MUKAND WA KUSAMBISH WA PAUL KUD TIMOTE

1 Paul, kambuy wa Kristu Yesu kwi mbil ya Nzamb Mupandish wetu ni ya Kristu Yesu, ruchingej retu, 2 kud Timote,* mwanam wa kashinsh mu ritiy:

El Nzamb Tatuku ni Kristu Yesu Nsalejetu akumekeshin ranaken rijim, akwovil riy ni akwinkish chisambu.

3 Mud mutapu nakukasikesha pinading nikimbina kuya ku Masedon, nikukasikeshin kand kushal ku Efes, mulong wa kuyikand antu amwing chakwel kangal afundish malejan mindj, 4 ap kuta matu kwi nsang ja makasu ni ku kukimbijol milong ya angakiril.* Yom mud yiney yikatap kulet chom ap chimwing cha ukwash, pakwez yikat kushikij kusu kwau ku kulond yom yakad kwikal nich kashinsh pa ndond pa kulet chom kanang chidokila kud Nzamb piur pa ritiy. 5 Chakin, chitongijok cha umutakel winou* rid rukat ridokila ku muchim wa zwang, ku kom kawamp ni ku ritiy rakad rubabek. 6 Mu kupumbuk ku yom yiney, amwing akarumukidin kal kwi ntaad ja chamwamu. 7 Akatin kwikal alej a chijil, pakwez kwovilap kurumburik kwa yom yilondinau ap kwa yom yijikishidinau.

8 Chad twij anch Chijil chid chiwamp anch muntu wachisadin mu mutapu uwamp,* 9 anch wijik anch chijil achitekin, kadap mulong wa muntu utentamina, pakwez mulong wa antu akata kujip chijil nau antombwij, akad kumwov Nzamb wom ni akayitil, akad kushinshaman* ni in kupipej yom yitumbila, in kuyijip atatuku ni amaku, in kuyijip antu akwau, 10 antu akata kusal yisal ya masandj,* amakundj akata kusal utun,* in kwiy antu, akamakasu, antu akata kuchip kwa makasu, ni chom chikwau chawonsu chakad kukwatijan ni mafundish ma ukwash* 11 makwatijadina ni rusang ruwamp ra uyaj ra Nzamb wa musangar, ranginkishau.

12 Nimujikitishin Kristu Yesu Nsalejetu, wanginkisha usu, mulong wanmana anch nishinshamen kusutin kwinginkish mudimu, 13 ap anch pakur nading mwin kumusaal Nzamb, mwin kuzengolan ni muntu wakad kalimish. Ap mwamu, anmekeshina ranaken mulong nasalang mwamu mulong wa kuburen ronganyin ni kuburen ritiy. 14 Pakwez ranaken rijim ra Nsalejetu rapandakana pamwing ni ritiy ni rukat rida muday Kristu Yesu. 15 Mazu manam mad makuchingejin ni mawanyidin kumitiy kamu: Kristu Yesu weza mu mangand mulong wa kuyipandish akayitil. Am nid wa kusambish pakach pau. 16 Ap mwamu, anmekeshina ranaken chakwel kusutin am mukayitil wa kusambish, Kristu Yesu amekesh kushimpish muchim kwend kwawonsu ni kwintek am kwikal chilakej kud antu akuteka ritiy rau muday ndiy mulong wa mwom wa chikupu.

17 Katat el uyaj ni katumb yikal chikupu ni chikupu kud Mwant wa chikupu, wakad kuvundang, wakad kumekanang ku mes, Nzamb umwing kusu. Amen.

18 Umutakel winou* nikwinkishinau ey, mwanam Timote, kukwatijan ni uprofet walejanau piur pey, chakwel kusutin uprofet winou udandamen kurish njit jiwamp, 19 ni ulam ritiy ni kom kawamp, kadjubwilau kal antu amwing, chom chashikijina kal ritiy rau ku kujiy. 20 Himeney ni Alekizandre ad pakach pa antu inay, ni nayipanin kal mu makas ma Satan chakwel dipup dined diyifundish kulik kumusaal Nzamb.

2 Chad kurutu kwa yawonsu, nikukasikeshinany kusal malembil ma kwilemb, ma kwit, ma kuyilembil antu kwau, ni ma kujikitish mulong wa antu a mitapu yawonsu, 2 piur pa ant ni awonsu ada pa jindond ja piur,* chakwel tudandamen kushakam zoong mu chisambu mu kulamat ba kud Nzamb* ni mu mutapu wa kalimish. 3 Chom chinech chiwapin ni chitiyikin ku mes ma Nzamb Mupandish wetu, 4 usotina anch antu a mitapu yawonsu apand ni ashiken ku ronganyin rakin ra uyakin. 5 Mulong kud Nzamb umwing ni mwin kusankesh umwing pakach pa Nzamb ni antu, muntu, charumburik anch Kristu Yesu, 6 wipana amwinend kwikal difut dilikena mulong wa antu awonsu*—⁠chinech chawiy chom chikulejanau kwikal uman pa chisu chiwanyidina. 7 Mulong uman winou wawiy wantekinau am kwikal mwin kulejan ni kambuy—⁠nilondin uyakin, nidimbenap bwat—⁠anteka kwikal mulej wa in michid piur pa ritiy ni uyakin.

8 Chawiy nisotin anch mu jindond jawonsu amakundj adandamen kulembil, makas mashinshamena makuzambul, pakad ujim ni kupwitamijan. 9 Chilik chimwing, amband afanyidin kwileng mu kudjal kuda kuwamp,* mu mutapu wisikena ni nich manang mawamp,* kadap nich milad ya kukasish nsuk* ni utad wa or, yileng ap masun ma usey nakash, 10 pakwez ilenga nich yisal yiwamp mu mutapu uyiwanyidina amband alejena anch alamatin kud Nzamb.

11 Chifanyidin mband ileja pakad kulond* nich kuziyin kwawonsu. 12 Nimwitiyinap mband kufundish ap kumuyikel ikundj, pakwez ufanyidin kuninet.* 13 Mulong Adam ndiy wasalau wa kusambish, kupwa chad Ev. 14 Kupwa, Adam kamudimbap, pakwez mband amudimba kamu nakash ni wikala mukayitil. 15 Pakwez mband akumuchidij mulong wa kuval, ching anch wadandamen* mu ritiy, rukat ni kwishitul pamwing nich manang mawamp.*

3 Dizu dined did dakuchingejin: Anch muntu ukimbin kwikal mukurump,* usotin mudimu uwamp. 2 Pa chinech, mukurump ufanyidin kwikal wakadau kufish nich, ikundj ukweta mband umwing, mwin kuyikel yaku yend, ukweta manang mawamp,* wakad kanvundangesh, mwin kwakan, wija kufundish, 3 kafanyidinap kwikal mwin kuleu maar, ap mwin chisum,* pakwez ufanyidin kwikal wisikena, kadap mwin matend, ap mwin kukat nfalang, 4 ufanyidin kwikal ikundj utakedina dijuku dend nawamp, ukweta an aziyidina ni ilimishina 5 (mulong anch muntu kijap kutakel dijuku dend, mutapu ik ukubanginay chikumangen cha Nzamb?), 6 kafanyidinap kwikal muntu udokidinap pa kwitiyij, ukuman wez witutul ni kwibaz ni wawil mu dirumburish damurumburishau Djabul. 7 Kupwa, ufanyidin kand kwikal ni uman uwamp wa* antu a pol chakwel kangal waletish usany* ni kuwil mu mupit wa Djabul.

8 Chilik chimwing, ankwash a mudimu afanyidin kwikal antu ilimishina, kadap a ndim jaad,* kadap in kuna maar nakash, kadap in ris ra kukimb kutaninamu pakad win kashinsh, 9 afanyidin kwikal antu alamatina ku ujindj utumbila wa ritiy nich kom kishitwila.

10 Chikwau kand, ayipaka bil anch awanyidin;* kupwa, anch kayifishinap nich ku chom, asala chad mud atushalapol.

11 Chilik chimwing, amband afanyidin kwikal antu ilimishina, kadap in kafukej, isikena mu yaku yau, ashinshamena mu yom yawonsu.

12 Ankwash a mudimu afanyidin kwikal amakundj akweta mband umwing, atakedina anau ni majuku mau nawamp. 13 Mulong amakundj akata kusal mudimu nawamp akat kwikal ni katumb kawamp ni kwikal nich kashinsh nakash ka kulond piur pa ritiy mu Kristu Yesu.

14 Nikufundidin yom yiney, ap anch nitongin kwez kwinaku piswimp ap, 15 chakwel anch nalab, wijik mutapu ufanyidina kwiyendish mu chikumbu cha Nzamb, chida chikumangen cha Nzamb mwom, dinguj ni pikamedina uyakin. 16 Chakin, ujindj utumbila wa kwipan kwa winzamb* kwinoku ud ujim: ‘Amumekesha mu mujimbu wa mbij, amumana anch utentamin mu spiritu, wayibudikina angel, amulejana pakach pa michid, amwitiyija mu mangand, amwaka mwiur nich uyaj.’

4 Pakwez dizu dipepidilau dilondin* patok anch mu machuku ma kurutu antu amwing akez kalik ritiy, mulong akuta matu ku mazu ma makasu mapepidilau* ni ku mafundish ma ayilembil, 2 mulong wa rubabek ra antu akata kulond makasu, akweta kom ka yidwur mud koshinau kal nich chikung chisunzina kasu. 3 Akat kujidik uruw ni kuyinkish antu mbil ya kulik kuda yakuda yatangay Nzamb mulong wa kuyida nich kujikitish kud antu akweta ritiy ni ija nawamp uyakin. 4 Mulong chom chawonsu chatangay Nzamb chid chiwamp, ni kwikil chom chifanyidina kulik anch achitambul nich kujikitish, 5 mulong achishitwishin kusutin dizu da Nzamb ni malembil.

6 Anch wayinkish akadivar yiyul yiney, ukwikal kashalapol muwamp wa Kristu Yesu, udishinau mazu ma ritiy ni ma mafundish mawamp mawalondula nawamp nakash. 7 Pakwez ipuk nsang ja makasu jakad kumulimish Nzamb, mud jikatau kulond amband amapal. Ku mutambu ukwau, ifumba amwiney nich chitongijok cha kulamat kud Nzamb. 8 Mulong kwijidish mujimbu* kud kwa ukwash mu yom yikemp, pakwez kulamat kud Nzamb* kud kwa ukwash mu yom yawonsu, mulong kukwet kushilamu kwa mwom wa katat ni kwa mwom wezina kurutu. 9 Mazu minam mad makuchingejin ni mawanyidin kumitiy kamu nakash. 10 Chawiy tusadidina mudimu ukash ni kwikasikesh mulong twatekin kal ruchingej retu mwi Nzamb mwom, uda Mupandish wa antu a mitapu yawonsu, pakampwil antu ashinshamena.

11 Dandamen kupan mbil jinej ni kujifundish. 12 Kangal muntu wapipej usand wey. Pakwez ikal chilakej kud ashinshamena mu kulond, mu mwikadil, mu rukat, mu ritiy, ni mu kwishitul. 13 Kushik ni pinikwezina, dandamen kwipan mu kutang kurutu kwa antu, mu kukasikeshan, mu kufundish. 14 Kangal wadiul chipan chida mu ey chakwinkishau kusutin uprofet pakwazukau makas kud chisak cha amakurump. 15 Tongijokin nakash pa yom yiney, ipanamu nakash, chakwel kuya kurutu kwey kumekan patok kud antu awonsu. 16 Dandamen kubabal ey amwiney ni kubabel mafundish mey. Dandamen mu yom yiney, mulong mu kusal mwamu ukwipandish ey amwiney ni kuyipandish akuteshina.

5 Kangal wamukand nich kuswej ikundj wapamina kal. Pakwez mwilembina mud tatuku, ni ansand mud akadivar, 2 amband apamina kal mud amaku, ayangadim mud anambaz, nich kwishitul kwawonsu.

3 Yibangina* adaafu ada chakin kamu adaafu.* 4 Pakwez anch mwadamufu ukwet an ap ijukur, awiy afanyidin kwilej cha kusambish kumekesh anch alamatin kud Nzamb mu dijuku dau ni kuyichirishin anvaj ni angak au yom yiyiwanyidina, mulong chinech chitiyikin ku mes kwa Nzamb. 5 Mulong mband uda chakin kamu mwadamufu ni wakad chom utekin ruchingej rend muday Nzamb ni ukat kudandamen kumwilembin ni kumulembil uchuku ni muten. 6 Pakwez wipanina amwinend mu kwisangaresh wafil kal ap anch udap nchik mwom. 7 Chawiy dandamen kuyinkish umutakel winou,* chakwel kangal ikal afishinau nich. 8 Chakin, anch muntu kawanyishinap maswir ma ayend, ni pakampwil ma antu ashicha mu chikumbu chend, watun kal ritiy ni ud muyimp nakash kusutamu muntu wakad ritiy.

9 Mwadamufu akumuchind pakach pa adaafu anch ukwet mivu anch yakep makum musamban (60), anch wading mband wa ikundj umwing, 10 anch wijiken mulong wa yisal yend yiwamp, anch walila an, anch wading mwin kwakan, anch wowisha yidjatil ya atumbila, anch wayikwashang amena mar, anch wipanang mu mudimu wawonsu uwamp.

11 Ku mutambu ukwau, kangal wayichindany adaafu achida ayangadim, mulong anch maku mau ma kulalijan michiik pakach pau ni Kristu, akat kukimb kwachik. 12 Ni akuyirumburish mulong alikin kal yom ya kusambish yalondau piur pa ritiy.* 13 Pa chisu chawiy chimwing akat kukudish kand chaku cha kwikal in usweral ni kutambitamb ku chikumbu ni chikwau; mwaning, kadap kusu ching in usweral pakwez kand akat kwikal in mboj ni kwiyandjik mu milong ya antu akwau, akat kulond yom yakadau kufanyin kulond. 14 Chawiy, nikatin anch adaafu achida ayangadim achik, aval an, alam majuku mau, chakwel kangal amwinkish mukankuny mutapu wa kutulond nayimp. 15 Chakin, amwing apumbukin kal ni kumulondul Satan. 16 Anch mband uda mwin kwitiyij ukwet anamakwend ada adaafu, ayikwash chakwel kangal ikal chisend mu chikumangen. Mwamu chikumangen chikutwish kuyikwash ada chakin kamu adaafu.*

17 Amakurump atakedina mu mutapu uwamp chifanyidin kuyiman anch awanyidin kutambul kalimish tupamp twaad, pakampwil asadina mudimu ukash mu kulond ni mu kufundish. 18 Mulong mufund ulondin anch: “Kangal wamukas ikwal a ngomb ku kan chisu chidjatinay tidiku,” ni “Nsalamudimu uwanyidin kutambul difut dend.” 19 Anch amufund mukurump,* kangal witiy, ching anch kud uman wa atuman aad ap asatu. 20 Yikanda kurutu kwa antu awonsu antu asadina yitil, mulong wa kuyibabesh ashadinaku.* 21 Nikulejin kamu pakad maswimbu kurutu kwa Nzamb ni Kristu Yesu ni angel atondinau kal, kulondul umutakel winou pakad katond ap kasolikany.

22 Kangal wipupwil kumwazuk ikundj win mwawonsu chikas,* kangal wanung chikas ku yitil ya antu akwau; dandamen kushal wishitwila.

23 Kangal kand wana mem,* pakwez nangaku tumaar tukemp twa nviny mulong wa ditont dey ni mulong wa kuyelol kwey.

24 Yitil ya antu amwing yijiken patok, ni yikat kuyitwal kapamp kamwing ku dirumburish, pakwez ya antu akwau yikat kwijikan mu kusut kwa chisu. 25 Chilik chimwing kand, yisal yiwamp yijiken patok ni yakad kwijikan patok yikudandamenap kujingam.

6 Ada mwinshin mwa mpand ya usuk adandamen kuyiman ansalejau anch awanyidin kutambul kalimish kawonsu, chakwel kangal antu alond nayimp ap pakemp piur pa dijin da Nzamb ni piur pa mafundish. 2 Chikwau kand, akweta ansalejau ada in kwitiyij kangal ayiburen kalimish anch mulong ad akadivar. Pakwez afanyidin kuyisadin nich muchim umwing, mulong antu atanidinamu mu mudimu wau uwamp ad in kwitiyij ni akatish nau.

Dandamen kufundish yom yiney ni kupan mbil jinej. 3 Anch muntu wafundish malejan mindj, ni anch kitiyinap umutakel uwamp* udokila kud Nsalejetu Yesu Kristu, ap mafundish makwatijadina ni kulamat kud Nzamb, 4 witutwil nich kwibaz ni kwikil chom chovilay kurumburik. Ud mud wayedin kal mayej ma kutadikijan ni kupwitamijan piur pa mazu. Yom yiney yikat kulangwish mukau, matend, kafukej,* ni kuyitongin antu akwau mu mutapu uyimp, 5 kupwitamijan kwakad kupwang piur pa yom ya usweral kud antu ayipina kal mu manang ni akad kwijik uyakin, atongina anch kulamat kud Nzamb ud mutapu wa kwisakinamu. 6 Chakin, kud kutaninamu kujim mu kulamat kud Nzamb anch twasanger yitukweta. 7 Mulong twaletap chom mu mangand, ni tukutwishap kand kusendamu chom. 8 Komb, anch tukwet yakuda ni yidjal,* yawiy yom tukusangera.

9 Pakwez akwatina mupak wa kwikal kamu ching ampich akat kuwil mu choziu ni mu mupit ni mu maku mavud ma usup ni ma ubaj makata kuyishikij antu ku kusheshik ni kunong. 10 Mulong rukat ra nfalang wawiy musul wa mitapu yawonsu ya yom yiyimp, ni mu kukimb kusangaresh rukat riner antu amwing ashil kal ritiy ni ipampodin kal ayinau ndond jawonsu nich kusansan kuvud.

11 Chad ey, A muntu wa Nzamb, chin yom yiney. Pakwez kimb kutentam, kulamat kud Nzamb, ritiy, rukat, kujijaman ni kwitudish. 12 Rish njit jiwamp ja ritiy; lam fe mwom wa chikupu wakutazukinau ni wawasadina chijikish chiwamp cha patok kurutu kwa atuman avud.

13 Kurutu kwa Nzamb, ulamina yom yawonsu nich mwom, ni Kristu Yesu, wasala chijikish chiwamp cha patok kurutu kwa Pons Pilat papanay uman, nikwinkishin mbil 14 ya kulam chijidik pakad chidik ni pakad kukufish nich kushik ni pa kumekan kwa Nsalejetu Yesu Kristu, 15 kukumekeshau kud Mukaleng wa musangar ni umwing kusu pa chisu chatekau kal. Ud Mwant wa ayikedila mud ant ni Nsalej wa ayikedila mud ansalej, 16 ndiy umwing kusu wakading kufang, ushicha mu chitokish chakad kutwish kusejin, wakadingawap kal kuman kud muntu ap kutwish kwez kuman. Uyaj ni dikand da chikupu yikal kud ndiy. Amen.

17 Yifumba* antu ada ampich mu mangand minam* chakwel kangal itutul, ni kangal atek ruchingej rau mu mapit makad kuchingejin, pakwez muday Nzamb, ukata kutwinkish pakad choy yom yawonsu tusangaredina. 18 Yileja asal yom yiwamp, ikal ampich mu midimu yiwamp, ikal in kupan, aswakela kwanganijan nau akwau, 19 mwamu akwitekin* ayinau mufulandal uwamp mwi ndond ya diking mulong wa machuku ma kurutu, chakwel alam fe mwom wakin.

20 Timote, lam yom yakwinkishau, ipuk mazu mamwamu makata kwijondish yom yitumbila ni ronganyin ra makasu ridokila ku mazu mapwitamijadina ni yom yakin. 21 Kusutin kwibazin ronganyin riner, amwing ashadishin kal ritiy.

El ranaken rijim rikal nen.