MUKAND WA KUSAMBISH WA PAUL KUD IN TESALONIK

1 Paul, Silveng,* ni Timote, ku chikumangen cha in Tesalonik chida mu uumwing ni Nzamb Tatuku ni Nsalejetu Yesu Kristu

El ranaken rijim ni chisambu yikal nen.

2 Tukat kumujikitish Nzamb chisu chawonsu pitukata kukujimbulany en awonsu mu malembil metu, 3 mulong tukat kuvurik chisu chawonsu mudimu wen ushinshamena, usu usadinanya nich rukat, ni kujijaman kwen mulong wa ruchingej ukwetanya muday Nsalejetu Yesu Kristu kurutu kwa Nzamb Tatukwetu. 4 Akadivar akatinau kud Nzamb, twij anch Nzamb wakutondinany kal, 5 mulong rusang ruwamp tulejena kakulejanyarap nich mazu kusu pakwez akulejanyar kand nich usu, nich spiritu utumbila ni nich kashinsh kakash, mud mutapu wijanya antu a mutapu ik twikala pakach pen mulong wa uwamp wen. 6 Ni watwimburijanya etu ni Nsalejetu, mulong witiyanya dizu nich musangar wa spiritu chikalap nchik mar mavud, 7 ni washikenanya kwikal chilakej kud in kwitiyij awonsu a ku Masedon ni a ku Akay.

8 Uyakin ud anch, kadap kusu ching dizu da Yehova* dateshinau ku Masedon ni ku Akay kudokal kud en pakwez kand ritiy ren muday Nzamb rapalangen kwawonsu, chawiy tukwetap kuswir kwa kulond kand chom pa mulong winou. 9 Mulong ayinau adandamedin kulejan piur pa kapamp ka kusambish twatanijana nen ni mutapu wayombanya nyim atupwany en ni kukarumukin kud Nzamb mulong wa kumusadin Nzamb mwom ni wakin mud asuk, 10 ni kumuchingel Mwanend ukudokala mwiur, wavumbulay, charumburik anch Yesu, utukamunidina ku ujim wezina.

2 Akadivar, wijany ayinen nawamp anch kusut twasutidina kwinaku kwadingap kwakad yibudikin. 2 Mulong ap anch cha kusambish twamana mar ni atukwatisha usany ku Filip, mud muwijanya, Nzamb watwinkisha kutakaman mulong wa kukulejany rusang ruwamp ra Nzamb chikalap nchik rupompat rikash. 3 Mulong kubabesh kwetu kudokilap ku kurumbuk, ku kwijond ap ku makasu, 4 pakwez mud mutapu watumanau kud Nzamb anch tuwanyidin kutwinkish chisend cha kulejan rusang ruwamp, chawiy tukat kulond, kadap mulong wakuyisangaresh antu, pakwez mulong wa kumusangaresh Nzamb, ukata kushinshikin michim yetu.

5 Chakin, wijany nawamp anch kand kal tusadinangap ap pakemp mazu ma rilemb ap kudjal chifu cha rubabek nich yibachikin ya ris; Nzamb ud kaman! 6 Ni twakimbap katumb ka antu, chikala kud en ap kud antu akwau, ap anch mutapu tuda atwimbuy a Kristu twafanyina kwikal chisend chilimina kud en. 7 Pakwez twitudisha pakach pen, mud mutapu ukatay maku wamwishina kuyibangin nich rukat* anend. 8 Chawiy, mulong twading tukukatinany nakash, twakwata mupak,* kadap ching kusu wa kukulejany rusang ruwamp ra Nzamb pakwez kand wa kwipan ayinetu,* mulong twakukatanya nakash.

9 Akadivar, uvurikinany chakin kamu usu twasala ni mar twamana. Pitwading tukulejinanya rusang ruwamp ra Nzamb, twasalang mudimu uchuku ni muten chakwel kangal twamutwik muntu ap umwing pakach pen chisend chilimina. 10 Udany atuman, Nzamb niyend ud kaman, piur pa mutapu twiyendisha nich kushinshaman ni kutentam ni pakad kutufish nich pantaliken niyenen in kwitiyij. 11 Wijany nawamp anch twadandamena kukukasikeshany ni kukwongojany ni kumuyul* umwing ni umwing wa pakach pen, mud mukatay tatuku kusal pad anend, 12 chakwel udandamenany kwiyendish mu mutapu umusangareshina Nzamb, ukutazukinanya ku Want ni uyaj wend.

13 Chawiy tukata kand kumujikitishin Nzamb chisu chawonsu, mulong piwakanya dizu da Nzamb, diwateshanya kud etu, waditiyanya kadap mud dizu da antu pakwez, mud mudida kamu chakin, dizu da Nzamb, disadina mudimu mu en in kwitiyij. 14 Akadivar, wimburijanya yikumangen ya Nzamb yida mu uumwing ni Kristu Yesu yida mu Yudeya, mulong mar makumeshanyau kud antu a ngand yen mawiy kand mayimeshinau niyau kud in Yuda, 15 amujipa ap Nsalejetu Yesu ni aprofet, ni atuzengola etu. Chikwau kand, kamusangareshinap Nzamb, pakwez ad akankuny a uwamp wa antu awonsu, 16 mulong afidin kutukangesh kuyilej in michid uruu ukutwisha kuyipandish. Mwamu akat kwizwish chipim cha yitil yau. Pakwez disuden ujim wend ukuyezin.

17 Pakwez patwaurilau niyenen, akadivar, mu kachisu kakemp (ku mujimbu, kadap mu michim yetu), twasala usu wawonsu mulong wa kukumanany mes ni mes,* mulong twading twovil nakash ja kukumanany. 18 Mulong wa diyingishin dined twakimba kwez kwinaku, inge, am Paul, napakisha kadap kusu kapamp kamwing pakwez twaad; pakwez Satan watujikina njil. 19 Mulong risu ruchingej retu ap musangar wetu ap chibangul tukwibazina kurutu kwa Nsalejetu Yesu pa chirung cha kwikalaku kwend? Ov, kiyeniyap? 20 Udany chakin katumb ketu ni musangar wetu.

3 Mulong twatwishap kand kuchingel chisu chilemp, chawiy twamana anch chiwapin kushal ku Aten; 2 ni twamutuma Timote, mukadivar netu uda kand kashalapol wa Nzamb* mulong wa rusang ruwamp piur pa Kristu, chakwel akukasikeshany ni kukwongojany mulong wa ritiy ren, 3 chakwel mar minam kangal mamunyikesh muntu ap umwing. Mulong ayinen wijany anch tukutwishap kwiyep yom ya mutapu winou.* 4 Mulong pitwading nen pamwing, twakulejanganya anch tukuman mar, ni yawiy yashikedina, mud mutapu wijanya. 5 Chawiy, pinakangenya kuchingel chisu chilemp, natumen mulong wa kukimb jinsang piur pa kushinshaman kwen, ukuman ap mwin kupakan wakupakinany, ni usu wetu wez waya mu mem.

6 Pakwez Timote washik kal kamu katat kunoku kudokal kwinaku ni watulej kal rusang ruwamp piur pa kushinshaman kwen ni rukat ren, anch udandamedinany kutuvurik nich rukat ni anch wovilany nakash ja kutuman mud mutapu kand niyetu twovila ja kukumanany. 7 Chawiy, akadivar, yom twateshang piur pen ni kushinshaman umekeshinanya yatwongojang mu yakamish* ni mu mar metu mawonsu. 8 Mulong anch wiminyany daang mwi Nsalejetu, tukat kupizurik.* 9 Mutapu ik tukutwisha kumekesh kujikitish kwetu kud Nzamb piur penen ni mulong wa musangar upandakena twovila kurutu kwa Nzamb wetu mulong wenen? 10 Uchuku ni muten tukat kumwilembin Nzamb nich usu wawonsu chakwel tutwish kukumanany* ni kuwej yiburedina ku ritiy ren.

11 El Nzamb Tatukwetu amwinend ni Nsalejetu Yesu atufungwil njil ya kwez kwinaku. 12 Ni el Nsalejetu akupamishany, inge, akwizwishany nich rukat mulong wa umwing ni mukwau ni mulong wa awonsu, mud kand mutapu tusadina etu mulong wenen, 13 chakwel akasikesh michim yen, akwikadishany akadau kufish nich ni atumbila kurutu kwa Nzamb Tatukwetu pa chirung cha kwikalaku kwa Nsalejetu Yesu pamwing nau atumbila end awonsu.

4 Cha nsuden, akadivar, mud mutapu twakwinkishanya umutakel piur pa mutapu ufanyidinanya kwiyendish mulong wa kumusangaresh Nzamb, mud kamu mutapu wiyendishinanya, tukwitinany ni tukwilembidinany kusutin Nsalejetu Yesu kudandamen kusal mwamu chipandakena. 2 Mulong wijany umutakel* twakwinkishanya udokila kud Nsalejetu Yesu.

3 Mulong rusot ra Nzamb rid anch wikalany atumbila ni wilamany ku yisal ya masandj.* 4 Muntu ni muntu pakach pen ufanyidin kwijik kuyikel mujimbu wend mu kwishitul ni kalimish, 5 kadap nich ris, maku ma kulalijan makad kutwish kuyikel mud makwetau in michid akad kumwijik Nzamb. 6 Kwikil muntu ufanyidina kumatik mimbu ni kumwiy mukadivar nend pa mulong winou, mulong Yehova* ukat kupupan piur pa yom yiney yawonsu, mud mutapu twasambela kukulejany ni kukubabeshany kand nakash. 7 Mulong Nzamb watutazuka, kadap mulong wa kwikal ijondila, pakwez mulong wa kwikal atumbila. 8 Chawiy komb, muntu upipejina yom yiney umupipejin, kadap muntu, pakwez Nzamb, ukata kukwinkishany spiritu wend utumbila.

9 Pakwez, piur pa rukat ra ukadivar, ukwetanyap kuswir kwa kukufundinany, mulong en ayinen akufundishinany kud Nzamb kukatijan umwing ni mukwau. 10 Chakin, usadinany mwamu pantaliken ni akadivar a ku Masedon mwawonsu. Pakwez tukukasikeshinany akadivar kudandamen kusal mwamu chipandakena. 11 Ikasikeshany kushakam mu chisambu, kushinshikin pa milong yen ayinen ni kusal mudimu nich makas men, mud mutapu twakufundishanya, 12 chakwel wiyendishany nich kalimish ku mes ma antu a pol ni pikil waburenany chom.

13 Chikwau, akadivar, tukimbinap ujimbarany* uyakin piur pa alela tul mu rufu, chakwel kangal wanengananany mud mukatau kunenganan antu akad ruchingej. 14 Mulong anch twitiyijin anch Yesu wafa ni wavumbuka, twitiyijin kand anch Nzamb ukuyibomb nend pamwing alela kal tul mu rufu mu uumwing ni Yesu. 15 Mulong tukulejinany mwamu kusutin dizu da Yehova,* etu tuda aom tukushakama djat ni pa chirung cha kwikalaku kwa Nsalejetu tukuyisambelap ap pakemp alela kal tul mu rufu; 16 mulong Nsalejetu amwinend ukushirik mwiur nich dizu dikash da kupan nich mbil, nich dizu da mukurump wa angel ni nich mpuny ya Nzamb, ni antu afa mu uumwing ni Kristu akusambel kuvumbuk. 17 Kupwa etu aom tukushalaku, akutusend nau pamwing mu madj mulong wa kumusankan Nsalejetu mu rinzwizu; mwamu tukwikal chisu chawonsu pamwing ni Nsalejetu. 18 Chawiy dandamenany kwongojijan umwing ni mukwau nich mazu minam.

5 Katat piur pa yisu ni yirung, akadivar, ukwetanyap kuswir kwa kukufundinany chom. 2 Mulong wijany ayinen nawamp anch dichuku da Yehova* dezin mud mweziningay kamu mwij uchuku. 3 Pakulondau anch “Chisambu ni diking!” chad kusheshik kukuyikashimwish kapamp kamwing, mud mukata misong ya kuval kumukashimwish mband ukweta madikaj, ni kakukwasinikap ap pakemp. 4 Pakwez en, akadivar, kiudanyap mu mididim, chakwel dichuku dined dikukashimwishany mud mukata chitokish cha kucha kwa dichuku kuyikashimwish ij, 5 mulong en awonsu udany an a chitokish ni an a muten. Tudap a uchuku ap a mididim.

6 Chawiy komb kangal twalalany mud antu akwau, pakwez tushalany achila ku mes ni tulamany manang metu. 7 Mulong akata kulal aleling uchuku, ni akata kuleu maar alewining uchuku. 8 Pakwez etu tuda a muten, tulamany manang metu ni tudjalany rikibu ra pa ntul ra ritiy ni rukat, ni tudjalany ruchingej ra dipandish mud mpup 9 mulong Nzamb watutonda, kadap mulong wa kutumekeshin ujim, pakwez mulong wa kutambul dipandish kusutin Nsalejetu Yesu Kristu. 10 Watufila etu, chakwel ap anch tud achila ku mes ap alela mu tul,* tushakam pamwing ni ndiy. 11 Chawiy, dandamenany kukasikeshijan* umwing ni mukwau ni kutungijan umwing ni mukwau, mud kamu mutapu usadinanya.

12 Katat tukwitinany, akadivar, kuyilimish akata kusal mudimu ukash pakach pen ni kukutakelany mwi Nsalejetu ni kukubabeshany; 13 ni yikwatany nich usey upandakena mu rukat mulong wa mudimu wau. Shakamany mu chisambu pakach pen. 14 Ku mutambu ukwau, tukukasikeshinany, akadivar, kuyibabesh* in kulet kanvundangesh, londany mu mutapu uyongojina akweta ushon nakash,* yikwashany aziyina, yishimpishinany antu awonsu muchim. 15 Babalany chakwel kangal muntu wachirish uyimp ku uyimp, pakwez chisu chawonsu, kimbany mutapu wa kusal yom yiwamp kud umwing ni mukwau ni kud antu awonsu.

16 Sangarany chisu chawonsu. 17 Lembilany chisu chawonsu. 18 Jikitishany mulong wa chom chin chawonsu. Rawiy riner rusot ra Nzamb mulong wenen udanya mu uumwing ni Kristu Yesu.* 19 Kangal wajimishany kasu ka spiritu. 20 Kangal wapipejany uprofet. 21 Shinshikinany yom yawonsu, lamatany ku yom yiwamp. 22 Ilamany ku uyimp wa mitapu yawonsu.

23 El Nzamb wa chisambu amwinend akushitwishany kamu nakash. Ni el spiritu, mupim* ni mujimbu wen akadivar, ayilam yakadau kufish nich, ni yakad kapad mu yom yawonsu kushik ni pa chirung cha kumekan kwa Nsalejetu Yesu Kristu. 24 Ukutazukinanya ushinshamen, ni ukusal kamu mwamu chakin.

25 Akadivar, dandamenany kulembil mulong wetwetu.

26 Yilangwishany akadivar awonsu nich rukat.*

27 Nikwitinany amboku pakad maswimbu, kusutin Nsalejetu, kuyitangin akadivar awonsu mukand winou.

28 El ranaken rijim ra Nsalejetu Yesu Kristu rikal nen.