MUKAND WA YAKOBU

1 Yakobu, musuk wa Nzamb ni wa Nsalejetu Yesu Kristu, ku michid dikum ni yaad (12) yipalangena:

Tambulany kulangwish!

2 Manany mud chom cha musangar ujim, akadivar, anch warishany nich yoziu kushalijan, 3 mulong wijany anch, anch ritiy ren aripak mu mutapu winou, chinech chikat kulet kujijaman. 4 Pakwez likany kujijaman kuwanyish mudimu wau, chakwel wikalany awanyidina ni akad kapad mu yom yawonsu, akad kuburen chom.

5 Chawiy anch pakach pen muntu uburedin manang, adandamen kumwit Nzamb, mulong ukat kupan kud awonsu pakad choy ni pakad kufishan nich,* ni akumwinkisham. 6 Pakwez adandamen kwit nich ritiy, pakad kwidjidjek ap pakemp, mulong muntu ukata kwidjidjek ud mud mambek ma karung makatau kutwal oku ni oku kud rinkind. 7 Muntu wa mutapu winou kafanyidinap kuchingej kutambul chom ap chimwing kud Yehova;* 8 ud muntu wakad kutwish kukwat mupak, mwin kuwayiway mu yom yawonsu yisadinay.

9 Pakwez el mukadivar ukweta mashakamin ma mwinshin asangar* anch amuzambwish, 10 ni mpich asangar anch amushikumwish, mulong ukez kajiy mud chisalamb cha mu masuku. 11 Mulong mud mutapu pakata muten kubudik nich chirungul chikash mutond ukat kuum, chisalamb chau chikat kuturik ni ufun wau ukat kusheshik, mwamu kand mukufay mpich paday mu midimu yend.

12 Wayuk kwend muntu udandamedina kujijaman mu choziu, mulong kupwa kwa kwikal ni dilau da Nzamb ukutambul chibangul cha mwom, chakanay Yehova* kuyinkish antu adandamedina kumukat. 13 Anch muntu urishin ni choziu, kangal walond anch: “Nzamb ndiy wingozina.”* Mulong Nzamb kakutwishap kumwoz nich yom yiyimp, ni amwinend kakumwozangap muntu mu mutapu winou. 14 Pakwez muntu ni muntu akat kumwoz kusutin kwilikidij amupwit ni kumurumbul* kud maku mend amwinend. 15 Kupwa, maku anch mimish makat kuval chitil; ni chitil anch achisal, chikat kulet rufu.

16 Kangal widimbany akadivar nam akatish. 17 Chipan chin chawonsu chiwamp ni chiwanyidina chidokil mwiur, chidokil kud Tatuku wa yitokish ya mwiur, wakading kuswimpang ap kukarumuk mud mukata kushemunok urel.* 18 Rading rusot rend kutuval kusutin dizu da uyakin, chakwel twikal mulad umwing wa mabuj ma kusambish ma yitang yend.

19 Ijikany chom chinech, akadivar nam akatish: Muntu mwawonsu ufanyidin kuswakal kutesh, kulik kuswakal kulond, kulik kuswakal kujiman, 20 mulong ujim wa muntu ukatap kuwanyish kutentam kwa Nzamb. 21 Chawiy, djubulany kwijond kwawonsu ni chidik chawonsu cha uyimp,* ni itiyany nich kwitudish dizu dikutwisha kukupandishany* dikun mu michim yen.

22 Chad ikalany in kusadin dizu kadap kusu in kutesh ni kwidimb ayinen nich yitongijok ya makasu. 23 Mulong anch muntu ud kwend mwin kutesh dizu pakwez kadap mwin kusadin, ud mud muntu witadina chifu chend* mu dikalash. 24 Ukat kwital, kupwa ukat kuya ni kuvuramen kapamp kamwing chiday. 25 Pakwez muntu ukata kushinshikin mu chijil chiwanyidina, chiletina want ipau, ni udandamedina kusal mwamu, ukat kwikal, kadap mwin kutesh ukata kuvuramen, pakwez mwin kusadin; ni ukwikal ni musangar mu yom yisadinay.

26 Anch muntu utongin anch ud mwin kumwifukwil Nzamb* pakwez kalaminap* rudim rend, widimbin amwinend, ni difukwil dend did dakad usey. 27 Difukwil* dishitwila ni dakad kwijond ku mes kwa Nzamb Tatukwetu dawiy ed: kuyibangin an anshon ni adaafu mu mar mau, ni kwilam pakad chidik ku mangand.

2 Akadivar nam, mutapu ik ukutwishanya kwikal ni ritiy muday Nsalejetu wa uyaj Yesu Kristu oku ukat kumekeshany kasolikany? 2 Mulong anch muntu udjadina mpet ja or ku miny yend ni masun ma ufun wez ku chikumangan chen, ni kazwendj udjadina masun mikisina niyend wez, 3 ov, ukat kumukwatany nich usey udjadina masun ma ufun ni kumulej anch: “Ey shakam ap, pa ndond yiwamp,” ni kumwel kazwendj anch: “Ey iman,” ap kand anch, “Shakam akwa, kwinshin kwa chibas* cham cha kwazuk mend”? 4 Anch chid mwamu, ov, umekeshinanyap kasolikany pakach pen, ni ov, udanyap anzuj in kukwat mipak yiyimp?

5 Teshany akadivar nam akatish. Ov, Nzamb kayitondap antu amekena ku mes ma mangand mud atuzwendj kwikal ampich mu ritiy ni answan a Want, wayikanay antu amukatina? 6 Pakwez en ukat kuyikwatishany atuzwendj usany. Ov, kadap ampich akata kukudjatinany pansh ni kukukakinany ku dirumburish? 7 Ov, kakatap kusaal dijin diwamp dakupilanyau? 8 Chad anch ukat kusadinany chijil cha want kukwatijan ni mufund ulondina anch: “Ufanyidin kumukat mukwen mud ey amwiney,” ukat kusalany nawamp. 9 Pakwez anch udandamedinany kumekesh kasolikany, usadinany chitil, ni chijil chikat kukufishany nich anch udany in kujip chijil.

10 Mulong anch muntu waziyin ku Chijil chawonsu, pakwez wabwambwil ku chom chimwing, wabwambwil kal ku Chijil chawonsu. 11 Mulong walonda anch: “Kangal wasal makaj,” walonda kand anch: “Kangal wajipan.” Komb anch usadinap makaj, pakwez wajipan, wajip kal chijil. 12 Dandamenany kulond ni kwiyendish mud antu akurumburishau ku chijil cha antu ada ant ipau.* 13 Mulong muntu wakad kumekeshang ranaken akumurumburish niyend pakad ranaken. Ranaken ripandakenamu dirumburish.

14 Akadivar nam, kutaninamu ik kudaku anch muntu walond anch ukwet ritiy pakwez kasadinap yom yiwamp? Ritiy mud riner rikutwishap kumupandish, ov, kimwawiyap? 15 Anch akadivar ap anambaz aburedin yidjal* ni yakuda yiwanyidina ya dichuku dawonsu, 16 chad muntu umwing pakach pen wayilej anch: “Yangany mu chisambu; otany kasu, ni dangany nawamp,” pakwez uyinkishinanyap yom yiswirikedinau mulong wa kwikwash nich, yiney yikuyikwash ku chom ik? 17 Chilik chimwing kand, ritiy arinar, rakad yisal, rifil.

18 Ap mwamu, muntu ukutwish kulond anch: “Ey ukwet ritiy, am nikwet yisal. Nleja ritiy rey rakad yisal, ni am nikukulej ritiy ram kusutin yisal yam.” 19 Witiyijin anch kud Nzamb umwing, ov, kimwawiyap? Usadin nawamp. Pakwez ayilembil niyau itiyijin ni akat kuzal. 20 Pakwez ov, ukimbin kwijik ey muntu wakad manang anch ritiy rakad yisal rikwetap usey? 21 Ov, tatukwetu Aburaham kamwelap anch utentamin mulong wa yisal kupwa kwa kumupesh mwanend Izak pa chintamb? 22 Umen anch ritiy rend rading rendin pamwing ni yisal yend, ni ritiy rend rikala riwanyidina kusutin yisal yend, 23 ni mufund ulondina anch: “Aburaham wikala ni ritiy muday Yehova,* ni amumana anch utentamin,” wawanyina, ni amutazuka anch murunend a Yehova.*

24 Umenany anch muntu akumuman anch utentamin mulong wa yisal, kadap mulong wa ritiy kusu. 25 Chilik chimwing kand, ov, kamwelap Rahab wading ndumb niyend anch utentamin mulong wa yisal kupwa kwa kuyak nawamp in kutentish* ni kuyikwash kuchinin njil yindj? 26 Inge, mud mutapu mujimbu wakad spiritu* ufil, chilik chimwing kand, ritiy rakad yisal rifil.

3 Akadivar nam, avud pakach pen kafanyidinap kwikal alej, mulong wijany anch tukutambul dirumburish dikash.* 2 Mulong etu awonsu tukat kwipwakal* tupamp tuvud. Anch muntu kakatap kwipwakal mu kulond, ud muntu uwanyidina, ukutwisha kand kutakel mujimbu wend wawonsu. 3 Anch twatek mbwambu mu tun twa atubar chakwel atuziyin, tutakedin kand mujimbu wau wawonsu. 4 Talany kand maat majim: Ap anch mad majim nakash ni akat kumabachik kud rinkind mukash, kachikay ka usweral kawiy kakata kumatwal kusotinay umendishina kuya.

5 Chilik chimwing kand, rudim kad kachid kakemp ka mujimbu, pakwez rikat kwibaz piur pa yom yijim. Talany mutapu kasu ka usweral kakutwisha kwosh mpat mujim! 6 Rudim niyar kaswa. Pakach pa yid ya mujimbu wetu, rudim rimekeshin mangand makad kutentam, mulong rikat kwijondish mujimbu wa kabuj ni kwosh mwom wawonsu wa muntu,* ni arakishin kasu kud Gehen.* 7 Mulong milad yawonsu ya annam a mu masuku, ya atujil, ya annam akata kwikak, ni ya yitang ya mu mem, akutwish kuyipit ni ayipitin kal kud antu. 8 Pakwez kwikil muntu ukutwisha kupit rudim. Rudim chid chom chiyimp ni chikasikena kutakel, rizwil nich ulemb ukata kujipan. 9 Tukat kurisadin mulong wa kumushiman nich Yehova* Tatukwetu, rudim rawiy rumwing tukat kurisadin kand mulong wa kuyishing nich antu atangau mu chifu cha Nzamb.” 10 Mu kan kawiy kamwing mukat kubudik chiyukish ni mashing.

Akadivar nam, kiwawiyap mutapu ufanyidina kusadik yom. 11 Musul umwing ukatap kubudish ku dipan dawiy dimwing mem matadina* ni mem maridina, ov, kimwawiyap? 12 Akadivar nam, mutond wa fig ukutwishap kusong mabuj ma oliv, ap mutond wa nviny kusong mabuj ma fig, ov, kimwawiyap? Ni musul wa mem ma mung ukutwishap kubudish mem matal.

13 Nany ubabela ni ukweta manang pakach pen? Amekesh mwamu kusutin mwikadil wend uwamp, kusutin yisal ya kusal nich kwitudish kudokila ku manang. 14 Pakwez anch mu michim yen ukwetany mukau uyimp ni mwikadil wa kupwitamijan,* kangal wibazany, chamwamu ukudimbenany uyakin. 15 Minam madap manang madokila mwiur; mad ma pa divu, ma winnam, ma ayilembil. 16 Mulong kwawonsu kuda mukau ni mwikadil wa kupwitamijan,* kukwikal kand kanvundangesh ni yom yiyimp ya mitapu yawonsu.

17 Pakwez manang madokila mwiur mading bil cha kusambish mishitwila, kupwa min chisambu, misikena, min kuziyin swa, mizwila nich ranaken ni mabuj mawamp, makad kasolikany, makad rubabek. 18 Chikwau kand, dibuj da chisambu akat kudikunang mu chisambu mulong wa* antu akata kusal chisambu.

4 Kwisu kudokila njit ni kupwitamijan pakach pen? Ov, kiyidokilap ku maku men ma mujimbu makata kurish mu en?* 2 Usotinany yom, pakwez ukwetanyap. Ukat kudandamenany kujipan ni kwovilan mukau, pakwez utwishinanyap kwikal nich. Udandamedinany kutend ni kurish njit. Ukwetanyap mulong witinanyap. 3 Piukata kwitany, ukatap kutambulany mulong witinany nich chitongijok chiyimp, mulong wa kusangaresh maku men ma mujimbu.

4 En akamakaj,* ov, kiwijanyap anch kwikal mu urund ni mangand kud kwikal mu ukankuny ni Nzamb? Chawiy, mwawonsu ukatina kwikal murund wa mangand, wisadin amwinend mukankuny wa Nzamb. 5 Ap ov, utonginany anch mufund ulondin kwau chamwamu anch: “Muchim* wikunina kal mu etu ukat kusot chisu chawonsu nich mukau”? 6 Pakwez, ranaken rijim rikatay kumekesh Nzamb rid rijim nakash. Chawiy mufund ulondin anch: “Nzamb kakatap kuyisanger in kwimekesh, pakwez ukat kumekesh ranaken rijim kud in kwikepish.”

7 Pa chinech, muziyinany Nzamb, pakwez murishikishany Djabul, ni ukukuchinany kulemp. 8 Sejany piswimp ni Nzamb, ni ndiy ukusej piswimp niyenen. Owishany makas men en akayitil, ni shitwishany michim yen, en antu akad kutwish kukwat mipak. 9 Nengananany, tekany chidil, ni dilany. Masip men makarumuk kwikal chidil, ni musangar wen kwikal kuburen ruchingej. 10 Ikepishany ku mes ma Yehova,* ni ukukuzambwishany.

11 Akadivar, likany kulondijan nayimp, muntu mwawonsu umulondina nayimp mukadivar ap umurumburishina mukadivar nend, ulondin nayimp piur pa chijil ni urumburishin chijil. Chad anch warumburish chijil, kiudap mwin kusadin chijil, pakwez ud nzuj. 12 Mwin Kutek Yijil ni Nzuj ud kusu umwing, ukutwisha kupandish ni kujiyish. Pakwez ey, ud nany chakwel umurumburish mukwen?

13 Teshany katat en ulondinanya anch: “Nlel ap damashik tukuya ku musumb kanang, ni tukusutish muvu umwing kwinikwa, tukwisak ni tukupit nfalang,” 14 pakwez wijanyap mutapu ukwikala mwom wen damashik. Mulong udany mbundu jikata kumekan mu kachisu kakemp ni kupwa jajimwangan. 15 Chinyim ni chinech, ufanyidinany kulond anch: “Anch Yehova* wakatish, tukudandamen kwikal aom, ni tukusal chom kampand ap kanang.” 16 Pakwez katat ukat kusangerany mu kwibaz kwen kwa chibud. Kwibaz kwawonsu kwa mutapu winou kud kuyimp. 17 Pa chinech, anch muntu wij mutapu wa kusal yom yiwamp pakwez ndiy kayisadinap, usadin chitil.

5 Teshany, katat en ampich, dilany ni toyany tubway mulong wa mar makwezidinanya. 2 Mapit men mavundin kal, ni masun men amadil kal kud amakej. 3 Utad wen wa or ni wa argent wakwatin kal ankal, ni ankal inay akukufishany nich ni akuda mijimbu yen. Yom watudikanya yikwikal mud kasu mu machuku ma nsuden. 4 Talany! Difut diwalikanya kuyifut in kusal mudimu angula mu yir yen didandamedin kudil, ni madil ma kwit ukwash ma in kwangul mashikin kal ku matu ma Yehova* wa yisak ya amasalay. 5 Pa divu wadingany ni mashakamin mawamp nakash mulong wa kwisangaresh ayinen. Michim yen yid mud annam ezina many kushik ni pa dichuku da kuyijip. 6 Wafishananya nich; wamujipanya muntu utentamina. Ov, komb ukusangaredinany?

7 Komb, shimpishany muchim akadivar, kushik ni pa kwikalaku kwa Nsalejetu. Talany! Ndim udandamedining kuchingel mabuj ma usey ma divu, ukat kumashimpishinang muchim kushik ni pakunakina ruval wa kusambish ni wa nsuden. 8 Niyen shimpishany muchim; kasikeshany michim yen, mulong kwikalaku kwa Nsalejetu kwasej kal piswimp.

9 Akadivar, kangal wanyinyitijanany* umwing ni mukwau, chakwel kangal akurumburishany. Talany! Nzuj ud ku chis. 10 Akadivar, piur pa kujijamen uyimp ni kushimpish muchim, imburijany chilakej cha aprofet alonda mu dijin da Yehova.* 11 Talany! Tumen anch antu ajijamana ad in musangar.* Wateshanya piur pa kujijaman kwa Yobu ni wamananya yom yamusadinau kwinsuden kud Yehova,* ni wamananya anch Yehova* ud mwin riy ni mwin ranaken nakash.

12 Chom cha usey nakash akadivar nam, likany kuchip, yikala kusutin diur ap kusutin divu ap kusutin chom chikwau chin chawonsu. Pakwez “Inge” wen ikal inge ni “Bwat” wen ikal bwat, chakwel kangal wawilany mu dirumburish.

13 Ov, kud muntu pakach pen urishina ni yakamish? Adandamen kulembil. Kud muntu wovila musangar? Awang kuseng. 14 Ov, pakach pen pad muntu uyedina? Ayitazuk amakurump a chikumangen, ni amulembil ni kumupan many mu dijin da Yehova.* 15 Ni malembil ma ritiy makusal anch muyej* ayerik, ni Yehova* ukumulangwish. Kupwa, anch wasalang yitil, akumulikishinay.

16 Pa chinech, lejanany yitil yen patok kud umwing ni mukwau ni lembilany mulong wa umwing ni mukwau, chakwel uyerikany. Malembil ma muntu utentamina makwet usu ni makutwish chakin kamu kumukwash muntu.* 17 Eliya wading muntu ukweta yovil mud yetwetu, pakwez palembilay nakash chakwel kangal ruval anak, mwi ngand mwanakap ruval mu mivu yisatu ni angond musamban. 18 Kupwa walembila kand ni diur danakisha ruval ni divu daminyisha mabuj.

19 Akadivar nam, anch pakach pen muntu wapumbuk kulemp ni uyakin chad mukwau wamuchirish, 20 ijikany anch mwawonsu umuchirishina mukayitil kudokal ku uyimp wend ukumupandish* ku rufu ni ukubwik miril ya yitil.