa ukwash wapaninanya kal ku* rusang ruwamp kudosh dichuku da kusambish djat ni katat. 6 Mulong nikwet kashinsh ka chom chinech, anch Nzamb wasambisha mudimu uwamp mu en ukuushikij kwinsuden djat ni pa dichuku da Kristu Yesu. 7 Chitentamin kud am kutong mwamu piur penen awonsu, mulong udany mu muchim wam, en utanidinanyamu mu ranaken rijim pamwing niyam pinida mu rukan ni mu kulondin ni kwijikish rusang ruwamp kud antakel.

8 Mulong Nzamb ud kaman wam anch novil ja kukumanany nakash en awonsu, mulong nikwet rukat rakin mulong wenen, mud rikwetay Kristu Yesu. 9 Ni ech chawiy chom nidandamedina kwit mu malembil, anch rukat ren ridandamen kujimb kamu nakash pamwing ni ronganyin rakin ni ukaliweny ukurikina wa kujingunin; 10 anch utwishany kujingunin yom yida ya usey nakash, chakwel wikalany ishitwila ni kulik kuyipwakesh antu akwau kushik ni pa dichuku da Kristu; 11 ni chakwel wizulany nich dibuj da kutentam, dikatay kubudish Yesu Kristu kusutin etu, mulong wa katumb ni uyaj wa Nzamb.

12 Akadivar, katat nikatin wijikany anch yom yanshikedina yakwashin kutwal kurutu rusang ruwamp, 13 mwamu chijiken patok kud Atulam a Chipang cha Mwant awonsu ni akwau awonsu anch nid mu rukan mulong wa kumwambat Kristu. 14 Katat, kwintek mu rukan kwasadin anch akadivar avud mwi Nsalejetu iman daang,* ni amekeshin kutakaman nakash mulong wa kulejan dizu da Nzamb pakad wom.

15 Chakin, amwing amulejen Kristu mulong wa mukau ni kubechijan, pakwez akwau asadin mwamu nich muchim uwamp. 16 A nsuden inay amulejen Kristu mulong wa rukat, mulong ij anch antondin kal mulong wa kwimen rusang ruwamp; 17 pakwez a kusambish asadin mwamu mulong wa kurishikishijan, kadap nich chitongijok chiwamp, mulong akimbin kwinwejin yakamish mu rukan nida. 18 Nich chibudikin ik? Chitongijok chikal chiwamp ap chiyimp, chidaku, mu mitapu yawonsu, Kristu amulejen, ni chom chinech chikat kwinsangaresh, ni nikudandamen kand kusangar, 19 mulong nij anch yom yiney yikushikij ku dipandish dam mulong wa malembil men ma kwilemb ni ku ukwash wa spiritu wa Yesu Kristu. 20 Chinech chikwatijadin ni impu yikash ni ruchingej nikweta anch kinikwovap usany ap pakemp, pakwez anch kusutin mazu mam nilondina nich kashinsh, Kristu akumushiman katat, mud mutapu chiding kal, kusutin mujimbu wam, chikal kusutin mwom ap kusutin rufu.

21 Mulong ku mutambu wam, kwikal mwom chid mulong wa Kristu ni kufa kud kutaninamu. 22 Chad anch changit kudandamen kwikal mwom mu mujimbu, chinech chid chibudikin cha mudimu wam; pakwez chinafanyinang kutond, nichijikishinap. 23 Nimenap cha kutond pakach pa yom yaad yiney, mulong nikatin nakash kukwolik ni kwikal pamwing ni Kristu, chom chida chakin kamu chiwamp nakash. 24 Pakwez, chid cha usey nakash nidandamen kushal mu mujimbu mulong wenen. 25 Chawiy, mulong nikwet kashinsh ka chom chinech, nij anch nikushal ni nikudandamen kwikal niyenen awonsu chakwel uyan kurutu ni mulong wa musangar wen mu ritiy, 26 chakwel pinikwikala kand nen pamwing, musangar wen upandakan mu Kristu Yesu mulong wamam.

27 Chijim iyendishany mu mutapu uwamp* kukwatijan ni rusang ruwamp piur pa Kristu, chakwel pinikweza kukumanany ap panikulika kwikalaku, nitesha piur pen anch wiminyany daang mu uumwing,* nich chitongijok chimwing,* usadinany pamwing chikij ku chikij mulong wa kutwal kurutu ritiy mu rusang ruwamp, 28 ni pakad kukwovishany wom ap pakemp kud akankuny nen. Chom chinech ud uman wa kusheshik kud awiy, pakwez wa dipandish kud en; ni chinech chidokil kud Nzamb. 29 Mulong akwinkishinany kal dilau, kadap kusu ching da kutek ritiy muday Kristu pakwez kand da kuman mar mulong wendendiy. 30 Mulong urishinany ni mar ma mutapu umwing ni mawamananya narisha nich am, mar nidandamedina kurish nich ni nlel mud mutapu uteshinanya.

2 Chad paukasikeshenanya mu Kristu, pa wongojinanya nich rukat, piudanya mu uumwing wa mu spiritu, piumekeshinanya rukat rakin ni ranaken, 2 salany anch musangar wam upandakan, kusutin kwikal ni chitongijok cha mutapu umwing ni rukat ra mutapu umwing, mu kwikal chakin kamu mu uumwing* mu yisal ni mu mutapu wa kutong. 3 Kangal wasalany yom mulong wa kurishikishijan ap mulong wa kwimekesh, pakwez nich kwikepish yimanany antu akwau mud akusutinanyamu, 4 ni kimbany kadap ching kusu uwamp wen ayinen, pakwez kand uwamp wa antu akwau.

5 Lamany mu en mutapu winou wa kutong wading kand mu Kristu Yesu, 6 ap anch wading ufanaken ni Nzamb, kikalap ap kusu ni chitongijok cha kupakish kwilakan ni Nzamb. 7 Bwat, pakwez walikap yom yawonsu, witiy kwikal musuk, ni wikala muntu.* 8 Chikwau kand, pezay mud muntu,* wikepisha amwinend ni waziyina kushik ni ku rufu, inge, rufu pa mutond wa mar.* 9 Chawiy, Nzamb wamuzambwisha pa ndond ya piur nakash ni wamwinkisha kwa kwikatin dijin dida piur pa dijin dikwau din dawonsu, 10 chakwel mu dijin da Yesu, antu awonsu asa manungun—⁠ada mwiur ni ada pansh ni ada kwinshin kwa divu—⁠ 11 ni chakwel rudim rawonsu ritiyin patok anch Yesu Kristu ud Nsalej mulong wa uyaj wa Nzamb Tatuku.

12 Pa chinech, akatish nam, mud mutapu uziyidininganya kal, kadap ching kusu anch nidap pakwez katat chipandakena kwa kwikatin pinakad kwikalaku, dandamenany kusal usu wa kushikij kwinsuden dipandish den nich wom ni kuzal. 13 Mulong Nzamb ndiy ukata kukukasikeshany chakwel umusangareshany chakin kamu, ukat kukwinkishany rusot* ni usu wa kusal mwamu. 14 Dandamenany kusal yom yawonsu pakad kunyinyit ni kutadikijan, 15 chakwel wikalany akadau kufish nich ni akad mulong, an a Nzamb akad kapad mukach mwa antu ayimp akad kusal yom yitentamina a chirung chinech, en umunyikinanya mud yom yilamina chitokish mu mangand, 16 ni alamina fe dizu da mwom. Mwamu nikwikal ni diyingishin da kusangar pa dichuku da Kristu, mulong nikwijik anch nabambilap ap kusal mudimu ukash chamwamu. 17 Pakwez, ap anch angichil mud mulambu wa yakuna pa chakupesh ni pa mudimu wen utumbila,* kwakutwalanya ritiy ren, nisanger nakash pamwing niyenen awonsu. 18 Chilik chimwing niyen kand ufanyidinany kusangar nakash pamwing niyamam.

19 Nichingejin anch piswimp ap, ku rusot ra Nsalejetu Yesu, nikumutum Timote kwinaku, chakwel nsang nikutambula piur pen jinkasikesh. 20 Mulong nikwetap muntu mukwau ukweta muchim mud wendendiy ni ukubangina chakin kamu maswir men. 21 Mulong akwau awonsu akimbin uwamp wau ayinau, kadap wa Yesu Kristu. 22 Pakwez wijany anch wamekesha amwinend, anch mud mwan ni tatuku, wasala mudimu ukash pamwing niyam mulong wa kutwal rusang ruwamp kurutu. 23 Chawiy ndiy nitongina kutum kupwa kamu kwa kuman mutapu ukusuta milong yam. 24 Niyam amwinam win nikwet kashinsh anch, anch rid rusot ra Nsalejetu, nikwez piswimp ap.

25 Pakwez mu chisu chinech nimen anch chid cha usey kukutuminanay Epafirodit, mukadivar nam, mbay nam wa mudimu, ni mukwetu turishina nend uwatumanya kand mulong wa kwinkwash ni kuwanyish maswir mam, 26 mulong wovil nakash ja kukumanany en awonsu ni wovil ushon nakash mulong wateshinany anch wad uyedin. 27 Chakin, wayedin kamu pifil; pakwez Nzamb wamwovidin riy, ni kadap kusu kwend ching ndiy wovidinau riy pakwez kand niyam, chakwel kangal nawej ushon pa ukwau. 28 Chawiy nimutumina mau mau, chakwel usangarany kand piukumumananya ni chakwel niyam nilik kwiyakamish. 29 Komb mud mutapu usadininganya kal, mwakany nich musangar wawonsu mud mukadivar mwi Nsalejetu, ni dandamenany kuyikat nakash amakundj a mutapu winou, 30 mulong warezikin rufu mulong wa mudimu wa Kristu,* watekin mwom* wend mu ubaj mulong wa kwinginkish ukwash wakangenanya en kwinginkish.

3 Cha nsuden, akadivar nam, dandamenany kusangar mwi Nsalejetu. Chidap chom chikash kud am kukufundinany kand yom yawiy yimwing, ni chid mulong wa diking den.

2 Yibabelany atubu; yibabelany antu akata kusalan nayimp; yibabelany antu akata kukatwol mujimbu. 3 Mulong etu yetu katwadinau ku mukand wakin,* etu tusadina mudimu utumbila kusutin spiritu wa Nzamb, etu twibazidina mu Kristu Yesu ni twakad kutek ruchingej retu mu mujimbu, 4 ap anch am nikwet mayingishin ma kutek ruchingej mu mujimbu kusutamu muntu win mwawonsu.

Anch muntu utongin anch ukwet mayingishin ma kutek ruchingej mu mujimbu, am nimakwet chipandakena: 5 antwala ku mukand* pa dichuku da chinan, mwin Isarel, wa ku muchid wa Benjamin, mwin Hebereu wavadikina kud in Hebereu; piur pa chijil, Mufaris; 6 piur pa mushiku, napompatang chikumangen; piur pa kutentam kwimedina pa chijil, namekesha anch kwikil chom cha kwinfish nich. 7 Pakwez yom yading ya ukwash kud am, nayimana mud yakad usey* mulong wa Kristu. 8 Chikwau kand, nimen kand yom yawonsu mud yakad usey mulong wa usey upandakena kujimb wa ronganyin ra Kristu Yesu Nsalejam. Mulong wendendiy nitiyin kal kushadish yom yawonsu ni kuyiman mud dishitil,* mulong wa kumwikal nend Kristu 9 ni mulong wa kwikal mu uumwing ni ndiy, kadap mulong wa kutentam kwam kudokila ku kuziyin ku Chijil, pakwez mulong wa kutentam kudokila ku ritiy mu Kristu, kutentam kudokila kud Nzamb ni kwimedina pa ritiy. 10 Rusot ram rid ra kumwijik ndiy ni usu wa divumbuk dend ni kuman mar mud mamanay ndiy, kusutin kwitiyin kufa mud mwafay ndiy, 11 mulong wa kuman anch nikutwish kusutin mitapu yawonsu kushiken ku divumbuk da kusambish da afu.

12 Kadap anch natambwil kal difut dined ap anch angikadishin kal uwanyidina, pakwez nidandamedin kwikasikesh mulong wa kuman anch niyam nikutwish kulam chom chantondinay* Kristu Yesu. 13 Akadivar, nitonginap anch nachikwatang kal; pakwez uyakin ud anch: Nikat kuvuramen yom yida kwinyim ni kusal usu nakash wa kukwat* yom yida kurutu, 14 nidandamedin kubambil ni chitongijok cha kutambul difut da kutazuk kwa mwiur kwa Nzamb kusutin Kristu Yesu. 15 Pa chinech, chifanyidin antu awonsu a pakach petu aswila ikal ni mutapu winou wa kutong, ni anch ukwetany mutapu ukwau wa kutong pa mulong kanang, Nzamb ukukujinguninany mutapu wa kutong winou. 16 Ap mwamu, chikalap nchik mutapu twayila kal kurutu, tudandamenany kwiyendish pakad kanvundangesh mu mutapu wawiy umwing.

17 Akadivar, en awonsu ngimburijany am, ni yishinshikinany antu iyendishina kukwatijan ni chilakej twakushilanya. 18 Mulong kud avud—⁠nayisambinang yisu yivud, ni pinap niyisambidin kand pakwez nich mansoj ku mes—⁠iyendishina mud akankuny a mutond wa mar* wa Kristu. 19 Disuden dau kusheshik, Nzamb wau divumu dau, uyaj wau mu win yakin usany wau, ni atekin manang mau ching ku yom ya pansh. 20 Pakwez etu wan a ngand wetu ud mwiur, ni tumuchingedin nich impu mupandish ukudokala mwiur, Nsalejetu Yesu Kristu, 21 ukukarumuna mujimbu wetu wa chamwamu chakwel wikal mud* mujimbu wend wa uyaj kusutin usu wend ujim umukwashina kutek yom yawonsu mwinshin mwa ulabu wend.

4 Pa chinech, akadivar nam nikatila ni novila ja kuman, en udanya musangar ni chibangul cham, akatish nam, imanany daang mu mutapu winou mwi Nsalejetu.

2 Nimukasikeshin Evodiy ni nimukasikeshin Sentish kwovijan* mwi Nsalejetu. 3 Inge, nikwitin kand niyey mbay nam wakin wa mudimu,* dandamen kuyikwash amband inay arisha pamwing niyamam chikij ku chikij mulong wa rusang ruwamp, kumuwejaku Kilema pamwing nau ambay nam a mudimu akwau, akweta majin mau makufund mu buku wa mwom.

4 Sangarany chisu chawonsu mwi Nsalejetu. Nilondin kand, Sangarany! 5 El mwikadil wen wa kwisikan wijikan kud antu awonsu. Nsalejetu ud piswimp. 6 Kangal wiyakamishany piur pa chom ap chimwing, pakwez mu yom yawonsu kusutin kulembil ni kwilemb pamwing ni kujikitish, mwijikishany Nzamb kwit kwen; 7 ni chisambu cha Nzamb chisutinamu yom yawonsu tukutwisha kutesh chikulam michim yen ni manang men* kusutin Kristu Yesu.

8 Cha nsuden, akadivar, yom yawonsu yida yakin, yom yawonsu yilimishina, yom yawonsu yitentamina, yom yawonsu yishitwila, yom yawonsu yiwanyidina kukat, yom yawonsu yikweta katumb kawamp, yom yawonsu yiwamp, ni yom yawonsu yiwanyidina kushiman, dandamenany kutongijokin pa yom yiney. 9 Yom wilejanya ni yawitiyanya ni yawateshanya ni kuman kud am, salany yom yiney, ni Nzamb wa chisambu ukwikal nen.

10 Nisanger nakash mwi Nsalejetu pa kuman anch katat wasambishangany kal kand kwimbangin. Chakin wimbangidiningany kwawonsu oku, pakwez wadinganyap ni mutapu wa kumekesh mwamu. 11 Nilondinap mwamu mulong nid mu maswir, mulong nilejin kal kusanger yinikweta chikalap nchik mashakamin mam. 12 Nij mutapu wa kushakam ni yom yikemp ni mutapu wa kushakam ni yom yivud. Mu yom yawonsu ni mu mashakamin ma mitapu yawonsu nilejin kal ujindj piur pa mutapu wa kwikut ni mutapu wa kushakam ni nzal, piur pa mutapu wa kwikal ni yom yivud ni mutapu wa kushakam pakad chom. 13 Mu yom yawonsu nikwet usu mulong wendendiy ukata kwinginkish ukash.

14 Pakwez wasadinany nawamp kwinkwash mu mar mam. 15 Chakin, en in Filip wijany kand nawamp anch piwateshanya kapamp ka kusambish rusang ruwamp, chisu nadokala ku Masedon, kukudoshanyaku en, kwikil chikumangen chikwau ap chimwing chibomba nam mu kupan ni kutambul; 16 mulong pinading ku Tesalonik, wantuminanya yom ya kuwanyish nich maswir mam kadap kusu kapamp kamwing pakwez tupamp twaad. 17 Kichidap anch nikimbin chipan, nikimbin kusu anch utambulany difut mulong wa kupan kwen. 18 Pakwez nikwet yom yawonsu niswirikedina ni kusut kand. Niwanyishin yom yawonsu, kudosh natambwidina yom wantumidinanya kud Epafirodit; chipan chida mud res ruwamp, chakupesh chitiyikina ni chimusangareshina Nzamb. 19 Ku mutambu wend, Nzamb wam ukuwanyish kamu maswir men mawonsu kukwatijan ni uyaj wa wimpich wend kusutin Kristu Yesu. 20 Atumba kwend Nzamb Tatukwetu chikupu ni chikupu. Amen.

21 Nlangwishinanyau atumbila in awonsu ada mu uumwing ni Kristu Yesu. Akadivar ada nam pamwing akulangwishinany. 22 Atumbila awonsu, pakampwil a kwa Kayisar, akulangwishinany.

23 El ranaken rijim ra Nsalejetu Yesu Kristu rikal pamwing ni mwikadil uwamp umekeshinanya.