MUKAND WA PAUL KUD TITUS

1 Paul, musuk wa Nzamb ni kambuy wa Yesu Kristu kukwatijan ni ritiy ra antu atonday Nzamb ni ronganyin rakin ra uyakin rikwatijadina ni kulamat kud Nzamb 2 ni rimedina pa ruchingej ra mwom wa chikupu wakanay Nzamb wakad kutwish kudimban, kudosh pakur nakash; 3 pakwez pa chisu chend chiwanyidina, wijikisha dizu dend kusutin mudimu wa kulejan wanginkishau kukwatijan ni mbil ya Mupandish wetu Nzamb; 4 kud Titus, mwanam wa kashinsh mu ritiy tukweta etu awonsu:

El Nzamb Tatuku ni Kristu Yesu Mupandish wetu akumekeshin ranaken rijim ni akwinkish chisambu.

5 Nakusha ku Kret chakwel utenchik yom yading yakad kuwap* ni utond amakurump mu musumb ni musumb, kukwatijan ni umutakel nakwinkisha: 6 Anch kud ikundj mwawonsu wakadau kufish nich, ikundj ukweta mband umwing, ukweta an in kwitiyij akadau kufish nich mu milong ya wimbwambol* ap ya kubwambwil. 7 Mulong mud kashalapol* wa Nzamb, mukurump* ufanyidin kwikal muntu wakadau kufish nich, kadap muntu ukweta mutu ukash, ap mwin kujiman swa, ap mwin kuleu, ap mwin chisum,* ap mwin ris ra kukimb kutaninamu pakad win kashinsh, 8 pakwez ufanyidin kwikal mwin kwakan, mwin kukat yom yiwamp, ukweta manang mawamp,* utentamina, ushinshamena, mwin kwilam, 9 ulamatina ba ku dizu dishinshamena* mu ukaliweny wend wa kufundish, chakwel atwish kukasikeshan nich mafundish ma ukwash* ni kuyikand antu akata kutadik* mafundish minam.

10 Mulong kud antombwij avud, aswila ku kan chamwamu, ni akamakasu, pakampwil alamatina ku chishankur cha kutwalan ku mukand.* 11 Chifanyidin kuyifung pa kan, mulong antu inay adandamedin kushesh majuku makabuj mulong wa kukimb kwisakinamu pakad win kashinsh kusutin kufundish yom yakadau kufanyin kufundish. 12 Umwing wa pakach pau, muprofet wau, walonda anch: “In Kret ading ching akamakasu, annam ayimp a mu masuku, amikopu in kupumb kuda.”

13 Uman winou ud wakin. Mulong wa diyingishin dined, dandamen kuyikand kamu nakash chakwel ikal ni ritiy rikash, 14 ni chakwel kangal ata matu kwi ngany ja in Yuda ni ku yijidik ya antu ombina nyim ku uyakin. 15 Yom yawonsu yishitwil kud antu ishitwila; pakwez kwikil chom chishitwila kud antu atakanena ni aburedina ritiy, mulong manang mau ni kom kau, yawonsu yitakanen. 16 Akat kulejan patok anch amwij Nzamb, pakwez mu yisal yau akat kumwitun, mulong ad atakanena ni in kubwambwil, ni kawanyidinap kusal mudimu uwamp ap umwing.

2 Pakwez ey dandamen kulond yom yikwatijadina ni mafundish ma ukwash.* 2 Chifanyidin amakundj apamina kal kwikal isikena mu yaku yau, ilimishina, akweta manang mawamp, akasikena mu ritiy, mu rukat, mu kujijaman. 3 Chilik chimwing, chifanyidin amband apamina kal kwikal ni mwikadil umulimishina Nzamb, kadap in kafukej, kadap asuk a maar pakwez alej a yom yiwamp, 4 chakwel atwish kuyiyul* amband ayangadim kuyikat anfumwau, kuyikat anau, 5 ikal ni manang mawamp, ishitwila, in kusal midimu ku chikumbu,* awamp, ayiziyidina anfumwau, chakwel kangal alond yom yiyimp piur pa dizu da Nzamb.

6 Chilik chimwing kand, dandamen kuyikasikesh ansand kwikal ni manang mawamp, 7 ni kwikal amwiney chilakej cha yisal yiwamp mu yom yawonsu. Fundish yom yishitwila* nich kalimish kawonsu, 8 mu kusadin mazu mawamp* makadau antu kutwish kulond nayimp, chakwel antu atupompatina ova usany, akangany kuman chom chiyimp cha kulond piur petu. 9 Chifanyidin asuk ayiziyin ansalejau mu yom yawonsu, asal usu wa kuyisangaresh, kangal kwakulijan nau, 10 kangal ayiy, pakwez amekesh anch ad akuchingejin mu yom yawonsu, chakwel mu yom yawonsu amekesh ufun wa mafundish ma Nzamb Mupandish wetu.

11 Mulong ranaken rijim ra Nzamb rameken kal ni kulet dipandish kud antu a mitapu yawonsu. 12 Rikat kutufumb kwipuk kumuburen Nzamb kalimish ni kwipuk maku ma mangand, ni kushakam nich manang mawamp, kutentam, ni kulamat kud Nzamb mu mangand minam,* 13 pituchingedina ruchingej ra musangar ni kumekan kwa uyaj kwa Nzamb mujim ni kwa Mupandish wetu, Yesu Kristu, 14 wipana amwinend mulong wetwetu, mulong wa kutukamunin* ku mitapu yawonsu ya kujip chijil ni kushitwish mulong wa amwinend antu ada chom chend cha pakampwil, akweta mushiku wa kusal midimu yiwamp.

15 Dandamen kufundish yom yiney, kukasikeshan, ni kukandan nich ulabu wawonsu. Kangal muntu wakupipej.

3 Dandamen kuyivurish kuziyin ku mant ni kuyiziyin in kutakel, kwikal kwaku mulong wa mudimu win wawonsu uwamp, 2 kulik kulond nayimp piur pa muntu ap umwing, kulik kwikal in matend, pakwez kwikal isikena, in kumekesh kwitudish nakash pantaliken ni antu awonsu. 3 Mulong pakur niyetu twading ayisup, in kubwambwil, apumbukina kal, asuk a mitapu kushalijan ya maku ni ya misangar, twadandamenang mu uyimp ni mu mukau, twading antu akisishena, akisijanang umwing ni mukwau.

4 Pakwez, pamekana kuwap kwa Mupandish wetu Nzamb ni rukat rend mulong wa antu 5 (kadap mulong wa yisal ya kutentam twasala, pakwez mulong wa ranaken rend), watupandisha kusutin kutwowish kwatutwala ku mwom ni kusutin kutusal kwikal asu kusutin spiritu utumbila. 6 Watuzizina nakash* spiritu winou kusutin Yesu Kristu Mupandish wetu, 7 chakwel kupwa kwa kutuman anch tutentamin ku ranaken rend rijim, twikal answan kukwatijan ni ruchingej ra mwom wa chikupu.

8 Mazu minam mad makuchingejin, ni nikatin ushindakeshin pa yom yiney, chakwel antu amwitiyijina kal Nzamb adandamen kushinshikin pa kusal midimu yiwamp. Yom yiney yid yiwamp ni ya ukwash kud antu.

9 Pakwez kangal wiyandjik mwi ntaad ja usup mu kukimbijol milong ya angakiril,* mu kupwitamijan, ni mu matend piur pa Chijil, mulong yom yiney yikwetap ukwash ni yid ya chamwamu. 10 Chad piur pa muntu uletina* mafundish ma makasu,* mwipuka kupwa kwa kumubabesh kapamp ka kusambish ni ka kaad, 11 ni kwijik anch muntu wa mutapu winou wapumbukin kal mwi njil, usadin chitil ni wifishin nich amwinend.

12 Panikumutuma Aritemas ap Tishik kwinaku, sal usu weza tumanijan ku Nikopolis, mulong natenchikin kusutishin chirung cha mashik kwinikwa. 13 Wanyish nawamp maswir ma Zenas, wija nawamp Chijil, ni ma Apolos, chakwel kangal aburen chom mu weny wau. 14 Pakwez chifanyidin antwetu niyawiy ilej kusalang midimu yiwamp mulong wa kukwash anch kwikal maswir mitina kukwash swa swa, chakwel kangal alik kusong mabuj.

15 Awonsu ada nam akulangwishin. Nlangwishinau antu atukatina mu ritiy.

El ranaken rijim rikal niyenen awonsu.