MUKAND WA KAAD WA PITA

1 Simon Pita, musuk ni kambuy wa Yesu Kristu, kud antu ikadina kal ni ritiy rumwing ra usey mud retwetu* mulong wa kutentam kwa Nzamb wetu ni kwa Mupandish wetu Yesu Kristu:

2 El ranaken rijim ni chisambu yipandakan kud en kusutin ronganyin rakin ra Nzamb ni ra Yesu Nsalejetu, 3 mulong usu wend wa winzamb watwinkishin kal* yom yawonsu yikwashina ku mwom ni ku kulamat kud Nzamb kusutin ronganyin rakin ra Ndiy watutazuka kusutin uyaj ni kuwap kwend. 4 Kusutin yom yiney, watwinkishin kal* kushilamu kwa usey ni kujim nakash chakwel kusutin yom yiney wikalany ni wuntu mud wa Nzamb, mulong wiyepinany kal ku kuyip kwa mangand kudokila ku maku mayimp.*

5 Mulong wa diyingishin dined, salany usu wen win wawonsu mulong wa kuwej ku ritiy ren kuwap, ku kuwap kwen ronganyin, 6 ku ronganyin ren kwilam, ku kwilam kwen kujijaman, ku kujijaman kwen kulamat kud Nzamb, 7 ku kulamat kwen kud Nzamb rukat ra ukadivar, ku rukat ren ra ukadivar rukat. 8 Mulong anch mikadil* yiney yid mu en ni yizulamu, yikukukangeshany kuvung makas ap kulik kusong mabuj piur pa ronganyin rakin ra Nsalejetu Yesu Kristu.

9 Mulong muntu uburedina mikadil yiney ud mputames ujimina mes mend ku chitokish,* ni uvuramedin anch amushitwishin kal ku yitil yend ya pakur. 10 Chawiy akadivar, ipanany chipandakena mulong wa kwikal nich kashinsh ka kutazuk kwakutazukanyau ni kutond kwakutondanyau, mulong anch wadandamenany kusal yom yiney, ukuwanyap ap pakemp. 11 Inge, mwamu akukwinkishany chipandakena mutapu wa kwandam mu Want wa chikupu wa Nsalejetu ni Mupandish wetu Yesu Kristu.

12 Chawiy nikatina chisu chawonsu kukuvurishany yom yiney, ap anch uyijany kal ni wiminyany daang mu uyakin uda mu en. 13 Pakwez nimen anch chitentamin pinichida kal mu mwinkand* winou, kukusosilany nich yivurish, 14 mutapu nija anch mwinkand wam akwindoshau piswimp ap, mud mwangijikishinay kand Nsalejetu Yesu Kristu. 15 Nikudandamen kusal usu wam win wawonsu, chakwel kupwa kwamam kuya, utwishany kuvurik* yom yiney.

16 Bwat, twakwijikishanyap usu ni kwikalaku kwa Nsalejetu Yesu Kristu kusutin kusadin ngany ja kutenchik nawamp nich manang, pakwez mulong twimenap ayinetu uyaj wend. 17 Mulong watambula kudokal kud Nzamb Tatuku uyaj ni katumb pamulejau mazu manam* kusutin uyaj ujim: “Winou ndiy Mwanam, mukatish nam, ukweta dilau dam.” 18 Inge, mazu minam etu twamatesha, mading madokil mwiur pitwading nend pamwing ku mukandu utumbila.

19 Mwamu dizu da uprofet dikadin kal dakin nakash kud etu, ni usadinany nawamp kutaku matu, mud ku lamp umunyikina mwi ndond ya mididim (kushik ni pakusambisha kumekan kucha kwa dichuku ni pakubudikay katumbu wa pamanch)* mu michim yen. 20 Mulong wijany cha kusambish anch, kwikil uprofet wa Mifund udokila ku kurumburil kwa muntu amwinend. 21 Mulong uprofet kand kal auletangap ku rusot ra muntu, pakwez antu alonda yom yadokala kud Nzamb mud mwayibachikau* kud spiritu utumbila.

2 Pakwez, kwikala kand aprofet a makasu pakach pa antu, mud mutapu kukwikala kand alej a makasu pakach pen. Alej inay akwandjik ku ujindj mafundish ma makasu* makushesha ritiy ren, ni akushiken ap kumwitun Nsalejau wayilanda, ni kwikakin pakad kulab disheshik. 2 Chikwau, avud akulondul mwikadil wau uyimp ni wa mukomu,* ni mulong wa awiy, akulond nayimp piur pa njil ya uyakin. 3 Kupwa, akez kakudimbany nich ris kusutin mazu ma makasu. Pakwez dirumburish dayirumburishau kudosh pakur dilabinap, ni disheshik dau dilelap tul.

4 Chakin, Nzamb kalikap kuyipup angel asala chitil, pakwez wayidjubwila mu Tartar,* wayikasidin kal* mu mididim yikurikina, muyilamidinay mulong wa dirumburish. 5 Ni kalikap kupup mangand ma pakur, pakwez wamuchidija Now, mwin kulejan wa kutentam, pamwing nau antu akwau sambwad paletishay mabeb pa mangand ma antu ading akad kumulimish Nzamb. 6 Ni kusutin kwosh shitit musumb wa Sodom ni wa Gomor, wayifisha nich, mwamu wayinkisha antu akad kumulimish Nzamb chilakej cha yom yikweza. 7 Wamupandisha kand Lot wading utentamina, wading unenganena nakash mulong wa mwikadil uyimp ni wa mukomu* wadingau nich antu akad kulimish chijil—⁠ 8 mulong dichuku dawonsu mupim* utentamina wa ikundj winou utentamina wabindang mulong wa yisal yijipina chijil yamanangay ni yateshangay pading pashichay pakach pau. 9 Chawiy, komb Yehova* wij mutapu wa kuyikamunin mu choziu antu alamatina kud ndiy, pakwez kand kuyilam antu akad kutentam mulong wa kuyishesh* pa dichuku da dirumburish, 10 pakampwil akimbina kwijondish mijimbu ya antu akwau ni apipejina ulabu.*

Atakamen, akwet mutu ukash, ni kakatap kwov wom wa kuyilond nayimp in uyaj, 11 pakwez angel, ap anch ad piur mu usu ni mu dikand, kakatap kuyifund awiy kusutin mazu ma masaal, mulong wa kumulimish* Yehova.* 12 Pakwez, mud annam akad kutong, akata kusal yom kusutin manang ma winnam ni avadika mulong wa kuyikwat ni kuyijip, antu inay akat kulond nayimp piur pa yom yakadau kwijik. Akusheshik mulong wa yisal yau yiletishina disheshik, 13 uyimp ukuyishiken mud difut da uyimp wasalau.

Akat kusanger mashakamin ma kwisangaresh, ap mukach ka muten. Ad yidik ni tupad, antu akata kusanger* mafundish mau ma makasu oku akat kusal musambu pamwing niyenen. 14 Mu mes mau mwizwil sens nich makaj ni katwishinap kwaurik ni chitil. Akat kuyoz antu aperokina.* Akwet muchim wafumbinau kal mu ris. Ad an ashinginau kal. 15 Mulong alikin kal njil yitentamina, apumbukin kal, alondwil kal njil ya Balam mwan a Beyor, wakata difut damwinkishau mulong wa kusal uyimp 16 pakwez wapupau mulong wa kurumbuk kwend. Nnam ukata kusendang mafund malimina, wakad kulondang, walonda nich dizu da muntu ni wakangesha chisal cha usup cha muprofet.

17 Antu inay ad misul yakad mem ni mbundu jibachikinau kud rinkind mukash; ayilamidin mididim yikurikina nakash. 18 Akat kulond mazu ma kwibaz ma chamwamu. Kusutin kulangwish maku ma mujimbu ni kwipan mu mwikadil uyimp ni wa mukomu,* akat kuyoz antu adokidinap kuyichin antu ashicha mu kurumbuk. 19 Akat kuyikan want ipau, pakwez ayinau ad asuk a kuyip; mulong anch muntu amupandakan kud mukwau, ud musuk wend.* 20 Chakin kamu, anch kupwa kwa kuchin kwijond kwa mangand mulong wa ronganyin rakin ra Nsalejetu ni Mupandish wetu Yesu Kristu, iyandjik kand mu yom yiney ni yayipandakan, mwikadil wau wa nsuden ukwikal uyimp nakash kusutamu wa kusambish. 21 Chafanyina kwikal chiwamp nakash kud awiy kulik kwijik nawamp njil ya kutentam pa ndond pa kuyijik ni kwomb nyim ku chijidik chitumbila chatambulau. 22 Yom yakin yilondinay jinswir ou yawiy yayishikedina: “Kabu wachirikin kal yirik yend, ni chibond wowishangau wachirik kal kand kwisamp mu malau.”

3 Akatish, winou ud katat mukand wa kaad nikufundidinanya, ni mu mukand winou, mud mu ukwau wa kusambish, nisosidin usu wen wa kutong kusutin chivurish, 2 chakwel uvurikany mazu malondau pakur* kud aprofet atumbila ni mbil ya Mwant ni Mupandish yakulejanau atwimbuy en. 3 Cha kusambish ijikany anch, mu machuku ma nsuden in kusipan akez kez ni masip mau, ni akez kasal yom kukwatijan ni maku mau 4 ni kulond anch: “Kwikalaku kwend kwakanay kud kwisu? Kudosh dichuku dalalau angakiril etu tul mu rufu, yom yawonsu yid kamu kwau mud muyading kudosh kwasambishinau kutang mangand.”

5 Mulong avuramedin kwa kwikatin uyakin unou, anch pakur kwading maur ni divu dikash dakad kwikal mu mem ni dading pakach pa mem kusutin dizu da Nzamb; 6 ni kusutin mitapu yiney mangand ma chisu chinicha amashesha pamandama mu mem. 7 Pakwez kusutin dizu dawiy dimwing maur ni divu ya katat ayilamin mulong wa kasu, ayilamin djat ni pa dichuku da dirumburish ni dikuyisheshau antu akad kumulimish Nzamb.

8 Pakwez kangal wavuramenany chom chinech, akatish, anch dichuku dimwing kud Yehova* did mud mivu kanan (1 000) ni mivu kanan (1 000) yid mud dichuku dimwing. 9 Yehova* kalabinap kuwanyish kushilamu kwend, mud mumenau antu amwing kulab, pakwez ukushimpishidinany muchim mulong kakatinap anch muntu ap umwing asheshik, pakwez ukatin anch awonsu ashiken ku kukarumuk. 10 Pakwez dichuku da Yehova* dikwez mud mwij, ni pa dichuku dinida maur makusut zupu* nich chidjimin chikash, pakwez mulong yom yikuswan nakash, yikwengurik, ni divu ni midimu yidap akuyimekesh patok.

11 Mulong yom yiney yawonsu yifanyidin kwengurik mwamu, tongijokany antu a mutapu ik ufanyidinanya kwikal, antu asadina yom ya mwikadil utumbila ni yisal ya kulamat kud Nzamb, 12 pauchingedinanya ni kudandamen kulam mu manang* kwikalaku kwa dichuku da Yehova,* kusutin dichuku dined maur makusheshik mu mizuzu ya kasu ni yom yikwengurik mu chirungul chikash! 13 Pakwez, kukwatijan ni kushilamu kwend tuchingedin maur masu ni divu disu, mukushakama kutentam.

14 Pa chinech, akatish, mulong uchingedinany yom yiney, salany usu wen win wawonsu chakwel kwinsuden akutanany pakad chidik, pakad kapad ni mu chisambu. 15 Kupwa, manany kushimpish muchim kwa Nsalejetu mud dipandish, mud mwakufundinanyay kand mukadivar netu mukatish Paul kukwatijan ni manang mamwinkishau, 16 mulong ulondin piur pa yom yiney mu mikand yend yawonsu. Pakwez, mud yom yikasikena kutesh, yikatau kuchukul antu akad ronganyin* ni aperokina, mud mukatau kand kusal piur pa Mifund yikwau, mulong wa disheshik dau ayinau.

17 Pa chinech, akatish, mulong en wasambedinany kal kwijik chom chinech, babalany chakwel kangal akupumbulany nau pamwing ku kurumbuk kwa antu akata kubwambwil chijil ni chakwel kangal wakanganyany kwiman daang. 18 Pakwez dandamenany kupam mu ranaken rijim ni mu ronganyin ra Nsalejetu ni Mupandish wetu Yesu Kristu. Atumba kwend ndiy katat djat ni chikupu. Amen.