MUKAND WA PAUL KUD IN KOLOSAY

1 Paul, kambuy wa Kristu Yesu ku rusot ra Nzamb, ni Timote mukadivar netu, 2 kud atumbila ni akadivar ashinshamena mu uumwing ni Kristu ada ku Kolosay:

El Nzamb Tatukwetu akwinkishany ranaken rijim ni chisambu.

3 Tukat kumujikitish chisu chawonsu Nzamb, Tatukwend a Nsalejetu Yesu Kristu, patukata kukulembilany, 4 mulong twateshin piur pa ritiy ukwetanya mu Kristu Yesu ni rukat ukwetanya mulong wa atumbila awonsu 5 mulong wa ruchingej rikulamidinanyau mwiur. Pakur wateshanya piur pa ruchingej riner kusutin uruu wa uyakin wa rusang ruwamp 6 rashika ni kud en. Mud mutapu rusang ruwamp risongina mabuj ni kupalangan pa mangand mawonsu, mwamu kand risadina pakach pen kudosh kamu dichuku wateshanya ni wijikanya nawamp ranaken rijim ra Nzamb, mutapu rida chakin kamu. 7 Yawiy wilejinanya kuday mbay netu mu usuk ni mukatish netu Epaferas, uda kashalapol ushinshamena wa Kristu pa ndond yetu. 8 Ndiy kand watulejina piur pa rukat ukwetanya kusutin spiritu.*

9 Chawiy kand chisadina anch kudosh kamu dichuku twatesha yom yiney, twimikinap kukulembilany ni kwit chakwel akwizwishany nich ronganyin rakin ra rusot rend nich manang mawonsu ni kutesh kwa mu spiritu, 10 chakwel wiyendishany mud mufanyidinau kwiyendish antu amusadidina* Yehova* mulong wa kumusangaresh mu yawonsu piudandamedinanya kusong mabuj mu mudimu uwamp win wawonsu ni kuya kurutu mu ronganyin rakin ra Nzamb; 11 ni el akukasikeshany nich usu wawonsu kukwatijan ni dikand dend da uyaj chakwel ujijamenany yom yawonsu nich kushimpish muchim ni musangar, 12 oku ukat kumujikitishany Tatuku, wakutwishishanya kutambul uswan wa atumbila ada mu chitokish.

13 Watukamunina ku ulabu wa mididim ni kutwandjik mu want wa Mwanend mukatish, 14 atukwodin kal kusutin difut mulong wendendiy, atulikishidin kal yitil yetu. 15 Ud chifu cha* Nzamb wakad kumekanang, kabuz ivumu wa* yitang yawonsu; 16 mulong yom yikwau yawonsu yida mwiur ni yida pa divu ayitanga kusutin ndiy, yimekena ni yakad kumekan, mikala matand ap winsalej, ap maguvernema ap ulabu. Yom yikwau yawonsu ayitanga kusutin ndiy ni mulong wendendiy. 17 Chikwau kand, wadingaku kurutu kwa yom yikwau yawonsu, ni yom yikwau yawonsu yikalaku kusutin ndiy, 18 ni ud mutu wa mujimbu, wa chikumangen. Ud disambishin, wa kusambish kudokal ku afu, chakwel ikal wa kusambish mu yom yawonsu; 19 mulong Nzamb wamana anch chiwapin mikadil yend yawonsu yikal mwi ndiy* Kristu, 20 ni chakwel kusutin ndiy achakwish yom yikwau yawonsu ni ndiy amwinend, yikala yom yida pa divu ap yom yida mwiur, mu kusal chisambu kusutin mash michilay pa mutond wa mar.*

21 Inge, en wadinganya pakur kulemp ni Nzamb ni wadinganya akankuny nend mulong wading utekinany manang men ku yisal yiyimp, 22 katat wakuchakwishinany kal kusutin mujimbu wa mbij wa Mwanend, kusutin rufu rend, chakwel akumekeshany kurutu kwend kwikal atumbila, akad chidik ni akadau kufish nich ku chom ap chimwing—⁠ 23 chakin, ching anch wadandamenany mu ritiy, wimanany daang pa mufulandal pakad kushemunik, pakad kupumbuk ku ruchingej ra rusang ruwamp riner wateshanya ni ralejanau pakach pa yitang yawonsu yida mwinshin mwa diur. Am Paul nikadin kal kashalapol wa rusang ruwamp riner.

24 Katat nisangaredin mar nimena mulong wenen, ni nimen mar ma Kristu machiburedina mu mujimbu wam mulong wa mujimbu wend, uda chikumangen. 25 Nikala kashalapol wa chikumangen chinech kukwatijan ni chisend changinkishay Nzamb mulong wenen, mulong wa kulejan dizu da Nzamb nich muchim wawonsu, 26 ujindj utumbila wajindjikau kudosh ku yitenchik ya yom ya pakur* ni kudosh kud antu a yirung ya pakur. Pakwez katat ayijingunidinau kal antwend atumbila, 27 kud awiy amanay Nzamb anch chiwapin kuyijikish pakach pa michid dipit da uyaj da ujindj winou utumbila, uda Kristu mu uumwing niyen, ruchingej ra uyaj wend. 28 Ndiy tulejena kusutin kuyibabesh antu awonsu ni kuyifundish antu awonsu nich manang mawonsu, chakwel tutwish kumumekesh muntu mwawonsu uwanyidina* kud Nzamb mu uumwing ni Kristu. 29 Chawiy nisadidina mudimu ukash ni kwikasikesh nich usu wend udikitina mudimu mu am.

2 Mulong nikimbin wijikany kujimb kwa njit nirila mulong wenen ni mulong wa in ku Laodiseya ni mulong wa awonsu akadingap kal kwinman mes ni mes.* 2 Chid mwamu chakwel michim yau ayongoj ni chakwel ikala mu uumwing mu rukat ni chakwel ikal ni dipit dawonsu didokila ku kashinsh kawonsu ka manang mau, mulong wa kwikal ni ronganyin rakin ra ujindj utumbila wa Nzamb, charumburik anch Kristu. 3 Yipau yawonsu ya manang ni ya ronganyin ayijindjikin nawamp mwi ndiy. 4 Nilondin mwamu chakwel kangal muntu wakudimbany nich mazu matadina. 5 Ap anch nidap nen mu mujimbu, pakwez nid nen mu spiritu, ni nikat kusangar pa kuman mutapu utenchikinanya yom nawamp* ni mutapu wiminyana daang mu ritiy muday Kristu.

6 Chawiy, mud mutapu wamwitiyanya Kristu Yesu Nsalejetu, dandamenany kwend mu uumwing ni ndiy, 7 ikunany mij ni kwitung paday ndiy ni kujikish mu ritiy, mud mutapu wakufundishanyau, oku ukat kupandakeshany kujikitish.

8 Babalany chakwel kangal muntu wakukwatany mu usuk kusutin manang ma mangand ni makasu ma chamwamu mimedina pa yishankur ya antu ni pa yom ya pa dishin ya mangand, kadap pad Kristu; 9 mulong kwizul kwawonsu kwa winzamb kushich chimujimbu mwi ndiy. 10 Chawiy washikedinany kwizul kusutin ndiy, ndiy uda mwant wa guvernema mwawonsu ni ulabu wawonsu. 11 Kusutin urund wen ni ndiy, niyen akutwalanya ku mukand,* kutwalan ku mukand kwakad kusadin makas, kusutin kudosh mujimbu wa mbij, kusutin kutwalan ku mukand kuda kwa Kristu. 12 Mulong akujikanya nend mu dibatish dend, ni kusutin urund ukwetanya nend akuvumbulanya kand pamwing kusutin ritiy ren mu mudimu ushimwokishena wa Nzamb, ndiy wamuvumbula kudokal ku rufu.

13 Chikwau kand, ap anch wad wafilany kal mu kurumbok kwen ni mu mwikadil wen wa antu akadau kutwal ku mukand* ku mujimbu, Nzamb wakuchirishanya ku mwom pamwing ni ndiy. Watulikishina kwa kwikatin kurumbok kwetu kwawonsu 14 ni wajima chijil cha yijidik chafundau ku makas ni chading chitufishina nich. Wachidoshin kal kusutin kuchipamp pa mutond wa mar.* 15 Kusutin mutond wa mar,* wadjodin kal ni kusha kanzikis maguvernema ni ulabu ni wayibudishin kal pa mutaj ku mes ma antu awonsu mulong wa kumekesh anch wayipandaken kal, ni mud antu a rukan, ukat kuyendish mu karishish, mud karishish kakatau kusal kupwa kwa kuwin njit.

16 Pa chinech, kangal muntu wakurumburishany piur pa yom udilanya ap unilanya ap piur pa kulimish musambu ap kwarik kwa ngond ap sabat. 17 Yom yiney yading mwizuzwimb wa yom yikweza kurutu, pakwez uyakin win ud Kristu. 18 Kangal wamulikany muntu ap umwing ukata kusanger kwikepish kwa makasu ap difukwil da angel “akutambulany difut.” Muntu winou ukat kwimen pa* yom yamenay kal, ukat kwitutul pakad diyingishin dakin mulong wa manang mend ma chiwuntu, 19 ni kalamatinap ku mutu, kuday ndiy kukata mujimbu wawonsu kutambwil yiuswirikedina ni kwibomb nawamp pamwing kusutin yinungin yau ni mijir ni kusal anch upam kupam kudokila kud Nzamb.

20 Anch wafanya pamwing ni Kristu pantaliken ni yom ya pa dishin ya mangand, chad mulong wak ushichanya mud uchidany a mangand kusutin kudandamen kuziyin yijidik mud: 21 “Kangal watambul, kangal wapak,* kangal wapukun,” 22 yijidik yitadina yom yikata kusheshik yawonsu kupwa kwa kuyisadin, yom yikwatijadina ni mbil ni mafundish ma antu? 23 Ap anch yom yiney yimeken mud manang kusutin difukwil da kwishindin muntu amwinend ni kwikepish kwa makasu, kuumesh mujimbu mar, yikwetap usey ap ukemp mu kurishikish maku ma mujimbu.

3 Chad anch akuvumbulanya pamwing ni Kristu, dandamenany kukimb yom ya mwiur, mushichay Kristu ku chikas cha katatuku cha Nzamb. 2 Dandamenany kutongin pa yom ya mwiur, kadap pa yom ya pansh. 3 Mulong wafanya ni mwom wen aujindjikin kal pamwing ni Kristu mu uumwing ni Nzamb. 4 Pakumumekeshau Kristu uda mwom wetu, chad niyen akukumekeshany nend pamwing mu uyaj.

5 Pa chinech, jipany yid ya mujimbu wen yida pa divu yitwadina ku yisal ya masandj,* ku kwijond, ku upwepu wakad kutwish kukangesh, ku maku mayimp, ni ku ris, rida kwifukwil yirumbidij. 6 Ujim wa Nzamb wezin mulong wa yom yiney. 7 Wawiy mutapu wiyendishanganya* niyen mu mwom wadinganya nich pakur.* 8 Pakwez katat ufanyidinany kudjubul yom yiney yawonsu: kuswej, ujim, uyimp, masaal, ni mazu mayimp mabudikina mu kan ken. 9 Kangal wadimbijanany muntu ni mukwau. Djolany wuntu ukur* ni yaku yau, 10 ni djalany wuntu usu, ukata kusutin ronganyin rakin, kudandamen kwikal usu kukwatijan ni chifu chendendiy wautanga, 11 kwakad kwikal mwin Grek ap mwin Yuda, utwadinau ku mukand* ap wakadau kutwal ku mukand, ngez ap mwin Skitan,* musuk ap muntu uda mwant ipend; pakwez Kristu ud yom yawonsu mu yawonsu.

12 Pa chinech, mud antu atondinau kal kud Nzamb, atumbila ni akatinau, djalany rukat rakin ni ranaken, kuwap, kwikepish, kwitudish ni kushimpish muchim. 13 Dandamenany kuduulijan* umwing ni mukwau ni kulikishijadin umwing ni mukwau kwa kwisotin ap anch muntu ukwet diyingishin da kwinan mulong amurumbukinang kud mukwau. Mud mutapu Yehova* mwakulikishinanay kwa kwisotin, niyen ufanyidinany kand kusal mwamu. 14 Pakwez kudoshaku yom yiney yawonsu, djalany rukat, mulong ud moj uwanyidina ukata kuyibomb antu pamwing.

15 Chikwau kand, el chisambu cha Kristu chiyikel mu michim yen, mulong akutazukanya ku chisambu chinech mu mujimbu umwing. Ni mekeshany kujikitish. 16 El dizu da Kristu dishakam chipandakena mu en ni dikwinkishany manang mawonsu. Dandamenany kufundishijan ni kukasikeshijan* umwing ni mukwau nich kuseng, kumushiman Nzamb, miminy ya mu spiritu ya kuwang nich muchim wa kujikitish, ni dandamenany kumuwangin Yehova* mu michim yen. 17 Mu yom yawonsu ulondinanya ap usadinanya, salany yawonsu mu dijin da Nsalejetu Yesu, ni kumujikitish Nzamb Tatukwetu kusutin ndiy.

18 En amband, yiziyinany anfumwen, mud muchifanyidina mwi Nsalejetu. 19 En amakundj, dandamenany kuyikat akajen ni kangal wayisudinany ku muchim.* 20 En an, yiziyinany anvaj en mu yom yawonsu, mulong chinech chimusangareshin Nsalejetu. 21 En atatuku, kangal wasambishany kuyijimesh* anen, chakwel kangal anenganan.* 22 En asuk, yiziyinany ansalejen a chiwuntu* mu yom yawonsu, kadap ching anch akutadinany, mulong kusu wa kuyisangaresh antu, pakwez salany mwamu nich win kashinsh wa muchim, nich wom wa Yehova.* 23 Chikalap nchik yom usadinanya, yisalany nich mupim wawonsu* mud umusadidinany Yehova,* kadap mud uyisadidinany antu, 24 mulong wijany anch Yehova* ndiy ukukwinkishanya uswan mud difut. Musadinany Nsalejen Kristu mud asuk. 25 Chakin kamu, muntu usadina uyimp akumufut kukwatijan ni uyimp wasalay, ni kwikil kasolikany.

4 En ansalej, yisadinany asuk en mu mutapu uwamp ni utentamina, ni kwijik anch niyen ukwetany Nsalejen mwiur.

2 Dandamenany kulembil, shalany achila ku mes kusutin malembil ni mujikitishany Nzamb. 3 Pa chisu chawiy chimwing, tulembilany kand niyetu, anch Nzamb azuril chis mulong wa dizu chakwel tutwish kulejan ujindj utumbila piur pa Kristu, ujindj wintekidinau mu rukan, 4 ni chakwel niulejan patok mud munifanyidina kuulejan.

5 Dandamenany kwiyendish nich manang pantaliken ni antu a pol, sadinany nawamp nakash chisu chen.* 6 Chifanyidin mazu men mikal chisu chawonsu masangareshina, ma kutek mung, chakwel wijikany mutapu ufanyidinanya kumwakul muntu ni muntu.

7 Tishik, mukadivar nam mukatish, kashalapol ushinshamena, ni mbay nam musuk mwi Nsalejetu, ukukulejany nsang jawonsu piur pam. 8 Nimutumin kwinaku chakwel wijikany mutapu tuda ni chakwel ongoj michim yen. 9 Wezin pamwing ni Onezim, mukadivar nam mukatish ni ushinshamena, wadokala kwinaku; akukurumburilany yom yawonsu yisadikina kunoku.

10 Aristarikis, mbay nam wa rukan, ukupanidinany moy, ni Marko, musanyend a Barinabas (watwakwinkishinanya mbil ya kumwak anch wez kwinaku), 11 ni Yesu utazukinau anch Yusitus, ada pakach pa atwadinau ku mukand.* Awiy kusu ada ambay nam a mudimu mulong wa Want wa Nzamb, ni ikel musul wa rongoj rijim* kud am. 12 Epaferas, musuk wa Kristu Yesu wadokala kwinaku, ukupanidinany moy. Ukat kurish chisu chawonsu mu malembil mend mulong wenen, chakwel wikalany awanyidina* ni kwikal ni kashinsh kakash mu rusot rawonsu ra Nzamb. 13 Mulong nipanin uman piur pend anch wipanin nakash mulong wenen ni mulong wa akadivar a ku Laodiseya ni a ku Hiyerapolis.

14 Luka, mwingang mukatish, ukupanidinany moy, ni Demas niyend. 15 Nlangwishinanyau akadivar a ku Laodiseya ni Ninfa pamwing ni chikumangen chikata kukumangen mu chikumbu chend. 16 Ni anch watangany mukand winou, salany chakwel autang kand mu chikumangen cha Laodiseya ni kupwa niyen utangany kand wa ku Laodiseya. 17 Kupwa, mulejany Arishipus anch: “Sal usu wawonsu mulong wa kuwanyish mudimu witiyina mwi Nsalejetu.”

18 Kwinoku kud kulangwish kwam, kwa Paul, kwa kufund ku chikas cham amwinam. Dandamenany kuvurik miyolal yam ya rukan. Ranaken rijim rikal nen.