MUKAND WA KAAD WA PAUL KUD IN TESALONIK

1 Paul, Silveng,* ni Timote, ku chikumangen cha Tesalonik chida mu uumwing ni Nzamb Tatukwetu ni Nsalejetu Yesu Kristu:

2 El ranaken rijim ni chisambu cha Nzamb Tatuku ni cha Nsalejetu Yesu Kristu yikal nen.

3 Akadivar, twiyovil anch chitufanyidin kumujikitish Nzamb chisu chawonsu mulong wenen. Ni chiwapin kusal mwamu, mulong ritiy ren rikudin nakash ni rukat renen awonsu mulong wa umwing ni mukwau riyil mu kukul. 4 Chawiy twibazina ayinetu mulong wenen pakach pa yikumangen ya Nzamb mulong wa kujijaman ni ritiy ren mu kuzengok kwawonsu ni mu yikokujol* urishinanya nich.* 5 Winou ud uman wa dirumburish ditentamina da Nzamb, ni chinech chikushikij ku kukumanany anch uwanyidinany kwandam mu Want wa Nzamb umedinanya mar chakin.

6 Mulong, chid chitentamina kud Nzamb kuyimesh mar* awiy akata kukumeshany en mar. 7 Pakwez en umenanya mar akukuletinany kwiswedish pamwing niyetwetu pa chisu cha kumekan kwa Nsalejetu Yesu kudokal mwiur pamwing nau angel end a dikand 8 mu muzuzu wa kasu, pakufundakeshay kud antu akad kumwijik Nzamb ni antu akad kuziyin ku rusang ruwamp piur pa Nsalejetu Yesu. 9 Dipup da antu inay dikwikal kusheshik kwa chikupu ni akujiy kurutu kwa Nsalejetu ni kurutu kwa dikand dend da uyaj, 10 pa chisu chikwezay chakwel amutumbish mulong wa atumbila end ni chakwel amutal pa dichuku dinida nich kushimwok pakach pa awonsu amekeshina ritiy muday ndiy, mulong witiyanya nich ritiy uman twapana pakach pen.

11 Chawiy tukata kulembil chisu chawonsu mulong wenen, anch Nzamb wetu akumanany anch uwanyidinany kutazuk kwend ni kusutin usu wend asal yom yawonsu yiwamp yimusangareshina ni awanyish midimu yawonsu ya ritiy. 12 Chid mwamu chakwel dijin da Nsalejetu Yesu aditumbish kusutin en ni chakwel niyen akutumbishany mu uumwing ni ndiy kukwatijan ni ranaken rijim ra Nzamb wetu ni ra Nsalejetu Yesu Kristu.

2 Pakwez, akadivar, piur pa kumekan kwa Nsalejetu Yesu Kristu ni piur pa kutukumangej nend pamwing, tukwitinany 2 kulik kwikal aswapela kurumbangesh manang ap kwovish wom kusutin mazu mapepidilau* ap kusutin uruu ulondinau ku kan ap kusutin mukand umekena mud udokil kud etu, mulong wa kwijikish anch dichuku da Yehova* dashik kal.

3 Kangal muntu wakupumbulany mu mutapu kanang, mulong dichuku dinada dikutwishap kushik anch kupumbok kand kal kusambelaku ni anch muntu ubwambwidina chijil kand kal amekan, mwan wa disheshik. 4 Ukat kupompat ni kwizambwish amwinend piur pa chom chawonsu chitazukinau anch nzamb ap chikatau kwifukwil, chawiy ukat kushakam mu tempel wa Nzamb ni kwimekesh amwinend patok mud nzamb. 5 Ov, uvurikinanyap anch pinading niyenen nakulejanganya yom yiney?

6 Ni katat wijany chom chimukangeshina, chakwel ez amekan pa chisu chend chiwanyidina. 7 Chakin, kubwambwil chijil kwinoku kwasambishin kal mu ujindj, pakwez kukushal ujindj kushik ni pakumudoshau uda mud chikangesh pa chisu chinech. 8 Kupwa chad, mwin kubwambwil chijil ukumekan, ndiy ukusheshau kud Nsalejetu Yesu kusutin spiritu wa mu kan mwend ni ukumujiyish pa chisu chikumekana patok kwikalaku kwend. 9 Pakwez kwikalaku kwa mwin kubwambwil chijil kudokil ku usu wa Satan nich midimu yawonsu yishimwokishena ni yijingidij ni yilay ya makasu 10 ni mitapu yawonsu ya makasu madokila ku kuburen kutentam mulong wa antu ayila mu kusheshik, mud dipup dau mulong alika kwitiy rukat ra uyakin chakwel apanda. 11 Chawiy chilikidinay Nzamb chibachikin cha makasu chiyipumbul chakwel ashiken kwitiyij makasu, 12 chakwel awonsu ayirumburish mulong kitiyijap uyakin pakwez asangera kuburen kutentam.

13 Pakwez chitufanyidin kumujikitish Nzamb chisu chawonsu mulong wenen, akadivar akatinay Yehova,* mulong kudosh kwinsambishin Nzamb wakutondanya mulong wa dipandish kusutin kukushitwishany nich spiritu wend ni mulong wa ritiy ren mu uyakin. 14 Ndiy wakutazukanya ku chom chinech kusutin rusang ruwamp tulejena, chakwel utwishany kutambul uyaj wa Nsalejetu Yesu Kristu. 15 Chawiy komb, akadivar, imanany daang ni lamany fe yishankur wilejanya, chikala kusutin mazu ma mukan ap kusutin mukand wadokala kud etu. 16 Chikwau, el Nsalejetu Yesu Kristu amwinend ni Nzamb Tatukwetu, watukata ni watwinkisha rongoj ra chikupu ni ruchingej ruwamp kusutin ranaken rijim, 17 ongoj michim yen ni akukasikeshany chakwel usalany chisu chawonsu yom yiwamp mu yisal ni mu mazu.

3 Cha nsuden, akadivar, dandamenany kulembil mulong wetwetu, chakwel dizu da Yehova* didandamen kupalangan mau mau ni aditumbish, mud muchida kwinaku, 2 ni chakwel atukamunin mu makas ma antu ayimp ni akachisum, mulong kadap antu awonsu akweta ritiy. 3 Pakwez Nsalejetu ushinshamen ni ukukukasikeshany ni kukuchidijany pantaliken ni muyimp.* 4 Chikwau kand, tukwet kashinsh mwi Nsalejetu piur pen, anch udandamedinany kusadin umutakel wetu ni ukudandamenany kuusadin. 5 El Nsalejetu adandamen kutakel nawamp nakash michim yen, chakwel umukatany Nzamb ni ujijamanany mulong wa Kristu.

6 Katat, akadivar, twakwinkishany kal umutakel mu dijin da Nsalejetu Yesu Kristu, mwiyepany mukadivar mwawonsu wiyendishina mu mutapu wa kanvundangesh ni wakad kukwatijan ni umutakel* watambulanya* kud etu. 7 Mulong en ayinen wijany mutapu ufanyidinanya kutwimburij, mulong twiyendishap mu mutapu wa kanvundangesh pakach pen, 8 ni twadap yakuda ya muntu yamwamu.* Pakwez twasala mudimu wa usu ni wa mar uchuku ni muten chakwel kangal twamutwik muntu ap umwing pakach pen chisend chilimina. 9 Kidap anch tuburedin ulabu, pakwez twakata kukulejany chilakej cha kwimburij. 10 Oku ni patwading nen, twakwinkishanganya mbil yiney: “Anch muntu kakatinap kusal mudimu, kangal kand wada.” 11 Mulong tuteshin anch antu amwing iyendishin nich kanvundangesh pakach pen, kasadinap mudimu ap pakemp, pakwez akat kwiyandjik mu yom yakad kuyital. 12 Antu inay tuyinkishin mbil ey ni chiyul ech mwi Nsalejetu Yesu Kristu: Afanyidin kusal mudimu zoong ni kuda yakuda yipawilau ayinau.

13 Ku mutambu wen, akadivar, kangal waziyany kusal yom yiwamp. 14 Pakwez anch muntu kaziyidinap ku yom tulondina mu mukand winou, mutekany chijingidij ni likany kubombakan nend, chakwel akwachik usany. 15 Ap mwamu, kangal wamumanany mud mukankuny, pakwez dandamenany kumubabesh mud mukadivar.

16 Katat el Nsalej wa chisambu amwinend akwinkishany chisambu chisu chawonsu ni mu mitapu yawonsu. Nsalejetu ikal niyenen awonsu.

17 Kwinoku kud kulangwish kwam, kwa Paul, kwa kufund ku chikas cham amwinam, chida chijingidij mu mukand ni mukand; wawiy mutapu nikata kufund.

18 El ranaken rijim ra Nsalejetu Yesu Kristu rikal niyenen awonsu.