MUKAND WA KAAD WA PAUL KUD TIMOTE

1 Paul, kambuy wa Kristu Yesu ku rusot ra Nzamb kukwatijan ni kushilamu kwa mwom kutwishikina kusutin Kristu Yesu, 2 kud Timote, mwanam mukatish:

El Nzamb Tatuku ni Kristu Yesu Nsalejetu akumekeshin ranaken rijim, riy, ni chisambu.

3 Nimujikitishin Nzamb, unisadidina mudimu utumbila nich kom kishitwila mud mwasalau angakiril am, ni nidandamedin kukuvurik mu malembil mam ma kwilemb uchuku ni muten. 4 Anch navurik mansoj mey, nikat kwov ja kukuman, chakwel nova musangar nakash.* 5 Mulong nivurikin ritiy rey rakad rubabek, radingay nich cha kusambish ngakey Loyis* ni makwey Yunis, pakwez nikwet kashinsh anch niyey urikwet.*

6 Mulong wa diyingishin dined nikuvurishin kuvuvuril mud kasu chipan cha Nzamb chida mu ey ni chawatambula kusutin makas nakwazuka. 7 Mulong Nzamb katwinkishap spiritu wa wom, pakwez watwinkisha spiritu wa usu, wa rukat, ni wa manang mawamp. 8 Chawiy kangal wov usany wa kupan uman piur pa Nsalejetu ap wamam, nida muntu wa rukan mulong wa kumwambat ndiy, pakwez itiyin kuman mar mulong wa rusang ruwamp kusutin kuchingejin usu wa Nzamb. 9 Watupandisha ni watutazuka kusutin kutazuk kutumbila, chidap mulong wa midimu yetu, pakwez mulong wa chitongijok chend ni ranaken rend rijim. Ranaken riner rijim atwinkishar kukwatijan ni Kristu Yesu kurutu kwa yirung ya pakur nakash, 10 pakwez katat arimekeshin kal patok kusutin kwikalaku kwa Mupandish wetu Kristu Yesu, wadoshina kal rufu ni kumunyik chitokish pa mwom ni pa mujimbu wakad kusheshikang kusutin rusang ruwamp, 11 rantondinau kwikal mwin kulejan, kambuy, ni mulej.

12 Chawiy nimedina niyam mar minam, pakwez novilap usany. Mulong nimwij Nzamb wanitiyija, ni nikwet kashinsh anch ukutwish kulam yom natudika kud ndiy djat ni pa dichuku dinida. 13 Dandamen kulam chilakej cha mazu mawamp* watesha kud am nich ritiy ni rukat yidokila ku uumwing ni Kristu Yesu. 14 Lam kusutin spiritu utumbila ushicha mu etu chom chinech cha usey chakwinkishau.

15 Wij anch antu awonsu a mu provens wa Aziy, kuwejaku Fijel ni Herimojen, angombin kal nyim. 16 El Nzamb amekesh ranaken rend ku dijuku da Onezifor, mulong wankasikeshin yisu yivud, ni kwovilap usany wa miyolal yam ya rukan. 17 Chinyim ni chinech, padingay ku Rom, wankimbin nakash ni wantanin. 18 El Nsalejetu amwinkish mutapu wa kutan ranaken ra Yehova* pa dichuku dinada. Ni wij nawamp midimu yawonsu yasadinay ku Efes.

2 Chad ey mwanam, dandamen kutambul usu mu ranaken rijim rida mu Kristu Yesu; 2 ni yom watesha kud am yapaninau kashinsh kud atuman avud, yom yiney yipana kud amakundj ashinshamena akuwanyisha niyau yitinau mulong wa kuyifundish antu akwau. 3 Mud Isalay muwamp wa Kristu Yesu, itiyin kuman mar. 4 Kwikil muntu usadina mudimu wa usalay ukata kwiyandjik mu milong ya kwisak* mu mwom anch ukimbin kwikal ni dilau da muntu wamwandjika mu usalay. 5 Ni ap mu masengan, muntu usengena akat kumudjikang chibangul ching anch wasenganang kukwatijan ni mbil ja masengan. 6 Ndim usadina mudimu ukash ufanyidin kwikal wa kusambish kuda mabuj. 7 Dandamen kutongijokin pa yom nilondina; Nsalejetu ukukukwash kwov kurumburik kwa* yom yawonsu.

8 Vurik anch Yesu Kristu amuvumbula ni wading wa mu dijuku da* David, kukwatijan ni rusang ruwamp nilejena, 9 rinimedina mar ni rintekidinau mu rukan mud mpopol. Ap mwamu, dizu da Nzamb kadikasinap. 10 Mulong wa diyingishin dined, nidandamedin kujijamen yom yawonsu mulong wa atondinau kal, chakwel niyau atambul dipandish kusutin Kristu Yesu, pamwing ni uyaj wa chikupu. 11 Mazu manam mad makuchingejin: Chakin kamu, anch twafa nend pamwing, tukwikal kand nend aom pamwing; 12 anch twadandamen kujijaman, tukuyikel kand nend pamwing mud ant; anch twamwitun, niyend ukutwitun; 13 anch twalik kushinshaman, ndiy ushadin ushinshamena, mulong kakutwishap kwitun amwinend.

14 Dandamen kuyivurish yom yiney, yinkisha mbil* kurutu kwa Nzamb chakwel alik kutend piur pa mazu, yom yakad usey ap ukemp mulong yikat kuyisal nayimp* akata kuyitesh. 15 Sal usu wey win wawonsu chakwel wimekesh kud Nzamb mud muntu witiyinay, nsalamudimu wakad diyingishin da kwovil usany, ukata kusadin nawamp dizu da uyakin. 16 Pakwez ipuk minsamb yamwamu yikata kwijondish yom yitumbila, mulong yikushikij ku kumuburen Nzamb kalimish chipandakena, 17 ni mazu ma antu akata kuyilond makupalangan mud dikolong.* Himeney ni Filet ad pakach pau. 18 Amakundj inay apumbukin kal kudokal ku uyakin, akat kulond anch divumbuk dasadikin kal, ni akat kushesh ritiy ra antu amwing. 19 Chikalap nchik mwamu, mufulandal ukash wa Nzamb wiminy daang, ni pad kashe unou: “Yehova* uyij ada ayend,” ni “muntu mwawonsu utazukina pa dijin da Yehova* alikap kuburen kutentam.”

20 Chad mu chikumbu chijim mudingap ching kusu yom ya utad wa or ni wa argent pakwez muding kand ya mitond ni ya kam, yimwing ya kusadin pa dichuku da pakampwil ni yikwau ya kusadin machuku mawonsu. 21 Chawiy anch muntu wiyep ni yom ya nsuden yiney, ukwikal chom cha kusadin pa dichuku da pakampwil, chisadinau kwikal chitumbila, cha ukwash kud mwin chom, chirijekinau mulong wa mudimu win wawonsu uwamp. 22 Komb chin maku ma usand, pakwez kimb kutentam, ritiy, rukat, chisambu, pamwing nau antu akata kumutazuk Nsalejetu nich muchim wishitwila.

23 Kupwa, ipuk ntaad ja usup ni ja chamwamu, ni kwijik anch jikat kulet matend. 24 Mulong musuk wa Nsalejetu kafanyidinap kwikal mwin matend, pakwez ufanyidin kwikal witudishina* pad antu awonsu, wija kufundish, ukata kwilam anch amurumbukin, 25 ukata kuyifundish in kubwambwil nich kwitudish. Ukuman ap Nzamb wayinkish mutapu wa kukarumuk* utwadina ku ronganyin rakin ra uyakin, 26 ni ukuman ap achirish manang ni kukusuk* mu mupit wa Djabul, wayikwata aom chakwel asal rusot rend.

3 Pakwez ijik anch, mu machuku ma nsuden kukwikal yisu yikash kurish nich. 2 Mulong antu akwikal in kwikat ayinau, in kukat nfalang, in kwibaz, in kwimekesh, in kumusaal Nzamb, in kuyibwambwil anvaj, akad kujikitishang, akad kushinshaman, 3 akad rukat ra wanamaku, akad muchim wa kwovijan, in kafukej, akad kwilam, in chisum, akad kukat yom yiwamp, 4 in matung, akweta mitu yikash, in kwitutul, in kukat kwisangaresh pa ndond pa kumukat Nzamb, 5 amekena mud alamatin kud Nzamb, pakwez usu wa kulamat kud Nzamb uswimpinap mwom yau; yiyepa antu inay. 6 Pakach pau pakat kulank amakundj akata kwandam kwa manang mu yikumbu ni kuyoz amband aziyina akweta dilim da yitil, atakedinau kud maku ma mitapu kushalijan, 7 akata kwilej pa kwilej pakwez kakutwishangap kushik ku ronganyin rakin ra uyakin.

8 Chad, mud mutapu Yanes ni Yamberes mwamurishikishau Moses, mwawiy kand murishikishinau inay niyau uyakin. Antu a mutapu winou ayipin kal nakash mu manang; kukwatijan ni ritiy, kakwetap dilau da Nzamb. 9 Ap mwamu, kakushikap kulemp, mulong kuzarik kwau* kukumekan patok kud antu awonsu, mud muchading piur pa amakundj aad inay. 10 Pakwez ey walondula nawamp nakash mafundish mam, mashakamin mam, chitongijok nilondwila, ritiy ram, kushimpish muchim kwam, rukat ram, kujijaman kwam, 11 kuzengol ni mar namana ku Antiyosh, ku Ikoniom, ni ku Listre. Najijamena kuzengol kwinoku, ni Nsalejetu wankamunina mu yawonsu. 12 Chakin, awonsu akatina kushakam mu kulamat kud Nzamb mu uumwing ni Kristu Yesu akuyizengol niyau. 13 Pakwez antu ayimp ni akamakasu akudokal ku uyimp kushik ku uyimp nakash, akudimban, niyau akuyidimb.

14 Pakwez ey, dandamen mu yom wileja ni yakwinkishinau kashinsh, mulong wij kud nany wayilejina 15 ni mulong wij anch kudosh ku wanikanch wey wij mifund yitumbila, yikutwisha kukwinkish manang mulong wa dipandish kusutin ritiy muday Kristu Yesu. 16 Mifund yawonsu ayipepila kusutin spiritu wa Nzamb ni yid ya ukwash mulong wa kufundish nich, mulong wa kukand nich, mulong wa kutenchik* nich yom, mulong wa kupup nich mu kutentam, 17 chakwel muntu wa Nzamb ikal uwanyidina mu yawonsu, uwanyishina yom yawonsu, mulong wa mudimu wawonsu uwamp.

4 Kurutu kwa Nzamb ni Kristu Yesu, ukurumburisha aom ni afu ni kusutin kumekan kwend ni Want wend, nikwinkishin mbil pakad maswimbu anch: 2 Lejan dizu; sal mwamu nich kushindakesh* mu yirung yiwamp ni mu yirung yikash; kandan, pupan, babeshan, nich kushimpish muchim kwawonsu ni ukaliweny wa kufundish. 3 Mulong kukwez chirung chikulikau kusanger mafundish mawamp,* pakwez kukwatijan ni maku mau ayinau, akez kikumangejin alej mulong wa kusangaresh matu mau.* 4 Akez kalikap kutesh uyakin ni akuta matu kwi nsang ja makasu. 5 Pakwez ey, lam manang mey mu yom yawonsu, jijamen yikokujol, sal mudimu wa mwin kulejan,* wanyish nawamp kamu mudimu wey.

6 Mulong akat kwingichil mud mulambu wa yakuna, ni chisu cham cha kukwolik chasej kal piswimp nakash. 7 Narishin njit jiwamp, napwishin kubambil, nalamin ritiy. 8 Kudosh katat, kud chibangul cha kutentam chinlamidinau, chikwinginkishau kud Nsalejetu, nzuj utentamina, mud difut pa dichuku dinida, chad kichidap kusu ching mulong wamam, pakwez kand mulong wa awonsu akata kumekan kwend.

9 Sal usu wey win wawonsu mulong wa kwez kunoku pakad kulab. 10 Demas wandjubwil mulong wakatin mangand minam,* ni wayil ku Tesalonik, Kiresen wayil ku Galatiya, Titus wayil ku Dalimatiya. 11 Ching Luka ndiy nida nend. Musenda Marko weza nend pamwing, mulong ukwinkwash mu mudimu. 12 Pakwez Tishik namutumin ku Efes. 13 Piukweza, nsendina kabwik unasha kwa Karipus ku Trowas, ni mivungur, pakampwil ya chikit.

14 Alekizandre ukata kuchil utad wa kwivre wansadin yom yiyimp nakash. Yehova* ukumufut kukwatijan ni yisal yend. 15 Niyey ufanyidin kumubabel, mulong wapompatin uruu wetu mu chilik chipandakena.

16 Panilondina kapamp ka kusambish ku dirumburish, kwikil muntu wading ku kabet kam, pakwez awonsu andjubula—⁠kangal ayichindin yom yiney. 17 Pakwez Nsalejetu wangimanyina piswimp ni kwingizwish nich usu, chakwel kusutin am, mudimu wa kulejan auwanyish nawamp kamu ni chakwel michid yawonsu yiutesh; ni ankamunina mu kan ka ntambu. 18 Nsalejetu ukwinkamunin ku mudimu win wawonsu uyimp ni kwimpandish mulong wa Want wend wa mwiur. Uyaj wikal kud ndiy chikupu ni chikupu. Amen.

19 Nlangwishinay Priska ni Akila ni dijuku da Onezifor.

20 Erastus washalang ku Korint, pakwez Trofimus namushang muyej ku Milet. 21 Sal usu wey wawonsu mulong wa kushik kurutu kwa chirung cha mashik.

Ebulus ukupanidin moy, ni Puden, Linus, Kulodiya, ni akadivar awonsu.

22 El Nsalejetu ikal pamwing ni mwikadil uwamp umekeshina. Ranaken rend rijim rikal nen.